Read idege INEHEMAYA 9 Bible Online

INEHEMAYA 9 - idege bible

INEHEMAYA 9

¹Ẹnụtụrụ iwo imiiye kụrụ ine nya ọya ọharwiye ọwẹ-ọwẹ, ala Isirẹlụ wẹ kaka jịra myịmyị. Ugbẹnyị lẹ, ị hụ limyi, kụrụ ịwụrụ nya owuru ọkpakpa bala o-gu ịpyị chị ịlaa e-egbeju.

²Ị chị ịlaa ịgọ hi angga ịlẹpwụ nyaa. Ọọwa, ị godayị juwa ya ịhọbịrị nya ịlaa bala ịnya adaa igogo anyị dodehe lẹlẹ.

³Ị wa Ụpwụ nya Ehile nya Amkpaa Ohe Oluhye nyaa jaa lala awa ịta lẹpwụ-lẹpwụ. Ị tịtị ya ịhọbịrị nyaa dodehe bala ọ-gbịgba ha Amkpaa Ohe Oluhye nyaa ẹ-ẹpwụ nya awa ịta ịnyịnyị.

⁴Ẹkpa ọkịla ọhẹ juwa kị họ nya ala iLivayị. IJechuwa bala ịBani bala ịKadimyẹlụ bala ịChebaniya bala iBuni bala iCherebiya bala ịBani bala iKenani anyị godayị ụ-ụwa lẹ, ị juwa raabwọ gboo ha Amkpaa Ohe Oluhye nyaa lẹlẹ.

⁵Ọọwa, iJechuwa bala ịKadimyẹlụ bala ịBani bala ịHachabeneya bala iCherebiya bala iHodiya bala iChebaniya bala iPetahiya kị ri alegbeju nya ala iLivayị à dako wụrụ alụma byaa yẹkẹẹ, “Anụ wuleji kanụ gwogbo Amkpaa Ohe Oluhye nyanụ, anụ gwogbo họọ gbe oyi myị oyi! Ọng myị ọng ā gwogbo ha ẹnyị ọlụmụmẹ nyamwụ, ọwa ayịdang lụmẹ kpoye nya ogbo ọlẹ káhị-ị̀ jụ gwo họọ!”

⁶Ọọwa, Ẹsịra a yẹkẹẹ, “Ahụ kẹnẹ-kẹnẹ à ri Amkpaa lẹ, Ahụ à họ uhye-ọgba bala ịdịchụ ịlụwa lẹ. À họ ịpyị bala ihu bala ang ịlẹpwụ nyaa wuu, à ya ọhịhị ha ang wuu. alepwoohe wuu hirikpẹẹ gbịgba hang.

⁷Ahụ à ri Amkpaa Ohe Oluhye ọlẹ ká chụ Ebiram lẹ. À gbọọ kpehe bwu epweji nya Uu ọla ịBabịlọn, yẹ ẹnyị nyamwụ da kaka ri Ebiraham.

⁸À yẹ nyori ọ la kpẹẹkpẹẹ ẹ-ẹga nyang, À myị ọnụ họọ nyọka ya ọpyị nya ala iKenan họọ tụ ọpyị nya ala iHiiti bala ịnya ala Amọ bala ọpyị nya ala iPerisi bala ịnya ala iJebusi tụ ịnya ala ịGẹgachị, kọ ka ri ọpyị ọlẹ ká anyị ịtụma nyamwụ ka kụ. À họ ọnụ ọmyịmyị nyang jịra, chajị à ri ọlabwẹla ọnyịịla.

⁹“À yẹ akama ịlẹ ká adahị igogo anyị yẹ Ijipiti, à wo omyi nya ida nyaa Ihu Oletungkohyo.

¹⁰À họ ụkụrwọ ẹbyẹbyị bala ang-ẹjẹẹ tụ adịrahụ nya Ijipiti pyịpyị, bala alụkụrwọ nyamwụ bala angịnyị nyamwụ wuu, chajị à jẹ jaabwọ kị kpa angịnyị nyang nmaanmaa kaka ba, à họ ẹnyị nyang la ihi-ihi jaabwọ kọ la-à wẹ daalẹ.

¹¹À chị ihu ọtụka eku, angịnyị nyang jẹ ẹdịyẹ kpoye ọ-ọpyị ọchọrụ, à tị ya aluji nyaa byi enyi ụ-ụjẹ-ẹmwụ, ị kpụ myọ̀ọọ jaabwọ ká ẹjwọ kaa kpụ ka ọmwụ nya enyi.

¹²À kpaa labwụma nya egbamwụ lẹnụ, lụka nya odu ohihi à kpaa labwụma nya ila juwa ya ahịgboo ha ụgbẹyị ọlẹ kị juwa bwu.

