Read idege INEHEMAYA 1 Bible Online

INEHEMAYA 1 - idege bible

INEHEMAYA 1

¹Ụpwụ ọlẹ ri ego nya ang ịlẹ ká iNehemaya ọnyị nya ịHakaliya họ. Ụka ọọwa, lọya nya iKisilẹvụ ẹ-ẹpwụ nya ẹka iwo imiiye nya adịrahụ oriri nya Atakịsẹkịsisi i-iPechiya, am ayịdang juwa i-iSusa ọlẹ kọ ri egbeju-ẹpwa nya ọpyị ọwẹ.

²Ọọwa, ịHanani ọnyịnam ọhẹ à pwụ eji bala alogu nya alẹng ịkịla bwu iJuda lẹlẹ. M̀ taa wo jaabwọ ká iwe-ahụrụ nya ala iJuu aanahị ịlẹ kị be bwu ẹpwụ nya ọnyọhị oriri[1] la bala iwe-ahụrụ nya epweji nya iJerusalẹm ayịdang.

³Ọọwa lẹ, ị byim yẹkẹẹ, “Angịlẹ kị be bwu ẹpwụ nya ọnyọhị oriri juwa ẹ-ẹpwụ nya akama bala oyoyi ọtụka lụmẹ. Egwalọ nya iJerusalẹm tụrụ ju eji gbanggbang. Igirigba nyamwụ wuu tị rụ ila ta ayịreji ịnyịnyị.”

⁴Ụka kam wo ẹlẹwẹ wuu lẹ, m̄ pwọ pwọọ hụhụ, juwa jida lẹlẹ. M̀ hụ limyi juwa bida ẹ-ẹpwụ nya ẹnụtụrụ lụmẹ-lụmẹ. Ụka ọọwa, m̀ raabwọ ha Ohe Oluhye yẹkẹẹ,

⁵“Amkpaa Ohe Oluhye olepwoohe ee! À ri Ohe Oluhye ọ-la ụmụmẹ bala ọ-la uhi-uhi. À kaa kpa ehile nya iro ọnwanwa nyang kpẹẹkpẹẹ bala ọ-chị ọháha nyang ehe ẹ-ẹga nya angị myị kpa ehile nyang.

⁶Chuchuu, chẹhị yẹm bala o-ke ụrụ wo abwọ ọlẹ kam ọnchẹ nyang wẹẹ rị hang lodu bala alẹnụ chajị nya ala Isirẹlụ anchẹ nyang. M̀ ya ahị ala Isirẹlụ họ ang onyobyi bang, ọgụgụ wuu ri am bala alugbiyegu nyam.

⁷Ahị họ ang onyobyi bang. Áhị kpa ehile nyang ka. Áhị tị ba ọmẹjẹ nyang ịlẹ ká ya hahị bwula iMosisi ọnchẹ nyang jẹ ka ịnyịnyị.

⁸Aa kpịtịya nya ọna ọlẹ ká ya ha iMosisi lẹẹ yẹkẹẹ, ‘Ó-ri kaanụ ala Isirẹlụ-ụ́ myị ba ọmẹjẹ nyam jẹ ka, m̀ ka nyiinu epepe tụ ẹpwụma ịkịla da.

⁹Ọ́ tị ri kanụ myị nyà chịm ọgụ, kanụ kpa ehile nyam aalẹ, ó-ri kanụ dọmwụ nyi epepe ju ka ọbaba nya odehe wẹwẹ, m̀ ka kpanụ nyà bwu ụwa wẹ ẹga ọlẹ kam hunọ kị ka gbịgba ham.’

¹⁰“Angịwẹ wuu ri anchẹ nyang bala angịnyị nyang ịlẹ kaahụ ayịdang chịda bwula ụmụmẹ bala ọngịrị ọtụka nyang.

¹¹Lẹẹlẹ, Ọngọlahị ee, ke ụrụ wo abwọ ọrịrị nyam bala ịnya anchẹ nyang ịkịla wuu ịlẹ kị wẹẹ tịtọ nyọka jung ihi mẹ. Aa ya ụgbẹyị da ham alẹ bwula ọ-họ ká adịrahụ ọtụka ka họm ọnahị mẹ.” Am à kaa kpa ukoku nya ere ha adịrahụ ụka ọọwa lẹ.