Read idege INEHEMAYA 6 Bible Online

INEHEMAYA 6 - idege bible

INEHEMAYA 6

¹Ụka ọọwa, ịSanbalatị bala iTobiya bala ịGẹchẹm ọla Arabụ bala aluji nyahị ihihi ịkịla wo ahị nyị me ugulọ kpá dọmwụ hi iwa pyee ẹ-ẹgẹgẹhẹ kaka. Ụka ọwẹ tị kpangga lẹ, áhị go ekpileku nya igirigba ku lẹka.

²Ọọwa, ịSanbalatị bala ịGẹchẹm à du ẹrụ tọm yẹkẹẹ, “INehemaya ee, kẹwẹ kahị tọ awụlẹ e-epweji ọhẹ ụteeji nya Ono wẹẹ.” M̀ tị jẹ ká ijẹẹhị ọlẹ kị kpa bwu họm ang à wẹ.

³Ọọwa, m̄ du alẹrụ kaka byaa yẹkẹẹ, “Ụkụrwọ ọlẹ kam kpa ụ-ụbwọ lẹẹ baba lụmẹ. Ḿ ka jẹ-ẹ̀ warị kaka yẹnụ koo. Ḿ ka wu ụkụrwọ ọlẹ dayị ajị nyọka wẹ kaka tọnụ kpong-kpong ka.”

⁴Ị ma ẹrụ ọwẹ du tọm ugbabwọ ine. M̀ tịtị wẹ du taa ịwẹ-ịwẹ.

⁵Ọọwa, ịSanbalatị à du ọnchẹ nyamwụ ọhẹ ẹrụ ẹpẹtẹ ọharụ tọm lileta ọ-da dodo lẹlẹ.

⁶Ẹla ọla ileta ọọwa yẹkẹẹ, “ỊGẹchẹm ya ọwa nyị wo kịị nyị juwa kpa ya kuuu tụ ẹpwụma ịbaahị ba da ya nyori ahụ bala ala iJuu nyị juwa tịtọ nyọka la egbeju ọngịrị tụ adịrahụ ọtụka pyịpyị, ịnyị nyaa du kaanụ nyị wẹẹ me ugulọ ọwẹ lẹ. Ị ya ịnyịnyị nyori ahụ nyị juwa ka hu ịlọng adịrahụ nyaa lẹ.

⁷Ọ ya ahụ nyị dọmwụ chụ alọmwụ ịlẹ kịị nyị ka yang dodehe i-iJerusalẹm lala adịrahụ nya iJuda lẹ. Adịrahụ ọtụka-á ka dayi la o-wo ẹlẹwẹ kokoo. Lẹẹlẹ, tụtụ kẹwẹ kam bala ahụ ā ya egbeju ke awụlẹ u-uhye nya ẹlẹwẹ mẹ.”

⁸Ụka ọọwa, m̀ wẹ du tịrẹkpẹ kaka byoo yẹkẹẹ, “Ọhẹ-lọhẹ nya ala ịwẹ ká ya wẹ wuu-ú ri ịnyịlẹhị ka. Ẹla ká kụ chịng meme ya bwu irya nya ịlọng à wẹ lẹ.”

⁹Ị juwa maga nyọka chị uhi juhi kị ka dahị ụkụrwọ yi. M̀ tị raabwọ bịlẹ ọngịrị bwu ẹga nya Ohe Oluhye.

¹⁰Ẹnẹhẹ, m̀ kele kaka yẹ iChemaya ọnyị nya iDelaya ọlẹ ká adamwụ ọgbahị ri iMehetabẹlụ. IChemaya ayịdang-ńgǹg kpehe bwu ẹpwa nyamwụ lụka ọọwa ka. Ọ tị byim yẹkẹẹ, “INehemaya ee, kẹwẹ kaahụ bala am ā kele kaka kpụ ịbaa ẹ-Ẹga Ọlịgọgọ u-Ube nya Amkpaa, kahị tụ agbayị wuu ku mẹ, chajị aluji nyang juwa wẹ kaka nwụng lobyi alẹ.”

¹¹Ọọwa, m̄ byi iChemaya yẹkẹẹ, “Ọngịnyị ọlala am ọlẹng ọlẹ à ka rụnyẹ rụ hi ang oluhi-uhi lẹ-ẹ́? Ọngịnyị ọlala am ka rụ ka Ube nya Amkpaa nyọka kpa ọhịhị nyam be-ēé? Ḿ ka ka koo.”

¹²M̀ kụ irya ju ẹla nyamwụ ọwẹ lẹ, m̀ jẹ ká Ohe Oluhye à doo ẹrụ ka. ITobiya bala ịSanbalatị a ya okpoko chọọ ikiri ju nyị yẹ ọmwụ ọwẹ lẹ.

¹³Ị diroo kọ ka chị uhi jum, chajị kam ka họ ọhọbịrị bwula ọ-ba irya nyamwụ jẹ. Ọọwa, ịwa-à ka kụ uhye nya ọọwa bịrịm ẹnyị bala o-jum ẹpẹ.

¹⁴M̀ raabwọ yẹkẹẹ, “Ohe Oluhye nyam ee, aa kpịtịya nya ang ịlẹ ká iTobiya bala ịSanbalatị anyị họ, ká yaa akama. Aa kpịtịya nya iNowadiya ọlọmwụ ọnyang tụ alọmwụ ịkịla ịlẹ wuu kị maga nyọka chị uhi jum, ká yaa akama ịnyịnyị.”

¹⁵Ahị họ ụkụrwọ ọwẹ jịra ẹẹnụtụrụ iwo ịrụ kụrụ imiiye lẹ, ahị chọọ eju ẹnụtụrụ iwo imiiye kụrụ ịrụ nya ọya nya Elulu lẹlẹ.

¹⁶Ụka ká aluji nyahị wo ụkụrwọ nyị cheju, ị chị bịlọọ, oyi jwaa, chajị ịwa wuu jẹ nyori ri bwula ụbwọ ọdada nya Ohe Oluhye ụkụrwọ ọwẹ nyaa cheju lẹ.

¹⁷Lụka ọwẹ wuu ká ụkụrwọ ọwẹ wẹẹ kịnyaa, alegbeju nya ala iJuu nya ala iJuu bala iTobiya kaa da ileta du tọ awụlẹ.

¹⁸Ang odudu ri iru nya ala iJuda ju ihi nyamwụ chajị nyọlẹ ká iChekaniya adamwụ-ẹpwa kọ ri ọnyị nya Ara ri ọla iJuu. Datị hi ọwẹ, iJehohanan ọnyị nyamwụ ye ọnyị nya iMechulam ọlẹ ká adamwụ ri iBerekaya.

¹⁹Ụka ọọwa, ị ka juwa mịla oja nya ang ịnyịịla ịlẹ ká iTobiya họ a-ahị nyam. Ị ka kpa ẹla myị ẹla kam ya kele kaka tịrọnụ joo. Ọọwa, ọ kaa mịla ileta da du tọm nyọka ch ị uhi jum lẹlẹ.