Read idege EHE ỌKPỤKPỤ 11 Bible Online

EHE ỌKPỤKPỤ 11 - idege bible

EHE ỌKPỤKPỤ 11

¹Ụka ọọwa, Amkpaa byi iMosisi yẹkẹẹ, “M̀ juwa ka kpa akama ọkịla ookpokpo kem wẹ uhye nya iFero Adịrahụ bala angịnyị nyamwụ lẹ. Ọọwa lẹ, ọ ka tụhiinu rụ bwu ẹgẹlẹ lẹlẹ. Ụka kọ ka tụhiinu, ọ dọmwụ ka kpa agbụrụ kunu rụ wuu gbanggbang.

²Byi ala Isirẹlụ ká ọng myị ọng nyaa a tọ ịtọ nya ang ịlẹ kị kpa okpoko ịgọm bala okpoko onyoowuru họ bwu ụbwọ nya ala Ijipiti ịlẹ kị kụ ẹpwa lawụlẹ mẹ.”

³Ụka ọọwa, Amkpaa họ ká ala Ijipiti la olegu nya ọnahị ẹ-ẹga nya ala Isirẹlụ. Ọ́ ba ọọwẹ ka, ala Ijipiti wuu bala alegbeju ịtụkụ yi iFero Adịrahụ hu iMosisi nya ọngọ ọtụka.

⁴Ịnyị, iMosisi à byi adịrahụ ụka ọọwa yẹkẹẹ, “Ịịlẹ Amkpaa-à ya lẹ: ‘M̀ ka jẹ tụ Ijipiti wuu da lala ụka nya epwodu o-gu ene.

⁵Ọnyị ọlẹng nya ọgbanyẹ ọnyị myị ọnyị wuu ka gbu lụka ọọwa. Ọnyị ọlẹng nya ọgbanyẹ nya iFero ọlẹ kọ wẹẹ ka ri adịrahụ tụ ọnyị ọlẹng nya ọgbanyẹ nya ọnyọhị ọlẹ kọọ go ang i-igo bala anyị nya ọgbanyẹ nya ịna nyanụ wuu ka gbu ịnyịnyị.

⁶Ọọwa, eko onyuujujwo o-gboo à ka kpeji ẹ-ẹga myị ẹga nya Ijipiti lẹlẹ. Ụma nya eko onyuujujwo ọlịnyị-ị́ ji Ijipiti ẹnẹnẹhẹ lẹka, o-me ọlinyị-ị́ tị ka ji ẹnẹnẹhẹ kaka ịnyịnyị.

⁷Ma, ẹ-ẹga nya ala Isirẹlụ lẹ, ebwu ọlam-ọlam ọlẹ-ẹ́ dọmwụ ka wọ arụ jwaa lee iyo oleji nyaa ọhẹ-lọhẹ kpong-kpong ka. Ọọwa lẹ, ā ka jẹ kam Amkpaa họ ka ang ọdatị ji ẹpwarịrị nyanụ anụ ala Ijipiti bala ala Isirẹlụ lẹlẹ.’

⁸Alegbeju ịtụkụ ying ịwẹ wuu ka rụnyẹ warị wẹ ẹga nyam kaka hirikpẹẹ ham, juwa bịlẹm yẹkẹẹ, ‘Yegiri, ká rụ bala angịnyị nyang wuu me!’ Ọọwa-á họ jịra kpá lẹ, m̄ ka rụ lẹlẹ” Ọọwa lẹ, iMosisi a yegiri bwu ẹga nya iFero la ikẹjẹ-awụrụ lẹlẹ.

⁹Amkpaa lẹẹ byi iMosisi ene yẹkẹẹ, “IFero-ó ka myị-ị̀ ke ụrụ lanụ ka, chajị ká ụkụrwọ ẹbyẹbyị ịlẹ kam ka họ Ijipiti ka ju iru.”

¹⁰IMosisi bala Erọn họ ụkụrwọ ẹbyẹbyị ịwẹ wuu a-ahị nya iFero. Amkpaa tị họ kọ ngịrị ọkịlẹtụ nyamwụ ọngịrị lẹ, ọ́ myị pẹhi ala Isirẹlụ rụ bwu ọpyị nyamwụ ka.