Read idege EHE ỌKPỤKPỤ 12 Bible Online

EHE ỌKPỤKPỤ 12 - idege bible

EHE ỌKPỤKPỤ 12

¹Ọọwa, Amkpaa-à byi iMosisi bala Erọn ụ-ụwa Ijipiti yẹkẹẹ,

²“Ọya ọlẹ kpangga à ka ri ọya nya ọgbanyẹ-ọgbanyẹ nyanụ lẹ. Ọwa à ka ri ọya ọhọhẹ-họhẹ nya ẹka ọwawa nyanụ lẹlẹ.

³Aa byi aluche nya ala Isirẹlụ wuu mẹ, ẹnụtụrụ okiriwo nya oya ọlẹ, ọlẹng ọnyị myị ọnyị ka chụ ụgba nya ẹmwụ ookpokpo ha ugbiyegu nya ịlọmwụ-ịlọmwụ.

⁴Ugbiyegu ọlẹ ká ụgba nya ẹmwụ ọlẹpwụ-lẹpwụ-ụ́ kịlaa-kịla la oriri kà bá ịnya alughiyegu ọkịla oloye-ẹpwa nyaa bá taa myị, meme la iru ojuju nya alụwa bala jaabwọ ká ong myị ọng nyaa ka jụ ri kaka ba.

⁵Iyo ọlẹ kanụ ka chụ ka ri ọlẹng ọlẹ kọ gu ẹka ookpokpo, ká ehe-é họọ ka. Ọ ka ri ụgba nya omilodo lee oyichi myị.

⁶Ugbiyegu ọnyị myị ọnyị ka kpẹhị rịrị ẹmwụ nyamwụ gbee da ka ẹnụtụrụ iwo kụrụ ine nya ọya ọlẹ. Ẹnụ ọọwa aluche nya ala Isirẹlụ wuu à ka nwụ ágba nya ịmwụ nyaa lụka nya ewu-obyi lẹ.

⁷Ị ka gu ịwọ nya ịmwụ chị ịkịka imimiiye bala uhye nya ekeji i-wu ukpileku kpa nya ẹpwang ọlẹ kị wẹẹ ka kụ ri iyo ọọwa.

⁸Lodu-odu ọọwa, ị ka ya iyo ọwẹ hyà i-ila. Ọọwa, ị ka kpa apwụ ilejwo-ejwo bala ịkaa ọmịrịị-mịrị-ka ba iyo ọọwa ri lẹlẹ.

⁹Ānụ kpụ iyo ọọwa ene kanụ ka ryoo lee o-ryoo ri lịmẹ-lịmẹ koo. Anụ hyọọ hya i-ila lẹpwụ-lẹpwụ tụ egbeju bala ata tụ ang-ẹpwụ nyamwụ wuu.

¹⁰Anụ hi ẹ̀ga nya iyo ọọwa ọhẹ-lọhẹ nọ gbe alụtụrụ koo. Ó-ri ká ọhẹ nyamwụ-ụ́ hi gbe alụtụrụ aalẹ, anụ chọọ ila hụrụ mẹ.

¹¹Ụka kanụ ka ri ang oriri ọọwa, anụ ka ya ugba ọchọhị nyanụ chị awụrụ nyanụ kpimkpim bala ọ-ya ugbẹtẹ nya ẹdịyẹ ju ẹta giri-giri la ọgọdọ nyanụ ụbwọ nya ọnwụlanọ nya ẹdịyẹ. Anụ-ụ̀ ryoo lagaga ịnyịnyị mẹ. Ang Oriri Ọchịpwụrụ ọ-chị ihi jum am Amkpaa a wẹ lẹlẹ.

¹²“Ẹnẹwẹ-ẹnẹwẹ lodu m̄ ka chịpwụrụ bwu ọpyị nya Ijipiti wuu juwa nwụ ọnyị ọlẹng nya ọgbanyẹ nya angịnyị ehe bala iyo ileji ịlụwa wuu lẹ. M̀ tị ka yẹ ijiga nya ala Ijipiti wuu akama. Am kpakpakpa a ri Amkpaa lẹ.

¹³Ịwọ ọlẹ kanụ ya chị ekeji i-wu ekpileku nyanụ kpa à ka ri ang-ẹjẹẹ ọ-kpa jẹ ẹpwa ẹga kanụ kụ hanụ lẹlẹ. Ụka kam yẹ ịwọ ọọwa, m̀ ka cheji baanụ. Ḿ ka họnụ Akama ọhẹ-lọhẹ ịlẹ kam wẹẹ ka yẹ ala Ijipiti-í ka tụ junu chwẹẹ ka.

