Read idege INEHEMAYA 2 Bible Online

INEHEMAYA 2 - idege bible

INEHEMAYA 2

¹Ẹnẹhẹ lọya nya iNisan ẹ-ẹpwụ nya ẹka iwo imiiye nya adịrahụ oriri nya Atakịsẹkịsisi, kọ juwa ri ang, m̀ kpa ere kịlọọ. Adịrahụ-ụ́ tị yẹm kam bwọ ayiiji ị-ịlahị nyamwụ ẹnẹhẹ ene nya ẹnẹwẹ lẹka.

²Ọọwa, adịrahụ à tọm wo yẹkẹẹ, “Ányị tị́ du ká bwọ ayiiji ịnyị alẹ-ẹ̀ ká ẹdụrụ-ụ́ tị jung ka? M̀ jẹ ká ẹlẹhẹ à wẹẹ ring ẹla ọ-ọkịlẹtụ.” Ụka ọọwa, m̀ ju uhi ọtụka-ọtụka.

³M̀ tị wẹ adịrahụ yẹkẹẹ, “Agaba Idu, à ka hịhị pwụ ụka myị ụka! Ang odudu kam wẹẹ bwọ ayiiji ri epweji ọlẹ ká iworu nya adam igogo anyị ji kpụ egwawụ-egwawụ wuu. Ị ta ọnụ-ogirigba nyaa wuu ayịreji hụrụ la ila.”

⁴Ọọwa, adịrahụ à byim yẹkẹẹ, “Ịịyẹ à tị́ ri ọbịlẹ-bịlẹ nyang wẹ ene-è?” Ụka ọọwa lẹ, m̄ raabwọ ha Ohe Oluhye olepwoohe lẹlẹ.

⁵Ọọwa, m̄ wẹ adịrahụ yẹkẹẹ, “Ó-ri kọ hang ahụ Agaba Idu, ká ẹla nyam-ḿ kpụng ịpyọ aalẹ, ya iwe da ham kam kele ka ọpyị nya iJuda ẹga kị ju adam igogo anyị eji chajị kam ka mọọ nwụ mẹ.”

⁶Ụka ọọwa, adịrahụ ọnyang hụhụ bọọ ba. Ọọwa, adịrahụ à tọm wo yẹkẹẹ, “À tị́ ka hụ tata ka ba anyị? Ụka oyina ā tị́ ka nyà?” Ụka kam chị ụka nọ ha adịrahụ lẹ, ọ ya ẹga da ham kam ka kele lẹlẹ.

⁷Ọọwa, m̄ byi adịrahụ yẹkẹẹ, “Ó-ri ká ka myị aalẹ, da ileta ham kam ka ya ha ịgọvụnọ ịlọmwẹnụ-obyi nya Ihu iYufuretisi chajị kị ka ya ẹga da ham kam ka chịpwụrụ kpoye bwu ọpyị nyaa gbee kam ka pwụ iJuda mẹ.

⁸Da ileta dum kịla Asafụ ọngọ kpẹhị rịrị ipyinu nya adịrahụ ịnyịnyị chajị kọ ka tụrụ ekeji ịhyẹ bwu ụwa ham nyọka ya họ ọnụ-ogirigba nya angịgbeji u-ube ịgọgọ mẹ. M̀ ka ya ekeji ịịwa họ ọnụ-ogirigba nya ugulọ ọdagaga ju epweji bala ịnya ẹpwa ọlẹ kam ka kụ.” Ụka ọọwa, adịrahụ ọtụka ya ang myị ang ịlẹ kam bịlẹ wuu ham, chajị Ohe Oluhye juwa tam.

⁹Ọọwa, adịrahụ à chụ alegbeju nya angịdẹwụ ịhyẹ bala angị kpa anyịrẹ dẹwụ kpam chị lẹ, m̄ jẹ gbee kaka pwụ ọpyị ọlọmwẹnụ-obyi nya Ihu iYufuretisi lẹ, m̄ ya ileta nya adịrahụ ha ịgọvụnọ ịlụwa lẹlẹ.

¹⁰Ụka ká ịSanbalatị ọla ịHọrọn bala ịTobiya olegbeju o-bwu Amọn tị wo am nyị warị nyọka họ ká iwe-ahụrụ nya ala Isirẹlụ nyị ka hagụ olene, ọ waa ẹjẹ lụmẹ.

