Read idege INEHEMAYA 5 Bible Online

INEHEMAYA 5 - idege bible

INEHEMAYA 5

¹Ụka kọ nọ chẹẹ pwụ ụka ọhẹ, alẹng lụmẹ-lụmẹ bala ịhu nyaa juwa chị eru u-uhye nya ọhọhọ nya ala iJuu aanaa.

²Angịhyẹ juwa yẹkẹẹ, “Anjwo nyahị ju iru lụmẹ. Ahị tịtọ nya ambakpa kịịwa wuu ka ye ang ri kpụ ịlaa kị ka jẹ-ẹ̀ hị.”

³Angịkịla juwa yẹkẹẹ, “Uhi lụmẹ lẹ, ahị go ịpyị nya ẹrụ nyahị bala ẹrụ nya alakọnụ tụ ẹpwa nyahị bọkpa ene kahị wẹẹ ye ang oriri ri lẹ.”

⁴Angịwụlẹ juwa yẹkẹẹ, “Ahị dọmwụ kpịla okpoko ene kahị ye ang nyẹ ẹpwa ha adịrahụ u-uhye nya ịpyị nya ẹrụ bala alakọnụ nyahị.

⁵Aala iJuu ụma ookpokpo āhị ri bala aanahị ka-á? Anyị nyahị á lala anyị nyaa ịnyịnyị ka-á? Tị yẹ wẹẹ, ahị go anyị nyahị haa-ā ra nya anyịhị. Ahị go anyị anyang nyahị ịhyẹ ra nya anyịhị kam̀ lẹ. Ẹẹla kahị ka ju ịngịhyẹ họ u-uhye nyamwụ à tị-ị̀ wẹ ka, chajị ị nuhi ịpyị nya ẹrụ nyahị tụ ẹrụ nya alakọnụ nyahị lẹ.”

⁶Ụka kam wo eru ọchịchị nyaa ịwẹ, ịkẹjẹ wụm lụmẹ ka kpoye.

⁷M̀ kụ ẹhị yẹ ẹlẹwẹ chịng-ng lẹ, m̄ ya ẹla ta alegbeju bala angị ri ịbagọ ẹ-ẹpwụ nya angịnyị lẹlẹ. M̀ byaa yẹkẹẹ, “Anụ jam yẹ ala iJuu aananụ ụhị bwula ọ-chaa okpoko ọlẹ kị ka haju u-uhye nya okpoko ọlẹ kị wẹẹ kpịla bwu ẹga nyanụ!” Ọọwa, m̄ wụrụ ọhụhụ ọtụka-ọtụka nya alụma nyọka ya ẹla ọọwa lẹlẹ.

⁸Ọọwa, m̄ byaa yẹkẹẹ, “Ahị maga jaabwọ kahị ka ma kaka ba myị kpụ ahị ra ala iJuu aanahị ịlẹ kị ya ịlaa rịra angga lẹ. Anụ tị jam tụ aananụ tutu kpụ ị juwa ya ịlaa hanụ anụ aanaa ra! Kahị ka myịmyị-ị̀ raa tịrẹkpẹ lee anyị anụ tị́ ya ẹ-ẹpwụ nya ọọwa?” Alegbeju ịwẹ wuu hu ujiji kpini-kpini, chajị ị́ ye ẹlẹlẹhẹ ka ya kpong-kpong ka.

⁹Ọọwa, m̄ byaa yẹkẹẹ, “Ang ọlẹ kanụ wẹẹ họ-ọ́ pwoku koo. Ọ chịla kanụ ka ju ihi nya Ohe Oluhye, chajị ká ẹpwụma ịlẹ kị ri aluji nyahị-ị́ ka jẹ-ẹ̀ ye ẹga yẹta rịrị nyọka kpahị họ ka.

¹⁰Am kpangga bala aanam alụkụrwọ nyam kaa ya okpoko bala ambakpa kpịla ịnyịnyị. Āhị tị ba hi ẹla nya okpoko o-ju ọhị ụma ọwẹ gbanggbang mẹ.

¹¹Anụ tịrị ịpyị nya ẹrụ bala ẹrụ nya alakọnụ nyaa bala ẹrụ nya olivu nyaa bala ẹpwa nyaa ẹkpẹ haa i-ijata-ijata mẹ! Anụ tịrị okpoko ọ-haju ọlẹ kanụ-ụ̀ chaa u-uhye nya okpoko bala ambakpa bala ere bala ida nya olivu ịlẹ kanụ kaa ya kpịlaa ẹkpẹ ịnyịnyị mẹ.”