¹⁴“Ẹnewẹ ri ẹnụtụrụ ọlẹ kanụ ka kpa kpịtịya. Anụ ka kpịtịya nyamwụ ju ka oyi ọlịlahị ọnyị myị ọnyị wuu bwula ọ-la ọhụhụ nya ụya ọyaya ọ-chihi ju Amkpaa pyịyọọ gbe oyi myị oyi.

¹⁵“Anụ ka ri ịkaa ọmịrịị-mịrị-ka jịra ẹnụtụrụ irwiye gbẹgbịlẹ. Ẹnụ nya ọgbanyẹ-ọgbanyẹ, anụ-ụ̀ hu ụma nya ijọnwa ọ-mịrị ịkaa ịlẹ kị juwa ẹ-ẹpwa nyanụ wuu daarụ mẹ. Ọngọngọhẹ kọ kpa ịkaa ọmịrịị-mịrị kà ọnụ nyamwụ bwu ẹnụtụrụ ọhọhẹ ọwẹ gbee da ka ẹnụtụrụ ọharwiye á ka ri ala Isirẹlụ ẹnẹnẹhẹ kaka.

¹⁶Anụ-ụ̀ la ọjịra-jịra kanụ gbịgba ham ẹnụtụrụ ọhọhẹ bala ẹnụtụrụ ọharwiye. Ānụ họ ụma nya ụkụrwọ ọhẹ-lọhẹ ẹnụtụrụ imiiye ịwẹ kpong-kpong ka. Ang ọlẹ kam myị ọnụ hanụ kanụ ka họ ẹnụtụrụ ịwẹ kẹnẹ-kẹnẹ à ri ang oriri nya ịlọnụ ọhọhọ lẹlẹ.

¹⁷Anụ ka la ọhụhụ nya Ịkaa Ọmịrịị-mịrị-ka nya ọ-kpa kpịtịya, chajị ẹnẹwẹ kpangga m̄ gbanụ wuu kpehe ebwebweebwo bwu ọpyị nya Ijipiti lẹ. Anụ ka kpịtịya nya ẹnẹwẹ bwula ụya ọyaya. Ehile o-gbe oyi myị oyi ọlẹ ká aloyi ọlịlahị wuu ka kpa à wẹ lẹ.

¹⁸O-bwu alobyi nya ẹnụtụrụ iwo kụrụ ine gbee da ka alobyi nya ẹnụtụrụ iwo imiiye kụrụ ookpokpo nya ọya ọhọhẹ, ánụ ka ri ịkaa ọlẹ kị ya ang ọ-mịrị ịkaa ju ka.

¹⁹Ẹ-ẹpwụ nya ẹnụtụrụ irwiye gbẹgbịlẹ, ang ọ-mịrị ịkaa-á ka ji ẹpwa nya ọngọngọhẹ nyanụ ka. Lụka ọwẹ wuu ọngọngọhẹ kọ ri ịngịngịhyẹ ọlẹ kị ya ang ọ-mịrị ịkaa ju lẹ aalẹ, ọngọọwa-á ri ọngga ri lee ọnyị ọlọpyị wẹwẹ, ọ́ ka ri alẹpwụ nya ala Isirẹlụ kaka.

²⁰Anụ ri ịngịngịhyẹ ọlẹ kị kpa ang ọ-mịrị ịkaa ka ẹpwụ nyamwụ koko. Ẹga myị ẹga kanụ kụkụ, ikaa ọmịrịị-mịrị-ka anụ ka ri lụka ọọwa lẹlẹ.”

²¹Ọọwa lẹ, iMosisi à du ẹrụ kaka wụrụ ịgabwọ nya ala Isirẹlụ wuu lẹ, ọ byaa yẹkẹẹ, “Ọng myị ọng nyanụ ka chụ ụgba nya ẹmwụ ha ugbiyegu nyamwụ, chajị kanụ ka nwọọ nya ọhụhụ nya Ang Oriri Ọchịpwụrụ.

²²Anụ-ụ̀ ya uke nya okoji ihisọpụ ọlẹ kọ la chọnyị ju ịwọ nya ẹmwụ ọlẹpwụ nya ẹja chwaaa, kanụ ya ịwọ ọọwa chị uhye bala ịkịka imimiiye nya ekeji i-wu ekpileku nya ẹpwang nyanụ kpa mẹ. Ọngọngọhẹ nyanụ-ụ́ tị ka kpehe bwu ube nyamwụ kaka gbee da ka ahị ọpyẹpyẹ.

²³Ụka ká Amkpaa ka chịpwụrụ bwu ọpyị nya Ijipiti kọ ka nwụ anyị alẹng ịgbahị ịlụwa, ọ̄ ka yẹ ịwọ oluhye bala ọlịkịka nya ekeji i-wu ekpileku nyanụ kpa lẹ̀, ọ ka cheji ba ọnang ọọwa lẹlẹ. Ọ́ ka myị Olegu Ẹrụ ọ-nwụ angịnyị ka wẹ ẹpwang nyanụ kaka nwụnụ kaka.

