Read idege ẸSỊRA 5 Bible Online

ẸSỊRA 5 - idege bible

ẸSỊRA 5

¹Alọmwụ angị imiiye ịlẹ ká ẹnyị nyaa ri iHegayị bala ịSẹkaraya ọnyị nya Ido yẹ ọmwụ bwula ẹnyị nya Ohe Oluhye nya Isirẹlụ je ala iJuu ịlẹ kị kụ iJuda bala iJerusalẹm.

²Ọọwa lẹ, iSerubabẹlụ ịgọbwụnọ ọnyị nya iChiyalutiyẹlụ bala iJechuwa ọngọkiliya ọnyị nya iJosadakị a kpa angịkịla dọmwụ nya ube ịgọgọ nya Ohe Oluhye ọnwụnwụ myịmyị i-iJerusalẹm lẹlẹ. Alọmwụ imiiye nya Ohe Oluhye daa ụbwọ la ụkụrwọ ọọwa.

³Ụka ọọwa, ịTatẹnayị ọlẹ kọ ri olegbeju nya ọpyị ọlọmwẹnụ-obyi nya Ihu iYufuretisi bala ịChẹta-ibosenayị bala alegbeju aanaa ịkịla hu ang ka ju ka iJerusalẹm. Ọọwa, ị tọ ala iJuu ịtọ yẹkẹẹ, “Oowo kpakpakpa a tị́ ya ọngịrị hanụ nyọka me ube ịgọgọ ọlẹ bala ọ-ka họọ cheju kpong-kpong?”

⁴Ị byaa ịnyịnyị ya nyị bwuru ẹnyị nya alụkụrwọ nya ube ọnwụnwụ ọwẹ wuu jiwa.

⁵Ohe Oluhye tị juwa ta alegbeju nya ala iJuu. Alegbeju nya ala iPechiya ịwẹ-ẹ́ hwaa abwọ hi ụkụrwọ ọwẹ ọhọhọ ka gbee kị ka du ẹrụ ka ya je adịrahụ ịDarịyọsị bala o-ye ọwẹwẹ tịrẹkpẹ bwu ẹga nyamwụ.

⁶Ụpwụ ọlẹ kị da du tọ adịrahụ ọtụka a lẹẹ lẹ:

⁷“Adịrahụ ịDarịyọsị, à ka pyẹẹ.

⁸“Ọlẹ ri ọ-ka ya jeng ya ahị kele ka ọpyị nya iJuda, ẹga kị lalẹẹ kpa ube ịgọgọ nya Ohe Oluhye ọtụka nwụ. Ị juwa kpa ajwọ ịtụka-ịtụka moo. Ị ya ekeji ịtụka-ịtụka ju egwalọ juwa kpa me ịnyịnyị. Alụkụrwọ kpẹhị rige-rige ju ụkụrwọ ọọwa. Ụkụrwọ ọọwa juwa dụnyẹ kịlahị-ịlahị.

⁹“Ọọwa lẹ, ahị tọ alegbeju nyaa wo kị ka ya jehi ọngọlẹ kọ ya ọngịrị haa nyọka ma ube ịgọgọ me bala ọ-ka họọ cheju lẹlẹ.

¹⁰Ahị taa ịtọ nya ẹnyị nyaa ịnyịnyị chajị kahị ka da ụpwụ ka ya jeng angịlẹ kị kpaa kụ ịlahị nya ụkụrwọ ọọwa ọhọhọ.

¹¹“Ị wẹ byihi yẹkẹẹ, ‘Ahị ayịdang ri anchẹ nya Ohe Oluhye nya epwoohe bala odehe. Ahị jam ma ube ịgọgọ ọlẹ kị me ene lụka ọkẹkpẹ nwụ. Adịrahụ ọtụka ọhẹ nya ala Isirẹlụ a nwọọ lụka ọọwa lẹ.

¹²Ma, adahị igogo anyị tị họ ẹla wụ Ohe Oluhye nya epwoohe ẹjẹ. Ajị nya ọọwa a du kọ ya iwe da ká iNebukadinesa Adịrahụ nya ala ịBabịlọn warị kaka dẹwụ kụrwaa lẹ. Ọwa-à tụrụ ube ịgọgọ ọọwa ju eji, ọ go alụka ọọwa wuu kpa rụ ka ri anyịhị nya ịlọmwụ ị-ịBabịlọn lẹ.

¹³Ụka kọ nọ gbee ka pwụ ẹpwụ nya ẹka oheeye nya adịrahụ oriri nya ịSayịrọsị ị-ịBabịlọn lẹ, adịrahụ ịSayịrọsị lịlọmwụ a ya iwe da nyọka ma ube ịgọgọ ọlẹ nwụ lẹlẹ.

¹⁴Ọ́ ba ọọwa ka, ọ tịrị ịja bala ang-abwọ ilube ịgọgọ ọla iJerusalẹm ịlẹ kị họ lokpoko ịgọm bala okpoko onyoowuru ịlẹ ká adịrahụ iNebukadinesa go kpa ka ju ube nya ohe nya ala ịBabịlọn ẹkpẹ hahị. Adịrahụ ịSayịrọsị go ang ịwẹ wuu ju ịChẹchịbasa ọlẹ kọ hu ri olegbeju nya iJuda ụ-ụbwọ.

¹⁵Ọọwa, ịSayịrọsị a byoo ya nyị ye ang-abwọ ịwẹ kpa tịrẹkpẹ kaka ju u-ube ịgọgọ ọla iJerusalẹm kịị nyị ma ube ịgọgọ ọọwa nwụ rịrị ẹ-ẹga onyogo nyamwụ mẹ lẹlẹ.

¹⁶Ịnyị, ịChẹchịbasa a warị lẹ, ọ da itiwe nya ube ịgọgọ am i-iJerusalẹm lẹlẹ. Bwu ẹnụ ọọwa gbee daalẹ ụkụrwọ nya ube ịgọgọ ọlẹ jam kịnyaa kịlahị, ọ́ tị cheju la ọnwụnwụ lẹka.’

¹⁷“Lẹẹlẹ, ó-ri kọ hang i-irya aalẹ, a ya kị wụla apwụ nya ego nya ịdịrịhụ nya ala ịBabịlọn yẹ mẹ. Ị wụlayẹ ó-ri ká adịrahụ ịSayịrọsị-ị da ehile ya nyị ma ube ịgọgọ ọla iJerusalẹm nwụ ịnyịlẹhị wẹẹ. Ụka kị họ ịnyị kpá lẹ, a du ka ya jehi jaabwọ ká irya nyang ri u-uhye nya ẹlẹwẹ mẹ.”