Read idege 2 EGO OGBEGBE 9 Bible Online

2 EGO OGBEGBE 9 - idege bible

2 EGO OGBEGBE 9

¹Ụka ká adịrahụ ọnyang nya ala ịChẹba wo ohi oruru nya iSolomọn, ọ hu ang kele ka iJerusalẹm kọ ka mọọ yẹ la ịtọ ọtọtọ ịlẹ kị lujwo lụmẹ lẹlẹ. Ọ kpa anchẹ lụmẹ-lụmẹ dịrẹ ịlọmwụ bala iru nya anyịrẹ-ịkamẹlụ ịlẹ kị kpa olo nya etiji ichoru kwọkwọ bala ajwọ ịnyịịla-ịnyịịla bala iru nya okpoko ịgọm. Ụka ká ọnyang ọwẹ pwụ eji wẹ ẹga nya iSolomọn, ọ tọ iSolomọn ịtọ ịlẹ wuu kị ji ẹpwụ nyamwụ.

²ISolomọn wẹ ịtọ ịịwa wuu pịlẹtẹ. Ọhẹ-lọhẹ nyaa-á chọọ ọha lọwẹwẹ ka.

³Adịrahụ ọnyang nya ala ịChẹba ọwẹ yẹ jaabwọ ka ẹla ọjẹjẹ nya iSolomọn la kpori-kpori lụmẹ bala jaabwọ ká ẹpwang ọlẹ kọ nwụ la.

⁴Ọ yẹ ang oriri nya aleju ọlẹ kọ kaa ri. Ọ yẹ alegbeju ịtụkụ yoo jaabwọ kị hụ memeeme bala ang ịkụrụ-kụrụ nyaa bala anchẹ ịlẹ wuu kị juwa myị ẹrụ họọ lụka nya ang oriri bala iya ịlẹ wuu kọọ kịla u-Ube nya Amkpaa. Ụka kọ yọyị nya ẹlẹwẹ wuu, ọ wu ichinji godayị rụwa lọnụ hyoo pyee.

⁵Ọọwa, ọ byi iSolomọn Adịrahụ yẹkẹẹ, “Oja ọlẹ kam wo pwụ ọpyị nyam chajị nya ụkụrwọ ịlẹ wuu ká họ bala ẹla ọjẹjẹ nyang lẹ, ọ ri ẹla nya ịlẹhị.

⁶Ḿ tị hu oja ọọwa nya ẹla nya ịlẹhị ka gbee kam kpẹhị nya ịlọm yẹ lẹẹ ene. Oja nyang ọlẹ kam wo-ó pwụ ẹhya nya ọyị ọlẹ kam yẹ-ẹ̀ wẹ ka. Ẹla ọjẹjẹ nyang wuu kpoye nya oja ọlẹ kị jam.

⁷Ụrụrụ nya angịnyị à tị̀tị̀ há lẹ! Ịnya alụkụrwọ bala anchẹ nyang ịlẹ há lẹ, chajị ị jẹ la iwe nyọka wẹ ijata nyang ẹnụ myị ẹnụ bala ọ-ka wo ẹla ịlẹ kaa ya bwula ẹla ọjẹjẹ nyang wuu!

⁸Ogbo a ri nya Amkpaa Ohe Oluhye nyang ọlẹ ká ẹla nyang kpọọ ugbodu nyii kọ hung ri adịrahụ ha ịlọmwụ! Ajị nyọlẹ ká ọháha nya Amkpaa ẹ-ẹga nya ala Isirẹlụ juwa pyịyọọ à du kọ hung ri adịrahụ nyaa ká ka kpẹhị rịrị ẹ-ẹpwụ nya ang ọnyịịla ọhọhọ bala ọkpẹẹkpẹẹ ọlala lẹ.”