²⁴“Anụ bala anyị nyanụ ā kpa ehile ịlẹ nyanụ gbe oyi myị oyi mẹ.

²⁵Ụka kanụ pwụ ọpyị ọlẹ ká Amkpaa wẹẹ ka ya hanụ jaabwọ kọ myị ọnụ ene kpá, anụ-ụ̀ la ọhụhụ ọlẹ ụ-ụwa ịnyịnyị.

²⁶Ụka ká anyị nyanụ-ụ́ tọnụ wo yẹkẹẹ, ‘Ịyẹ à tị́ ri etu nya ọhọhọ ọlẹ kpong-kpong?’

²⁷Aalẹ, anụ ya jaa yẹkẹẹ, ‘Ọhọhọ ọlẹ ri iya ọkịlaakịla nya ang Oriri Ọchịpwụrụ ọ-chị ihi ju Amkpaa. Amkpaa cheji ba ẹpwa nya ala Isirẹlụ ụ-ụwa Ijipiti. Ọ nwụ ala Ijipiti, ọ tị chịhị da.’ ” Ọọwa lẹ, ala Isirẹlụ à hirikpẹẹ gbịgba ha Amkpaa lẹlẹ.

²⁸Lẹ, ala Isirẹlụ à kele ka họ kpẹẹkẹẹ jaabwọ ká Amkpaa da iMosisi bala Erọn ehile wuu lẹlẹ.

²⁹Lụka nya epwodu ogwene nya ẹnụ ọọwa, Amkpaa nwụ ọnyị nya ọgbanyẹ ọnyị myị ọnyị Ijipiti wuu. Ọnyị nya ọgbanyẹ nya adịrahụ ọlụka ọọwa ọlẹ kọ wẹẹ ka ku ọmwakpa nyamwụ tụ ọnyị nya ọgbanyẹ nya ọlagba ọlẹ kị ya ju agba ọtịpyọ u-ube ọlẹpwụ ịpyị bala anyị nya ọgbanyẹ nya iyo ileji wuu gbu kpẹngkpẹng ịnyịnyị.

³⁰Adịrahụ bala alegbeju ịtụkụ yoo bala ala Ijipiti wuu chahị une wuleji ụka nya alodu ọọwa. Eko onyuujujwo ọchịchị gboo kpeji ẹ-ẹga myị ẹga nya Ijipiti, chajị ẹpwa ọhẹ-lọhẹ-ẹ́ hi ká ọngịnyị-ị́ gbu ụ-ụwa ka lẹ ka.

³¹Lụka nya alodu ọọwa, iFero du ẹrụ kaka wụrụ iMosisi bala Erọn lẹ, ọ byaa yẹkẹẹ, “Anụ wuleji, kanụ rụ tụ kịnyaa hi ọpyị nyam mẹ! Anụ rụ bala ala Isirẹlụ wuu lawụle awụlẹ mẹ! Kanụ kele ka gbịgba ha Amkpaa jaabwọ kanụ ya mẹ.

³²Anụ go ịmwụ bala ịna nyanụ jaabwọ kanụ ya ịnyịnyị mẹ. Anụ-ụ̀ bịlẹ Ohe Oluhye kọ wahị kụrụm mẹ.”

³³Ụka ọọwa, ala Ijipiti juwa chị ala Isirẹlụ agaga nya ọrụrụ bwu ọpyị nyaa, juwa byaa yẹkẹẹ, “Ánụ rụ ahyaahị ka tụbwọ aalẹ, ahị ka gbu hụrụ wuu lẹ!”

³⁴Ịnyị, ala Isirẹlụ à hu ọrụ nya ang ọ-kpa họ ịkaa ọlẹ kị wọọ la enyi, la ọ-ya ang ọ-mịrị ịkaa jwoo lẹka lẹ, ị ya ju udiyo ị-kpa họ ịkaa nyaa, ya ịpwụ daba raa lẹlẹ. Ị ya rịrị amwachwọ nyaa juwa kpa rụ lẹlẹ.

³⁵Ala Isirẹlụ họ kpẹẹkpẹẹ jaabwọ ká iMosisi mẹjaa. Ị tọ ala Ijipiti ịtọ nya ang ịlẹ kị kpa okpoko ịgọm bala okpoko onyoowuru họ bala ịwụrụ ịkụrụ-kụrụ.

