Read idege INEHEMAYA 4 Bible Online

INEHEMAYA 4 - idege bible

INEHEMAYA 4

¹Ụka ká ịSanbalatị wo ahị ala iJuu nyị juwa ma ugulọ nya iJerusalẹm me, agbama nyamwụ wuru pwuu. O juwa kpahị họ lẹlẹ.

²Ọọwa, ọ juwa ya ị-ịlahị nya aligu nyamwụ bala angịdẹwụ nya ịSameriya yẹkẹẹ, “Ịịyẹ anụ ala ịJuu ịdẹwụ-dẹwụ ịwẹ à tị́ wẹẹ họ ene-è? Anụ juwa ma epweji ọlẹ nwụ kanụ ka kịla iya ụ-ụwa ẹnụ alẹ-alẹ-ẹ̄ẹ́? Anụ ka jẹ-ẹ̀ gba ajwọ ị-kị kụ ogu gbudum rụ ila rụ ila ịwẹ kpehe kaka nwụ ang myịmyị-ị̄ị́?”

³ITobiya ọla Amọn kọ hụ bọọba-à ya ịnyịnyị yẹkẹẹ, “Chàááà! Ang à wẹ kịị họ ene lẹ-ẹ́? Otenyi-ogbo amamadiroko-ó domwụ gbajị chị ugulo ọlẹjwọ-ẹjwọ nyaa ọwẹ, ọ́ ka tụrụ gbedem ka-á?”

⁴Ọọwa, m raabwọ yẹkẹẹ, “Ohe Oluhye nyahị ee, wo jaabwọ kị wẹẹ kpahị họ wẹẹ! Aa ji ọkpahọ nyaa ọwẹ kpata ka uhye-egbeju nya ịlaa. Ya iwe da ká aluji ā waa kpa rụ nya anyịhị ka ọpyị ọkịla.

⁵Ā gu ahị gboo hi ang onyobyi ọlẹ kị wẹẹ họ ka. Ā hịnyọhi ịhọbịrị nyaa koo, chajị ị du agbama jung ị-ịlahị nya alụkụrwọ nya ube omeme.”

⁶Ọọwa, ahị kịnyaa lugulọ nya iJerusalẹm omeme gbee ka pwụ ẹhya nya uhye ọlala nyamwụ lẹlẹ. Ang odudu ri angịnyị wuu họ ụkụrwọ lọkịlẹtụ ookpokpo.

⁷Ụka ọọwa, ịSanbalatị bala iTobiya bala ala Arabụ bala ala Amọn bala ala Achịdọdụ wo ahị nyị juwa kịnyaa lụkụrwọ nya ugulọ nya iJeruslaẹm omeme bala ọ-tụ ẹga ká ugulọ bene wuu ku lẹ. Ẹla ọọwa waa ẹjẹ lụmẹ.

⁸Ọọwa, i me obyi lawụlẹ nyọka wẹ kaka dẹwụ ta epweji nya iJerusalẹm, chajị ká ojigi-jigi ka juwa lẹlẹ.

⁹Ahị tị raabwọ ha Ohe Oluhye bala ọ-chụ angịnyị gbeji lodu bala alẹnụ.

¹⁰Ọọwa, ala iJuda-à yẹkẹẹ, “Ọngịrị gụụhị myị lolo ọkpakpa lẹ, ajeyi bala ikpichi-egwalọ tị hi lụmẹ la ọ-tụ hụrụ wẹẹ, ahị ka jụ ugulọ ọlẹ me cheju myị-ị̄ị́?”

¹¹Aluji nyahị juwa ya, “Anụ bahyaa kpa odu mẹ. Ene kị ka jẹ juhi kpá, ahị ka pwọ ju ka ẹpwụ nyaa wurum kahị ka nwaa chajị ká ụkụrwọ nyaa ọwẹ ka dayi lọhọhọ.”

¹²Ụka ọọwa, ala iJuu nyahị ịlẹ kị kụ ju aluji nyahị chwẹẹ kaa warị kịla ụka ohu kụrụ iwo kaka baahị ụbwọ ụ-ụrụ yẹkẹẹ, “Ị juwa ka wẹ bwu ịkịka ọnyị myị ọnyị kaka danụ ẹwụ.”

