Read idege ẸSỊRA 10 Bible Online

ẸSỊRA 10 - idege bible

ẸSỊRA 10

¹Ụka ká Ẹsịra hị nọnọ ị-ịlahị nya ube ịgọgọ nya Ohe Oluhye juwa raabwọ lida-lida ya ịhọbịrị ịwẹ dodehe, iru nya anyang bala alẹng bala anjwo ichiche nya ala Isirẹlụ tụ gbiriri ka dagaga jwoo. Ịwa wuu jida gbokiri.

²Ọọwa, iChekaniya ọnyị nya iJehiyẹlụ ọlẹ kọ bwu ogang nya Elam a byi Ẹsịra yẹkẹẹ, “O ri ịnyịlẹhị, áhị họ kpẹẹkpẹẹ ẹ-ẹga nya Ohe Oluhye nyahị ka. Chajị ahị ye ịhụ bwu ija ịkịla ịlẹ kị kụ dagaga juhi. Ọ tị la ịịwẹ la lẹ, ẹhị ọrịrịị-rịrị ji ha ala Isirẹlụ wẹẹ.

³Lẹẹlẹ, ahị ka myị ọnụ ha Ohe Oluhye nyahị lẹ. Ahị ka ku ịhụ i-bwu ija ịkịla ịwẹ wuu rụ lanyị-lanyị nyaa lẹ. Ang myị ang kaahụ bala angị ju ihi nya ehile nya Ohe Oluhye nyahị a mẹjẹẹhị āhị ka họ lẹlẹ. Ahị ka họ jaabwọ ká ehile nya Ohe Oluhye ya.

⁴Lẹẹlẹ, Ẹsịra, wuleji ká họ ịnyị mẹ. Ahụ a pwoku ẹlẹwẹ lẹ. Ahị ji ẹkpẹ nyang lẹ. Ju ugbodu ká họ ẹlẹwẹ mẹ.”

⁵Ọọwa, Ẹsịra a wuleji lẹ, ọ họ ká alegbeju ikịla iya bala alegbeju nya ala iLivayị bala alegbeju nya ala Isirẹlụ wuu nwa iro lẹlẹ. Ị nwa iro nyọka họ jaabwọ kị iChekaniya ya.

⁶Ọọwa lẹ, Ẹsịra a rụ bwu ịlahị nya ube ịgọgọ kele ka ẹpwụ nya ube ọlẹ ká iJehohanan ọnyị nya Eliyachibu kụ kaka hyehe ụ-ụwa lẹlẹ. Ụka kọ juwa ụ-ụwa, ọ́ kpa ang oriri lee enyi ọnwanwa ka ọnụ nyamwụ ka chajị ọ juwa bida ọọ-la ọhọbịrị nya angịlẹ kị nya bwu ẹpwụ nya ọnyọhị oriri.

⁷Ị du ẹrụ ka ẹga myị ẹga nya iJerusalẹm bala iJuda kaka ya je angịlẹ kị nyà bwu ẹpwụ nya ọnyọhị oriri wuu kị ka wẹ kaka jịra i-iJerusalẹm.

⁸Alegbeju bala ịgabwọ ya ịnyịnyị ẹ-ẹpwụ nya ẹrụ ọlẹ kị du ya ọng myị ọng kịị nyị wẹ ene ká ẹnụtụrụ ọhata nyị ka kam kpá ka aalẹ, ịwa nyị ka nu ọngọọwa ang myị ang ịlẹ kọ la. Ọngọọwa nyị́ tị ka ri alẹpwụ nya ala Isirẹlụ kaka ịnyịnyị.

⁹Ọọwa lẹ, ala iJuda bala ala iBenjamịn wuu a wẹ kaka jịra i-iJerusalẹm ene ká ẹnụtụrụ ịta ịịwa cheju lẹlẹ. Ẹnụtụrụ iwo imiiye nya ọya ohikichu ị wẹ kaka jịra lẹ. Ịwa wuu hụ ọdọda ọlịlahị nya ube ịgọgọ nya Ohe Oluhye. Enyi ọtụka-ọtụka juwa do ụka ọọwa. Ọng myị ọng nyaa juwa hụ́ kpákpaakpa ọọ-la ohu ọhọhọ bala ẹla ọnyọọngịrị ọlẹ kị wẹẹ ka ya ọ-ọjịra jịra ọwẹ.

