Read idege ẸSỊRA 4 Bible Online

ẸSỊRA 4 - idege bible

ẸSỊRA 4

¹Ụka ọọwa, aluji nya ala iJuda bala ala iBenjamịn wo oja ya angịlẹ kịị nyị nya bwu ẹpwụ nya ọnyọhị oriri nyị juwa nwụ Ube nya Amkpaa Ohe Oluhye nya ala Isirẹlụ me lẹ.

²Ịnyị, ị hu ang kele ka tọ iSerubabẹlụ bala alegbeju nya ogang lẹ, ị byaa yẹkẹẹ, “Ahị tịtọ kahị ka danụ ụbwọ lụkụrwọ nyanụ. Ohe Oluhye ọlẹ kanụ-ụ̀ gbịgba ha āhị kaa gbịgba ha ịnyịnyị lẹ. Bwu ụka-ụka nya Ẹsaahadọn Adịrahụ nya ala Asiriya ọlẹ kọ kpahị warị ka kụ ẹgẹlẹ lẹ, ahị kaa kịla iya ha Ohe Oluhye ọọwa ịnyịnyị.”

³Ọọwa lẹ, iSerubabẹlụ bala iJechuwa bala alegbeju nya ogang anyị wuu a wẹ byaa yẹkẹẹ, “Eheehe. Ánụ ka dahị ụbwọ ẹ-ẹpwụ nya ụkụrwọ nya Ube nya Amkpaa Ohe Oluhye nyahị omeme ka. Ahị ka moo ụbwọọhị jaabwọ ká ịSayịrọsị adịrahụ ọtụka nya iPechiya dahị ehile ahị nyị họ.”

⁴Ọọwa, angịlẹ kị kụ ẹgẹwẹ ene-ene a kpụ ala iJuu ọkịlẹtụ enyi bala ọ-chị uhi jwaa du kị hịnyọ la ube omeme kịlahị lẹlẹ.

⁵Ị ya okpoko chị alụkụrwọ nya ịgọmenti nya ala iPechiya ikiri ju kị ka daa ụkụrwọ nya ube omeme yi. Ị họ ẹlẹwẹ bwu ụka nya adịrahụ oriri nya ịSayịrọsị gbee da ka ụka ká ịDarịyọsị ri adịrahụ.

⁶Lụka nya ọmwụ ọdada nya adịrahụ oriri nya ịSẹkịsisi, aluji ịịwa da ụpwụ ba ala iJuda bala ala iJerusalẹm.

⁷Ọ́ ba ọọwẹ ka, iBichilam bala iMitiredatị bala iTabiili bala aliko nyaa da ileta du tọ Atasẹkịsisi adịrahụ ọtụka nya ala iPechiya lụka nya adịrahụ oriri nyamwụ. Ị da ileta ọọwa la oja nya Arameyiki[2] ene kịị yọọ da.

⁸IRehum ọlẹ kọ ri olegbeju nya alụwa bala iChimchayị akịraa nya alọpyị ọwẹ da ileta ịnyịnyị du tọ adịrahụ Atasẹkịsisi chajị nya ala iJerusalẹm. Ị da ileta ọọwa ịịlẹ:

⁹“Ileta ọlẹ bwu ẹga nya iRehum olegbeju bala iChimchayị akịraa bala alụkụrwọ ịtụkụ yaa ịlẹ kị ri angịleje bala alegbeju ịgbẹgbịlẹ ịkpẹhị rịrị angị bwu iPechiya bala Ẹrẹkị bala ịBabịlọn bala iSusa ọ-ọpyị nya Elam.

¹⁰Angịkịla ịlẹ kị yẹ ju laa da ileta ọọwa ri angịlẹ wuu ká Achubanịpalụ adịrahụ ọtụka olihi-ihi kpa lagbụrụ kele ka kụ e-epweji nya ịSameriya bala oye ọkịla wuu ọ-ka ọmwẹnụ-obyi nya Ihu nya iYufuretisi.”

¹¹Ẹla ọlẹpwụ nya ileta ọọwa a lẹẹ lẹ. “Ileta ọlẹ juwa wẹ ẹga nyang ahụ adịrahụ ọtụka Atasẹkịsisi bwu ẹga nyahị ahị anchẹ nyang ịlẹ kị kụ koye nya ọmwẹnụ-obyi nya Ihu nya iYufuretisi.

¹²“Agaba Idu, ọlẹ ri ọ-ka họ ká ka jẹ ya ala iJuu ịlẹ kị bwu oye ịkịla nya ọpyị nyang wẹ ẹgẹlẹ lẹẹ rụ kaka kụ iJerusalẹm lẹ. Ị juwa ma epweji onyobyi ọ-la egbeju-ọngịrị ọwẹ nwụ lẹ. Ị da itiwe nyamwụ kpá, juwa nwụ̀ egwalọ me lẹ.