³⁶Amkpaa họ ká ala Ijipiti haa ọnahị. Ị ya ang ịlẹ ká ala Isirẹlụ tịtọ bwu ẹga nyaa haa. Ịịwẹ ị bwu go ala Ijipiti ang-ụdụ nyaa kpa rụ lẹlẹ.

³⁷Ala Isirẹlụ jẹdịyẹ nyaa bwu ịRamisisi kele ka pwụ iSukotu. Alẹng ịlẹ kị jẹ ẹ-ẹpẹtẹ kem la angị ụnọ ohu ịrwọnyẹ (600,000) datị hi anyang bala anjwo ichiche.

³⁸Iru nya angịkịla datị-datị lụmẹ-lụmẹ baa rụ bala iru nya ogu nya iyo ileji o-juwa táa da rụ hyọọọ ịnyịnyị.

³⁹Ị ya ịrụ nya ang ọ-kpa họ ịkaa ọlẹ kị kpa dịrẹ ịlaa bwu Ijipiti họ ịkaa ọmịrịị-mịrị-ka. Ị́ la ụka nyọka họ ang oriri ha ịlaa ri lee ọ-ya ang ọ-mịrị ịkaa ju ịkaa ene ka chajị nyọlẹ kị kwaa rụ la ọkpịraka bwu ọpyị nya Ijipiti.

⁴⁰Angịnyị nya ala Isirẹlụ ayịdang kụ ọpyị nya Ijipiti ẹ-ẹpwụ nya ẹka ohu ine da iwo ịta gbẹgbịlẹlẹ (430).

⁴¹Ẹnụtụrụ ọlẹ ka ẹka ohu ine da iwo ịta (430) ịwẹ iwẹ cheju kpangga angịnyị nya Amkpaa wuu à ya ogu dawụlẹ rụ bwu Ijipiti gbanggbang lẹ.

⁴²Odu ọọwa ri ẹnụ ká Amkpaa kụ kee nyọka gba ala Isirẹlụ kpehe bwu ọpyị nya Ijipiti. Ịnyịnyị-ịnyịnyị ala Isirẹlụ à tịtị kaa kụ kee juwa kpịtịya nya odu ọwẹ ẹka myị ẹka pyịyọọ nyọka chị ihi ju Amkpaa lẹlẹ.

⁴³Amkpaa byi iMosisi bala Erọn yẹkẹẹ, “Ehile oluhye nya ọhụhụ nya Ang Oriri Ọchịpwụrụ ọlẹ kanụ ka kpa à lẹẹ lẹ: “Oloja ọkịla-á ka ri ang oriri ọlẹ kpong-kpong ka.

⁴⁴Ọnyọhị ọlẹ kanụ ra lokpoko nya ịlọnụ tị ka ryoo myị, anụ tị ka dọọ ụwụwụ kpá ene.

⁴⁵Ma, ọngga bala ọlụkụrwọ ọlẹ kanụ diroo-diro bwu odehe ọhẹ-lọhẹ-ẹ́ tị ka ri ang Oriri Ọchịpwụrụ ọlẹ ka.

⁴⁶“Ẹ-ẹpwang ọlẹ kị họ ang oriri ọwẹ anụ ka ryoo lẹ. Ānụ kpa iyo ọhẹ-lọhẹ kpehe bwu ube wẹ odehe koo. Ānụ tị be ukpunogu nyamwụ ọhẹ-lọhẹ ene kpong-kpong ka ịnyịnyị.

⁴⁷Ọng myị ọng nya aluche nya ala Isirẹlụ wuu ka ri ang nya ọhụhụ ọlẹ.

⁴⁸“Ó-ri ká ọngga ọhẹ-lọhẹ ọlẹ kọ kụ ịnyanụ-ụ́ tịtọ kọ ka ri Ang Oriri Ọchịpwụrụ nya Amkpaa aalẹ, ị ka da alẹng ịlọdọdẹpwa nyamwụ wuu ụwụwụ ene. Ọọwa, ọ ka jẹ-ẹ̀ ri ang oriri ọlẹ lala ọnyị ọlọpyị ayịdang wẹẹ lẹ. Ọlẹng ọ-da ụwụwụ ka ọhẹ-lọhẹ-ẹ́ ka kpa ang oriri ọwẹ ka ọnụ ka.

⁴⁹Ehile ọlẹ juwa hanụ anụ angị ri lala Isirẹlụ bala angga ịlẹ kị kụ tanụ.”

⁵⁰Ala Isirẹlụ wuu họ kpẹẹkpẹẹ jaabwọ ká Amkpaa da iMosisi bala Erọn ehile ya nyị họ.

⁵¹Ẹnụ ọọwa kpangga Amkpaa-à gba ala Isirẹlụ wuu kpehe ebwebweebwo bwu ọpyị nya Ijipiti lẹ.