Read idege EHE ỌKPỤKPỤ 10 Bible Online

EHE ỌKPỤKPỤ 10 - idege bible

EHE ỌKPỤKPỤ 10

¹Ọọwa lẹ, Amkpaa-à byi iMosisi yẹkẹẹ, “Kele ka ẹga nya iFero mẹ. Am ayịdang họ kọọwa bala alegbeju ịtụkụ yoo ngịrị ọkịlẹtụ nyaa ọngịrị, chajị kam ka bwula ọọwa chị ụkụrwọ ẹbyẹbyị nyam ịlẹ ehe ẹ-ẹpwarịrị nyaa.

²M̀ họ ịnyị chajị kanụ tịtị ka jẹ-ẹ̀ gbe kpẹẹkpẹẹ je anyị nyanụ bala anyị ịtụma nyanụ jaabwọ kam kpa ala Ijipiti hu utungguru bala jaabwọ kam họ ụkụrwọ ẹbyẹbyị nyam ẹ-ẹpwarịrị nyaa. Anụ wuu ka jẹ kam ayịdang kpakpaakpa à ri Amkpaa.”

³Ịnyị, iMosisi bala Erọn à kele ka ẹga nya iFero lẹ, ị byoo yẹkẹẹ, “Amkpaa Ohe Oluhye nya ala iHiburu yẹkẹẹ, ‘Ányị a tị́ ka myị-ị̀ che kpẹẹ ham ka tata ka ba-à? Pẹhi angịnyị nyam kị rụ, chajị kị ka gbịgba ham mẹ.

⁴Ó-ri ká myị tụụbwọ hyaa rụ ka aalẹ, m̀ ka du ịyịri wẹ ọpyị nyang ijuju oleeri ọlẹ.

⁵Eji ka yẹ ịrịrị la ịyịrị ịịwa gbee ká ọpyị-ị́ dọmwụ ka hyeehe wiri-wiri kpụ ịị yẹ ẹ-ẹhị ka. Ị ka ri ang ihihi ịlẹ ká ekpawẹ-ẹ́ bịrị ka. Ị ka ri ekeji ịlẹrụ nyanụ wuu gbanggbang.

⁶Ịyịrị ịịwa ka myị̀ ebe ịlọdọda nyang bala ịnya alegbeju ịtụkụ ying bala ịnya ala Ijipiti wuu kpọrịkọọ. Adanụ ịmanụ ma lee adanụ igogo anyị-ị́ yẹ iru nya ịyịrị ịlịnyị ẹnẹnẹhẹ mwiiji kị maa ya ẹta chị eji kwẹkụrwẹ lẹka da wẹ ahyẹẹnụ ọlalẹ.’ ” Ọọwa lẹ, iMosisi à jahị kpata lẹ, ọ rụ bwu ẹga nya iFero lẹlẹ.

⁷Alegbeju ịtụkụ yi iFero byoo yẹkẹẹ, “Ányị ā tị́ tịtọ ká ọlẹng ọlẹ ka kịnyaa la ọ-myị ahị ka dọhụ rwẹẹ ka tata kaka ba-à? Bà hi ala Isirẹlụ ịwẹ kị rụ kaka gbịgba ha Amkpaa Ohe Oluhye nyaa mẹ. Á jẹ ká Ijipiti lẹpwụ-lẹpwụ yẹ ịkpangkachị lẹka-á?”

⁸Ịnyị, ị wụrụ iMosisi bala Erọn tịrẹkpẹ ka ẹga nya iFero Adịrahụ lẹ, ọ bya yẹkẹẹ, “Anụ rụ kele kaka gbịgba ha Amkpaa Ohe Oluhye nyanụ mẹ. Tị lẹẹ, oowo anyị lẹpwụ nyanụ à tị́ juwa ka ka ẹdịyẹ ọọwa ene-è?”

⁹IMosisi wẹ byoo yẹkẹẹ, “Ahị wuu à juwa ka ka lẹ. Anjwo bala angịgbahị bala anyị alẹng bala anyị anyang, tụ ịkpịlọ bala ịna nyahị wuu ka ka ẹdịyẹ ọọwa, chajị ahị juwa kele ka la ọhụhụ nyọka chihi ju Amkpaa.”

¹⁰Ma, iFero Adịrahụ byaa yẹkẹẹ, “Amkpaa ā juwa tanụ kele mẹ, ó-ri kanụ yẹyẹ kam tụụbwọ hi anyang bala anjwo nyanụ dịrẹnụ-dịrẹ lẹ̀! M̀ jẹ kanụ la irya onyobyi ọhẹ ọ-ọkịlẹtụ.

¹¹M̀ pwa! Anụ alẹng kem ā rụ kele, kanụ ka gbịgba ha Amkpaa jaabwọ kanụ lẹẹ bịlẹ mẹ.” Ọọwa lẹ, ị ku iMosisi bala Erọn kpehe hi ahị nya adịrahụ lẹlẹ.

¹²Ọọwa, Amkpaa-à byi iMosisi yẹkẹẹ, “Nịra ụbwọ nyang kpaaa ka uhye nya ọpyị nya Ijipiti, chajị ká ịyịrị ā mwụ bwọọọ wẹ ụwa mẹ. Ị ka ri ang myị ang ịlẹrụ nyaa ịlẹ ká ekpawẹ-ẹ́ bịrị ka mẹ.”

¹³Ịnyị, iMosisi à nịra ọgọdọ nyamwụ kpaa ka uhye nya ọpyị nya Ijipiti lẹ, Amkpaa-à họ ká igbachịwụ o-bwu ọmwẹnụ-ụtụrụ da wẹ ọpyị nya Ijipiti wuu lẹlẹ. Ọ da la ahị ọpyẹpyẹ bala odu ohihi ọọwa wuu la ọ-kpụba ụka ọhẹ-lọhẹ ka. Ahị à ka pyẹ lẹ, igbachịwụ ọwẹ à kpa ịyịrị pwụ eji lẹlẹ.