¹⁰Ọọwa lẹ, Ẹsịra ọngọkiliya a godayị kọkọ lẹ, ọ ya ẹla taa yẹkẹẹ, “Anụ họ ang onyobyi bwula ọlẹ kanụ ye ịhụ bwu ija ịkịla lẹ. Ọhọhọ nyanụ ọọwa du ká ịhọbịrị nya ala Isirẹlụ ju iru gụ olene lẹ.

¹¹Ee lẹ, anụ ya ịhọbịrị nyanụ je Amkpaa Ohe Oluhye nya adanụ igogo lẹẹlẹẹ, kanụ họ ẹla ọlẹ kọ ri irya nyamwụ mẹ. Anụ chị ịlọnụ ịgọ hi alija ịkịla ịlẹ kị kụ ọpyị ọlẹ, kanụ chị ebwo hi ịhụ nyanụ i-bwu ija ịkịla ịwẹ ịnyịnyị mẹ.”

¹²Ọọwa lẹ, aluche wuu a wẹ lomyi ogboo yẹkẹẹ, “A ya hiigu, ahị ka họ jaabwọ ká ya.

¹³Tị yẹ mẹ, ahị ju iru lụmẹ. Enyi tị wẹẹ do lẹ, áhị ka jẹ-ẹ godayị ọdọda ịịlẹ ka. Ẹla ọlẹ-ẹ́ tị ri ẹla kahị ka jụ cheju myị ẹnụ alẹ-alẹ lee ẹpwụ nya ẹnụtụrụ imiiye ka, chajị ẹlẹwẹ da ebe chị iru nyahị lụmẹ-lụmẹ.

¹⁴Lẹẹlẹ, alegbeju nyahị a hi am i-iJerusalẹm ku ọmwakpa nya aluche wuu mẹ. Ọọwa lẹ, ká ọng myị ọng ọlẹ kọ ye ahụ bwu oja ọkịla bala alegbeju nya epweji ọnyị myị ọnyị wuu a kpehe warị lụka ọlẹ kị ka hunọ mẹ. Ó-ri kahị kpa ụgbẹyị ọlịịwẹ chị ẹlẹwẹ eju lẹ, Ohe Oluhye-é ka wụ ẹjẹ tahị kaka.”

¹⁵IJonatan ọnyị nya Asahẹlụ bala iJaseya ọnyị nya iTikiva ụbwaa a pwa irya ọwẹ lẹlẹ. IMechulam bala iChabetayị ọlẹ kọ ri ọla iLivayị anyị tị myị jwaa ịnyịnyị.

¹⁶Ala Isirẹlụ ihihi ịlẹ kị nyà bwu ẹpwụ nya ọnyọhị oriri wuu myị ju irya ọlẹ kị gba kpehe. Ọọwa, Ẹsịra a chụ alẹng ịlẹ kị ri alegbeju nya ogang ọnyọnyọọnyị da ẹnyị nyaa ju wuu lẹlẹ. Ị dọmwụ nya ẹla ọdịrẹ-dịrẹ ẹnụtụrụ ọhọhẹ nya ọya okiriwo.

¹⁷Ị dịrẹ ẹlẹwẹ gbee da ka ẹnụtụrụ ọhọhẹ nya ọya ọhọhẹ nya ẹka ọkịla ene kịị chị ẹla nya angị ye ịhụ bwu ija ịkịla wuu eju gbanggbang.

¹⁸Angị bwu ogang nya angịkiliya ịlẹ kị ye ịhụ bwu ija ịkịla ri ịMaaseya bala Eliyesa bala ịJaribu bala iGedaliya. Angịwẹ wuu bwu ogang nya iJechuwa ọnyị nya iJosadakị bala anyịnamwụ alẹng.

