Read idege INEHEMAYA 3 Bible Online

INEHEMAYA 3 - idege bible

INEHEMAYA 3

¹Ụka ọọwa, Eliyachibu olegbeju okiliya bala angịkiliya aanamwụ dọmwụ nya ugulọ omeme. I me Ogirigba nya Ịkpịlọ kpá, chị ịgọgọ jwoo lẹ, ị kwaa ukpileku lẹlẹ. Ị chị ịgọgọ ju ugulọ ọlẹ kị me lalaala kaka pwụ Ube Oluhye nya Angị Ohu (100) bala Ube Oluhye nya ịHananẹlụ.

²Ala iJeriko me ugulọ o-yi ọwẹ yi lẹ, ịSakuu ọnyị nya Imri à me o-yi ịnya ala iJeriko yi ịnyịnyị lẹlẹ.

³Alogang nya ịHasẹnaa me Ogirigba nya Iyenyi. Ị ya ekeji nyaa weji bala o-kwaa ekpileku. Ọọwa, ị ya iloo bala ije ị-kpa da ekpileku chị kwaa ịnyịnyị lẹlẹ.

⁴Ugulọ ọ-ba ịnya ịHasẹnaa anyị ba ri ọlẹ ká iMeremotu ọnyị nya Uriya ma mẹ. IMeremotu ọlẹ ri ọnyị ọtụma nya ịHakọsị. IMechulam ọlẹ ka ẹnyị nya adamwụ ochiche ri iBerekiya, ká adamwụ-ọgbahị ri iMechesabẹlụ à ma ụpa nya ugulọ o-yi ọwẹ yi me lẹ. ỊSadọkọ ọnyị nya ịBaana me o-yi ọọwa yi ịnyịnyị.

⁵Ala iTekowa-à me ugulọ o-yi ịnya ịSadọkọ yi lẹ. Alegbeju ị-kụ ịlahị nya alụwa-á tị myị họ ụkụrwọ ọlẹ ká angịkpẹhị rịrị ụkụrwọ gà haa ka.

⁶IJoyada ọnyị nya ịPaseya bala iMechulam ọnyị nya iBesodeya-à nwụ̀ Ogirigba Onyogo[2] me lẹ. Ị ya ịtachị nyamwụ wu eji, ya ekpileku kwoo lẹ, ị ya iloo bala ije ị-kpa dọọ chị jwoo lẹlẹ.

⁷Angị me o-yi ịnyaa yi ri iMelatiya ọla ịGibyọn bala alẹng ịkịla bwu iGibyọn bala iMispa bala ịJadọn bala iMeronotu. Ẹga ịwẹ wuu ji ekpelẹji nya ịgọvụnọ ọkpẹhị rịrị imwawụ ọlọmwẹnụ-obyi nya iYufuretisi.

⁸Ọngọ họ ụkụrwọ ba angịwẹ ba ri Usiyẹlụ ọnyị nya ịHaraya ọlẹ kọ ri ọngọ hya ụwa nya okpoko ịgọm. Ọọwa, ịHananiya ọngọ họ ida ichoru kwọkwọ à me o-yaa yi lẹlẹ. Ị me[3] ugulọ nya iJerusalẹm lalaala ka pwụ Ugulọ Ọkpọ̀rị-kpọ̀rị.

⁹IRefaya ọnyị nya iHuu à nwụla ugulọ ọ-ba ọwẹ ba lẹ. IRefaya ọwẹ ri olegbeju nya ẹhya ọhẹ nya oye nya iJerusalẹm.

¹⁰IJedaya ọnyị nya ịHarumafụ me ugulọ ọ-ba ọwẹ ba ọlẹ kọ jahị da ẹpwa nyamwụ. Ọọwa, ịHatuchi ọnyị nya ịHachabuneya à nwụla ugulọ bọọ ba lẹlẹ.

¹¹ỊMalukija ọnyị nya ịHarim bala ịHachubu ọnyị nya ịPahatị-imowabụ à mẹ ụpa nya ugulọ ọkịla tụ Ube-oluhye nya Ila Ọ-tụju lẹ.

