Read idege ẸSỊTA 8 Bible Online

ẸSỊTA 8 - idege bible

ẸSỊTA 8

¹Ẹnụtụrụ ọwẹ-ọwẹ, adịrahụ Ahesurọsị ya ang myị ang ịlẹ ká ịHaman oluji nya ala iJuu la wuu ha Ẹsịta. Ụka ọọwa, Ẹsịta ya jaabwọ kọọwa bala iModekayị ri anyị nya anyịnịna je adịrahụ. Ọọwa, ị ya ẹga da ha iModekayị ka ịlahị nya adịrahụ lẹlẹ.

²Adịrahụ pwọ ọmapẹ nyamwụ ọ-kpa yụbwọ ju ụpwụ ẹ-ẹpwụ ọlẹ kọ ye tịrẹkpẹ bwu ẹga nya ịHaman lẹ, ọ ya ha iModekayị lẹlẹ. Ọọwa, Ẹsịta Adịrahụ à hu iModekayị ri olegbeju nya ang ịlẹ wuu ká ịHaman la ene lẹlẹ.

³Adịrahụ Ẹsịta ya ẹla ta adịrahụ Ahesurọsị myịmyị. Ọ ya ịlọmwụ da ka ịpyị a-ata nya adịrahụ juwa jida bịlọọ kọ ka bịrị obyi onyobyi ọlẹ ka ịHaman ọnyị ọtụma nya Agagị me tụ ala iJuu pyịpyị.

⁴Adịrahụ nịra ọkụta nya okpoko ịgọm kpaaa ka ẹga nya Ẹsịta lẹ, Ẹsịta à wuleji godayị ị-ịlahị nyamwụ lẹ,

⁵ọ byoo yẹkẹẹ, “Agaba Idu ee, Ó-ri kọ hang, ká ẹla nyam-ḿ kpụng ịpyọ, kọ tị pwoku a-ahị nyang aalẹ, chuchuu, da ehile ọkịla ọlẹ kọ ka bịrị ileta ịlẹ ká ịHaman da mẹ. ỊHaman ọnyị nya ịHamẹdata ọnyị nya Agagị lẹẹ da ileta du ka imwawụ ọnyị myị ọnyị ọ-ọpyị ọlẹ kị ka ta ala iJuu wuu ayịreji.

⁶Ḿ ka hụ ka yẹ ang ọjụjụ ọlẹ kọ wẹẹ ka chị angịnyị nyam ọgụ myị ka. Ḿ ka hụ ka yẹ kị juwa nwụ aanam myị ka.”

⁷Ọọwa lẹ, adịrahụ Ahesurọsị à byi adịrahụ Ẹsịta bala iModekayị ọla iJuu yẹkẹẹ, “Anụ yẹ mẹ, m̀ ya ị ju ịHaman orinwa chajị nya obyi onyobyi ọlẹ kọ me tụ ala iJuu pyịpyị lẹ. M̀ ya ẹpwa nya ịHaman ha Ẹsịta ịnyịnyị lẹ.

⁸Ehile ọlẹ kị da lẹnyị nya adịrahụ kpụ kọ yụbwọ jwoo ẹ-ẹpwụ lẹ̀ aalẹ, ị́ ka jẹ-ẹ̀ pyọọ kaka. Anụ tị lẹ, anụ-ụ̀ da ụpwụ du kịla ala iJuu u-uhye nya ẹla myị ẹla ọlẹ kọ haanụ lẹnyị nyam, kị yụbwọ jwoo ẹ-ẹpwụ la ọmapẹ nyam mẹ.”

⁹Ọọwa, ị wụrụ akịraa nya adịrahụ kaka jịra wuu ẹnụtụrụ iwo imiiye kụrụ ịta nya ọya nya iSivan ọlẹ kọ ri ọya ọhata lẹlẹ. Jaabwọ ká iModekayị byaa lẹ, ị da ehile ụ-ụpwụ du kịla ala iJuu bala alegbeju ịtụkụ yi adịrahụ bala igọvụnọ bala alụkụrwọ nya adịrahụ wuu jịra imwawụ ohu da iwo imiiye kụrụ irwiye (127) i-bwu Indiya lalaala ka ju ka Itiyopyiya. Ị da ehile ọọwa loja bala ụma nya ụpwụ ọdada nya oja ọnyị myị ọnyị du kịla alụwa tụ ala iJuu loja nyaa ịwa ịnyịnyị.

¹⁰IModekayị ya ị da ileta ọọwa lẹnyị nya adịrahụ lẹ, ọ yụbwọ jwaa ẹ-ẹpwụ la ọmapẹ nya adịrahụ lẹlẹ. Ọ ya ileta ịwẹ du alẹrụ ị-kụ anyịrẹ ịlịmịla ịlẹpwa nya adịrahụ.

¹¹Ehile ọọwa ya adịrahụ nyị myị ju ala iJuu ilepweji ọnyị myị ọnyị kị ka tụguru nyọka mwẹla chị ịlaa da. Ó-ri ká angịdẹwụ nya alụma ọhẹ-ẹ́ jahị da ala iJuu bala anjwo bala ịhụ nyaa aalẹ, ala iJuu ka mwẹla ta aluji ịịwa kị ka nwaa bala ọ-ta ọng myị ọng nyaa ayịreji bala ọ-wụ ang-ụdụ nyaa wụ myị.

¹²Ẹnụ kị hunọ nyọka kpa ehile ọwẹ họ ụkụrwọ ẹ-ẹga myị ẹga nya ọpyị nya iPechiya wuu ri ẹnụtụrụ iwo kụrụ ịta nya Adāà ọlẹ kọ ri ọya iwo kụrụ imiiye.

¹³Ị ka ya ehile ọwẹ dodehe ká ọng myị ọng ka jẹ i-imwawụ ọnyị myị ọnyị. Ọọwa ka du ká ala iJuu ka jẹ-ẹ̀ nwụla ịlaa nọ nyọka họ aluji nyaa kwiwa ẹnụ ọọwa.

¹⁴Ọọwa, adịrahụ à ya lẹ, angị kụ anyịrẹ ịlịmịla nya adịrahụ à kpa ehile ọwẹ ka ẹga datị-datị lagaga lẹlẹ. Ị ya ehile ọwẹ dodehe i-iSusa egbeju-ẹpwa nya iPechiya ịnyịnyị.

¹⁵Ọọwa, iModekayị à yegiri rụ bwu ẹpwa nya adịrahụ lẹlẹ. Ụka ọọwa, ọ kụrụ ịwụrụ nya adịrahụ ịlẹ kị la ukpuukpo bala ọ-la owuru bala okpo nya adịrahụ ọlẹ kị họ lokpoko ịgọm bala awụrụ ogbileji ọnyọmịla gbuu. Ala iSusa juwa da iwuru bala ọ-ya ụya.

¹⁶Ala iJuu lẹ, ị juwa chị ọkẹkẹnị lịnyịrọ daa cháaa bala ọ-la ihi.

¹⁷Epweji bala imwawụ ọnyị myị ọnyị kị kpa ehile nya adịrahụ jẹ pwụ, ala iJuu wụrụ ọhụhụ nya ụya ọyaya lọkẹkẹnị ọchịchị bala ọ-la ọmwịịnyọ. Alụma ịkịla ịhyẹ lụmẹ-lụmẹ dọmwụ ya ịlaa ri ala iJuu, chajị ị juhị nya ala iJuu.