¹³À hireji bwu epwoohe wẹ uhye nya Ọgbọdọ nya ịSayịnayị, à ya ẹla ta angịnyị nyang, à ya ehile ịnyịịla ịlahịchịng haa bala ọmẹjẹ ịlẹ kị ri nya ịlẹhị.

¹⁴À mẹ ehile chajị nya Ẹnụtụrụ Ọhịnyọ Lụkụrwọ jaa, bwula iMosisi ọnychẹ nyang à byaa kị ka kpa ehile bala ọmẹjẹ nyang wuu.

¹⁵“Imyi nwaa, à ya ịkaa bwu epwoohe haa ri, imyi-enyi nwaa, à ya enyi haa bwu ẹpwụ nya ẹjwọ. À byaa nyị ye ọpyị la mẹ— ọpyị ọlẹ ká myị ọnụ nyọka ya haa.

¹⁶Adahị igogo anyị tị hi ọbọọchẹ bala ọ-la egbeju-ọngịrị, ị́ myị ju ihi nya ehile nyang ka.

¹⁷Ị pwa ọ-ka ke ụrụ, ị deeri nya ụkụrwọ ẹbyẹbyị ịlẹ wuu ká họ. Ẹ-ẹpwụ nya egbeju-ọngịrị ọlala nyaa, ị chụ olegbeju ọkịla kọ ka kpaa tịrẹkpẹ ka ri anyịhị iJipiti. À tị ri Ohe Oluhye ọ-kaa hịnyọhi, à ri ọngọ la ọháha bala ọlọnahị, aa ju agbama hyaa ka, ọháha o-gbu enyi-ka bala ahyẹẹrwẹrwa nyang lụmẹ, á nyẹẹkpẹ daa ka.

¹⁸Ị họ ukpeku nya ẹna, juwa ya ọwa nyaa ri Ohe ọlẹ kịị nyị kpịwa bwu Ijipiti lẹ! Ị ya ala inyibyi lụmẹ-lụmẹ bang.

¹⁹Á tị nyẹẹkpẹ daa u-ugbileji ka Ajị nyọlẹ ka ahyẹẹrwẹrwa nyang lụmẹ lẹ, á tụụbwọ hyaa u-u, ahyẹẹrwẹrwa nyang lụmẹ Egbamwụ nyang kịnyaa juwa kpaa ụgbẹyị lẹnụ ila nyang nyang juwa ya ahịgboo ha ụgbẹyị nyaa lodu.

²⁰À kpa olegu ọnyịịla nyang mẹjaa jaabwọ kị ka họ, à ya ịmána haa ri ụka wuu, à ya enyi haa-ā nwa du ká imyi-enyi nyaa myị.

²¹À kpaa u-ugbileji ẹ-ẹpwụ nya ẹka iwo ine gbẹgbịlẹ, à họ ọbaba nyaa haa wuu, ịwụrụ nyaa-á gu ene jẹgụ-jẹgụ ka, ata nyaa-á mịrị ka.

²²“À daa ụbwọ ị kụrụ ịpyị bala ẹpwụma datị-datị, ị ye ịpyị nyaa gwọka-gwọka. Ị kụrụ ọpyị nya ịHẹchịbọn, ẹga ká iSihọn ri adịrahụ. Ị ye ọpyị nya ịBaachan, ẹga ká Ọọgụ ri adịrahụ.

²³À họ anyị nyaa pyebile, ju iru lala ịdịchụ iluhye-ọgba, à kpaa wẹ kaka kụ ọ-ọpyị ọlẹ ká myị ọnụ ha adaa igogo anyị.

²⁴Ị ye ọpyị nya iKenan la, à kụrụ angịlẹ wuu kị kụ ụ-ụwa ene. À ya alụwa bala ịdịrịhụ nyaa ju angịnyị nya ụ-ụbwọ, ị haa jaabwọ myị abwọ kọ háa.

²⁵Angịnyị nyang kụrụ epweji ịlẹ kị me egwalọ ju, ị nu ịpyị i-ju eyo nya alụwa, tụ ẹpwa ịlẹ ká ang-ụdụ myị̀ bala ịwẹẹlụ ịlẹ kị wu kpá ene, ẹrụ nya olivu bala ekeji ị-nwụ egbe ịkịla bala ẹrụ nya alakọnụ nya alụwa. Ị ri ang jaabwọ kọ háa kaka ba, du kị hye kpọbọ-kpọbọ, ị chị ọkẹkẹnị ju ang ịlẹ wuu ká ya haa.

²⁶“Angịnyị nyang-ńg tị myị jung ihi ka, ị la egbeju-ọngịrị tang. Ị nyẹẹkpẹ da Ehile nyang, ị nwụ alọmwụ nyang ịlẹ kị gbilaa ụbwọ ụ-ụrụ, byaa ya nyị nyà tịrẹkpẹ chịng ọgụ, ị ya ala inyibyi lụmẹ-lụmẹ bang.

