Read idege INEHEMAYA 8 Bible Online

INEHEMAYA 8 - idege bible

INEHEMAYA 8

¹Ụka kọ ka pwụ ọya ọharwiye kpá lẹ, ala Isirẹlụ wuu kụ e-epweji nya ịlaa-ịlaa lẹ̀. Ịwa wuu kele ka jịra i-iJerusalẹm i-ikpọdọda ọ-ba Ogirigba nya Enyi ba. Ọọwa, ị byi Ẹsịra akịraa nyị hu Ụpwụ nya Ehile ọlẹ ká Amkpaa ya du iMoses kịla ala Isirẹlụ kpehe mẹ lẹlẹ.

²Ọọwa, Ẹsira-à gboo kpehe kpa ka ịlahị nya alọjịra-jịra lẹlẹ. Alẹng bala anyang tụ anjwo ịlẹ kị nwà ọ-ka wo ẹla myị wuu lẹ à jịra ụ-ụwa ẹnụtụrụ ọhọhẹ nya ọya ọharwiye ọwẹ lẹ.

³Ọ godayị jahị da ikpọdọda ọlịlahị nya Ogirigba nya Enyi ọọwa juwa wa ụpwụ nya Ehile dodehe jaa bwu alụtụrụ pwurum gbee da ka ẹnụ ọrịrị ẹ-ẹpwayịrẹtẹ. Ịwa wuu ke ụrụ pịlẹẹ wo ọwawa nya Ụpwụ nya Ehile.

⁴Ẹsịra godayị u-uhye nya ẹkpa nya ekeji ọlẹ kị da chajị nya ọjịra-jịra ọwẹ. Alẹng ịlẹ kị godayị rịrị u-upwuriri nyamwụ ri ịMatitiya bala ịChẹma bala Anaya bala Uriya bala iHilikaya bala ịMaaseya. Angịlẹ kị dayị rịrị ụ-ụpụpịla nyamwụ rị iPedaya bala iMichẹlụ bala ịMalụkija bala ịHachum bala ịHachịbadana bala ịSẹkaraya bala iMechulam.

⁵Ẹsịra godayị u-uhye nya ẹkpa ọọwa langịnyị wuu jẹ yọọ gede-gede chajị ẹkpa luhye gụ ẹga kịịwa godayị. Ụka kọ pyẹ ụpwụ maa lẹ, ịwa wuu à dayị kọkọ lẹlẹ.

⁶Ọọwa, Ẹsịra-à gwogbo ha Amkpaa Ohe Oluhye ọtụka lẹ, angịnyị wuu à kpa abwọ nyaa ka uhye lẹ, ị myị dọọọ yẹkẹẹ, “Amẹn! Amẹn!” Ọọwa, ị hirikpẹẹ juwa gbịgba ha Amkpaa yahị cheji lẹlẹ.

⁷Ụka kị wuleji dayị kọkọ ẹ-ẹga kị kụ lẹ, ala iLivayị ịhyẹ à da Ehile wụlẹ ya jaa lẹlẹ. Ala iLivayị ịịwa ri iJechuwa bala ịBani bala iCherebiya bala ịJamin bala Akubu bala ịChabetayị bal iHodiya bala ịMaaseya bala iKelita bala Asariya bala iJosabadị bala ịHanan bala iPelaya.

⁸Ị wa bwu Ụpwụ nya Ehile nya Ohe Oluhye lẹ, ị yọọ da lọnụ dodehe, chajị ká angịnyị ka wo etu nya ẹla ọlẹ kị wẹẹ wa lẹlẹ.

⁹Ụka ká angịnyị wo o-ya dodehe nya Ehile, ọkịlẹtụ taa olujwo, ị dọmwụ nyọka jida. INehemaya ịgọvụnọ bala Ẹsịra akịraa bala ala iLivayị ịlẹ kị wẹẹ mẹ ang jẹ angịnyị tị byaa yẹkẹẹ, “Eheehe! Ānụ jida alẹ ọlẹ koo. Alẹ ri ẹnụ ọlịgọgọ ọ-chị ihi ju Amkpaa Ohe Oluhye nyanụ.”

