Read idege ẸSỊTA 4 Bible Online

ẸSỊTA 4 - idege bible

ẸSỊTA 4

¹Ụka ká iModekayị jẹ ang chajị nya ẹlẹwẹ, ọ gu ịwụrụ nyamwụ ene nya ang-ẹjẹẹ nya ọjụjụ. Ọ hu awụrụ nya owuru kụrụ, gu agbụ chị egbeju lẹ, ọ jẹ gu epweji ene chịrọrọọrọ juwa jida onyuujujwo ngịrọrọọrọ lẹlẹ. Ọ chị pwụrụ bwu epweji lẹ, ọ juwa jida la omi ogboo bala ida ọnyujujwo lẹlẹ.

²Ọ jẹ gbee kaka dayị rịrị ọ-ọnang nya ogirigba nya ẹpwa nya adịrahụ lẹlẹ. Ọ́ jụ ka ẹpwang ka, chajị ọngọngọhẹ-ẹ̀ jụ kele lawụrụ nya owuru ka.

³I-imwawụ ọnyị myị ọnyị wuu kị ya ehile nya adịrahụ dodehe, ala iJuu ịlụwa kaa juwa bida bala o-jida gboo bala ọ-hụ limyi. Iru nyaa lụmẹ-lụmẹ go ịwụrụ nya owuru ọkpakpa kụrụ bala ọ-nọnọ ẹ-ẹpwụ nya agbụ.

⁴Ụka ká anchẹ anyang nya Ẹsịta bala alụkụrwọ[7] nyamwụ ịkịla kele ka ya joo ang ọlẹ ká iModekayị juwa họ, ọ tọọ olujwo lụmẹ. Ọ ya ịwụrụ du kịla iModekayị kọ ka ya kụrụ ọkọkọ nya awụrụ nya owuru, ma ọ́ tị myị ye ka.

⁵Ọọwa, Ẹsịta à wụrụ ịHataki ọngọhẹ nya alụkụrwọ ịkpẹhị rịrị anyang nya adịrahụ ọlẹ kị chụ nyọka myị ẹrụ họọ lẹlẹ. Ẹsịta doo ẹrụ ka ẹga nya iModekayị kọ ka jẹ ang odudu kọ wẹẹ họ ịnyị.

⁶ỊHatakị kele kaka tọ iModekayị i-ikpọdọda nya epweji ị-ịlahị nya ọnụ ogirigba nya ẹpwa nya adịrahụ.

⁷Ọọwa, iModekayị à ya jọọ ẹla ọlẹ kọ ji ẹga nyamwụ wuu bala jaabwọ ká ịHaman myị ọnụ nya okpoko ọtụka ọlẹ kọ ka nwụ̀ ju ka ẹga ọ-ya okpoko kpịbaa nya adịrahụ ó-ri kị ka myị-ị̀ ta ala ịJuu wuu ayịreji lẹlẹ.

⁸IModekayị ya ụpwụ nya ehile ọlẹ ká adịrahụ da i-iSusa nyọka ta ala iJuu ayịreji ha ịHatakị. Ọ byi ịHatakị kọ ka kpa ụpwụ ọọwa kaka mẹjẹ Ẹsịta bala ọ-ka dọọ wụlẹ ya joo. Ọ byoo ịnyịnyị kọ ka byi Ẹsịta ya nyị kele kaka bịlẹ adịrahụ kọ ka yẹ ahyẹẹrwẹrwa nya ala iJuu angịnyị nya Ẹsịta mẹ.

⁹Ọọwa, ịHatakị à akele kaka tịrọnụ je Ẹsịta ẹrụ ọlẹ ká iModekayị doo lẹlẹ.

¹⁰Ẹsịta du ịHatakị tịrẹkpẹ kaka byi iModekayị yẹkẹẹ,

¹¹“Ehile ọhẹ jam ọlẹ ká alụkụrwọ bala angịnyị nya adịrahụ i-imwawụ ọnyị myị ọnyị wuu jẹ. Ọlẹng lee ọnyang ọhẹ-lọhẹ-ẹ̀ jụ ka ẹpwang ọhụhụ nya adịrahụ nyọka yọọ yẹ la ọ-wụrụ ọngọọwa ene ka lẹ ka. Ọngọ bịrị ehile ọwẹ aalẹ, ị ka nwọọ. Ọngọlẹ ká adịrahụ-ụ́ nịra ọkụta nya okpoko ịgọm nyamwụ kpaaa ka ẹga nyamwụ lẹ aalẹ, ọngọọwa à ka hị lẹlẹ. Am tị lẹ, ọ lala ẹnụtụrụ iwo ịta kam kẹkpẹ myị nyọlẹ ká adịrahụ wụrụm lẹ.”

¹²Ị ya je iModekayị ẹrụ ọlẹ ká Ẹsịta du.

¹³Ọọwa, iModekayị à du ẹrụ tịrẹkpẹ ka byi Ẹsịta yẹkẹẹ, “Ā me irya ká ka be igu-ọnụ hi ala iJuu ịkịla tu o-ri à juwa ẹ-ẹpwa nya adịrahụ koo.

¹⁴Ó-ri ká hu ujiji ẹ-ẹpwụ nya iwe-ahụrụ ọlẹ, ala iJuu ka ye ụbwọ ọdada bwu oye ọkịla myị, ma ahụ bala alugbiyegu nya adang anyị tị ka ta ayịreji. Yẹ mẹ-ẹ! Ọhẹka ajị nya ụka ọlịịlẹ kpangga à du ká ji iwe-ahụrụ ogidogbo ọwẹ lẹ.”

¹⁵Ẹsịta du ẹrụ tịrẹkpẹ kaka byi iModekayị yẹkẹẹ,

¹⁶“Kele ká tụ ala iJuu ịla iSusa wuu gụrụ, kanụ hụ limyi chajị nyam mẹ. Ānu rị ang lee ọ-kpa ang ọnwanwa ọhẹ-lọhẹ ka ọnụ ka gbee jịra ẹnụtụrụ ịta gbẹgbịlẹ tụ odu tụ ẹnụ. Am bala anjwo ịyẹẹnọ ịlẹ kị jam tam ka hu limyi ịnyịnyị. Ọọwa, m̄ ka ka ẹga nya adịrahụ lẹlẹ. O-ri nya ịlẹhị ọọwa ri ehile ọbịrịị-bịrị. Ọ́ tị ri kam gbu ọọ-la ọọwa lẹ, m̄ gbu mẹ.”

¹⁷IModekayị à rụ lẹ, ọ họ jaabwọ ka Ẹsịta byọọ nyị họ lẹlẹ.