Read idege ẸSỊTA 9 Bible Online

ẸSỊTA 9 - idege bible

ẸSỊTA 9

¹Ọọwa, ẹnụtụrụ iwo kụrụ ịta nya Adāà ọlẹ kọ ri ọya iwo kụrụ imiiye à pwụ eji lẹlẹ. Ẹnẹwẹ à ri ẹnụ ọlẹ kị hunọ nyọka kpa ehile nya adịrahụ họ ụkụrwọ lẹ. Aluji nya ala iJuu lẹẹ dahịhile kị ka kụrụ ala iJuu ẹnụ ọọwa. Ma, ala iJuu dachichi kụrụ aluji nyaa.

²Ala iJuu tụ ịlaa gụrụ e-epweji[8] ọnyị myị ọnyị i-imwawụ datị-datị ịlọpyị nya adịrahụ Ahesurọsị nyọka mwẹla tọ ọngọngọhẹ kọ maga nyọka mwẹla taa. Angịnyị wuu ẹ-ẹga myị ẹga tị ju uhi nyaa. Lẹẹlẹ, ọngọngọhẹ-ẹ́ godayị taa pyịpyị myị ka.

³Alegbeju ịtụkụ yi adịrahụ bala ịgọvụnọ anyị bala alụkụrwọ nya adịrahụ wuu chẹkpẹ ju ala iJuu, chajị ịwa wuu ju uhi nya iModekayị.

⁴IModekayị ri ọngọtụka ọ-ọpyị nya adịrahụ Ahesurọsị. Ohi oruru nyamwụ pyebile tụ ẹga myị ẹga da wuu, chajị ọwa ayịdang juwa lọngịrị gụ ọọwa-ọọwa kịlahị-ịlahị.

⁵Ala iJuu mwẹla ta aluji nyaa bala ọ-nwaa loge nya ẹwụ. Ị họ angịlẹ kị baa ẹtẹ ang myị ang ọlẹ kọ haa.

⁶Ala iJuu nwụ angịnyị angị ohu ịrụ (500) i-iSusa egbeju-ẹpwa nya ọpyị ọwẹ.

⁷Angịkịla ịlẹ kị nwụ ịnyịnịyị ri ịPachandata bala ịDalụfọn bala Asịpata

⁸bala iPorata bala Adaliya bala Aridata

⁹bala ịPamachịta bala Arisayị bala Aridayị bala ịVayịsata.

¹⁰Angịwẹ à ri anyị alẹng angị iwo nya ịHaman oluji nya ala iJuu ọnyị nya ịHamẹdata oluji nya ala iJuu lẹ. Ị́ tị wụ ang-ụdụ nya aluji nyaa wụ kpa rụ ka.

¹¹Ẹnụ ọọwa-ọọwa, ị kpa ka ya je adịrahụ jaabwọ ká angịlẹ kị nwụ i-iSusa ju iru kaka ba.

¹²Ọọwa, adịrahụ à byi adịrahụ Ẹsịta yẹkẹẹ, “I-iSusa kem ala iJuu à nwụ angịnyị angị ohu ịrụ (500) tụ anyị alẹng angị iwo nya ịHaman wẹẹ lẹ, ányị ị tị́ ka nwụ angịnyị kaka ba i-imwawụ ọnyọnyọọnyị-ị̀? Ee lẹ, ya jem wẹẹ, ịyẹ à tị́ ri ọbịlẹ-bịlẹ nyang ugbẹnyị mẹ? M̀ ka họọ hang. Ịyẹ à tị́ ri ọbaba ọkịla nyang? M̀ ka ya hang.”

¹³Ọọwa, Ẹsịta à wẹ byoo yẹkẹẹ, “Agaba Idu ee, ó-ri kọ hang aalẹ, ya iwe da ká ala iJuu ịlẹ kị kụ iSusa ā họ ijuju ịnyịnyị jaabwọ kị họ-ọ̀ wẹ alẹ mẹ. Ya kị ya egu nya anyị alẹng angị iwo nya ịHaman chọpịla o-okoji nya orinwa u-ugbọdọda mẹ.”

¹⁴Ọọwa, adịrahụ Ahesurọsị à da ehile kị ka họ ịnyị lẹlẹ. Ọ ya lẹ, ị kpa egu nya anyị nya ịHaman kaka chọpịla o-okoji nya orinwa lẹlẹ.

¹⁵Ala iJuu ịlẹ kị juwa i-iSusa tụguru myịmyị ẹnụtụrụ iwo kụrụ ine nya Adāà. Ọọwa, ị nwụ angị ohu ịta (300) ẹnẹwẹ ba angị ilene u-uhye lẹlẹ. Ị́ tị wa ang-ụdụ nya angịịwa wụ kpa rụ ka.

¹⁶Ala iJuu ịkịla ilimwawụ ịlọpyị ọwẹ lẹẹ tụ ịlaa guru kpụ ị mwẹla chịlaa da. Ị chị aluji nyaa hụlẹẹ hi ịlaa. Ị nwụ angịnyị angị ụnọ iwo irwiye da ụnọ ịrụ (75,000) nya angịlẹ wuu ká ala iJuu waa ẹjẹ. Ala iJuu-ú tị wụ ang-ụdụ nyaa wụ kpa rụ ka.

¹⁷Ẹnụtụrụ iwo kụrụ ịta nya ọya Adāà ị nwụ angịwẹ lẹ. Ahị ọpyẹpyẹ ọọnamwụ ọlẹ kọ ri ẹnụtụrụ ịwo kụrụ ine, ị mwụ ịnyọ la angịnyị ọnwụnwụ. Ọọwa, ị họ ọhụhụ juwa chị ọkẹkẹnị lẹlẹ.

