Read idege ẸSỊRA 6 Bible Online

ẸSỊRA 6 - idege bible

ẸSỊRA 6

¹Ọọwa lẹ, adịrahụ ọtụka ịDarịyọsị a da ehile ya nyị wụla apwụ nya ego ịlẹ kị da ju chajị nya ịdịrịhụ ịla ịBabịlọn yẹ mẹ lẹlẹ.

²Ị yẹ ụpwụ ọhẹ e-epweji nya Ekibatana ọlẹ kọ ri ẹpwa-ụtụrụ nya ọpyị nya iMidiya. Ẹla ọlẹ kị da ju ụ-ụpwụ ọọwa a lẹẹ lẹ:

³“Ọlẹ ri ọ-ka kpa kpịtịya ya ẹ-ẹpwụ nya ẹka nya ọgbanyẹ-ọgbanyẹ nya adịrahụ oriri nya ịSayịrọsị adịrahụ ọtụka, ọ da ehile chajị nya ube ịgọgọ nya Ohe Oluhye ọlẹ kị ka nwụ i-iJerusalẹm. Ọ da ehile ọọwa yẹkẹẹ: ‘Ị ma ube ịgọgọ ọwẹ nwụ, kọ ka ri ẹga okiliya mẹ. Ị ka da itiwe nyamwụ la uhye. Uhye ọlala nya ube ọwẹ ka la apatẹ iwo ihikichu. Ẹpwụ ojuju nyamwụ ka la apatẹ iwo ihikichu ịnyịnyị.

⁴Ị ka ya ọgba ookpokpo nya ekeji nịrọ ịgba nya ajwọ ịta ọnyị myị ọnyị nya ugulọ nyamwụ. Ẹga ọ-ya okpoko kpịbaa nya adịrahụ ị-ka gba okpoko bwu kpa ka nwụ uri nya ụkụrwọ ọwẹ wuu lẹ.

⁵Ọ́ ba ọọwa ka, ị ka tịrị ịja nya okpoko ịgọm bala okpoko onyoowuru ịlẹ ká adịrahụ iNebukadinesa go bwu ube ịgọgọ nya Ohe Oluhye kpa wẹ ịBabịlọn ẹkpẹ ka ẹga onyogo nyaa u-ube ịgọgọ ọla iJerusalẹm ọọwa ịnyịnyị.’ ”

⁶Ọọwa lẹ, ịDarịyọsị adịrahụ ọtụka a wẹ ileta ọọwa yẹkẹẹ: “Ahụ ịTatẹnayị olegbeju nya alọmwẹnụ-obyi nya Ihu iYufuretisi bala ahụ ịChẹta-iBosenayị bala alegbeju aananụ ịkịla iloye ọwẹ wuu, anụ tụ kẹkpẹhi ẹga nya ube ịgọgọ ọwẹ.

⁷Anụ chị ụkụrwọ ọlụwa ochuchuu koo. Anụ ba ká olegbeju nya ala iJuda bala alegbeju nya ala iJuu ā ma ube ịgọgọ nya Ohe Oluhye ọwẹ nwụ rịrị ẹ-ẹga onyogo nyamwụ.

⁸Ọlẹẹlẹẹ, m jam danụ ehile jaabwọ kanụ ka bwu da alegbeju nya ala iJuu ịlẹ kị wẹẹ me ube ịgọgọ ọwẹ ụbwọ lẹ. Anụ nwụ angịwẹ uri nya ụkụrwọ ọlẹ kị wẹẹ họ bwu ẹpwụ nya okpoko nya ẹpwa ọnyẹnyẹ ọlẹ kanụ ye ọ-ọmwẹnụ-obyi nya Ihu iYufuretisi mẹ. Anụ nwaa uri ahyaahị chajị ká ụkụrwọ ā ka wu dayị ka.

⁹Anụ ka ya ang myị ang ịlẹ ká angịkiliya ịla iJerusalẹm tịtọ ẹnụ myị ẹnụ haa. Anụ ka ya agba nya ịna bala imilodo bala ịkpịlọ ịlẹ kị ka ya kịla iya ha Ohe Oluhye nya epwoohe haa tụ iwiiti bala ịma bala ere bala ida jaabwọ kị ya la ọ-tụhi ịngịngịhyẹ deeji ka.

¹⁰Ọọwa, ị ka jẹ-ẹ kịla iya ịlahịchịng ịlẹ kị ka há Ohe Oluhye nya epwoohe lẹ, ị ka raabwọ chajị nyam bala anjwo nyam ịnyịnyị lẹlẹ.

¹¹Ehile ọ-da ọwẹ u-uhye ri ọngọlẹ kọ bịrị ehile ọwẹ aalẹ, ị ka gbile okoji ọkpụrụ-kpụrụ ọhẹ bwu ẹpwụ nya ịnawụ nyamwụ. Ị ka kọ okoji ọọwa ẹhị piye-piye kị ka ya bwuru ọngọọwa kpoye-kpoye lẹlẹ. Ị ka yẹ ẹpwa nyamwụ la ọtẹwụụ.