¹¹Ụka kam pwụ iJerusalẹm ri ẹnụtụrụ ịta lẹ,

¹²m̄ wuleji kpehe lepwodu lẹlẹ. M̀ kpa alẹng angị ịmanyị-ịmanyị ba ịlọm. Ḿ tị ya je ọngọngọhẹ ang ọlẹ ká Ohe Oluhye nyam byim ọ-ọkịlẹtụ nyọka họ ha iJerusalẹm kpong-kpong ka. Obyiyó ọlẹ kam kụ u-uhye nyamwụ kẹnẹ-kẹnẹ à ri iyo oleji ọlẹ kahị kpa dịrẹ ịlọhị lẹlẹ.

¹³Lodu ọọwa, m̄ kpehe bwu ogirigba ọlọkpọọ ọ-ọmwẹnụ-obyi lẹ, m̄ jẹ yahị da ka edii kpoye nya ụ́gbụ nya enyi nya ịdịragọn kele ka pwụ ogirigba nya ọtẹwụụ lẹlẹ. Ụka ọọwa, m̀ wụla egwalọ ịlẹ kị tụrụ beji bala ọnụ-ogirigba ịlẹ kị rụ ila hụrụ yẹ.

¹⁴Ụka ọọwa, m̀ jẹ koye nya ẹtẹ yahị da ka ogirigba nya Ụ́gbụ nya Enyi lalaala ka pwụ Ẹmwụ-enyi nya Adịrahụ. Ẹgẹgẹhẹ-ẹ́ tị hi ụ-ụwa obyiyó nyam ka kpoye bwu kpong-kpong ka.

¹⁵Ọọwa, m̄ kụ obyiyó ju ka ọkpọọ nya iKidirọn lodu ọwẹ juwa wụla ugulọ yẹ ene kam jahị kpata nyà tịrẹkpẹ wẹ epweji bwu ogirigba nya ọkpọọ ọọwa lẹlẹ.

¹⁶Ụka ọwẹ lẹ, ọngọngọhẹ nya alegbeju nya epweji-í jẹ ẹga kam kà lee ang ọlẹ kam wẹẹ họ ka. Ang odudu ri ḿ ya je ọngọngọhẹ nya ala iJuu aanam tụ angịkiliya lee angị gbẹgbịlẹ lee alegbeju angịkịla ihihi ịlẹ kị wẹẹ ka kpa ụbwọ nya ịlaa họ ụkụrwọ ọwẹ lẹka.

¹⁷Ugbenyị lẹ, m̀ byaa yẹkẹẹ, “Anụ ayịdang tị́ yẹ ụma nya akama ọtụka ọlẹ kahị jam ẹ-ẹpwụ nyamwụ wẹ lẹ. Epweji nya iJerusalẹm kpụ egwawụ-egwawụ. Ọnụ-ogirigba nyamwụ ta ayịreji wuu lẹ. Lẹẹlẹ, āhị ma egwalọ nyamwụ me ká oyoyi ọlẹ ā rụ hiihi mẹ.”

¹⁸Ọọwa, m̄ ya jaa jaabwọ ká Ohe Oluhye nyam dam ụbwọ bala ẹla ọlẹ ká adịrahụ ọtụka byim lẹlẹ. Ọọwa, ị wẹm yẹkẹẹ, “Āhị dọmwụ nya ugulọ ọ-ma me mẹ.” Ọọwa, ị dọmwụ nya ụkụrwọ ọnyịịla ọọwa ọhọhọ lẹlẹ.

¹⁹Ụka ká ịSanbalatị ọla ịHorọn bala ịTobiya olegbeju ọla Amọn bala ịGẹchẹm ọla Arabụ wo obyi ọlẹ kahị mẹ, ị dọmwụ nya ọ-kpahị họ bala ọ-hụlọ ahụ juhi juwa byihi yẹkẹẹ, “Ịyẹ anụ tị́ wẹẹ họ ịịwẹ ene-è? Anụ juwa la egbeju-ọngịrị tụ adịrahụ pyịpyị lẹ le?”

²⁰Ọọwa, m̄ waa yẹkẹẹ, “Ohe Oluhye olepwoohe ka họ ang chịkpẹẹ hahị. Ahị anchẹ nyamwụ jam ka ma ugulọ ọlẹ me lẹ. Anụ tị lẹ, ánụ la ịngịngịhyẹ ám i-iJerusalẹm lee ọ-la ụbwọ-lẹta ẹ-ẹpwụ nya ẹlẹlẹhẹ nya alụwa ka.”