⁹Ọọwa, adịrahụ ọnyang nya ala ịChẹba ọọwa a ya ang-ahị ga iSolomọn lẹlẹ. Ang ịlẹ kọ ya họọ ri okpoko ịgọm ọlẹ kọ lụmẹ gụ okolo ụnọ ine (4,000) bala iru nya etiji ichoru kwọkwọ bala ajwọ ịnyịịla-ịnyịịla. Ụka ọhẹ-lọhẹ á juwa ka ọngọngọhẹ kpa etiji ichoru kwọkwọ ịlẹ kị há nya ịlẹhị-ịlẹhị wẹ iSolomọn lala ịnya adịrahụ ọnyang ọwẹ kaka. (

¹⁰Ụka ká alụkụrwọ nya agbọ nya enyi nya iHiram-ḿ kpa okpoko ịgọm warị bwu Ọfii, ị kaa kpa ekeji nya ijunipa bala ajwọ ịnyịịla-ịnyịịla nyà ịnyịnyị.

¹¹ISolomọn Adịrahụ kaa kpa ekeji ịịwa chị apatẹ i-wule ka Ube nya Amkpaa bala ẹ-ẹpwa nya adịrahụ. Ọọ kpaa họ ogum̀ bala ẹnwụ ịlẹ ká angị mwu eje ka kpa du. Ọngọngọhẹ-ẹ́ yẹ ang idudu ịnyịịla ịlịnyị ẹnẹhẹ ene nya ụka ọwẹ ọ-ọpyị nya iJuda lẹka.)

¹²ISolomọn Adịrahụ ya ang myị ang ịlẹ ká adịrahụ ọnyang nya ala ịChẹba bịlẹ họọ. Ang-ahị ịịwa dọmwụ lụmẹ gụ ịlẹ ká adịrahụ ọnyang ọwẹ kpa kaka ga họọ. Ụka ọọwa lẹ, ọ yegiri rụ ka ọpyị nya ịChẹba nyaa bala anchẹ ịlẹ kọ kpa dịrẹ ịlọmwụ lẹlẹ.

¹³Ẹka myị ẹka wuu iSolomọn kaa ye okpoko ịgọm ohu ịrwọnyẹ da iwo ịrwọnyẹ kụrụ ịrwọnyẹ (666).

¹⁴Ịwẹ datị hi ẹpwa ọnyẹnyẹ ịlẹ kọọ ye bwu ẹga nya alọhị ịtụka bala ichiche. Ịdịrịhụ nya ala Arebyiya bala ịgọvụnọ nya ala Isirẹlụ kaa ya okpoko ịgọm bala okpoko onyoowuru họọ ịnyịnyị.

¹⁵ISolomọn Adịrahụ họ akụmada nya okpoko ịgọm ohe imiiye (200) i-ju ẹpwụ pọpịla. Ilo ọlala nya ọnyọnyọọnyị nyaa gụ okolo ohu ịta (300).

¹⁶Ọ họ akụmada ichiche ohu ịta (300) lokpoko ịgọm ọlẹ kị hyahya. Ọ kpa okpoko ịgọm lala okolo imiiye họ ọnyọnyọọnyị. Ọọwa, adịrahụ a ya ị go akụmada iwẹ guru ẹ-Ẹpwang nya Ipyinu nya iLibanọn lẹlẹ.

¹⁷Adịrahụ họ ẹchị ọtụka-ọtụka lẹngịrị nya inyi. Ị kpụ okpoko ịgọm ọlahịchng kụrwọọ u-uhye.

¹⁸Ị chị apatẹ ịrwọnyẹ kele ka uhye nya ẹchị ọwẹ. Ị họ ẹga ọ-ya ẹta rịrị jwoo bala ẹga ị-yụbwọ nọ oyiye-oyiye nyamwụ. Ị me ugẹbẹ godayị ịkịka nya oyiye-oyiye nyamwụ.

¹⁹Ị họ egabẹ iwo kụrụ imiiye godayị rịrị apatẹ ịrwọnyẹ ịwẹ, ookpokpo godayị rịrị e-egbeju ọbaba ọnyọnyọọnyị nya apatẹ ịrwọnyẹ ịwẹ. Ẹpwụma ọhẹ-lọhẹ-ẹ́ họ ẹchị-adịrahụ o-me ọwẹ ẹnẹnẹhẹ lẹka.

