Read idege ẸSỊRA 7 Bible Online

ẸSỊRA 7 - idege bible

ẸSỊRA 7

¹Ụka ká ala ịwẹ họ kam kpá, kọ nọ gbee pwụ ụka nya adịrahụ oriri nya Atasẹkịsisi i-iPechiya, ọlẹng ọhẹ ọlẹ ká ẹnyị nyamwụ ri Ẹsịra nya bwu ịBabịlọn. Ẹsịra ọọwa ri ọnyị nya iSeraya. ISeraya ri ọnyị nya Asariya. Asariya ri ọnyị nya iHilikaya.

²IHilikaya ri ọnyị nya ịChalum. ỊChalum ri ọnyị nya ịSadọkọ. ỊSadọkọ ri ọnyị nya Ahitubụ.

³Ahitubu ri ọnyị nya Amarịya. Amarịya ri ọnyị nya Asariya. Asariya ri ọnyị nya iMerayotu.

⁴IMerayotu ri ọnyị nya iSerahiya. ISerahiya ri ọnyị nya Usi. Usi ri ọnyị nya iBuki.

⁵IBuki ri ọnyị nya Abichuwa. Abichuwa ri ọnyị nya iFinihasị. IFinihasị ri ọnyị nya Eliyẹsa. Eliyẹsa ri ọnyị nya Erọn olegbeju okiliya.

⁶Ẹsịra ọọwa nya wẹ iJerusalẹm bwu ịBabịlọn. Ọ ri ọngọmẹjẹ ọlẹ kọ jẹ ehile ịlẹ ká Amkpaa Ohe Oluhye nya ala Isirẹlụ ya ha iMosisi hịlẹ-hịlẹ. Ẹsịra ye ụbwọ ọdada bwu ẹga nya Amkpaa Ohe Oluhye nyamwụ lẹẹ lẹ, adịrahụ ya ang myị ang ịlẹ kọ bịlọọ wuu họọ.

⁷Angịhyẹ nya ala Isirẹlụ tụ angị ri angịkiliya bala ala iLivayị bala ang du ayịlọ ilube ịgọgọ bala angịgbeji bala alụkụrwọ ilube ịgọgọ ba Ẹsịra nyà bwu ịBabịlọn wẹ iJerusalẹm ẹ-ẹpwụ nya ẹka ọharwiye nya adịrahụ oriri Atasẹkịsisi ịnyịnyị.

⁸Ẹsịra anyị nyà pwụ iJerusalẹm la ọya ọharụ nya ẹka ọharwiye nya adịrahụ oriri nya Atasẹkịsisi.

⁹Ị hu ang nya ọnyanya bwu ịBabịlọn ẹnụtụrụ ọhọhẹ nya ọya ọhọhẹ. Ị pwụ iJerusalẹm ẹnụtụrụ ọhọhẹ nya ọya ọharụ bwula ụbwọ ọnahị nya Ohe Oluhye nya Ẹsịra ọlẹ kọ juwa tọọ.

¹⁰Ẹsịra ayịdang hu ọhịhị nyamwụ lẹpwụ-lẹpwụ juwa kpa jẹ ehile nya Amkpaa bala o-ju ihi nyamwụ bala ọ-ka mẹ ehile bala ọhọhọ nyamwụ jẹ ala Isirẹlụ.

¹¹Adịrahụ Atasẹkịsisi da ụpwụ ọhẹ ha Ẹsịra ọngọkiliya ọlẹ kọ ri ọngọmẹjẹ ọ-jẹ ụpwụ nya ehile ọlẹ ká Amkpaa da ha ala Isirẹlụ hịlẹ-hịlẹ. Ụpwụ ọọwa a lẹẹ lẹ:

¹²“Ụpwụ ọlẹ[3] bwu ẹga nyam am Atasẹkịsisi adịrahụ ọtụka ka ẹga nya Ẹsịra ọngọkiliya ọlẹ kọ ri ọngọ mẹ ehile nya Ohe Oluhye nya epwoohe jẹ. A ka pyẹẹ.

¹³“M̀ jam da ehile ya ọng myị ọng nya ala Isirẹlụ, tụ angịkiliya bala ala iLivayị nyaa, ọlẹ kọ họọ kọ ka rụ lẹ aalẹ, ọngọọwa a bang ahụ Ẹsịra rụ tịrẹkpẹ ka iJerusalẹm mẹ.

¹⁴Ẹsịra ee, am adịrahụ bala angị kaa jum irya angị irwiye nyam a wẹẹ dung ẹrụ ka iJerusalẹm bala iJuda lẹ. Ahị jam dung ẹrụ ka ụwa nyọka wụlayẹ jaabwọ ká alụwa juwa ju ihi nya ehile nya Ohe Oluhye nyang ọlẹ kị ya jung ụ-ụbwọ wẹ yẹẹyẹẹ ka ba.

¹⁵Aa kpa okpoko ọnyoowuru bala okpoko ịgọm ịlẹ kam bala alụkụrwọ i-jum irya dà julawụlẹ bwu ẹpwụ nya ọkịlẹtụ nyahị lẹẹ ha Ohe Oluhye nya ala Isirẹlụ ọlẹ ká ube ịgọgọ nyamwụ ji iJerusalẹm kele ịnyịnyị mẹ.

