Read idege INEHEMAYA 13 Bible Online

INEHEMAYA 13 - idege bible

INEHEMAYA 13

¹Ẹnụ ọlẹ kị wa ụpwụ nya Ehile nya iMosisi dodehe ha angịnyị wo, ị yẹ kị da ẹ-ẹgẹhẹ nya Ehile ya nyị rigọgọ nya ala Amọn lee ala iMowabụ ọ-ka yẹjula angịnyị nya Ohe Oluhye.

²Ang odudu ri alụma ịwẹ-ẹ́ myị ya ang oriri bala enyi ọnwanwa ha ala Isirẹlụ ụka kị juwa jẹ kpehe bwu Ijipiti ka. Ọkọkọ nya ọọwa, ị lẹẹ diro ịBẹlam kọ ka gọlọ jwaa. Ohe Oluhye nyahị tị yẹ ọlọ ọọwa la ahị ọwawa.

³Ụka ká ala Isirẹlụ wo ọwawa nya ehile ọọwa lẹ, ị ku angịlẹ ká ọmwụ nyaa-á bwu Isirẹlụ-ka rụ lẹlẹ.

⁴Ene nya ụka ọwẹ, ị lẹẹ hu Eliyachibu ọngọkiliya kọ ri ọọnịna nya iTobiya ri olegbeju ọkpẹhị rịrị ebe ị-ya ang guru ilube ịgọgọ.

⁵Ụka ọọwa, ọ pẹhi ube ọ-ya ang guru o-ju ẹpwụ gbamgbam ọhẹ da ha iTobiya. Ang ịlẹ ịnọ kị kaa kpa guru u-ube ọọwa ri ọhaha nya ajẹ nya ambakpa bala ịtangare bala ịja ịlube ịgọgọ bala ajẹ nya ang-ẹrụ ịlẹ kị ya ha ọhaha nya ookpokpo ẹ-ẹpwụ nya iwo bala ere bala ida nya olivu ịlẹ kịị ya ha ala iLivayị bala angị mwu eje bala angịgbeji.

⁶Ụka ọwẹ lẹ, ḿ juwa i-iJerusalẹm ka. M̀ lẹẹ tịrẹkpẹ ka ẹga nya Atakịsẹkịsisi Adịrahụ ọtụka nya ala ịBabịlọn ẹ-ẹpwụ nya ẹka iwo ịta kụrụ imiiye nya adịrahụ oriri nyamwụ. Ụka kọ tị nọ chẹẹ, m̀ bịlẹ kpụ ọ hi ẹga ham.

⁷Ọọwa, m̄ nyà wẹ iJerusalẹm lẹlẹ. Ụka ọọwa, m̀ yẹ uguru ẹla ọlẹ ká Eliyachibu họ nya ọ-pẹ hi ẹpwang ọhẹ u-Ube nya Amkpaa da ha iTobiya.

⁸Ẹla ọọwa jum agbama lụmẹ. M̀ go ang myị ang nya iTobiya chịịrụ hi ube ọ-ya ang guru ọọwa.

⁹Ọọwa, m̄ ya lẹ, ị da ịlọ hụ́ ebe ịịwa charị-charị wuu ene kịị kpa ang-abwọ ilube ịgọgọ bala ọhaha nya aje nya ang-ẹrụ bala ịtangare tịrẹkpẹ ka ụwa lẹlẹ.

¹⁰M̀ yẹ ịnyịnyị nyori ebwo nya ang ịlẹ kị hunọ nyọka kpa ha ala iLivayị kị ka kpa kpa ịlaa lẹ, ị́ kaa ya haa pwụ ọnụ nya ọọwa lẹ. Ọọwa du ká ala iLivayị bala angị mwu eje ịkpẹhị rịrị ịgba ọgbagba rụ ka ọlụmwọ ka ẹrụ nya ịlaa.

¹¹Ọọwa, m̄ ya ẹla ta alegbeju lọngịrị-ọngịrị juwa wụ ẹjẹ taa nyọlẹ kị ya ụkụrwọ olube ịgọgọ da abwọ-agịla lẹlẹ. M̀ wụrụ ala iLivayị bala angị mwu eje tịrẹkpẹ lẹ, m̄ byaa kị ka dọmwụ nya ụkụrwọ nyaa ọhọhọ lẹlẹ.