²⁰Ekeku ị-kpa nwa ere nya iSolomọn wuu tụ ang-abwọ ịlẹ kị ji Ẹpwang nya Ipyinu nya iLibanọn wuu ri ịlẹ kị kpa okpoko ịgọm họ. Ị́ họ ọhẹ-lọhẹ nyaa lokpoko onyoowuru ka, chajị ị́ hwoo nya ang o-ju apyobwuna loyi nya iSolomọn ka.

²¹ISolomọn Adịrahụ la iru nya agbọ nya enyi ịtụka ị-kpa da ọhị ịlẹ kịị bajẹ ta agbọ nya enyi nya iHiram Adịrahụ. Ụka ookpokpo ẹ-ẹpwụ nya ẹka ịta ọnyị myị ọnyị, agbọ nyamwụ kaa nyà lolo nya okpoko ịgọm bala okpoko onyoowuru bala angịrị nya inyi bala ahyọ bala ije.

²²Adịrahụ iSolomọn kpụ ụdụ bala ọ-jẹ ẹla gụ ịdịrịhụ ịkịla ilodehe ọlẹ wuu.

²³Ịdịrịhụ ịkịla ilodehe kaa wẹ ẹga nyamwụ kaka wo ẹla ọjẹjẹ ọlẹ ká Ohe Oluhye ya họọ.

²⁴Ẹka myị ẹka wuu, ọngọngọọng nya angịlẹ kịị wẹ ẹga nyamwụ kaa kpa ang-ahị wọọ. Ang-ahị ịịwa ri ang ịlẹ kị họ lokpoko onyoowuru bala okpoko ịgọm bala ịwụrụ bala ang-abwọ nya ẹwụ bala etiji ichoru kwọkwọ bala anyịrẹ ịlam bala anyịrẹ ịlahịchịng nya adịrahụ.

²⁵ISolomọn la ẹga ị-ya anyịrẹ bala angị ịrụnyẹ nyamwụ rịrị ụnọ ine (4,000). Ọ la anyịrẹ ụnọ iwo kụrụ imiiye. Ọ ya ịhyẹ nyaa kụ i-iJerusalẹm, ọ ya ịkịla kụ e-epweji datị-datị.

²⁶ISolomọn à ri adịrahụ ọtụka ọgụgụ ọlẹ kọ kpa ẹpwụma ịkịla tụ ịdịrịhụ nyaa ẹ-ẹpwụtụbwọ bwu Ihu nya iYufuretisi ẹ-ẹtẹ nya ọpyị nyamwụ gbee ka pwụ ọpyị nya ala iFilisitiya e-edii lalaala ka pwụ oyi nya ọpyị nya Ijipiti lẹ.

²⁷Lụka nya adịrahụ oriri nyamwụ, okpoko onyoowuru dịda i-iJerusalẹm lala egbanjwọ. Ekeji nya isida dịda lala ikiledu ịlọka nya ikiti ịla iJuda.

²⁸ISolomọn kaa ra anyịrẹ bwu Ijipiti bala ịpyị ịkịla.

²⁹Ang ịkịla ịlẹ wuu kị họ lụka nya adịrahụ oriri nya iSolomọn bwu ọmwụ ọdada gbee pwụ ocheju lẹ, ị daa ju ụ-ụpwụ nya Ego nya ịNatan ọlọmwụ bala Ọmwụ Ọyẹyẹ nya Ahija ọla iChilo bala Ọyị Ọyẹyẹ nya Ido ọlọmwụ ọlẹ kọ ya ẹla rụ iJerobowam ọnyị nya iNebatị.

³⁰ISolomọn hụ i-iJerusalẹm ri adịrahụ nya ala Isirẹlụ wuu jịra ẹẹka iwo ine gbẹgbịlẹ.

³¹Ụka ká iSolomọn gbu, ị jwoo eji e-Epweji nya iDevidi adamwụ. Ọọwa, iRehobowam ọnyị nyamwụ à ri adịrahụ kwiwa nyamwụ lẹlẹ.