¹³Ọlẹ ri ọ-họ ká adịrahụ ka jẹ gede-gede ya ó-ri ká angịwẹ-ẹ́ ma epweji ọwẹ nwụ kpá, kị me egwalọ dagaga jwoo lẹ aalẹ, ị́ ka myị-ị nyẹ ẹpwa kpong-kpong kaka. Ọ́ tị ri kọ lịnyị lẹ, okpoko ọlẹ ká ịgọmenti nyang kaa ye a ka chụ hi lẹlẹ.

¹⁴Ahị ayịdang tị jam e-ekpeleji nya ẹhị ọ-kpa rịrị nyang lẹ, áhị tịtọ kahị ka hu ujiji ịị hu ẹpẹpẹ jung ịịwẹ ka. Ịnyị a du káhị wẹẹ da ileta ọlẹ du wang chajị ká ka jẹ ẹlẹwẹ lẹ.

¹⁵Lẹẹlẹ, ọ ka hiigu ká ka ya kị ka wụla apwụ nya ego ịlẹ ká ịdịrịhụ ijene nyang da ju yẹ. A ka jẹ bwu ẹpwụ nya apwụ ịịwa jaabwọ ká alepweji nya iJerusalẹm ọwẹ kaa la egbeju-ọngịrị ụka wuu. Ịị hu akama ha ịdịrịhụ bala alọpyị datị-datị. Egbeju ọnyọọngịrị ọlala nyaa bwu oyoyi nya alene. Ọlịnyị a du kị ta epweji ọwẹ ayịreji lẹ.

¹⁶Ee lẹ, ahị ya jeng lẹ, adịrahụ nyahị, ó-ri kị nwụ epweji ọwẹ, kị me egwalọ nyamwụ kpá lẹ aalẹ, ọpyị ọhẹ-lọhẹ-ẹ́ ka hi ji ekpeleji nya ẹhị ọ-kpa rịrị nyang ka ọ-ọmwẹnụ-obi nya Ihu iYufuretisi kaka.”

¹⁷Adịrahụ Atasẹkịsisi wẹ ụpwụ ọwẹ ịịlẹ: “Ọlẹ ri ọ-ka da ọnụ chịng ahụ iRehum olegbeju bala iChimchayị akịraa nyang bala alegbeju ịtụkụ yiinu ịlẹ kị kụ ịSameriya bala oye ọkịla nya ọmwẹnụ-obyi nya Ihu iYufuretisi.

¹⁸“Ileta ọlẹ ká da du wam lẹ, ị wọọ bala ọ dọọ wụlẹ jem lẹ.

¹⁹M tị byi alụkụrwọ nyam ị wụla apwụ yẹ rige-rige lẹ. Apwụ ịịwa họ kahị jẹ ya ala iJerusalẹm ọwẹ kaa la egbeju-ọngịrị ta ịdịrịhụ bwu ụka-ụka nya alene. Ọ ri ịnyịlẹhị, epweji ọwẹ myị la aluguru-ẹla bala angị la egbeju-ọngịrị.

²⁰Ịdịrịhụ ịtụka ịlọngịrị a kaa kpẹhị ri iJerusalẹm bala ọpyị ọlọmwẹnụ-obyi nya ịhụ iYufuretisi wuu ene-ene lẹ. Ịdịrịhụ ịịwa kaa nyẹ alụwa ẹpwa.

²¹Lẹẹlẹ, m tịtọ ká ka da angịwẹ ehile kị ka hịnyọ la ọ-ma epweji ọwẹ nwụ gbee kị ka wo ẹrụ ọkịla bwu ẹga nyam.

²²Ẹlẹwẹ ā lang gbẹgụ-gbẹgụ koo. Ó-ri ịnyị ka aalẹ, ọhọhọ nyaa ọwẹ ka kpa akama wẹ ịgọmenti nyam.”

²³Ọọwa lẹ, ị wa ileta nya adịrahụ Atasẹkịsisi ọwẹ je iRehum bala iChimchayị bala alegbeju ịtụkụ yaa lẹlẹ. Ahyaahị lẹ, ị rụ kele ka ẹga nya ala iJuu lẹ, ị kpa agbụrụ hwaa abwọ hi ụkụrwọ nya iJerusalẹm ọ-ma nwụ lẹlẹ.

²⁴Ụka ọọwa, ị hu abwọ la ụkụrwọ nya ube ịgọgọ omeme. Ụkụrwọ ọwẹ tị wu godayị gbee da ka ẹka oheeye nya adịrahụ ọtụka oriri nya ịDarịyọsị i-iPechiya.