Read idege ẸSỊRA 8 Bible Online

ẸSỊRA 8 - idege bible

ẸSỊRA 8

¹Ọlẹ ri ẹnyị nya alegbeju nya ogang datị-datị bala angịlẹ kị da ẹnyị nyaa ju ta angịlẹ kị bam am Ẹsịra nya bwu ọpyị nya ịBabịlọn lụka ká Atasẹkịsisi ri adịrahụ ọtụka.

²Angịịwa ri ịGẹẹchọm ọlẹ kọ bwu ogan nya iFinihasị bala ịDanẹlụ ọlẹ kọ bwu ogang nya Itamaa bala ịHatọchị ọlẹ kọ bwu ogang nya iDevidi.

³ỊHatọchị ayịdang ri ọnyị nya iChekaniya. Angịkịla nyaa ri ịSẹkaraya bala alẹng angị ohu da iwo ịrụ (150) i-bwu ogang nya ịParọchị. Angịwẹ la ẹga kị da ego nya adaa igogo anyị ju.

⁴Eliyehonayị ọnyị nya iSerahiya bala alẹng angị ohu imiiye (200) bwu ogang nya ịPahatị-imowabụ.

⁵IChekaniya ọnyị nya ịJahasiyẹlụ bala alẹng angị ohu ịta (300) bwu ogang nya ịSatụ[4].

⁶Ebẹdị ọnyị nya iJonatan bala alẹng angị iwo ịrụ bwu ogang nya Adin.

⁷IJechaya ọnyị nya Ataliya bala alẹng angị iwo irwiye bwu ogang nya Elam.

⁸ISebadiya ọnyị nya ịMayịkẹlụ bala alẹng angị iwo ineku bwu ogang nya iChefatiya.

⁹Obadaya ọnyị nya iJehiyẹlụ bala alẹng angị ohu imiiye da angị iwo kụrụ ineku (218) bwu ogang nya iJowabụ.

¹⁰IChelomiti ọnyị nya iJosifiya bala alẹng angị ohu da angị iwo ịrwọnyẹ (160) bwu ogang nya ịBani[5].

¹¹ỊSẹkarịya ọnyị nya iBebayị bala alẹng iwo imiiye kụrụ ineku bwu ogang nya iBebayị.

¹²IJohanan ọnyị nya ịHakatan bala alẹng angị ohu kụrụ angị iwo (110) bwu ogang nya Asịgadị.

¹³Elifẹlẹtị bala iJiwẹlụ bala iChemaya anyị kị nyà ku nya angịkịla bala alẹng angị iwo ịrwọnyẹ bwu ogang nya Adonikam.

¹⁴Utayị bala ịSakuu bala alẹng angị iwo irwiye bwu ogang nya iBigivayị.

¹⁵M tụ ebwo nya angịwẹ wuu guru ọ-ọnụ nya ogo ọlẹ kọọ mwụ yahị da ka epweji nya Ahava. Ọọwa, ahị chịkụ ụ-ụwa ẹnụtụrụ ịta gbẹgbịlẹ lẹlẹ. Ụka kam wụla angịwẹ bala angịkiliya yẹ wuu lẹ, m jẹ ká ala iLivayị ọhẹ-lọhẹ-ẹ́ juwa ẹ-ẹpwụ nya ogu nyahị kaka lẹlẹ.

¹⁶Ụka ọọwa, m du ẹrụ kaka wụrụ Eliyesa bala Ariyẹlụ bala iChemaya bala Elinatan bala ịJaribu bala Elinatan ọkịla bala ịNatan bala ịSẹkaraya bala iMechulam anyị kị ri alegbeju. M du ẹrụ tọ iJoyaribu bala Elinatan angịmẹjẹ ịnyịnyị.

¹⁷M du alẹng ịwẹ ka ẹga nya Ido olegbeju ọla ịKasifiya kaka byoo bala alụkụrwọ aanamwụ ilube ịgọgọ ọlụwa kị ka chụ angịnyị du wahị chajị kị ka họ ụkụrwọ u-ube ịgọgọ nya Ohe Oluhye nyahị.