²⁷Ọọwa, ā yaa ju aluji nyaa ụ-ụbwọ lẹlẹ. Ụka kị tị juwa yẹ akama, ị chị eko wụrụng, à wo laa bwu epwoohe. À yẹ ahyẹẹrwẹrwa nyaa nya ịlẹhị-ịlẹhị, à ya alegbeju haa ịlẹ kị chaa da bwu ụbwọ nya aluji nyaa.

²⁸Kpọkpọọkpọ, ẹ-ẹkpẹ nyọlẹ kị la okpunyi, ị họ ịhọbịrị bang myịmyị, à ya ẹga da aluji nyaa kụrwaa myịmyị. Ụka kị tị yẹ irya da kị chị eko bịlẹ ụbwọ ọdada nyang, à wo laa bwu epwoohe. Bwula ahyẹẹrwẹrwa ọtụka nyang, à chaa da ụka lụmẹ-lụmẹ.

²⁹À daa ọna kpá kị ka nyà tịrẹkpẹ kaka kpa ehile nyang, ọbọọchẹ nyaa-á tị myị ka lẹ, ị pwa ọmẹjẹ nyang deeji, ịnọ ehile nyang ọkpakpa tị kaa ya ọhịhị ha ọngịnyị. Ị pwụ lụpwụ okopyi e-egbeju, ị́ myị ju ihi nyang ka.

³⁰Bwu ẹka ka ẹka, à kaa ju ugbodu haa ọnahị, à ya olegu nyang kụ ta alọmwụ ịlẹ kịị daa ọna, ị tị ya arụ kpụ ịla, ọọwa, ā myịmyị yaa ju alọpyị ịkịla ụ-ụbwọ lẹlẹ.

³¹Ahyẹẹrwẹrwa nyang tị lụmẹ lẹ, á nyẹẹkpẹ daa lee ọ-taa ayịreji ka. À ri Ohe Oluhye ọlọnahị bala ọlahyẹẹrwẹrwa!

³²“Ohe Oluhye nyahị ee, à chakpa lụmẹ! À chakpa lọngịrị bala ọluhi-uhi! À kaa họ ọnụ ọmyịmyị nyang jịra kpẹẹkpẹẹ. Bwu ụka ká ịdịrịhụ nya ala Asiriya kụrụụhị chẹẹchẹẹ gbee daalẹ, ahị yẹ akama onyobyi-obyi, ịdịrịhụ nyahị bala alegbeju nyahị bala angịkiliya bala alọmwụ nyahị, tụ adahị igogo anyị bala angịnyị nyahị wuu yẹ akama. Ā myị ká akama ịwẹ wuu ā ri ẹla ọpyịnyẹng a-ahị nyang koo.

³³À họ kpakpa nyọlẹ ká yẹhị akama ịwẹ wuu, ahụ lẹ, à họ kpẹẹkpẹẹ, ahị à họ tịpyọ lẹ.

³⁴Ịdịrịhụ nyahị bala alegbeju nyahị bala angịkiliya nyahị tụ adahị igogo anyị wuu-ú kpa Ehile nyang ka. Ị́ ke ụrụ lehile bala ọmẹjẹ nyang ịlẹ ká ya haa ka.

³⁵À ya ẹga da haa ị la ịdịrịhụ nya ịlaa, ị́ tị myịng ẹrụ ka kpá liru nya ahị ọwawa ịla ká ya haa. À ya ọpyị ọgbamgbam o-ju eyo haa, ị́ tị myị mwụ ịnyọ hi ọhọbịrị ọhọhọ, ị wẹ kaka myị ẹrụ hang ka.

³⁶Ahị rị anyịhị lẹẹ alẹ am̀ ọ-ọpyị ọlẹ ká ya ha adahị anyị, ọpyị ọlẹ ká ang oriri dịda, ọọwa, āhị ri anyịhị lẹẹ ẹ-ẹga ká ang ịnyịịla ji lẹka le!

³⁷Iru nya ang oriri ịlẹrụ nyahị wuu, mwọọgịlẹ yẹ ri nya ịdịrịhụ ịlẹ ká ya kpẹhị rịrịịhị, chajị nyọlẹ kahị họ ịhọbịrị. Ị kpahị họ tụ iyo ileji nyahị jaabwọ myị abwọ kọ háa, ahị ji ẹpwụ nya uhila nya akama!”

³⁸Ajị nya ang ịlẹ kị họ-ọ̀ wẹ wuu lẹ, ahị jam myị ọnụ, dọọ ụ-ụpwụ lẹ. Alegbeju nyahị bala ala iLivayị nyahị tụ angịkiliya nyahị yụbwọ nyaa jwoo ẹ-ẹpwụ lẹ.