Read idege ẸSỊTA 7 Bible Online

ẸSỊTA 7 - idege bible

ẸSỊTA 7

¹Ọọwa lẹ, adịrahụ bala ỊHaman à kaka ri ang ta adịrahụ Ẹsịta lẹlẹ.

²Ẹnụ nya ọhụhụ oheeye, ụka kị juwa kpa ere nwa, adịrahụ tọ Ẹsịta wo myịmyị yẹkẹẹ, “Adịrahụ Ẹsịta ee, ịyẹ à tị́ ri ọbịlẹ-bịlẹ nyang? M̀ ka họọ hang. Ịyẹ ā tị́ tịtọ-ọ̀? Ó-ri ẹhya nya ọpyị nyam ọlẹ ri ká tịtọ, m̀ ka ya hang.”

³Ọọwa, adịrahụ Ẹsịta à wẹ yẹkẹẹ, “Adịrahụ ee, ó-ri ká ẹla nyam-ḿ kpụng ịpyọ kpụ ká ka myị-ị̀ họ ọbaba nyam ham aalẹ, ọbịlẹ-bịlẹ nyam ri chuchuu, chịm da, ká chị angịnyị nyam da ịnyịnyị mẹ.

⁴Ị hum bala angịnyị nyam ra lẹ. Ó-ri o-wu ra lala anyịhị kem ịnọ m̀ ka tụ ọnụ nyam pịrị, chajị ọọwa-á kpụ m̄ ka hu olo hang u-uhye nyamwụ ka. Ị tị tịtọ kị ka nwụhị bala ọ-tahị ayịreji gbanggbang.”

⁵Adịrahụ Ahesurọsị tọ adịrahụ Ẹsịta wo yẹkẹẹ, “Oowo kpong-kpong à tị́ byẹjẹ wẹẹ ka họ ẹlẹwẹ ene-è? Ọngọọwa tị́ ji ale ene-è?”

⁶Ẹsịta wẹ yẹkẹẹ, “Oluji nyahị, ọngọ baahị ẹtẹ ọọwa à ri ịHaman ọngọ onyobyi ọwẹ lẹ.” Ọọwa, ịHaman à ju uhi ọtụka-ọtụka ị-ịlahị nya adịrahụ bala Ẹsịta adịrahụ ọnyang lẹlẹ.

⁷Adịrahụ wuleji hi ọhụhụ ẹ-ẹpwụ nya agbama lẹ, ọ rụ ka ẹpwụ nya ẹrụ ọlọdọda nyamwụ lẹlẹ. Ma, ịHaman jẹ ká adịrahụ cheje nyọka yọọ akama u-uhye nya ẹlẹwẹ. Lẹẹlẹ, ọ hi hụhụ juwa bịlẹ Ẹsịta kọ ka chị ọhịhị nyamwụ da.

⁸Ụka ká adịrahụ nyà bwu ẹpwụ nya ẹrụ ọlọdọda nyamwụ ka ẹga kọ hụ lẹẹ nwa ere, ọ yẹ ịHaman kọ hu ịlọmwụ mịla okoji ọlẹ ká Ẹsịta hụ nyọka yụbwọ kụ eji họọ. Ọọwa, adịrahụ à yẹkẹẹ, “Ahyụ! Ọlẹng ọlẹ tụtụm kà wu adịrahụ ọnyang chị beji a-ahị nyam ám̀ ẹ-ẹpwa nyam-ḿ?” Ụka ká adịrahụ ya ẹlẹwẹ kpá bwaaa lẹ, alụkụrwọ nyamwụ à ya ang chị ịHaman a-ahị lẹlẹ.

⁹Ọọwa, ịHabọna ọngọhẹ nya alụkụrwọ ịwẹ à yẹkẹẹ, “ỊHaman dọmwụ lẹẹ kọ okoji nya orinwa weji ẹ-ẹpwa nyamwụ kị ka ju iModekayị ọlẹ kọ chị ọhịhị nyang ahụ adịrahụ da orinwa ụ-ụwa. Uhye ọlala nya okoji ọọwa ri apatẹ iwo irwiye kụrụ ịrụ.” Ọọwa, adịrahụ à da ehile yẹkẹẹ, “Anụ ju ịHaman orinwa ụ-ụwa mẹ.”

¹⁰Lẹ, ị ju ịHaman orinwa o-okoji oweji ọlẹ kọ nwụlanọ gbe iModekayị lẹ, agbama nya adịrahụ à pwuru lẹlẹ.