¹⁰Ọọwa, iNehemaya-à byaa yẹkẹẹ, “Anụ rụ kele kanụ yụya bwula o-ri ụma nya ang oriri bala ọ-nwa ere ịlahịchang. Anụ ya ang du kịla angị la ang ka ri ka. Alẹ ri ẹnụtụrụ ọlịgọgọ ha Ọngọlahị. Ānụ bwọ ayiiji koo. Ọkẹkẹnị ọlẹ ká Amkpaa ya hanụ ka junu ọngịrị.”

¹¹Ọọwa, ala iLivayị à juwa ká angịnyị byaa yẹkẹẹ, “Anụ ba! Anụ ba! Ānụ jida ka. Alẹ ri ẹnụtụrụ ọlịgọgọ.”

¹²Ọọwa, angịnyị wuu à rụ ka ẹpwa kaka ri ang bala ọ-nwa ere lọkẹkẹnị juwa ga angịkịla ang oriri lẹlẹ. Ị họ ịnyị, chajị ị wo ẹla nya Ohe Oluhye bala ọ-jẹ etu nyamwụ lẹ.

¹³Ahị ọpyẹpyẹ ọọnamwụ kọ ri oheeye nya ọya ọharwiye ọwẹ, alegbeju nya ogang datị-datị bala angịkiliya bala ala iLivayị kele kaka tụguru a-ata nya Ẹsịra kị ka wụla Ehile yẹ rige-rige gụ ọọwa.

¹⁴Ụka ọọwa, ị yẹ jaabwọ kị da ẹ-ẹpwụ nya Ehile ọlẹ ká Amkpaa ya ha iMosisi nyori ala Isirẹlụ nyị ka kụ a-adáa lụka nya Ọhụhụ nya Adáa ọlẹ kịị la lọya ọharwiye.

¹⁵Ị jẹ ịnyịnyị nyori ị ka ya dodehe tụ epweji nyaa da wuu bala i-iJerusalẹm yẹkẹẹ, “Anụ kpehe kele ka uhye nya ikiti kaka chị apwụ nya ekeji olivu tụ olivu ịlẹpwamẹ bala ịnya ịmatụlụ bala ịnya ịrị bala ekeji ịkịla kanụ kpa nyà kaka nwụ adáa jaabwọ kị da ụ-ụpwụ nya Ehile mẹ.”

¹⁶Ọọwa, angịnyị à kpehe kaka chị ụpwụ nya ekeji kpa nyà lẹ, ị nwụ adáa chwecheeche rịrị ẹ-ẹpwayịrẹtẹ ọpapịla nya ẹpwang nyaa bala ọdọda nyaa bala ọdọda nya Ube nya Amkpaa tụ ikpọdọda ọlẹga nya Ogirigba nya Enyi bala ikpọdọda ọlẹga nya Ogirigba nya Ifurem lẹlẹ.

¹⁷Angịlẹ wuu kị nyà bwu ịBabịlọn nwụ adáa bala ọ-kụ ẹpwụ nyaa lụka nya Ọhụhụ nya Adáa ọọwa. Bwu ụka nya iJochuwa ọnyị nya iNun gbee da wẹ ụka ọwẹ, ọwẹ à ri nya ọgbanyẹ kị wẹẹ la ọhụhụ ọwẹ wẹẹ lẹ. Ọng myị ọng wuu chị ọkẹkẹnị lụka ọọwa.

¹⁸Bwu ẹnụ nya ọgbanyẹ gbee da ka ẹnụ ohyẹẹkpẹ nya ọhụhụ ọwẹ, Ẹsịra kaa wa Ụpwụ nya Ehile nya Ohe Oluhye. Ị la ọhụhụ ọwẹ jịra ẹẹnụtụrụ irwiye gbẹgbịlẹ. Ẹnụtụrụ ọhaneku lẹ, ị la ọjịra-jịra nya otuku jaabwọ ká Ehile ya lẹlẹ.