¹⁸Ala iJuu ịlẹ kị kụ iSusa tị lẹ, ịwa la ọmwịịnyọ bala ọhụhụ nya ọkẹkẹnị nyaa ẹnụtụrụ iwo kụrụ ịrụ, chajị ị kpa ẹnụtụrụ iwo kụrụ ịta bala ẹnụtụrụ iwo kụrụ ine nwụ aluji nyaa.

¹⁹Ịịwẹ à du ká ala iJuu ịlẹ kị kụ e-epweji ichiche kaa kpa ẹnụtụrụ iwo kụrụ ine nya Adaa nya ẹnụ ọmwịịnyọ bala ẹnụ nya ọkẹkẹnị ọchịchị lẹ. Ị kaa bwu ang oriri du kịla awụlẹ ẹnẹwẹ ịnyịnyị.

²⁰IModekayị da ala ịwẹ wuu ju. Ọọwa, ọ da ileta du kịla ala iJuu ịlẹ kị kụ ọnaabwọ bala ẹga ọlụrụ ọ-ọpyị nya iPechiya wuu kaka

²¹byaa ya nyị la ọmwịịnyọ ẹnụtụrụ iwo kụrụ ine bala ẹnụtụrụ iwo kụrụ ịrụ nya ọya nya Adāà ẹka ọnyị myị ọnyị mẹ lẹlẹ.

²²Ẹnụtụrụ ịwẹ à ri ẹnụ ịlẹ ka ala iJuu kpa kụrụ aluji nyaa lẹ. Ọya ọwẹ à ri ọya ọlẹ ká ụka nya ọjụjụ nyaa yẹ kpáta ka ri ụka nya ụya ọyaya lẹ. Ọ ri ụka ọlẹ ká imahị nyaa yẹ ka ri ọkẹkẹnị bala ọmwịịnyọ. Ị ka hu ẹnụtụrụ ịwẹ nya ẹnụ nya ọhụhụ nya ụya ọyaya bala ẹnụ o-bwu ang oriri du kịla awụlẹ bala alẹbyahị.

²³Ọọwa, ala ịJuu à ba ọmẹjẹ nya iModekayị jẹ lẹ, ị juwa kpịtịya nya ẹnụtụrụ imiiye ịwẹ lala ẹnụ ọmwịịnyọ ẹka myị ẹka lẹlẹ.

²⁴ỊHaman, oluji nya ala iJuu ọlẹ kọ ri ọnyị nya ịHamẹdata ọnyị nya Agagị lẹẹ me obyi nyọka ta ala iJuu wuu ayịreji kpụ ọ da iwo ịlẹ kị wụrụ ipurim nyọka jẹ ẹnụ kị ka nwaa.

²⁵Ma, ụka ká Ẹsịta ka ẹga nya adịrahụ, adịrahụ da ehile ya ang onyobyi ọlẹ ka ịHaman nyị me obyi nyamwụ yahị da ala iJuu wẹẹ, nyị ka họ jịra u-uhye egbeju nya ịlọmwụ. Ọ ya nyị ka ju anyị alẹng nya ịHaman orinwa ịnyịnyị.

²⁶Ang odudu kị wụrụ ẹnụ ọmwịịnyọ ịwẹ iPurim[9] à wẹ lẹlẹ. Ọọ-lajị nya ileta ọlẹ ká iModekayị da bala ang ịlẹ kị họ taa wẹ wuu lẹ,

²⁷ala iJuu hwoo nya ehile ya ịwa lịlaa bala anyị ịtụma nyaa bala angịlẹ kị ka yẹ ka ri ala iJuu ẹnẹhẹ wẹẹ̀ nyị̄ kpịtịya nya ẹnụtụrụ imiiye ịwẹ lụka ohunọ nyaa ẹ-ẹpwụ nya ẹka ọnyị myị ọnyị jaabwọ ká iModekaya da ụ-ụpwụ nyamwụ mẹ.

²⁸Alugbiyegu nya ala iJuu ọnyị myị ọnyị ịlẹ kị kụ e-epweji bala imwawụ ọnyị myị ọnyị ka kpịtịya nya ẹnụtụrụ imiiye nya iPurim ịwẹ gbe oyi myị oyi.

²⁹Adịrahụ ọnyang Ẹsịta ọnyị nya Abihẹlụ bala iMọdẹkayị da ụpwụ nya ọ-myị ọnụ ju ụpwụ oheeye ọlẹ ka iModekayị da chajị nya ọhụhụ nya iPurim.

³⁰Ị ya ileta ọọwa du ẹrụ tọ ala iJuu ịlẹ wuu kị kụ i-imwawụ ohu da iwo imiiye kụrụ irwiye (127) ịlọpyị nya adịrahụ Ahesurọsị. Ị da ụ-ụpwụ ọọwa ya ala iJuu wuu nyị̄ pyẹ̀ẹẹ ẹ-ẹpwụ nya okpunyi mẹ.

³¹IModekaya bala Esịta byaa kịịwa bala anyị ịtụma nyaa ka kpịtịya nya ọhụhụ nya iPurim lụka ohunọ nyamwụ jaabwọ kịịwa ayịdang wẹẹ kpa ehile nya ụka ọ-hụ limyi bala ida ọbaba ịnyịnyị mẹ.

³²Ịịwẹ ị kpa ọngịrị nya ileta ọlẹ ká Ẹsịta da ya ehile nya ọhụhụ nya iPurim ọwẹ yeji lẹ̀, ị dọọ juwa ẹpwụ nya ụpwụ lẹlẹ.