¹⁸Bwula ụbwọ-ọnahị nya Ohe Oluhye nyahị ọlẹ kọ juwa tahị lẹ, ị chụ ọlẹng ọkpịra-kpịra ọlẹ kị wụrụ iCherebiya bala anyị alẹng nyamwụ bala anyịnamwụ alẹng jịra angị iwo kụrụ ineku du wahị. Ọlẹng ọlẹ ayịdang ri ọnyị nya iLivayị ọlẹ ká adamwụ ri Isirẹlụ bwu ogang nya ịMahili.

¹⁹Ị chụ iHachabiya bala iJechaya bwu ogang nya iMerarị tụ aanaa alẹng bala anyị alẹng nyaa du wahị. Ịwa wuu la angị iwo imiiye.

²⁰Ọ́ ba aang ịwẹ ka, ị ya alụkụrwọ ilube ịgọgọ angị ohu imiiye kụrụ iwo imiiye (220) du wahị ịnyịnyị. Angịịwa ri angịlẹ ká Adịrahụ iDevidi bala alụkụrwọ ịtụkụ yoo chụ adaa igogo anyị nyọka da ala iLivayị ụbwọ. Ị da ẹnyị nya ọng myị ọng nyaa wuu ju.

²¹Ọọwa lẹ, m da ọna ya je ọng myị ọng nyahị ọ-ọnụ nya Ihu nya Ahava ọwẹ chajị kahị ka wu ịlọhị hụ limyi bala ọ-ka kpa ịlọhị ka eji ị-ịlahị nya Ohe Oluhye nyahị lẹlẹ. Ọlẹ ka họ kahị ka raabwọ bịlọọ kọ ka kpẹhị rịrịịhị bala anyị nyahị bala ang ịlẹ kahị la wuu ẹ-ẹpwụ nya ẹdịyẹ ọlẹ kahị lẹẹ jẹ.

²²Ọ ka lam oyoyi nyọka bịlẹ adịrahụ kọ ka chụ angịdẹwụ bala angị kụ anyịrẹ kaka kpahị chị kị ka keehi hi aluji nyahị ịlụgbẹyị ọlẹ kahị wẹẹ ka bwu. Chajị ahị lẹẹ byi adịrahụ ene ya Ohe Oluhye kaa yụbwọ-ọnahị nyamwụ hụ ta angịlẹ kị dahị hiloo, ọ tịị wụ agbama ta angịlẹ kị myị ju ihi nyamwụ ka.

²³Ọọwa, ahị hụ limyi bala ọ-raabwọ ha Ohe Oluhye nyahị kọ ka chẹwụ keehi lẹlẹ. Ọ wẹ abwọ ọrịrị nyahị.

²⁴Ụka ọọwa, m chụ angị iwo kụrụ imiiye bwu ẹpwụ nya angịkiliya ịle kị ri alegbeju. Angịịwa ri iCherebiya bala ịHachabiya bala aanaa angị iwo.

²⁵Ọọwa lẹ, m gba okpoko onyoowuru bala okpoko ịgọm bala ịja ị-kpa ju ang ịlẹ ká adịrahụ bala angị jwoo irya bala alụkụrwọ ịtụkụ yoo bala ala Isirẹlụ ịlẹ kị juwa tahị wuu hu ha chajị nya ube ịgọgọ nya Ohe Oluhye nyahị kpehe lẹ, m gyaa ha angịkiliya ịwẹ lẹlẹ.

²⁶M ya okpoko onyoowuru ọlẹ kọ la ilo lala awụtọọ nya ịrayịsị ohu imiiye da iwo kụrụ imiiye ba ẹhya haa bala ịja nya okpoko onyoowuru ohu ịlẹ ká ilo ọlala nyaa wuu julawụlẹ lala ịnya awụtọọ nya ịrayịsị ookpokpo bala okpoko ịgọm ọlẹ ká ilo nyamwụ lala ịnya awụtọọ nya ịrayịsị iwo ịta da ine.

²⁷Ang ịkịla ri ịja nya okpoko ịgọm iwo imiiye ịlẹ kị la ilo lala ẹja nya ịrayịsị ookpokpo bala ịja imiiye ịlẹ kị kpa oje ọnyọmịla ọnyịịla-ọnyịịla ọlẹ kọ há lala okpoko ịgọm họ.

