Read idege ẸSỊTA 6 Bible Online

ẸSỊTA 6 - idege bible

ẸSỊTA 6

¹Alodu nya ẹnụ ọọwa, adịrahụ-ụ́ nune myị ka. Ọọwa, ọ ya nyị kpa ụpwụ nya ego nya ọpyị nyamwụ warị kịị nyị wọọ je ọwa lẹlẹ.

²Ẹga kị wa ya jaabwọ ka iModekayị bwuru dodehe obyi ọlẹ ká iBigitan bala ịTẹrẹchị alụkụrwọ i-gbe ọnang nya ebe nya adịrahụ me nyọka nwụ adịrahụ Ahesurọsị.

³Ọọwa, adịrahụ à tọ wo yẹkẹẹ, “Ị chị ihi ọhe ju iModekayị chajị nya ang ọlẹ kọ họ-ọ̀ wẹ-ẹ́?” Anchẹ nya adịrahụ à wẹ yẹkẹẹ, “Ị́ chị ihi ọhẹ jwoo ka.”

⁴Ọọwa, adịrahụ à tọ wo yẹkẹẹ, “Oowo tị́ juwa ọdọda-à?” ỊHaman ayịdang lẹẹ jụ wẹ ọdọda nya ẹpwa nya adịrahụ ene nya ụka ọwẹ nyọka byi adịrahụ kị ka ju iModekayị orinwa uhye nya okoji nya orinwa ọlẹ kị họ.

⁵Ọọwa, anchẹ nya adịrahụ à wọọ yẹkẹẹ, “ỊHaman à godayị lalẹẹ ọdọda lẹ.” Adịrahụ à byaa yẹkẹẹ, “Byoo kọ wẹ ẹpwang mẹ.”

⁶ỊHaman jụ ka ẹpwang lẹ, adịrahụ à tọọ wo yẹkẹẹ, “Ịịyẹ à tị́ chịla ọ-ka họ ẹ-ẹga nya ọlẹng ọlẹ kọ ham kam ka chihi ju-ù?” Ụka ọọwa, ịHaman me irya ẹ-ẹpwụ-ẹpwụ nya ịlọmwụ yẹkẹẹ, “Oowo adịrahụ à tị́ ka chihi ju dalam wẹẹ-ẹ̀? Am kpangga mẹ ịnyị.”

⁷Ọọwa, ịHaman à wẹ byi adịrahụ yẹkẹẹ, “Ọngọlẹ kọ hang ká ka chihi ju wẹẹ-ẹ,

⁸ị ka kpa ịwụrụ nya adịrahụ ịlẹ kaahụ lịlọng kaa kụrụ warị bala ụnyịrẹ ọlẹ kaa kụ, kị ka ya okpo nya adịrahụ kụrụ ụnyịrẹ ọọwa e-egbeju.

⁹Ọọwa lẹ, kị ya ịwụrụ ịịwa ha ọlụkụrwọ nyang ọlẹ kọ ri olegbeju ọgbẹgbịlẹ gu wuu kọ ya kụrụ ọngọọwa mẹ. Olegbeju ọwẹ ā kpa ọngọọwa jẹ u-uhye nya ụnyịrẹ tụ opeje-opeje nya epweji da, ká ọngọhẹ ā juwa ya dodehe yẹkẹẹ, ‘Ọlẹ à ri ang ọlẹ kị ka họ ha ọngọlẹ kọ há adịrahụ kọ ka chihi ju lẹlẹ oo.!’ ”

¹⁰Ọọwa, adịrahụ à byi ịHaman yẹkẹẹ, “Chị agaga kele ká go ịwụrụ bala ụnyịrẹ jaabwọ ká ya, ká họ ịnyị ha iModekayị ọla iJuu ọlẹ kọọ họ ụkụrwọ ọ-ọnang nya ogirigba nya adịrahụ mẹ. Ā pẹhi ẹlẹlehẹ ọlẹ ka ya wẹ deeji koo.”

¹¹Ọọwa lẹ, ịHaman à kpa ịwụrụ bala ụnyịrẹ warị lẹ, ọ ya ịwụrụ kụrụ iModekayị lẹlẹ. Ọọwa, ọ kpọọ jẹ u-uhye nya ụnyịrẹ tụ epweji da juwa da ọna gboo yẹkẹẹ, “Ọlẹ à ri ang ọlẹ kị ka họ ha ọngọlẹ kọ há adịrahụ kọ ka chihi ju lẹlẹ oo!”

¹²Ọọwa, iModekayị à nyà wẹ ọnang nya ogirigba nya adịrahụ lẹlẹ. ỊHaman tị chị agaga rụ ka ẹpwa nya ịlọmwụ layiiji bala oyoyi.

¹³ỊHaman tịrọnụ ya je ahụ nyamwụ ịSẹrẹchị bala aligu nyamwụ ang myị ang wuu ịlẹ kị họ tọọ. Ọọwa, aligu nyamwụ ị-jẹ ẹla ịịwa bala ahụ nyamwụ ịSẹrẹchị à byoo yẹkẹẹ, “Ó-ri ká iModekayị-ị́ ri ọla iJuu aalẹ, ịịwẹ ā ka ri ka ejejeeji ẹ-ẹga nyamwụ lẹlẹ. Á ka kụrwọọ myị ka. Ọ ka kụrụng pyii lẹ.”

¹⁴Ụka kị wẹẹ kpa ẹlẹwẹ ya wẹ́ẹ̀, alụkụrwọ nya adịrahụ à pwụ eji lẹ, ị kpa ịHaman rụ lagaga ka ọhụhụ nya ang oriri ọlẹ ká Ẹsịta nwụlanọ lẹlẹ.