¹²Ohe Oluhye ọlẹ kọ họ ká iJerusalẹm ri ẹga kị ka gbịgba họọ ā yẹ adịrahụ lee epwoja ọhẹ-lọhẹ ọlẹ kọ nwụ ehile ọlẹ da lee ọ-bịrị ube ịgọgọ ọlụwa akama. Am ịDarịyọsị kpakpakpa a da ehile lẹ. Ị ka ju ihi nya ehile ọọwa kpẹẹkpẹẹ.”

¹³Ọọwa lẹ, ịTatẹnayị olegbeju bala ịChẹta-iBosenayị bala alegbeju aanaa wuu a họ kpẹẹkpẹẹ jaabwọ ká ịDarịyọsị adịrahụ ọtụka daa ehile ya nyị họ lẹlẹ.

¹⁴Ụka ọọwa, alegbeju nya ala iJuu kpa ụkụrwọ nya ube ịgọgọ kịlahị-ịlahị bwula ọhụ ojuju nya iHegayị ọlọmwụ bala ịSẹkaraya ọnyị nya Ido. Ị nwụ ube ọwẹ kpá jaabwọ ká Ohe Oluhye nya ala Isirẹlụ da ehile bala jaabwọ ka ịSayịrọsị bala ịDarịyọsị bala Atasẹkịsisi ịdịrịhụ nya ala iPechiya ya.

¹⁵Ẹnụtụrụ ọhata nya ọya nya Adāà nya ẹka ọharwọnyẹ nyọlẹ ká ịDarịyọsị ri adịrahụ ị chị ụkụrwọ nya ube ịgọgọ ọnwụnwụ eju lẹ.

¹⁶Ala Isirẹlụ ịlẹ kị ri angịkiliya bala ala iLivayị bala angị ịhịhị ịkịla ịlẹ kị nya bwu ẹpwụ nya ọnyọhị oriri wuu hu ube ịgọgọ ọwẹ ju Ohe Oluhye ụ-ụbwọ lọkẹkẹnị.

¹⁷Ị hu ube ịgọgọ ọwẹ ha Ohe Oluhye bwula ọ-ya ịna ohu (100) bala imilodo ohu imiiye (200) bala anyị-ịkpịlọ ohu ine (400) kịla iya. Ị ya iyichi iwo kụrụ imiiye kịla iya ọ-hụ ịhọbịrị nya ala Isirẹlụ wuu. Iyichi iwo kụrụ imiiye ịịwa ku ọmwakpa nya ịmwawụ iwo kụrụ imiiye ala Isirẹlụ.

¹⁸Ọọwa lẹ, ị go angịkiliya bala ala iLivayị hụ e-ebwo nya iwe-ahụrụ nyaa datị-datị chajị nyọka họ ụkụrwọ olube ịgọgọ nya Ohe Oluhye ọla iJerusalẹm jaabwọ kị da ju ụ-ụpwụ nya iMosisi lẹlẹ.

¹⁹Angịlẹ kị nya bwu ẹpwụ nya ọnyọhị oriri wuu ri ang oriri ọchịpwụrụ ẹnụtụrụ iwo kụrụ ine nya ọya ọhọhẹ.

²⁰Angịkiliya bala ala iLivayị da ịlọ hụ ịlaa du kị la charị-charị. Ọọwa, ala iLivayị a nwụ anyị-ịkpịlọ ịlẹ kị ka ri lụka nya ang oriri ọchịpwụrụ ọwẹ ha angịlẹ kị nya wuu tụ angịkiliya aanaa bala ịlaa lẹlẹ.

²¹Ala Isirẹlụ ịlẹ kị nya bwu ẹpwụ nya ọnyọhị oriri wuu ri anyị-ịkpịlọ ịlẹ kị nwụ nya ang oriri ọchịpwụrụ. Angịkịla ịlẹ kị kụ ụwa kị chị ịlaa ịgọ hi ang ịtịpyọ ọhọhọ nya angị jẹ Ohe-ka chajị nyọka gbịgba ha Amkpaa Ohe Oluhye nya ala Isirẹlụ wuu ri ang oriri ọchịpwụrụ ọwẹ ịnyịnyị.

²²Ị ri ang oriri nya ịkaa ọmịrịị-mịrị-ka ịnyịnyị ẹ-ẹpwụ nya ẹnụtụrụ irwiye gbẹgbịlẹ lọkẹkẹnị. Ị chị ọkẹkẹnị chajị Amkpaa họ ká Adịrahụ nya ala Asiriya haa ọnahị bwula ọ-da ụbwọ ẹ-ẹpwụ nya ụkụrwọ nya ube ịgọgọ nya Ohe Oluhye nya ala Isirẹlụ ọ-ma nwụ.