Read idege ẸSỊTA 3 Bible Online

ẸSỊTA 3 - idege bible

ẸSỊTA 3

¹Ụka kọ nọ chẹẹ, Adịrahụ Ahesurọsị kpa ịHaman ọnyị nya ịHamẹdata ka ri olegbeju ọgbẹgbịlẹ gụ wuu ọ-ọpyị nyamwụ. ỊHamẹdata ayịdang ri ọnyị ọtụma nya Agagị[6]

²Adịrahụ lẹẹ da alụkụrwọ nyamwụ wuu ehile ya nyị ju ịHaman ihi bwula o-hirikpẹẹ kụ arụụ eji họọ. Lẹẹlẹ, angịnyị wuu kaa hirikpẹẹ kụ arụụ eji họọ. Ma, iModekayị-ị́ tị myị-ị̀ họ ịnyị ka.

³Ọọwa, alụkụrwọ ịkịla nya adịrahụ à tọ iModekayị wo yẹkẹẹ, “Ịyẹ à tị́ du ká kaa ju ehile nya adịrahụ ịhị ka-à?”

⁴Ẹnụ myị ẹnụ ị kaa ya tọọ kọ ka ju ihi nya ehile nya adịrahụ. Ọ́ tị myị ka, chajị ọ byaa ọwa nyị ri ọla iJuu lẹ, ọwa nyị́ ka hirikpẹẹ ha ịHaman ka. Ọọwa lẹ, ị ya je ịHaman nyọka yẹ ó-ri kọ ka yẹ iModekayị chịng lẹlẹ.

⁵Ụka ká ịHaman yẹ ká iModekayị pwa ọ-ka hirikpẹẹ bala ọ-kụ arụụ eji họọ, ọ wụ ẹjẹ lụmẹ.

⁶ỊHaman cheje ya ọ-nwụ iModekayị ụbwọọmwụ kem nyị́ nwa ka. Ụka kọ jẹ iModekayị nyị ri ọla iJuu, ọ me obyi nyọka ta ala iJuu, angịnyị nya iModekayị ịlọpyị nya iPechiya wuu ayịreji.

⁷Ẹ-ẹpwụ nya ọya iNisan ọlẹ kọ ri ọya ọhọhẹ nya ẹka iwo kụrụ imiiye nya adịrahụ oriri nya Ahesurọsị, ịHaman à ya ị da iwo nyọka jẹ ẹnụ kọ ka họ obyi omeme nyamwụ jịra lẹ. Ọọwa, iwo à chụ ẹnụtụrụ iwo kụrụ ịta nya ọya nya Adāà ọlẹ kọ ri ọya iwo kụrụ imiiye lẹlẹ.

⁸Ọọwa, ịHaman à byi adịrahụ yẹkẹẹ, “Yẹ mẹ, alụma ọhẹ jam kị pyẹ yịrị ọpyị nyang yịrị. Ị kụ imwawụ ọnyị myị ọnyị ilekpeleji nyang. Ọhọhọ nyaa datị hị ịnya angịkịla wuu. Ị́ kaa ju ihi nya ehile nyang ka ịnyịnyị. Lẹẹlẹ, ọ́ ri ang apyobwuna ọhẹ hang ahụ adịrahụ nyọka yaa chịng koo.

⁹Ó-ri kọ hang aalẹ, à da ehile kị ka nwaa mẹ. Aalẹ, m̀ myị ọnụ kam ka nwụ̀ okpoko onyoowuru ụnọ iwo ju alụkụrwọ nyang ụ-ụbwọ chajị kị ka ya ju ẹ-ẹga ọ-ya okpoko kpịbaa nya adịrahụ.”

¹⁰Ọọwa, adịrahụ à pwọ ọmapẹ ọ-kpa yụbwọ ju ehile ẹ-ẹpwụ nyamwụ ha ịHaman oluji nya ala iJuu ọnyị nya ịHamẹdata ọlẹ kọ ri ọnyị ọtụma nya Agagị lẹlẹ.

¹¹Ọọwa, adịrahụ à byi ịHaman yẹkẹẹ, “Okpoko ọọwa tụ angịnyị ịịwa ji ụbwọ nyang lẹ̀. Jaabwọ kọ hang i-irya nyang lẹ, à họ laa mẹ.”

¹²Ọọwa, ịHaman à wụrụ akịraa ị-da ileta nya adịrahụ wuu kaka jịra ẹnụtụrụ iwo kụrụ ịta nya ọya ọhọhẹ lẹlẹ. Ị da ehile ụ-ụpwụ jaabwọ ka ịHaman byaa. Ị dọọ loja bala ụma nya ụpwụ ọdada nya oja ọnyị myị ọnyị du kịla alegbeju ịtụkụ yi adịrahụ bala igọvụnọ ị-kpẹhị rịrị imwawụ-imwawụ bala alụkụrwọ nya adịrahụ wuu ọ-ọpyị ọọwa. Ị dọọ lẹnyị nya adịrahụ Ahesurọsị lẹ, ị yụbwọ jwoo ẹ-ẹpwụ lọmapẹ nyamwụ lẹlẹ.

¹³Ị ya ehile ọọwa du alẹrụ ka imwawụ ịlẹ wuu kị ji ekpeleji nya adịrahụ. Ehile ọọwa ya nyị nwụ ala iJuu wuu—anjwo tụ angịgbahị bala anyang tụ alẹng—kịị nyị taa ayịreji wuu gbanggbang ẹ-ẹpwụ nya ahyẹẹnụ ookpokpo ọlẹ kọ ri ẹnụtụrụ iwo kụrụ ịta nya ọya nya Adāà ọlẹ kọ ri ọya iwo kụrụ imiiye. Ị ka go ang-abwọ nyaa wuu kpa rụ ịnyịnyị.

¹⁴Ị ka ya ẹla ọlụpwụ ọwẹ dodehe i-imwawụ ọnyị myị ọnyị wuu chajị ká angịnyị wuu ka nwụlanọ gbe ẹnụtụrụ ọọwa.

¹⁵Jaabwọ ká adịrahụ byaa, ị ya ehile ọlẹ dodehe i-iSusa. Ahyaahị lẹ, alẹrụ à yegiri lagaga kpa ẹrụ ọọwa kaka ya pyẹ i-imwawụ ọnyị myị ọnyị lẹlẹ. Ụka ọọwa, adịrahụ bala ịHaman hụhụ juwa nwa ere, epweji nya iSusa tị juwa ẹ-ẹpwụ nya ojigi-jigi.