¹²Ọngọ me bọọ ba ri ịChalum ọnyị nya ịHalohẹchị. ỊChalum ọwẹ ri olegbeju nya ẹhya ọkịla nya oye nya iJerusalẹm. Ọwa bala anyị anyang nyamwụ à họ ụkụrwọ ọọwa lẹ.

¹³ỊHanun bala alepweji nya ịSanowa à nwụla Ogirigba nya Ọkpọọ lẹ. Ị nwọọ me wuu, kwaa ekpileku lẹ, ị ya iloo bala ije ịlẹ kị ka kpa daa chị kwaa ịnyịnyị lẹlẹ. Ị me ụpa nya ugulọ nyaa lala apatẹ ụnọ ookpokpo da apatẹ ohu ịta kụrụ iwo ịrụ (1350) lalaala ka pwụ Ogirigba nya Ọtẹwụụ.

¹⁴Ọnyị nya iRekabụ ọlẹ ká ẹnyị nyamwụ ri ịMalukija kọ ri olegbeju nya epweji nya ịBẹtị-ịhakẹrẹm à ma Ogirigba nya Ọtẹwụụ me lẹ. Ọ moo, kwoo ekpileku bala ọ-ya iloo bala ije ịlẹ kị ka kpa dọọ chị kwoo ịnyịnyị.

¹⁵Ọnyị nya iKoluhose ọlẹ kị wụrụ ịChalum kọ ri olegbeju nya epweji nya iMisipa à ma Ogirigba nya Ụ́gbụ nya Enyi me lẹ. Ọ moo, nwụ ịnawụ kụrwọọ kpá lẹ, ọ kwaa ekpileku bala iloo tụ ije ịlẹ kị ka kpa dọọ chị lẹlẹ. Ugulọ ọlẹga nya Ẹmwụ-enyi nya iChela ọlẹ kọ me ịnyịnyị ri ọlẹ kọ ba ẹrụ nya adịrahụ ba lalaala ka ju ka ọpwọpwọ o-bwu kpehe bwu Epweji nya iDevidi.

¹⁶Ọnyị nya Asubuku ọlẹ kị wụrụ iNehemaya olegbeju nya ẹhya nya oye nya ịBẹtịsuu me ugulọ ọ-ba ọwẹ ba jahị da iwori nya iDevidi lalaala kaka pwụ ẹmwụ-enyi ọlẹ kị wuwu bala Ẹpwa nya Angịdẹwụ.

¹⁷Ala iLivayị ịlẹ à me ọgba nya ugulọ o-bwu ẹgẹwẹ kịlahị lẹ. IRehum ọnyị nya ịBani me họhẹ-họhẹ. ỊHachabiya ọlẹ kọ ri olegbeju nya ẹhya nya oye nya iKela me ugulọ o-yi ọwẹ yi ku ọmwakpa nya aloye nyamwụ.

¹⁸Ọọwa, ịBavayị ọnyị nya ịHẹnadadị à kpa ala iLivayị aanaa me ugulọ o-yi ọwẹ yi lẹlẹ. ỊBavayị ayịdang ri olegbeju nya ẹhya ọkịla nya oye nya iKela.

¹⁹Ẹsẹẹ ọngọ nya iJechuwa me ugulọ o-yi ọwẹ yi. Ọwa-à ri olegbeju nya epweji nya iMisipa lẹ. Ọ me bwu ẹga ojahị da ube nya ang-abwọ nya ẹwụ lalaala ka pwụ ẹga ká ugulọ yẹgẹmwụ bwu.

²⁰ỊBaruku ọnyị nya ịSabayị me bwu ẹga ọyẹgẹmwụ nya ugulọ ọwẹ kele kaka pwụ ọnang nya ẹpwa nya Eliyachibu olegbeju okiliya.