¹⁶À ka kpa okpoko onyoowuru bala okpoko ịgọm ịlẹ ká ye bwu ẹga myị ẹga nya ọpyị nya ịBabịlọn ọlẹ wuu lẹpwụ-lẹpwụ kele ịnyịnyị. À ka kpa ọhaha ịlẹ ká ala Isirẹlụ bala angịkiliya nyaa hu ha chajị nya ube ịgọgọ nya Ohe Oluhye nyaa ọlẹ kọ ji iJerusalẹm ịnyịnyị.

¹⁷“Aa kpẹhị chịng ká ya okpoko ọwẹ ra ịna bala imilodo bala anyị-ịkpịlọ tụ ajẹ nya ang-ẹrụ bala ere ịlẹ kị ka ya kịla iya tụ iyo ịwẹ da mẹ. Ọọwa lẹ, ká ya ang ịwẹ wuu kịla iya u-uhye nya ogidi olube ịgọgọ nya Ohe Oluhye nyang ọlẹ kọ juwa i-iJerusalẹm mẹ.

¹⁸“Ahụ bala ala iJuda aanang anyị a ya okpoko onyoowuru bala okpoko ịgọm ohihi họ ang ọlẹ kọ pwoku a-ahị nyanụ bala irya nya Ohe Oluhye nyang mẹ.

¹⁹Aa kpa ang-abwọ ị-kpa họ ụkụrwọ u-ube ịgọgọ ịlẹ kị ya hang wuu kịla Ohe Oluhye i-iJerusalẹm mẹ.

²⁰Ó-ri ká ang ọkịla ọhẹ-ẹ́ baba hang kị ka ra chajị nya ube ịgọgọ aalẹ, à ka ye okpoko bwu ẹga ọ-ya okpoko kpịbaa nya adịrahụ.

²¹“Am kpakpakpa lẹẹ danụ anụ angị kpẹhị rịrị ang-ụdụ nya adịrahụ oloye nya ọmwẹnụ-obyi nya Ihu iYufuretisi ehile ịịlẹ: Anụ ya ang myị ang ọlẹ ká Ẹsịra ọngọkiliya ọlẹ kọ ri ọngọ mẹ ehile nya Ohe Oluhye nya epwoohe jẹ tịtọ bwu ẹga nyanụ họọ.

²²M ya iwe hanụ kanụ ka ya okpoko onyoowuru ọlẹ ká ilo ọlala nyamwụ ka lala ịnya awụtọọ nya ịrayịsị iwo ịta da ine myị họọ. Ilo ọlala nya iwiiti ịlẹ kanụ ka ya họọ ka lala ịnya awụtọọ nya ịrayịsị ohu chịrịrị myị. Ere ka la ịgalọn ohu ịrụ. Ida nya olivu ọlẹ kanụ ka ya họọ ka la ịgalọn ohu ịrụ myị ịnyịnyị. Anụ ya ịma họọ jaabwọ kọ tịtọ lụmẹ ka ba.

²³Anụ kpẹhị chịng kanụ ya ang myị ang ịlẹ ká Ohe Oluhye nya epwoohe tịtọ u-ube ịgọgọ nyamwụ ha Ẹsịra chajị ká Ohe Oluhye-é ka wụ ẹjẹ tam lee angịkịla ịlẹ kị ka ri adịrahụ ẹ-ẹgẹlẹ ị-ịlahị kaka mẹ.

²⁴Ọlẹ ri ọ-ka ya jenu ịnyịnyị ya áhị ya ọngịrị hanụ nyọka ye okpoko nya ẹpwa ọnyẹnyẹ bwu ẹga nya angịkiliya bala ala iLivayị bala angị du ayịlọ bala angịgbeji bala alụkụrwọ ilube ịgọgọ lee ọngọngọhẹ ọlẹ kọọ họ ang u-ube ịgọgọ ọwẹ kpong-kpong ka.

²⁵“Ahụ Ẹsịra tị lẹ, aa kpa ẹla ọjẹjẹ ọlẹ ká la bwu ẹga nya Ohe Oluhye wẹ chụ alegbeju bala angịleje ịlẹ kị ka kpẹhị rịrị aloye nya ọmwẹnụ-obyi nya Ihu iYufuretisi ịlẹ kii hịhị ba ehile nya Ohe Oluhye nyang jẹ mẹ. Mẹ ehile ọọwa jẹ angịlẹ kị jọọ lẹka.

²⁶Ọng myị ọng ọlẹ kọ myị ju ihi nya ehile nya Ohe Oluhye nyang lee ehile nya adịrahụ ka aalẹ, ị ka yẹ ọngọọwa akama la o-jujwo nyamwụ ka. Ị ka yẹ ọngọọwa akama bwula ọ-nwọọ nwụ lee o-kwoo rụ hi uma nyamwụ lee o-noo ang ịlala nyamwụ lee o-woo ju agba.”

²⁷Ọọwa, Ẹsịra a yẹkẹẹ, “Ogbo a ri nya Amkpaa Ohe Oluhye nya adahị igogo anyị. Ọwa-à ji ọkịlẹtụ nya adịrahụ kpata du kọ chị ihi ju Ube nya Amkpaa ọla iJerusalẹm lẹ.

²⁸Ọ chị ọháha nyamwụ ehe mẹjẹm du kam ye ọnahị bwu ẹga nya adịrahụ bala angị jwoo irya bala alegbeju ịgbẹgbịlẹ nyamwụ wuu. Bwula ụbwọ ọdada nya Amkpaa Ohe Oluhye nyam ọlẹ kọ juwa tam, m ju ugbodu, ọọwa, m tụ alegbeju nya ala Isirẹlụ guru kị ka bam rụ lẹlẹ.”