¹²Ụka ọọwa, ala iJuda wuu à dọmwụ nyọka kpa ọhaha nya ebwo ookpokpo ẹ-ẹpwụ nya iwo nya ajẹ nya ang-ẹrụ bala ere bala ida nya olivu nyaa wẹ Ube nya Amkpaa myịmyị lẹlẹ.

¹³Ụka ọọwa, m̀ chụ iChelemaya ọngọkiliya bala ịSadọkọ ọng mẹ Ehile jẹ bala iPedaya ọla iLivayị ọhẹ kị ka kpẹhị rịrị ebe ị-ya ang guru. M̀ chụ ịHanan ọnyị nya ịSakuu ọlẹ ká adamwụ ọgbahị ri ịMataniya kị ka ri alegbeju ịtụkụ yaa. Alẹng ịwẹ wuu ju ọdahịile. Ụkụrwọ nyaa ri ọ-ka gu ang okpo gịla ala iLivayị aanaa.

¹⁴Abwọ ọrịrị nyam ri Ohe Oluhye nyam ka kpịtịya nya ang ịnyịịla ịlẹ wuu kam họ-ọ̀ wẹ chajị nya Ube Ịgọgọ nyamwụ bala ịgba ọgbagba họọ.

¹⁵Ụka ọọwa, m̀ yẹ ká ala iJuda kaa chị ere nya alakọnụ Ẹnụtụrụ Ọhịnyọ Lụkụrwọ. Angịkịla kaa ju olo nya ambakpa bala ere bala alakọnụ bala ikiledu bala ụma nya ang datị-datị gọọọ chụ ibyiyó juwa kpa ka iJerusalẹm Ẹnụtụrụ Ọhịnyọ Lụkụrwọ ịnyịnyị. M̀ daa ọna ya ọngọngọhẹ ā ya ịngịngịhyẹ ra Ẹnụtụrụ Ọhịnyọ Lụkụrwọ koo.

¹⁶Ala ịTaya ịhyẹ kị kụ i-iJerusalẹm kaa kpa iyenyi bala ẹchẹ nya ang nya ọhị datị-datị warị juwa kpa ha alịnyahị ra Ẹnụtụrụ Ọhịnyọ Lụkụrwọ.

¹⁷M̀ ya ẹla ta alegbeju nya ala iJuu lọngịrị-ọngịrị yẹkẹẹ, “Ụma nya ang onyobyi ọlanyị anụ tị́ wẹẹ họ ịnyị, kanụ juwa bịrị ehile nya Ẹnụtụrụ Ọhịnyọ Lụkụrwọ ịnyị mẹ?

¹⁸Ịwẹ-ịwẹ adanụ ịgọgọ anyị à họ du kà Ohe Oluhye nyahị kpa akama ọtụka ọlẹ chịhị ọgụ bala epweji ọlẹ lẹ. Anụ tị jam bẹẹdọ nya agbama nya Ohe Oluhye chị Isirẹlụ gụ olene bwula ọ-chị Ẹnụtụrụ Ọhịnyọ Lụkụrwọ ịrị.”

¹⁹Ụka ọọwa, m̀ da ehile kị ka tụ ogirigba i-bwu ka epweji wuu ku lewu-obyi ene nya Ẹnụtụrụ Ọhịnyọ Lụkụrwọ, kị ka wụrwaa ka gbee ká Ẹnụtụrụ Ọhịnyọ Lụkụrwọ ka cheju. M̀ chụ alụkụrwọ nyam ịhyẹ gbeji ogirigba ịịwa ịnyịnyị, chajị ká ọngọngọhẹ-ẹ́ ka kpa ang nya ọhị wẹ iJerusalẹm ẹnẹwẹ ka.

²⁰Ụka ịmanyị-ịmanyị ịhyẹ juwa ká alọhị ịhyẹ hyehe lodu odehe nya iJerusalẹm lolo nya ọhị nyaa.

