Read idege ẸSỊTA 1 Bible Online

ẸSỊTA 1 - idege bible

ẸSỊTA 1

¹Ọlẹ ri ọ-da ju nya ang ịlẹ kị họ lụka ká Ahesurọsị[1] ri Adịrahụ nya ala iPechiya bwu ọpyị nya Indiya lalaala ka ju ka ọpyị nya Itiyopyiya. Imwawụ ịlọpyị nyamwụ wuu la ohu da iwo imiiye kụrụ irwiye (127).

²Epweji nya iSusa à ri egbeju-ẹpwa ẹga ká Ahesurọsị hụ ri adịrahụ bwu lẹ.

³Ẹ-ẹpwụ nya ẹka ọhata nya adịrahụ oriri nyamwụ, ọ wụrụ ọhụhụ nya ang oriri ọtụka ha alegbeju ịtụkụ yoo bala alụkụrwọ nyamwụ bala angị ri ịgọvụnọ bala ịbagọ nya angịnyị i-bwu imwawụ datị-datị. Angịdẹwụ nya ala iPechiya bala ịnya ala iMidiya wẹ juwa ịnyịnyị.

⁴Ọ ya ụdụ ọkpụkpụ bala ụmụmẹ bala ọngịrị ọlala nyamwụ chehe haa ẹ-ẹpwụ nya ẹnụtụrụ ohu da iwo ineku (180) gbẹgbịlẹ.

⁵Ụka ká ọhụhụ ọwẹ myị kpá, adịrahụ wụrụ ọhụhụ nya ang oriri ọkịla ha alepweji nya iSusa wuu. Alụdụ bala alẹbyahị wuu wẹ. Ị juwa ẹ-ẹpwụ nya ọhụhụ ọwẹ jịra ẹnụtụrụ irwiye lẹpwụ-lẹpwụ ụ-ụwa ọdọda nya adịrahụ.

⁶Ị họ ẹgẹwẹ ịnyangga la ịpwụ ikeke inyiiwuru bala inyuukpuukpo ịlẹ kị ya iri ịnyịmịla gbuuu do bwọ ka wu ịmapẹ nya okpoko onyoowuru u-uhye nya ịtachị ịlẹ kị kpa ajwọ ịmabụ họ. Ekeji ị-da hụhụ ịlẹ kị họ lokpoko ịgọm bala okpoko onyoowuru ị ya da ọ-ọdọda nya adịrahụ lẹ. Ajwọ ịnyịịla ịlịnya ụma datị-datị ị kpa họ ọdọda wuu lẹ.

⁷Ị chị ere ha angga la ekeku nya okpoko ịgọm ụma datị-datị. Adịrahụ ya ere ha angga nwa pwụụpwụụ.

⁸Ọng myị ọng nwà jaabwọ kọ họọ i-ike nyamwụ. Adịrahụ lẹẹ da anchẹ ehile neeji ya nya ya ere ha ọng myị ọng jaabwọ kịị nyị tịtọ.

⁹Ụka ọọwa, ịVachịti adịrahụ ọnyang wụrụ ọhụhụ nya ang oriri ọtụka ha anyang ẹ-ẹpwa nya adịrahụ Ahesurọsị ịnyịnyị.

¹⁰Ẹnụtụrụ ọharwiye nya ọhụhụ nya adịrahụ Ahesurọsị, ọkịlẹtụ kpọọ nyii chajị ọ nwa ere kpụ ịlọmwụ. Ọọwa, ọ wụrụ alụkụrwọ[2] nyamwụ angị irwiye ịlẹ ka ẹnyị nyaa ri iMehuman bala iBisita bala ịHabona bala iBigita bala Abagịta bala iSetaa bala ịKaakasị

¹¹kị ka kpa ịVachịti adịrahụ wọọ lokpo adịrahụ e-egbeju nyamwụ lẹlẹ. ỊVachịti ayịdang ri ọnyang ọlụhị. Lẹẹlẹ, adịrahụ tịtọ kọ ka mọọ jẹ angga bala alụkụrwọ nyamwụ jaabwọ kọ há ụhị kaka ba.

