Read idege ẸSỊRA 3 Bible Online

ẸSỊRA 3 - idege bible

ẸSỊRA 3

¹Ụka ká ọya ọharwiye nya ẹka ọọwa pwụ eji, ká ọng myị ọng nya ala Isirẹlụ wuu kụ epweji nya ịlọmwụ-ịlọmwụ lẹ, ị kele kaka tụguru ẹ-ẹga ookpokpo i-iJerusalẹm lẹlẹ.

²Ụka ọọwa, iJechuwa ọngọkiliya ọnyị nya iJosadakị bala angịkiliya aanamwụ bala iSerubabẹlụ ọnyị nya iCheyalutiyẹlụ bala alogang nyamwụ anyị dọmwụ nyọka ma ogidi nya Ohe Oluhye nya ala Isirẹlụ me chajị kị ka kịla iya u-uhye nyamwụ jaabwọ kị da nọ ụ-ụpwụ nya ehile nya iMosisi ọngịnyị nya Ohe Oluhye.

³Ịnọ, ị ju uhi nya alepwoja ịkịla ịlẹ kị kụ dagaga jwaa, ị tị me ogidi rịrị ẹ-ẹga kọ ji ene-ene. Ọọwa lẹ, ị dọmwụ nyọka kịla iya nya ụtụrụ bala ịnya obyi u-uhye nyamwụ ha Amkpaa myịmyị lẹlẹ.

⁴Ụka ọọwa, ị la Ọhụhụ nya Adáa jaabwọ ká ehile nya ọhọhọ nyamwụ la. Ị kịla iya ẹnụtụrụ ọnyọnyọọnyị jaabwọ kọ chịla kị ka kịla iya ẹnụ ọọwa.

⁵Ọ́ ba i-iya nya ẹnụ myị ẹnụ ịwẹ ka, ị kịla iya nya Ọya Onyeewe bala iya nya ang oriri ọ-kpa kpịtịya nya ụka datị-datị ịlẹ ká Amkpaa hunọ. Ị kịla iya wọnụ nya ọng myị ọng ọlẹ kọ wẹ nyọka kịla iya nya ịlọmwụ ha Amkpaa ju ịnyịnyị.

⁶Ị́ dọmwụ nyọka nwụ ube ịgọgọ ụka ọwẹ lẹka, ma ị dọmwụ nyọka kịla iya ha Amkpaa bwu ẹnụtụrụ ọhọhẹ nya ọya ọharwiye nya ẹka ọọwa.

⁷Ị nwụ angị be ajwọ bala ikebenta uri lokpoko. Ị ya ang oriri bala ere bala ida du kaka nwụ ala ịSayịdọn bala ala ịTaya uri nyọka kpa ekeji nya ịsẹda tụ Ihu da bwu iLibanọn wẹ ịJọpa. ỊSayịrọsị Adịrahụ nya ala iPechiya a myị ọnụ nya ụkụrwọ ọwẹ ọhọhọ haa lẹ.

⁸Ẹ-ẹpwụ nya ọya oheeye nya ẹka oheeye nya ọnyanya nyaa ị dọmwụ nya ụkụrwọ nya ube ịgọgọ ọnwụnwụ lẹ. ISerubabẹlụ ọnyị nya iChiyalutiyẹlụ bala iJechuwa ọngọkiliya bala angịkiliya aanaa bala ala iLivayị tụ angịkịla ịlẹ kị nya bwu ẹpwụ nya ọnyọhị oriri wẹ iJerusalẹm wuu a dọmwụ nya ụkụrwọ ọwẹ ọhọhọ lẹ. Ị go ala iLivayị ịlẹ wuu kị gu ẹka iwo imiiye kele ka uhye ri alegbeju ịkpẹhị rịrị ụkụrwọ nya ube ịgọgọ ọnwụnwụ.

⁹Ụka ọọwa, iJechuwa bala anyị alẹng nyamwụ tụ aanamwụ bala ịKadimiyẹlụ bala anyị alẹng nyamwụ ịwa anyị ịtụma nya iHovadiya anyị wuu yẹ julawụlẹ kpẹhị rịrị alụkụrwọ nya ube ịgọgọ ọnwụnwụ. Ala iLivayị ịkịla ịlẹ kị ri alogang nya ịHẹnadadị daa ubwọ.

¹⁰Ụka ọọwa, alụkụrwọ dọmwụ nya itiwe nya ube ịgọgọ. Ọọwa lẹ, angịkiliya a go ịwụrụ nyaa kụrụ kele ka godayị la ipyike nyaa a-abwọ lẹ, ala iLivayị anyị nya Asafụ a go ija ị-kpa du ang nyaa lẹlẹ. Ọọwa lẹ, ịwa wuu a godayị nyọka gwogbo ha Amkpaa jaabwọ ká Adịrahụ iDevidi ya neeji bwu ụka-ụka nyamwụ lẹlẹ.

¹¹Ịwa wuu mwu eje nya ogbo ogwogwo bala obe ojiji ha Amkpaa hi ọnụ ha awụlẹ yẹkẹẹ: “Amkpaa hiigu lụmẹ; ọháha ọlala nyamwụ ẹ-ẹga nya ala Isirẹlụ juwa gbe oyi myị oyi.” Ụka ọọwa, angịnyị wuu gwogbo ha Amkpaa ịnyịnyị la iwuru ọdada chajị ị dọmwụ nya itiwe nya ube ịgọgọ nyamwụ lẹ.

¹²Ma, angịlẹ kị ri angịgbahị ẹ-ẹpwụ nya angịkiliya bala ala iLivayị bala alegbeju nya ogang datị-datị ịlẹ kị kpịtịya nya ube ịgọgọ ọlẹnẹ be ẹkọ jida ngịrọrọọrọ ụka kị yẹ ọmwụ ọdada nya ube ịgọgọ onyeewe ọọwa. Angịkịla ịlụwa wuu da iwuru nya ọkẹkẹnị ọchịchị.

¹³Angịnyị-ị́ jẹ omyi nya iwuru ọdada datị hi omyi nya ida ojeje kaka, chajị ọmọnyọ ọọwa la gboo gbee kị wo pwụ ẹga ọlụrụ-lụrụ.