²¹IMeremotu ọlẹ ká adamwụ ochiche ri Uriya, ká adamwụ-ọgbahị ri ịHakosi nwụla ebwo nya ugulọ o-bwu ọnang nya ẹpwa nya Eliyachibu kele kaka pwụ ọbaba oloye ọkịla nya ẹpwa ọọwa.

²²Angịkiliya-à me ugulọ o-bwu ẹgẹwẹ kịlahị lẹ. Angịkiliya ịlẹ kị kụ dagaga ju iJerusalẹm à me ebwo ọkịla lẹ.

²³IBenjamịn bala ịHachubu me ebwo ọkịla ị-ịlahị nya ẹpwa nyaa. Ọọwa, Asariya ọnyị nya ịMaaseya à me ọgba nya ugulọ ọlịkịka nya ẹpwa nyamwụ lẹlẹ. Ananiya-à ri adịda-ọgbahị nya Asariya ọwẹ lẹ.

²⁴IBinuwi ọnyị nya ịHẹnadadị me ugulọ o-bwu ẹpwa nya Asariya gbee pwụ ọyẹgẹmwụ nya ugulọ lalaala ka ịkpanggọ nyamwụ.

²⁵ỊPalalụ ọnyị nya Usayị me ugulọ yoo yi bwu ịkpanggọ nyamwụ ẹ-ẹga nya ube-oluhye nya ẹpwa nya adịrahụ oloye oluhye ba ọdọda nya angịgbeji ba. Ọọwa, iPedaya ọnyị nya ịParochi à me yi ọwẹ yi lẹlẹ.

²⁶Alụkụrwọ ịla Ube Ịgọgọ ịlẹ kị kụ ẹpwa i-ikiti nya Ofẹlụ me ugulọ yahị da ka ọmwẹnụ-ụtụrụ ba Ogirigba nya Enyi ba bala ube-oluhye.

²⁷Ala iTekowa me ugulọ ebwo oheeye nyaa yi ọwẹ yi. I me jahị da ube-oluhye o-ke Ube Ịgọgọ kele ka yi ugulọ nya Ofẹlụ.

²⁸Oye oluhye nya Ogirigba nya Ụnyịrẹ tị lẹ, angịkiliya họ ụkụrwọ ụ-ụwa. Ọngọngọọng nyaa me ugulọ ọlẹ kọ jahị da ẹpwa nya ịlọmwụ.

²⁹ỊSadọkọ ọnyị nya Imẹẹ me ugulọ o-yi ọwẹ yi ọlẹ kọ jahị da ẹpwa nyamwụ. Ọngọ me ugulọ yi ọwẹ yi ri iChemaya ọnyị nya iChekaniya. IChemaya ọwẹ ayịdang à ri ọngọgbeji nya Ogirigba Ọlọmwẹnụ-ụtụrụ lẹ.

³⁰Angị me ugulọ o-yi ọwẹ yi ri ịHananiya ọnyị nya iChelemiya bala ịHanun ọlẹ kọ ri ọnyị ọlẹng ọharwọnyẹ nya ịSalafụ. IMechulam ọnyị nya iBerekiya à me o-yi ịnyaa yi lẹ. Ọ me ugulọ ojahị da ẹpwa nya ịlọmwụ mịlẹ-mịlẹ.

³¹ỊMalụkija ọngọhẹ nya angị hya ụwa nya okpoko ịgọm me ịnyamwụ bwu ẹgẹwẹ kaka pwụ ẹpwa nya alụkụrwọ ilube ịgọgọ bala ịnya alọhị ọlẹ kọ jahị da Ogirigba Ọ-wụla Ang Yẹ lalaala ka pwụ ube ọlẹ kị nwụ rịrị u-uhye nya ịkpanggọ nya ugulọ ọwẹ.

³²Angị hya ụwa nya okpoko ịgọm bala alọhị à me ugulọ ọlapewa nya ube ọlẹ kị nwụ rịrị ị-ịkpanggọ nya ugulọ ọwẹ bala Ogirigba nya Ịkpịlọ lẹ.