Read idege ẸSỊTA 5 Bible Online

ẸSỊTA 5 - idege bible

ẸSỊTA 5

¹Ẹnụtụrụ ọhata nya ọ-hụ limyi nya Ẹsịta, ọ hu awụrụ nya adịrahụ oriri nyamwụ kụrụ. Ọọwa, ọ kele kaka godayị ẹ-ẹpwang ọhụhụ nya adịrahụ jahị da ube nya alụma ọlụwa lẹlẹ. Adịrahụ Ahesurọsị hụhụ ẹ-ẹchị nyamwụ u-ube ọọwa jahị da ọnang.

²Ụka ká adịrahụ yẹ Ẹsịta godayị ụ-ụwa ẹ-ẹpwang ọhụhụ ọwẹ, ugbodu kpọọ nyiii. Ọọwa, ọ nịra ọkụta nya okpoko ịgọm nyamwụ kpaaa lẹ, Ẹsịta à yụbwọ gu egbeju nya ọkụta ọọwa lẹlẹ.

³Adịrahụ à tọọ wo yẹkẹẹ, “Ẹla-ịyẹ tị́, adịrahụ Ẹsịta? Ịịyẹ à tị́ ri ọbaba nyang? Ya mẹ, m̀ ka ya hang, ó-ri ẹhya nya ọpyị nyam ọlẹ ri ká tịtọ.”

⁴Ọọwa lẹ Ẹsịta à yẹkẹẹ, “Ó-ri kọ hang aalẹ, ahụ bala ịHaman ā wẹ ka ri ang oriri ọlẹ kam nwụlanọ gbeng ahụ adịrahụ alẹ mẹ.”

⁵Ọọwa, adịrahụ à du ẹrụ kaka wụrụ ịHaman ahyaahị chajị kị ka ka ọhụhụ nya ang oriri ọlẹ ká Ẹsịta nwụlanọ lẹ, ọwa bala ịHaman à kele ka ọhụhụ nya Ẹsịta ọọwa lẹlẹ.

⁶Ụka kị juwa kpa ere nwa, adịrahụ tọ Ẹsịta wo yẹkẹẹ, “Ịyẹ à tị́ ri ọbịlẹ-bịlẹ nyang? M̀ ka họọ hang. Ịyẹ ā tị́ tịtọ-ọ̀? Ó-ri ẹhya nya ọpyị nyam ọlẹ ri ká tịtọ, m̀ ka ya hang.”

⁷Ọọwa lẹ, Ẹsịta à wẹ yẹkẹẹ, “M̀ lẹẹ bịlẹ ịịlẹ:

⁸Ó-ri ká ẹla nyam-ḿ kpụng ahụ adịrahụ ọtụka ịpyọ kpụ ká ka myị-ị̀ họ ọbaba nyam ham aalẹ, ahụ bala ịHaman ā jum ụga ijuju wẹ ọhụhụ nya ang oriri ọlẹ kam ka nwụlanọ gbenu mẹ. Ụka ọọwa, m̄ ka ya ọbaba nyam jeng lẹlẹ.”

⁹ỊHaman rụ bwu ọhụhụ ẹnụ ọọwa lọkẹkẹnị. Ọkịlẹtụ kpọọ nyiii. Ma, ụka kọ yẹ iModekayị ọ-ọnụ nya ogirigba nya adịrahụ ká iModekayị-ị́ tị wuleji lee o-che bweebwee họọ chẹẹ ka lẹ̀, ịHaman à ju agbama ta iModekayị lẹlẹ.

¹⁰Ọ tị wu ịlọmwụ kpa, ọ nyà tịrẹkpẹ ka ẹpwa. Ọọwa, ọ du ẹrụ kaka wụrụ aligu nyamwụ bala ịSẹrẹchị ahụ nyamwụ lẹlẹ.

¹¹Ọọwa, ịHaman à juwa kpa ọbọọchẹ gbana ya jaa jaabwọ ká ụdụ nyamwụ lụmẹ kaka ba bala anyị ịlẹ kọ ma wuu bala ọ-kpa kịlahị ọlẹ wuu kọ la bwu ẹga nya adịrahụ bala jaabwọ kọ la ihi-ihi gụ alụkụrwọ nya adịrahụ ịkịla wuu lẹlẹ.

¹²ỊHaman myịmyị byaa yẹkẹẹ, “Ánụ yẹ-ẹ̀ wẹ ka-á, adịrahụ ọnyang Ẹsịta-á wụrụ ọngọngọhẹ ẹpwa ka ọhụhụ nya ang oriri dala adịrahụ bala am ọlẹ ka. Ijuju oleeri ọlẹ, ọ myịmyị wụrụụhị ẹpwa.

¹³Ma, jaabwọ kam yẹ iModekayị ẹ-ẹpwụ nya ụkụrwọ nya adịrahụ ọ-ọnang nya ogirigba tata kaka ba, ang ịwẹ-ẹ́ jum apyobwuna ịịlẹ ụpẹnị-ụpẹnị ka.”

¹⁴Ọọwa, ịSẹrẹchị ahụ nya ịHaman bala aligu nyamwụ à jwoo irya yẹkẹẹ, “Ya kị họ ọkoji nya orinwa ọlẹ kọ ka luhye lala apatẹ iwo irwiye kụrụ ịrụ kị ya weji mẹ. Ijuju lụtụrụ lẹ, à byi adịrahụ kọ ya iModekayị ju orinwa u-uhye nyamwụ mẹ. Ụka kị họ ịnyị lẹ, ká bajẹ bala adịrahụ lọkẹkẹnị ka ọhụhụ nya ang oriri mẹ.” Ẹlẹwẹ kpụ ịHaman ịpyọ lụmẹ. Ọọwa, ọ ya lẹ, ị kọ okoji nya orinwa lẹlẹ.