¹⁹Ị myị ọnụ kị ka ku ịhụ nyaa. Ị wu omilodo kịla iya chajị nya ịhọbịrị nya ịlaa.

²⁰Angị bwu ogang nya Ima ri ịHanani bala iSebadiya.

²¹Angị bwu ogang nya ịHarim ri ịMaaseya bala Ịlayịja bala iChemaya bala iJehiyẹlụ bala Usiya.

²²Angị bwu ogang nya iPasuu ri Eliyo-enayị bala ịMaaseya bala Ichimẹlụ bala ịNatanẹlụ bala iJosabadị bala Elasa.

²³Ala iLivayị ịlẹ kị ye ịhụ bwu ija ịkịla ri iJosabadị bala iChimeyị bala iKelaya ọlẹ ká ẹnyị ọkịla nyamwụ ri iKelita. Angịkịla nyaa ri iPetahiya bala iJuda bala Eliyesa.

²⁴Eliyachibu kem à ri ọngọ du ayịlọ olube ịgọgọ ọlẹ kọ ye ahụ bwu oja ọkịla lẹ. Ẹnyị nya angịgbeji ilube ịgọgọ ịlẹ kị ye ịhụ bwu ija ịkịla ri ịChalum bala ịTẹlẹm bala Uri.

²⁵Ẹnyị nya ala Isirẹlụ ihihi ịkịla ịlẹ kị ye ịhụ bwu ija ịkịla a lẹẹ lẹ. Angị bwu ogang nya iParochi ri ịRamiya bala Isiya bala ịMalikija bala iMijamin bala Eliyesa bala iMalikija bala iBenaya.

²⁶Angị bwu ogang nya Elam ri ịMataniya bala iSekarịya bala iJehiyẹlụ bala Abidi bala iJeremotu bala Ilayịja.

²⁷Angị bwu ogang nya iSatu ri Eliyo-enayị bala Eliyachibu bala ịMataniya bala iJeremotu bala ịSabadị bala Asisa.

²⁸Angị bwu ogang nya iBebayị ri iJehohanan bala ịHananiya bala ịSabayị bala Atilayị.

²⁹Angị bwu ogang nya ịBani ri iMechulam bala ịMaluku bala Adaya bala ịJachubu bala iChiili bala iJeremotu.

³⁰Angị bwu ogang nya ịPahatị-imowabụ ri Adịna bala iKelalụ bala iBenaya bala ịMaaseya bala ịMataniya bala iBesalẹlụ bala ibyinuwi bala ịManasẹ.

³¹Angị bwu ogang nya ịHarim ri Eliyesa bala Ichija bala ịMalikija bala iChemaya bala iChimyọn

³²bala iBenjamịn bala ịMaluku bala iChemarịya.

³³Angị bwu ogang nya iHachum ri iMatenayị bala ịMatata bala iSabadị bala Elifẹlẹtị bala iJeremayị bala ịManasẹ bala iChimeyi.

³⁴Angị bwu ogang nya ịBani ri iMaadayị bala Amram bala iYuwẹlụ

³⁵bala ịBenaya bala iBedeya bala iKeluhi

³⁶bala iVaniya bala iMeremotu bala Eliyachibu,

³⁷bala ịMataniya bala iMatenayị bala ịJaasu.

³⁸Angị bwu ogang nya iBinuwi ri iChimeyi

³⁹bala iChelemaya bala ịNatan bala Adaya

⁴⁰bala iMakinadebayị bala ịChachayị bala iCharayị

⁴¹bala Asarẹlụ bala iChelemaya bala iChemariya

⁴²bala ịChalum bala Amariya bala iJosẹfụ.

⁴³Angị bwu ogang nya iNebo ri iJeyẹlụ bala ịMatitiya bala ịSabadị bala iSebina bala ịJadayị bala iJuwẹlụ bala iBenaya.

⁴⁴Alẹng ịwẹ wuu ye ịhụ bwu ija ịkịla. Ị tị ku ịhụ ịịwa lanyị-lanyị nyaa wuu rụ.