¹²Ọọwa, alegbeju ịịwa-à wẹ yẹkẹẹ, “Ahị ka họ jaabwọ ká ya wẹ lẹ. Ahị ka tịrị ang ịwẹ wuu ẹkpẹ haa lẹ. Áhị ka ka byaa ị nwụ uri ịlẹ kị kpa tịrẹkpẹ kaka.” Ọọwa, m̄ wụrụ angịkiliya lẹ, m̄ byi alegbeju bala ịbagọ ịwẹ lẹ, ị nwa iro ị-ịlahị nyaa nyọka họ ọnụ ọlẹ kị myị-ị̀ wẹ jịra lẹlẹ.

¹³Ọọwa, m̄ chị aba ọmwụmwụ nya awụrụ nyam pwuru-pwuru lẹ, m̄ yọnụ deeji haa yẹkẹẹ, “Ọng myị ọng kọ bịrị ọnụ ọmyịmyị ọlẹ aalẹ, Ohe Oluhye ā chị ọngọọwa pwuru-pwuru hụrụ pwẹpwẹẹpwẹ, kọ noo ịpyị bala ẹpwa nyamwụ wuu ịnyịnyị mẹ.” Ọọwa, angịlẹ kị juwa wuu à myị dooo yẹkẹẹ, “Amẹn!” lẹ, ị gwogbo ha Amkpaa lẹlẹ. Ọọwa, alegbeju ịwẹ à họ jaabwọ kị myị ọnụ lẹlẹ.

¹⁴M̀ lẹẹ ri ịgọvụnọ nya iJuda ẹ-ẹpwụ nya ẹka iwo kụrụ imiiye gbẹgbịlẹ, bwu ẹka iwo imiiye nya adịrahụ ọtụka oriri nya Atakịsẹkịsisi lalaala ka ju ka ẹka iwo ịta kụrụ imiiye nyamwụ. Lụka ọọwa wuu, am bala ọngọngọhẹ nya aanam-ḿ tị kaa ye ang oriri ọlẹ kị hunọ ham lala ịgọvụnọ ka.

¹⁵Angị ri ịgọvụnọ ene nyam ri olo ha alụma. Ị kaa ye and oriri bala ere bala okpoko onyoowuru iwo ine bwu ẹga nyaa ẹnụ myị ẹnụ. Anchẹ nyaa amamadiroko kụ uhye nya ọọwa juwa wu angịnyị lẹhyọ. Am-ḿ họ lala ịwa ka, chajị m̀ ju ihi nya Ohe Oluhye.

¹⁶Ọkọkọ nya ọọwa lẹ, m hu ịlọm lẹpwụ-lẹpwụ ha ụkụrwọ nya ugulọ ọlẹ omeme. Ḿ ra ọpyị ọhẹ-lọhẹ ha ịlọm ka. Angị họ ụkụrwọ tam wuu tịtị hu ịlaa ha ẹ-ẹpwụ nya ụkụrwọ ọwẹ ịnyịnyị.

¹⁷M̀ kaa kpa ala iJuu tụ alegbeju nyaa angị ohu da angị iwo ịrụ (150) lang oriri ẹnụ myị ẹnụ datị hi angga ịlẹ kị kaa jum wuu bwu ẹpwụma ịkịla.

¹⁸Ang oriri ọlẹ kọọ nwa ụga ahyẹẹnụ ookpokpo ha angịlẹ kam kaa kpa lang oriri wuu ri ẹna ookpokpo bala ịkpịlọ ịrwọnyẹ ịlẹ kị hye hiigu-hiigu bala iru nya anụ. Ẹnụtụrụ iwo ọnyị myị ọnyị m̀ ka ya ere haa ọlẹ kọ nwa ụga yẹẹyẹẹ. Ụga ọwẹ lụmẹ kpá odu ịnyị-ị̄, ḿ ye ang oriri ọlẹ kọ pwoku kam ka ye bwu ẹga nya alụma lala ịgọvụnọ ka, chajị m̀ jẹ jaabwọ ká olo myaa lụmẹ kaka ba ene.

¹⁹Ohe Oluhye ee, aa kpịtịya nya ang ịnyịịla ịlẹ kam họ ha angịlẹ wuu, chajị ká wahị kụrụm.