Read idege ẸSỊRA 9 Bible Online

ẸSỊRA 9 - idege bible

ẸSỊRA 9

¹Ụka ká ọhọhọ ịwẹ cheju kpá, alegbeju nya ala Isirẹlụ wẹ kaka byim yẹkẹẹ, “Ẹsịra ee, yẹ mẹ, ala Isirẹlụ nyahị tụ angịkiliya bala ala iLivayị-ị́ myị chị ịlaa ịgọ hi alụma ịlẹ kị kụ dagaga ju uhi lẹẹ koo. Ị jam họ ang ịtịpyọ ịlala ịlẹ ká ala iKenan bala ala iHiiti bala ala iPerisi bala ala iJebusi bala ala Amọn bala ala iMowabụ bala ala Ijipiti bala ala Amọ họ.

²Alẹng nya alịnyahị go anyị anyang nya ija ịkịla ịwẹ ye nya ịhụ nyaa. Bwula ọ-yẹ julawụlẹ ọwẹ du ká angịnyị ịlịgọgọ nya Ohe Oluhye chị ịlaa ịrị wuu lẹ. Alegbeju bala angị kpẹhị rịrị a tị kụ ịlahị nya ang ọtịpyọ ọwẹ ọhọhọ lẹ.”

³Ụka kam wo ẹlẹwẹ, m gu ịwụrụ ịlẹ kam kụrụ ene hwang ẹ-ẹpwụ nya agbama. M du ịlọm inyi bala ịchwọ pwọọrịị. Ọọwa, m hụhụ la ọjụjụ ẹ-ẹpwụ lẹlẹ.

⁴Angịlẹ wuu ká ẹla ọlẹ ká Ohe Oluhye nya ala Isirẹlụ ya chajị nya ịhọbịrị nya angịlẹ kị nyà bwu ẹpwụ nya ọnyọhị oriri gu ọ-ọkịlẹtụ wẹ kaka dagaga jum. Am tị hụ ẹgẹwẹ gbee da ka ụka nya iya ọkịlaakịla nya obyi.

⁵Lụka nya iya ọkịlaakịla nya obyi, kám hụhụ ẹ-ẹpwụ nya ojuju wẹẹ lẹ, m wuleji lịwụrụ i-gwene gwene nyam ịịwa ya arụụ kụ eji lẹlẹ. Ọọwa, m hu abwọ nyam hwaa ka uhye-ọgba ka ẹga nya Amkpaa Ohe Oluhye nyam lẹ,

⁶m ya ẹla tọọ ẹ-ẹpwụ nya abwọ ọrịrị yẹkẹẹ, “Ohe Oluhye nyam ee, ọ lam oyoyi nyọka hu ahị hwaa wẹ ẹga nyang. Ịhọbịrị nyahị nwa gbọrị-gbọrị gụụhị ahị lịlọhị. Abyị ịlẹ kahị la wuu la uhye wu ohe ọyị lẹ.

⁷Bwu ụka-ụka nya adahị igogo anyị daalẹ, ahị họ ịhọbịrị bang lụmẹ. Ajị nya ọọwa a du kaahị bala ịdịrịhụ nyahị bala angịkiliya nyahị yẹ akama ụ-ụbwọ nya ịdịrịhụ nya ụma ịkịla lẹ. Ị nwụhị nwụ, ị họhị agbụrụ, ị goohi kpa ka ri anyịhị nya ịlaa. Ị chị oyoyi juhi jaabwọ kahị jam ẹ-ẹpwụ nya oyoyi lẹẹ alẹ.

⁸“Ma, ịnya ọlẹẹlẹẹ lẹ, ahụ Amkpaa Ohe Oluhye nyahị họhị ọnahị lẹ̀. A họ ká angịhyẹ nyahị hi nyà bwu ẹpwụ nya ọnyohị oriri warị kaka kụ lokpunyi ẹ-ẹga ọlịgọgọ nyang. A juhi ọhụ onyeewe, a họ ká ịnyịrọ pwọọhị kpuru bwu ẹpwụ nya ụhị nya ọnyọhị oriri.

⁹Ahị ri anyịhị ene, á tị pẹhiihi ta ẹpwụ nya ọnyọhị oriri ka. A chị ọháha ọlala nyang ẹ-ẹga nyahị ehe. A họ ká ịdịrịhụ nya ala iPechiya họhị ọnahị. Ahị ye ọhịhị onyeewe bwu ẹga nyang, a tị ya iwe da hahị nyọka nwụ ube ịgọgọ nyang ọlẹ kọ tụrụ ju eji ene-ene bala ọ-chẹwụ keehi i-iJuda bala iJerusalẹm lẹ̀.

¹⁰“Ee lẹ, Ohe Oluhye nyahị, anyị ahị tị́ ka ya ẹ-ẹpwụ nya ẹlẹwẹ mẹ? Ahị bịrị ehile nyang

¹¹ịlẹ ká ya hahị bwula alọmwụ anchẹ nyang lẹ. Ị ya jehi ya ọpyị ọlẹ kahị nyị wẹẹ kaka ye la wẹ nyị ri ọpyị ọlẹ kịị nyị ju ibyi lụmẹ ọọ-la abwẹla ịtịpyọ ọhọhọ nya alụwa. Ang inyibyi ịhọhọ nyaa myị ọpyị ọọwa pwẹẹpwẹẹ bwu ọbaba nyamwụ ọhẹ kele ka ọkịla.

¹²Ị dahị ọna ahị nyị ya anyị anyang nyahị da ọrụ ka ụwa ka. Ahị nyị tị myị ká anyị alẹng nyahị nyị ye ịhụ bwu ụwa ka ịnyịnyị. Ahị nyị daa ụbwọ lee ọ-myị haa ị-ka kụ lokpunyi ka. Ọọwa, ahị nyaa ka la ọngịrị bala o-ye ang ịnyịịla ịlọpyị ọlẹ ri bala ọ-pẹhi ọpyị ọlẹ da nya ang-ugu nya anyị nyahị pyịyọọ lẹ.

¹³“Akama ịwẹ wuu wẹ chịhị ọgụ ọọ-la ịhọbịrị nyahị kpá odu ịnyị, ahị jẹ kaahụ Ohe Oluhye nyahị á yẹhị akama pwụ eji nya ẹga kahị họ ang onyobyi kaka ba ka. A ya iwe da angịhyẹ nyahị be nyà myịmyị.

¹⁴Ee lẹ, ịyẹ tị́ du kahị ka myịmyị-ị̀ bịrị ehile nyang nyọka ye awụlẹ bala alụma ịlẹ kị wẹẹ họ ang inyibyi ịwẹ wẹẹ? Ó-ri kahị họ ịnyị, à ka wụ ẹjẹ tahị, āà tahị ayịreji wuu gbanggbang.

¹⁵Amkpaa Ohe Oluhye nya ala Isirẹlụ, a ri ọlabwẹla ọnyịịla, a tị ya iwe da hahị ahị be nyà. Ahị wẹ ịlahị nyang la ịhọbịrị nyahị lẹ, ọ tị lahị oyoyi nyọka wẹ ijata nyang.”