Read idege EHE ỌKPỤKPỤ 1 Bible Online

EHE ỌKPỤKPỤ 1 - idege bible

EHE ỌKPỤKPỤ 1

¹Anyị nya iJekọbụ ịlẹ kị bọọ kele ka ọpyị nya Ijipiti bala alugbiyegu nyaa wuu à lẹẹ lẹ:

²IRubẹn bala iSimyọn bala iLivayị bala iJuda,

³bala Isakaa bala iSebulọn bala iBenjamịn,

⁴bala ịDan bala ịNafụtali bala ịGadị bala Achẹẹ.

⁵Iru ojuju nya anyị nya iJekọbụ lụka ọwẹ wuu tụchawụlẹ la angị iwo irwiye (70)[1]. IJosẹfụ ọnyị nyamwụ lẹ, tị juwa ọ-ọpyi nya Ijipiti ene-ene lẹ.

⁶Ụka kọ nọ chẹẹ lẹ, iJosẹfụ bala anyịnamwụ anyị bala aloyi ọọwa à gbu wuu lẹlẹ.

⁷Ma, anyị ịtụma nya iJekọbụ ịịwa ma anyị lụmẹ-lụmẹ, juwa pyẹ kịlahị-ịlahị bala ọ-la ọngịrị nya ịlẹhị-ịlẹhị gbee kị myị ọpyị nya Ijipiti kpọrịkọọ.

⁸Ọọwa lẹ, ọngọ onyeewe ọlẹ kọ jẹ ẹlẹlẹhẹ chajị nya iJosẹfụ ka à tị dọmwụ nya adịrahụ oriri ụ-ụwa Ijipiti lẹlẹ.

⁹Ụka ọhẹ lẹ, adịrahụ ọọwa à byi ala Ijipiti nyaa yẹkẹẹ, “Anụ yẹ mẹ! Ala Isirẹlụ ịlẹ ju iru bala ọ-la ọngịrị lụmẹ kịlaahị-kịla lẹ.”

¹⁰Āhị kpa ijẹẹhị ọhẹ tụ ụgbẹyị nya opyẹpyẹ nyaa ku mẹ. Ó-ri ịnyị ka, ụka ká ẹla ọmwọmwọ ọhẹ-ẹ́ kpeji, ị ka chẹkpẹ ju aluji nyahị, dẹwụ tụụhị pyịpyị gbee kị ka be rụ bwu ọpyị nyahị.

¹¹Ịnyị, ala Ijipiti à chụ alegbeju ịkpẹhị rịrị anyịhị nyọka kpa ala Isirẹlụ họ ụkụrwọ nya igwabwọ ọlẹ kọ ka wu olegu nyaa ọyị lẹlẹ. Ala Isirẹlụ nwụ epweji nya iPitom bala ịRamisisi ha adịrahụ nya ala Ijipiti, ká ụwa ka ri ẹga ọ-ya ang datị-datị guru.

¹²Ma, jaabwọ ká ala Ijipiti juwa tụ ala Isirẹlụ pyịpyị ka ba, ịnyịnyị-ịnyịnyị iru ojuju nyaa a juwa lụmẹ kịlahị-ịlahị gbee kị pyẹ yịrị ọpyị nya Ijipiti yịrị wuu lẹ. Ọọwa, ala Ijipiti a juwa ju uhi nya ala Isirẹlụ lẹlẹ.

¹³Ala Ijipiti họ ka ọhịhị nyí ala Isirẹlụ oru pwuu bwula ọ-táa ụbwọ ba ụkụrwọ ọnyọọngịrị, juwa yaa ụhi gụ olene-ene. Ị juwa kpaa họ ụkụrwọ nya ebe imeme bala ang ịlẹrụ nyaa ọhọhọ la o-jujwo nyaa kpong-kpong ka.

¹⁵Ọọwa lẹ, adịrahụ nya ala Ijipiti à da alụkụrwọ anyang imiiye ịlẹ kị kaa kpa anyang nya ala iHiburu ụma ịlẹ ká ẹnyị nyaa ri iChifura bala iPuwa ehile yẹkẹẹ,

¹⁶“Ụka kanụ juwa kpa anyang nya ala iHiburu ịwẹ ụma o-okube, anụ-ụ̀ nwụ ọnyị ọlẹng ọnyị myị ọnyị kị ma. Ma, ọ́ tị ri ká ọnyị ọọwa-á ri ọnyang aalẹ, anụ bahyoo.”

¹⁷Ma, alụkụrwọ ị-kpa anyang ụma ịịwa ju uhi nya Ohe Oluhye lẹ, ị́ myị họ jaabwọ ká adịrahụ ya ka. Ị yẹ anyị alẹng chịng juwa hịhị.

¹⁸Ụka ká adịrahụ-ụ́ jẹ jaabwọ kọ ka họ kaka lẹ, ọ du ẹrụ ka wụrụ alụkụrwọ ị-kpa anyang ụma ịịwa lẹ, ọ taa wo yẹkẹẹ, “Ịyẹ tị́ du kanụ họ ịnyị, kanụ yẹ anyị alẹng nya ala iHiburu chịng la ọ-nwaa ka?”

¹⁹Alụkụrwọ ị-kpa anyang ụma ịịwa wẹ byi adịrahụ yẹkẹẹ, “Anyang nya ala iHiburu-ú la dẹwụ-dẹwụ lala anyang nya ala Ijipiti ka. Ọnyị ọmama nyaa kaa chịkpẹẹ hyaa. Ene kahị ka pwụ ụwa kpá, ị kaa ma anyị lẹ̀.”

²⁰Ọọ-lajị nyọlẹ ká alụkụrwọ anyang ịwẹ ju ihi nya Ohe Oluhye lẹ, ọ mẹ ọnahị nyamwụ jẹ ẹ-ẹga nyaa. Ọ họ kị ma anyị nya ụbwọ nya ịlaa. Ụka ọọwa, ala Isirẹlụ juwa pyẹ kịlahị-ịlahị bala ọ-la ọngịrị gụ olene-ene.

²²Ụka ohyẹẹkpẹ lẹ, adịrahụ à da ehile byi angịnyị nyamwụ wuu yẹkẹẹ, “Anụ-ụ̀ hu ọnyị ọlẹng ọnyị myị ọnyị ká ala iHiburụ ma kpa ka da ju ka ẹpwụ nya Ihu ịNayịlị mẹ. Ma, anụ họ anyị anyang ịngịngịhyẹ kpong-kpong koo.”