¹⁴Ịyịrị ịịwa hu ẹwụ kitim ọ-ọpyị nya Ijipiti. Ẹga myị ẹga nya Ijipiti wuu yẹ ịrịrị laa. Ịyịrị-ị́ ju iru ịịwẹ ẹnẹnẹhẹ lẹka. O-me ọlịịwẹ-ẹ́ tị ka ji ẹnẹnẹhẹ kaka ịnyịnyị.

¹⁵Ị myị ẹga myị ẹga wuu gbee ká ịpyị chu bidu. Apwụ bala egbe nya ekeji ịlẹ wuu ká ekpawẹ-ẹ́ bịrị ka, ịyịrị ịwẹ naa kịrẹm. Ịngịngịhyẹ olukpo-lukpo-ó hi u-uhye nya okoji lee ụmẹ ọhẹ-lọhẹ ẹ-ẹgẹgẹhẹ nya ọpyị nya Ijipiti kaka.

¹⁶IFero du ẹrụ ahyaahị kaka wụrụ iMosisi bala Erọn lẹ, ọ byaa yẹkẹẹ, “M̀ họ ang ọtịpyọ ba Amkpaa Ohe Oluhye nyanụ bala anụ ayịdang lẹ.

¹⁷Anụ hịnyọhi ọhọbịrị nyam ugbẹnyị myịmyị kanụ raabwọ ha Amkpaa Ohe Oluhye nyanụ kọ tụ ila nya akama ọlẹ kịnyaa him mẹ.”

¹⁸Ọọwa, iMosisi à yegiri bwu ẹga nya iFero lẹ, ọ raabwọ ha Amkpaa lẹlẹ.

¹⁹Amkpaa-à yẹ ụbwọhụ nya igbachịwụ ọwẹ da lẹ, igbachịwụ ọnyọọnygịrị ọhẹ à da bwu ọmwẹnụ-obyi kaka go ịyịrị ịịwa kpa ka ju ka ẹpwụ nya Ihu Oletungkohyo wurum lẹlẹ.

²⁰Ma, Amkpaa họ ká iFero ngịrị ọkịlẹtụ nyamwụ ọngịrị, ọ́ myị tụụbwọ hi ala Isirẹlụ rụ ka.

²¹Ọọwa lẹ, Amkpaa-à byi iMosisi yẹkẹẹ, “Hu ụbwọ nyang hwaa ka uhye-ọgba chajị ká ụkpowu ā chị ám̀ ọ-ọpyị nya Ijipiti mẹ. Ukpowu okpemkpem ọọwa ka ri ọlẹ kị ka jẹ-ẹ yụbwọ gụ.”

²²Ịnyị, iMosisi à hu ụbwọ nyamwụ hwaa ka uhye-ọgba lẹ, ukpowu okpemkpem à chị ẹ-ẹga myị ẹga nya ọpyị nya Ijipiti wuu ẹ-ẹpwụ nya ẹnụtụrụ ịta gbẹgbịlẹ lẹlẹ.

²³Ọngọngọhẹ-ẹ́ jẹ yẹ ọngọwụlẹ ẹ-ẹhị lee o-wuleji bwu ẹpwa nyamwụ ka ẹga ọkịla ka ẹ-ẹpwụ nya ẹnụtụrụ ịta lẹpwụ-lẹpwụ. Ma, ala Isirẹlụ wuu tị la ahịgboo ụ-ụwa ẹ-ẹpwa nyaa ịwa lụka ọọwa.

²⁴Ọọwa lẹ, iFero à du ẹrụ kaka wụrụ iMosisi lẹ, ọ byoo yẹkẹẹ, “Anụ rụ kele kaka gbịgba ha Amkpaa mẹ. Anụ-ụ̀ kpa anyang bala anjwo ichiche nyanụ wuu dịrẹ ịlọnụ mẹ. Ịkpịlọ bala ịna nyanụ tị ka hi jam pyii.”

²⁵Ma, iMosisi wẹ yẹkẹẹ, “Aalẹ, ahụ à tị̀ tị̄ ka ya ang ịlẹ kahị ka kpa kịla iya ha Amkpaa Ohe Oluhye nyahị hahị lẹlẹ.

²⁶Ahị ka kpa iyo ileji nyahị ba ịlọhị. Áhị ka pẹhi ọhẹ-lọhẹ nyaa dam kpong-kpong ka. Ịhyẹ lẹpwụ nyaa ịlẹ kahị chụ ahị ka kpa gbịgba ha Amkpaa Ohe Oluhye nyahị lẹ. Ụka kahị tị pwụ ụwa kpá ene ahị ka jẹ ụma nya iyo ịlẹ kahị ka kpa gbịgba ha Amkpaa wẹẹ lẹ.”

²⁷Ma, Amkpaa họ ka iFero ngịrị ọkịlẹtụ nyamwụ ọngịrị, ọ́ myị tụụbwọ hi ala Isirẹlụ rụ ka.

²⁸Ọọwa, iFero à byi iMosisi yẹkẹẹ, “Tụ kịnyaa hi ẹhị nyam mẹ! Ā họ kam ya ẹhị nyam gung gụ ọwẹ koko! Ẹnụ kam yẹng ẹ-ẹhị lẹ aalẹ, odehe nyang à ka myị lẹlẹ.”

²⁹IMosisi wẹ byi adịrahụ yẹkẹẹ, “O hiigu, à ya kpakpa. Ḿ ka yẹng ẹ-ẹhị gụ ọwẹ ẹnẹnẹhẹ kaka ịnyịnyị.”