¹²Ụka ká alẹrụ nya adịrahụ ya ẹrụ ọọwa je ịVachịti lẹ, ọ́ myị kele ka. Ẹlẹwẹ wụ adịrahụ ẹjẹ ọtụka-ọtụka.

¹³Jaabwọ kọ ri ọhọhọ nya adịrahụ nyọkaa wo la irya nya angịnyị u-uhye nya ẹla nya ehile bala ẹla ọkpàkpa ọhọhọ lẹ, ọ wụrụ alụkụrwọ ịlẹ kịị jwoo irya kọ ka wo laa ang ọlẹ kọ ka họ chajị nya ẹlẹwẹ.

¹⁴Angịịwa ri ịKachẹna bala ịChẹtaa bala Adịmata bala ịTaachichi bala ịMẹrẹsị bala ịMaasẹna bala iMemukan. Angị irwiye ịla iPechiya bala iMidiya ịwẹ à ri alegbeju ịtụkụ yoo ịgbẹgbịlẹ gụ wuu ọ-ọpyị nyamwụ lẹ.

¹⁵Ọ byaa yẹkẹẹ, “Am adịrahụ Ahesurọsị du anchẹ nyam ẹrụ tọ ịVachịti adịrahụ ọnyang. Ọ́ tị myị họ ẹla ọọwa ka. Ányị ehile à tị ya kahị ka họọ-ọ̀?”

¹⁶Ọọwa, iMemukan à byi adịrahụ bala alụkụrwọ nyamwụ yẹkẹẹ, “ỊVachịti ya ẹpẹpẹ jung ahụ adịrahụ bala alụkụrwọ nyang tụ alẹng ịlọpyị ọlẹ wuu lẹ!

¹⁷Anyang ịlọpyị ọlẹ wuu-ú wo ẹlẹwẹ, ị ka ju ọrwaa ẹpẹ. Ị ka yẹkẹẹ, ‘Adịrahụ Ahesurọsị tị́ da ịVachịti ehile kọ ka wẹ ẹga nyamwụ lẹ, ọ tị́ pwa.’

¹⁸Ụka ká ịhụ nya alụkụrwọ ịla iPechiya bala iMidiya-á ka wo ẹla nya ịVachịti ọwẹ, ị ka ju ọrwaa ẹpẹ ịnyịnyị. Ẹ-ẹga myị ẹga wuu, ịhụ-ụ́ ka myị-ị̀ ju ọrwaa ịhị kaka, ọọwa ka wụ ọrwaa ẹjẹ taa.

¹⁹Ó-ri kọ hang, ahụ Agaba Idu aalẹ, da ehile chajị ká ịVachịti-í ka wẹ ẹga nyang ẹnẹnẹhẹ kaka mẹ. Ya kị dọọ ẹ-ẹpwụ nya ehile nya ala iPechiya bala iMidiya ọlẹ kị ka jẹ-ẹ̀ nwọọ họ ẹnẹnẹhẹ kaka mẹ. Ọọwa lẹ, ká chụ ọnyang ọkịla ọlẹ kọ chịla gwọọ ku ọmwakpa nyamwụ mẹ.

²⁰Ụka ká anyang ịlọpyị ọlẹ wuu-ú wo o-ya dodehe nya ehile nyang ọọwa lẹ aalẹ, ó-ri ká ọrwaa-á ri alụdụ ri lee alẹbyahị, ịhụ nyaa ka jwaa ihi lẹ.”

²¹Irya ọwẹ há adịrahụ bala alụkụrwọ ịtụkụ yoo. Ọọwa, ọ họ jaabwọ ka iMemukan ya lẹlẹ.

²²Ọ da ụpwụ du ẹrụ ka imwawụ nyamwụ ọnyị myị ọnyị wuu loja bala ụpwụ ọdada nya alụwa kaka byaa ya ọrwahụ ọnyị myị ọnyị nyaa ri ayịbaba nya ẹpwa nya ịlọmwụ lẹ.