¹³Ọọwa, m̄ chụ angịnyị kụ ẹgẹgẹẹga ká ugulọ hi lomeme ẹ-ẹga ịlẹ kị la bẹdẹẹ lẹlẹ. Ị gbeji ugbiyegu-ugbiyegu lige bala awangga bala eda nyaa ụ-ụbwọ.

¹⁴Ụka kam kụ ẹhị yẹ iwe-ahụrụ ọwẹ chịng lẹ, m̄ wụrụ angịnyị bala ịbagọ ịlẹpwụ nyaa tụ alegbeju nyaa lẹ, m̄ byaa yẹkẹẹ, “Ānụ ju uhi nya aluji nyahị koo. Anụ kpịtịya nya Ọngọlahị ọngọlẹ kọ lụmụmẹ bala ọ-la uhi-uhi. Ọwa-à ya aananụ bala anyị nyanụ bala ịhụ nyanụ tụ ẹpwa nyanụ dada lẹ.”

¹⁵Ụka ọọwa, aluji nyahị wo ahị nyị jẹ jwaa nya obyi ọlẹ kị juwa me yahị dahị. Ị jẹ ká Ohe Oluhye da obyi nyaa ẹta chọpyị lẹ. Ọọwa, ahị wuu à rụ tịrẹkpẹ kaka họ ụkụrwọ nyahị lẹlẹ.

¹⁶Bwu ụka ọwẹ kịlahị, ẹhya nya angịnyị nyam juwa kaa họ ụkụrwọ, ẹhya ọkịla kụ giri-giri juwa gbeji lawangga bala akụmada bala eda bala ịwụrụ iloje-oje nyaa. Alegbeju wuu kụ ẹ-ẹkpẹ nya ala iJuu

¹⁷ịlẹ kị juwa kpa ugulọ me. Angịlẹ ká ụkụrwọ nyaa ri ọ-ka go ang-abwọ tọ alụkụrwọ wẹwẹ lẹ, ị kpa olo nya ang ịịwa ụ-ụbwọ ọhẹ, kpa ang-abwọ nya ẹwụ ụ-ụbwọ ọkịla.

¹⁸Ọng myị ọng nya angị me ugulọ wuu ya oge nyamwụ chị ọhụ juwa kpa ụkụrwọ họ. Ọngọ ka chị opyike ó-ri ká ẹla-á ji godayị bam ba.

¹⁹Ụka ọọwa, m̀ byi alegbeju bala ịbagọ bala angịnyị wuu yẹkẹẹ, “Ụkụrwọ ọlẹ pyẹ ẹpwụ kpanggbaa lụmẹ lẹ. Ahị tị kụ dana-dana-dana hi awụlẹ tụ ugulọ da.

²⁰Lẹẹlẹ, ụka kanụ wo opyike lẹ, anụ yoko myọọ yahị da wẹ ẹga ọọwa kaka tọhị mẹ. Ohe Oluhye nyahị ka ma uya hahị.”

²¹Ẹnụ myị ẹnụ wuu ahị kaa dọmwụ nya ụkụrwọ lịwọọwọ nyà lichirere. Ẹhya nyahị juwa họ ụkụrwọ, ẹhya ohihi juwa gbeji.

²²M̀ byi alegbeju nya ụkụrwọ bala angị myị ẹrụ haa kị ka hyehe ẹ-ẹpwụ nya epweji nya iJerusalẹm lodu. Ọọwa du kị ka jẹ-ẹ̀ gbe epweji lodu bala o-kpehe kaka họ ụkụrwọ lẹnụ.

²³Ụka ọwẹ wuu, am lee ọngọngọhẹ lẹpwụ nya aanam lee anchẹ nyam tụ angịgbeji ịlẹ kị juwa tam-ḿ pwọ awụrụ ọhẹ hu ọkịla kụrụ ka. Ọng myị ọng kpa ang-abwọ nya ẹwụ nyamwụ ụ-ụbwọ, ó-ri enyi ri kị juwa kaka chị nwà.