Read idege ẸSỊRA 1 Bible Online

ẸSỊRA 1 - idege bible

ẸSỊRA 1

¹Ẹ-ẹpwụ nya ẹka nya ọgbanyẹ-ọgbanyẹ ọlẹ ká ịSayịrọsị ọla iPechiya ri adịrahụ, ẹla ọlẹ ká Amkpaa ya bwula iJeremaya a họ jịra lẹ. Amkpaa họ ká adịrahụ ịSayịrọsị da ehile ọhẹ ọlẹ kị kpa da ọna tụ ọpyị nyamwụ wuu da ya je angịnyị. Ị da ehile ọọwa ụ-ụpwụ ịnyịnyị yẹkẹẹ,

²“Am ịSayịrọsị Adịrahụ nya ala iPechiya a da ehile ọlẹ lẹ. Amkpaa Ohe Oluhye nya epwoohe hum ri Adịrahụ nya alọpyị ọnyị myị ọnyị wuu odehe ọlẹ. Ọ byim am nyị nwụ ube ịgọgọ họọ i-iJerusalẹm ọ-ọpyị nya iJuda.

³Ohe Oluhye a juwa tanụ anụ angị ri angịnyị nyamwụ mẹ. M̀ ya iwe da hanụ kanụ ka rụ tịrẹkpẹ kele ka iJerusalẹm lẹ. Anụ ka kele kanụ ka ma Ube nya Amkpaa Ohe Oluhye nya ala Isirẹlụ ọlẹ kịị gbịgba ha i-iJerusalẹm nwụ onyeewe.

⁴Angị ihihi ịkịla wuu ā da angịlẹ kị wẹẹ ka rụ ụbwọ bwula ọ-ya okpoko onyoowuru bala okpoko ịgọm bala ang-abwọ ịkịla tụ iyo ịlẹpwa ọ-ya haa bala ang-ahị ịlẹ kị ka hu ha chajị nya ube ịgọgọ ọla iJerusalẹm mẹ.”

⁵Ọọwa lẹ, iru nya angịnyị lụmẹ-lụmẹ ịlẹ ká Ohe Oluhye yụbwọ gu ọ-ọkịlẹtụ a nwụlanọ kị ka rụ ka iJerusalẹm kaka nwụ Ube nya Amkpaa lẹlẹ. Angịhyẹ ẹ-ẹpwụ nya angịịwa ri alegbeju nya imwawụ nya iJuda bala iBenjamịn bala angịkịla iya bala ala iLivayị.

⁶Aanaa ịkịla wuu daa ụbwọ bwula ọ-ya ang-abwọ datị-datị haa. Ang ịlẹ kị ya haa ri ịlẹ kị kpa okpoko onyoowuru bala okpoko ịgọm họ bala ang-abwọ ịkịla bala iyo ịlẹpwa bala ang-ahị ịlahịchịng bala ọhaha ịlẹ kị ha bwu ọkịlẹtụ nya ịlaa.

⁷Adịrahụ ịSayịrọsị ayịdang tịrị ịja ị-kpa ju ang ịlẹ ká adịrahụ iNebukadinesa go bwu Ube nya Amkpaa ụ-ụwa i-iJerusalẹm kpa ka guru u-ube nya ohe ojiga nyamwụ ẹkpẹ ha ala Isirẹlụ.

⁸Adịrahụ ịSayịrọsị chụ iMitirẹdatị olegbeju ọkpẹhị rịrị okpoko nyọka ya ija ịịwa haa tịrẹkpẹ. Ịnyị, iMitirẹdatị a gbaa kpehe lẹ, ọ waa wuu ju ịChẹchịbasa olegbeju nya ala iJuda ụ-ụbwọ lẹlẹ.

⁹Iru ojuju nyaa a lẹẹ lẹ: ịja ịtụka ịlẹ kị kpa okpoko ịgọm họ nya ọ-kpa ye ọhaha la iwo ịta. Ịja ịtụka nya okpoko ọnyoowuru la ụnọ ookpokpo (1,000). Ụma nya ang ị-kpa ju ang ịkịla la iwo imiiye da ihikichu.

¹⁰Ịja ichiche nya okpoko ịgọm la iwo ịta. Ịja ichiche nya okpoko onyoowuru la ohu ine da iwo (410). Ịja ịkịla la ụnọ ookpokpo.

¹¹Ọ-tụ julawụlẹ nya ịja nya okpoko ịgọm bala okpoko onyoowuru tụ ang-abwọ ịkịla wuu la ụnọ ịrụ da ohu ine (5400). ỊChẹchịbasa kpa ang ịwẹ wuu ba ịlọmwụ ụka kọọwa bala angịkịla rụ tịrẹkpẹ ka iJerusalẹm bwu ẹpwụ nya ọnyọhị oriri ị-ịBabịlọn.