Read idege ẸSỊTA 2 Bible Online

ẸSỊTA 2 - idege bible

ẸSỊTA 2

¹Ụka kọ nọ chẹẹ, agbama nya adịrahụ Ahesurọsị pwuru. Ma, ọ tị juwa kpa irya me ju ọhọhọ nya ịVachịti bala ehile ọlẹ kọ da chajị nyamwụ.

²Ọọwa, angịhyẹ nya angị ju adịrahụ irya ịlẹ kị jwoo chwẹẹ à byoo yẹkẹẹ, “Agaba Idu ee, āhị tịtọ nya anjwo ịyang ị-há ụhị ịhyẹ hang mẹ.

³Ọọwa lẹ, ká chụ alụkụrwọ nyang bwu imwawụ ọnyị myị ọnyị nya ọpyị ọlẹ kị kpa anyang ịịwa kaka ju ẹ-ẹga kaa ya ịhụ nyang ju ám̀ i-iSusa egbeju-ẹpwa nya ọpyị ọlẹ mẹ. Hu ịHẹgayị ọlụkụrwọ[3] nyang ọlẹ kọọ kpẹhị rịrị anyang nyang kọ ya ida ịwụwụ nya ụhị haa mẹ, chajị ụkụrwọ nyamwụ à wẹ lẹ.

⁴Ọọwa lẹ, ā ka hu ọyẹẹnọ ọlẹ kọ hang gụ wuu ri adịrahụ ọnyang ku ọmwakpa nya ịVachịti lẹlẹ.” Irya ọwẹ há adịrahụ Ahesurọsị, ọọwa, ọ họ ịnyị lẹlẹ.

⁵Ụka ọọwa, ọlẹng ọla iJuu ọhẹ juwa epweji nya iSusa ká ẹnyị nyamwụ ri iModekayị ọnyị nya ịJayii. Ọ ri ọnyị ọtụma nya iKichi bala iChimeyi. Ọ bwu imwawụ nya iBenjamịn.

⁶IModekayị ri ọngọhẹ ẹ-ẹpwụ nya ogu nya angịlẹ kị kpa rụ ụka ká adịrahụ iNebukadinesa ọla ịBabịlọn wu iJehoyachin[4] Adịrahụ nya ala iJuda bwu iJerusalẹm.

⁷Ọnyị nya ọnyịnịna nya iModekayị ọhẹ juwa ká ẹnyị nyamwụ ri Ẹsịta. Ẹnyị nyamwụ la iHiburu ri ịHadasa. Ọnyị ọyẹẹnọ ọọwa há ụhị lụmẹ. Ụka ká adamwụ bala ịnamwụ gbu hyoo, iModekayị kpọọ nwa lala ọnyị nya ịlọmwụ.

⁸Ụka kị ya ehile nya adịrahụ dodehe, kị juwa kpa anyị ịyẹẹnọ lụmẹ-lụmẹ ka iSusa, ị kpa Ẹsịta juwa ẹ-ẹpwụ nyaa ịnyịnyị. Ị kpọọ kaka ju ẹ-ẹpwa ọlẹ kịị ya anyang nya adịrahụ ju ọlẹ ká ịHẹgayị kaa kpẹhị rịrị.

⁹Ẹla nya Ẹsịta há ịHẹgayị lụmẹ du ká ịHẹgayị họọ ọnahị. Ahyaahị, ọ dọmwụ nyọka họ Ẹsịta ịyang bala ọ-ya ang oriri ọdatị-datị họọ. Ọ ya Ẹsịta ju ẹ-ẹga ọhagụ wuu ẹ-ẹpwa nya anyang nya adịrahụ lẹ, ọ chụ anyang angị irwiye ịhyẹ bwu ẹpwa nya adịrahụ kị ka myị ẹrụ ha Ẹsịta lẹlẹ.

¹⁰IModekayị lẹẹ da Ẹsịta ọna neeji ene lẹ, Ẹsịta-á họ ọngọngọhẹ jẹ ọwa nyị ri ọla iJuu ka.

¹¹Ẹnụ myị ẹnụ wuu iModekayị kaa tụgaaa kịlahị nya ẹpwa nya adịrahụ ẹga kị ya anyang nya adịrahụ kụ, chajị kọ ka jẹ ó-ri ká Ẹsịta-á juwa lokpunyi.

¹²Ị kaa kpa ọyẹẹnọ ookpokpo-ookpokpo ka ẹga nya adịrahụ ụka-ụka kọ ka wụlọọ yẹ. Ene nya ọọwa tị lẹ, ịyẹẹnọ ịịwa ka họ ẹka lẹpwụ-lẹpwụ jịra jaabwọ kị hunọ nyọka kpahị ju ụhị nyaa. Lụka nya ịya ịrwọnyẹ nya ọgbanyẹ-ọgbanyẹ, ị kaa wụ ida nya ịmaa. Lụka nya ịya ịrwọnyẹ ihihi, ị kaa wụ etiji bala ida ichoru kwọkwọ.