²⁸Ọọwa lẹ, m byi angịkiliya yẹkẹẹ, “Anụ la ịgọgọ ha Amkpaa lẹ̀. Ịnyịnyị-ịnyịnyị ang-abwọ ị-kpa họ ụkụrwọ họọ ịlẹ a la ịgọgọ lẹ. Okpoko onyoowuru bala okpoko ịgọm ịlẹ ri ọhaha ịlẹ ká angịnyị hu bwu ẹpwụ nya ọkịlẹtụ nyaa ha Amkpaa Ohe Oluhye nya adanụ igogo anyị.

²⁹Anụ kpẹhị rịraa yẹẹyẹẹ mẹ. Ụka kanụ pwụ ẹpwụ nya Ube nya Amkpaa i-iJerusalẹm lẹ, anụ wa ang ịwẹ kpẹẹkpẹẹ ju alegbeju ikịla iya bala ala iLivayị bala alegbeju nya ala Isirẹlụ ụ-ụbwọ mẹ.”

³⁰Ọọwa lẹ, angịkiliya bala ala iLivayị a ye okpoko onyoowuru bala okpoko ịgọm bala ịja ị-kpa ju ang ịwẹ kị ka kpa kele ka ube ịgọgọ nya Ohe Oluhye nyahị i-iJerusalẹm lẹlẹ.

³¹Ahị yegiri bwu Ihu nya Ahava ọwẹ ẹnụtụrụ iwo kụrụ imiiye nya ọya ọhọhẹ nya ẹdịyẹ ọ-ka iJerusalẹm. Ohe Oluhye nyahị yụbwọ-ọnahị nyamwụ kpẹhị rịrịịhị. Ọ gbehi bwu ẹga nya aluji bala alagbụrụ ịlẹ kịị kụ ịnya ụ-ụgbẹyị.

³²Ụka kahị pwụ iJerusalẹm kpá, ahị ya ata mwụ ịnyọ ẹnụtụrụ ịta gbẹgbịlẹ.

³³Ọọwa, ẹnụtụrụ ohene a wẹ lẹ, āhị kele ka ube ịgọgọ nya Ohe Oluhye nyahị lẹ, ahị wa okpoko onyoowuru bala okpoko ịgọm bala ịja ị-kpa ju ang ịwẹ wuu ju iMeremotu ọngọkiliya ọnyị nya Uuriya ụ-ụbwọ lẹlẹ. Eliyesa ọnyị nya iFinihasị bala ala iLivayị angị imiiye ịlẹ ká ẹnyị nyaa ri iJosabadị ọnyị nya iJechuwa bala iNuwadiya ọnyị nya iByinuwi juwa tọọ ụka ọọwa.

³⁴Ị wa iru ojuju bala ilo ọlala nya ang ọnyọnyọọnyị. Ọọwa, ị daa ju wuu kpẹẹkpẹẹ lẹlẹ.

³⁵Ụka ọọwa, angịlẹ kị nyà bwu ẹpwụ nya ọnyọhị oriri warị kaka kịla iya ha Ohe Oluhye nya ala Isirẹlụ. Ị ya ịna iwo kụrụ imiiye kịla iya wọnụ nya ala Isirẹlụ wuu ju. Ị ya imilodo iwo ihikichu kụrụ ịrwọnyẹ bala anyị-ịkpịlọ iwo irwiye kụrụ irwiye kịla iya ịnyịnyị. Ị ya iyichi iwo kụrụ imiiye kịla iya ọ-hụ́ ịhọbịrị. Ị ya iyo ịwẹ wuu kịla iya ju ịla ha Amkpaa.

³⁶Ị ya ehile ọlẹ ká adịrahụ Atasẹkịsisi da ju ụ-ụpwụ ha alegbeju nya aloye ọmwẹnụ-obyi nya Ihu iYufuretisi bala alegbeju ịtụkụ yaa. Ọọwa lẹ, alụwa a da ala Isirẹlụ bala ụkụrwọ olube ịgọgọ nya Ohe Oluhye ụbwọ lẹlẹ.