²¹M̀ daa ọna byaa yẹkẹẹ, “Ịyẹ tị́ du kanụ jam hyehe am̀ ẹgẹlẹ gbee ká ahị ka pyẹ-ẹ̀? Ánụ ma ẹlẹwẹ họ aalẹ, m̀ ka yụbwọ baanụ.” Bwu ụka ọọwa kịlahị lẹ, ị́ mwẹẹkpẹ warị Ẹnụtụrụ Ọhịnyọ Lụkụrwọ kaka.

²²M̀ byi ala iLivayị kị ka da ịlọ hụ́ ịlaa charị-charị kị ka wẹ kaka gbe ogirigba nya Ube nya Amkpaa Ẹnụtụrụ Ọhịnyọ Lụkụrwọ, chajị ká angịnyị ka kpọọ lịgọgọ. Abwọ ọrịrị nyam ri Ohe Oluhye nyam ā kpịtịya nya ang ọnyịịla ọwẹ ịnyịnyị, kọ họm ọnahị ajị nya ọháha o-gbu enyi-ka nyamwụ mẹ.

²³Ụka ọwẹ ịnyịnyị, m̀ yẹ nyori ala iJuu lụmẹ-lụmẹ lẹẹ ye ịhụ bwu Achịdọdụ bala Amọn bala iMowabụ.

²⁴Ẹhya nya anjwo nyaa kaa ya oja nya ala Achịdọdụ lee oja nya angịkịla ịhyẹ. Ị́ jẹ ya oja nyahị ahị ala iJuda kpong-kpong ka.

²⁵M̀ ya ẹla taa lọngịrị-ọngịrị, kpụ m̄ yọnụ haa. M̀ nyaa enyiri, gbilaa inyi chichiichi. Ọọwa, m taa tutu kaka nwa iro lẹnyị nya Ohe Oluhye nyori ịwa lee anyị nyaa-á ka ye awụlẹ bala alẹpwụma ịkịla ẹnẹnẹhẹ kaka lẹlẹ.

²⁶M̀ byaa yẹkẹẹ, “Ánụ jẹ ká anyang i-bwu ụma ịkịla-à kpa iSolomọn Adịrahụ kaka họ ọhọbịrị lẹẹ ka-á? Adịrahụ nya alụma ọhẹ-lọhẹ-ẹ́ lala ọwa kaka. Ọ há Ohe Oluhye du kọ hwoo ri adịrahụ nya ala Isirẹlụ wuu. Tị kpọkpọọkpọ ịhụ ịlẹ kọ ye bwu odehe kpọọ kaka họ ọhọbịrị.

²⁷Lẹ, ahị gbịlanụ ẹ-ẹpwụ nya ang onyobyi ọhọhọ ọwẹ juwa ye ịhụ bwu ija ịkịla mẹ-ẹ̄ẹ́?”

²⁸iJoyada lẹẹ ri ọnyị nya Eliyachibu Olegbeju Okiliya. Ọnyị nyamwụ ọhẹ tị ye ọnyị nya ịSanbalatị ọla ịHọrọn. Ọọwa, m̄ kwoo rụ hi ịlahị nya ịlọm lẹlẹ.

²⁹Abwọ ọrịrị nyam ri Ohe Oluhye nyam ā kpịtịya jaabwọ kị chị iwe-ahụrụ nya ọngọkiliya oriri bala iro ọlẹ kọ nwa ta angịkiliya bala ala iLivayị ịrị, kọ yaa akama mẹ.

³⁰Ịịwẹ m̄ bwu hwaa charị-charị bwu ẹpwụ nya ang o-bwu ẹpwụma ịkịla lẹlẹ. M̀ ya kpẹẹkpẹẹ jaabwọ ká ọngọngọọng nya angịkiliya bala ala iLivayị ka bwu họ ụkụrwọ nyaa.

³¹M̀ hunọ jaabwọ ká angịnyị ka kpa ịwụ ị-kpa kịla iya warị ụka opwoku bala angịnyị ọ-ka kpa ọhaha nya ang-ẹrụ inyeewe warị ịnyịnyị. Abwọ ọrịrị nyam ri Ohe Oluhye ā kpịtịya nyam chajị nya ang ịnyịịla ịwẹ kam họ mẹ.