¹³Ụka ká ọyẹẹnọ-ọ́ ka ka ẹga nya adịrahụ ịịwẹ, ị kaa ya ang myị ang ọlẹ kọ tịtọ họọ bwu ẹpwa nya anyang nya adịrahụ ene kọ ka kele.

¹⁴Ọ́ kele lobyi, ị kaa kpọọ lụtụrụ nya ahị ọpyẹpyẹ ọọnamwụ ka ụpa ọkịla nya ẹpwa nya anyang nya adịrahụ ẹga ká ịhụ-anchẹ nya adịrahụ ji. ỊChaachịgasị ọlụkụrwọ[5] nya adịrahụ à ri olegbeju nya ụwa lẹ. Ọyẹẹnọ ọọwa-á kaa tịrẹkpẹ ka ẹga nya adịrahụ kaka, kẹnẹ-kẹnẹ ó-ri kọ há adịrahụ kpụ kọ gu ẹnyị nyamwụ ya nyị kpọọ wẹ ọwa lẹ mẹ ịnyị.

¹⁵Ọọwa, ụka à pwụ ká Ẹsịta ọnyị nya Abihẹlụ ka ka ẹga nya adịrahụ lẹlẹ. Abihẹlụ ọlẹ ri ọnyịnịna nya adịda nya iModekayị ọlẹ kọ kpa Ẹsịta lala ọnyị nya ịlọmwụ. Ẹsịta-á tịtọ nya ịngịngịhyẹ bwu ẹga nya ịHẹgayị ọlụkụrwọ nya adịrahụ dala ang ịlẹ ká ịHẹgayị byoo nyị kpa ba ịlọmwụ kaka. Ụka ọọwa, Ẹsịta há angịlẹ wuu kị yọọ ẹ-ẹhị.

¹⁶Ọọwa, ị kpa Ẹsịta kịla adịrahụ Ahesurọsị lọya nya ịTẹbẹtị ọlẹ kọ ri ọya okiriwo ẹ-ẹpwụ nya ẹka ọharwiye nya adịrahụ oriri nyamwụ lẹlẹ.

¹⁷Ẹsịta há adịrahụ gụ anyang ịkịla wuu. Ọ ye ọnahị bala olegu nya ọháha bwu ẹga nya adịrahụ gụ anyang ịkịla wuu. Ọọwa, adịrahụ à ya okpo nya adịrahụ kụrwọọ lẹ, ọ hwoo nya adịrahụ ọnyang ku ọmwakpa nya ịVachịti lẹlẹ.

¹⁸Adịrahụ họ ọhụhụ nya ang oriri ọtụka-ọtụka nyọka chihi ju Ẹsịta. Ọ wụrụ alegbeju ịtụkụ yoo bala alụkụrwọ nyamwụ wuu ka ọhụhụ ọọwa. Adịrahụ Ahesurọsị myị ọnụ ká alimwawụ ọnyị myị ọnyị ka kpụba la ẹpwa ọnyẹnyẹ. Ọ ya ang-ahị ga ha angịnyị la ọ-pyẹ ụbwọ maa.

¹⁹Ụka kị tụ anjwo ịyang guru ụka oheeye wẹẹ, iModekayị ri ọlụkụrwọ ọlẹpwa nya adịrahụ lẹ̀.

²⁰Ẹsịta tị lẹ, ọ́ ya ịlọmwụ je ọngọngọhẹ ọwa nyị ri ọla iJuu ka jaabwọ ká iModekayị dọọ ọna. Ẹsịta ju ọna ọdada ọọwa ihi jaabwọ kọ kaa họ ụka kọ juwa a-ata nya iModekayị.

²¹Ụka ká iModekayị ri ọlụkụrwọ ẹ-pwa nya adịrahụ, alụkụrwọ imiiye i-gbe ọnang ịlẹ kị wụrụ iBigitan bala ịTẹrẹchị la irya onyobyi jahị da adịrahụ Ahesurọsị, juwa me obyi kị ka nwọọ.

²²IModekayị wo ẹlẹwẹ. Ọ yụbwọ ba Ẹsịta adịrahụ ọnyang ụ-ụrụ lẹ, Ẹsịta à ya je adịrahụ ha iModekayị lẹlẹ.

²³Ị dịrẹ ẹlẹwẹ kpụ ị jẹ kọ ri nya ịlẹhị. Ọọwa, ị wu angị imiiye ịịwa kpa kaka ju orinwa lẹlẹ. Adịrahụ ya lẹ, ị da ẹlẹwẹ ụ-ụpwụ nya ego nya alọpyị ọwẹ lẹlẹ.