Read idege EHE ỌKPỤKPỤ 13 Bible Online

EHE ỌKPỤKPỤ 13 - idege bible

EHE ỌKPỤKPỤ 13

¹Amkpaa byi iMosisi yẹkẹẹ,

²“Chị ịgọgọ ju ọnyị ọlẹng nya ọgbanyẹ-ọgbanyẹ ọnyị myị ọnyị ham mẹ. Ọnyị ọlẹng nya ọgbanyẹ ọlẹ kọ ka wụrụ ori-ụma nya ọngịnyị ehe lee iyo oleji wuu ri ịnyam am Ohe Oluhye lẹ.”

³Ọọwa lẹ, iMosisi à byi ala Isirẹlụ yẹkẹẹ, “Alẹ oleeri ọlẹ, ānụ ka kpa kpịtịya nya ẹnụtụrụ ọlẹ kanụ gba kpehe bwu ọpyị nya Ijipiti ẹga kanụ ri anyịhị ene-ene lẹ. Ẹnẹwẹ Amkpaa-à gbanụ kpehe bwu ụwa lọngịrị ọtụka nyamwụ lẹ. Ānụ kpa ịkaa ọlẹ kị ya ang ọ-mịrị ịkaa ju ka ọnụ kokoo.

⁴Alẹ kpangga ẹ-ẹpwụ nya ọya nya ọgbanyẹ-ọgbanyẹ ọlẹ kị wụrụ Abiibu anụ kpa yegiri lẹ.

⁵Amkpaa lẹẹ myị ọnụ ha adanụ igogo ene nyọka ya ọpyị nya ala iKenan bala ala iHiiti bala ala Amọ bala ala iHivi bala ala iJebusi hanụ. Ụka kọ kpanụ pwụ ọpyị o-ju eyo bala ọ-há ang hiigu-hiigu nyaa ọwẹ lẹ̀, anụ-ụ̀ kpịtịya nya ọhọhọ ọlẹ ẹ-ẹpwụ nya ọya ọhọhẹ nya ẹka ọnyị myị ọnyị mẹ.

⁶Anụ ka ri ịkaa ọlẹ kị ya ang ọ-mịrị ịkaa ju ka jịra ẹnụtụrụ irwiye gbẹgbịlẹ. Ẹnụtụrụ ọharwiye lẹ, anụ la ọhụhụ nya ang oriri nyọka chihi ju Amkpaa mẹ.

⁷Ịkaa ọ-mịrị mịrị ka anụ ka ri ẹ-ẹpwụ nya ẹnụtụrụ irwiye ịwẹ wuu lẹ. Ịkaa ọ-mịrịị-mịrị lee ang ọ-mịrị ịkaa ọhẹ-lọhẹ ā hi ji ẹgẹgẹhẹ nya ọpyị nyanụ ụka ọwẹ kokoo.

⁸Ọng myị ọng ā ya je anyị nyamwụ ụka ọọwa yẹkẹẹ, ‘Ọhọhọ ọlẹ ri ọ-kpa kpịtịya nya ang ọlẹ ká Amkpaa họ ham lụka kam gba kpehe bwu Ijipiti.’

⁹Ọhọhọ ọwẹ ka ri ang-ẹjẹẹ ọ-ka kpụnụ ịtịya lala ang ọ-dụụbwọ bala ang ọ-ba itochị. Ọ ka kpụnụ ịtịya ká ehile nya Amkpaa ọ-kpa mẹjẹ-ẹ́ ka chị hi ọnụ nyanụ ka, chajị Amkpaa-à gbanụ kpehe bwu ọpyị nya Ijipiti lọngịrị ọtụka nyamwụ lẹ.

¹⁰Anụ ka kịnyaa la ọhụhụ ọlẹ lụka o-hunọ nyamwụ pyịyọọ ẹ-ẹpwụ nya ẹka ọnyị myị ọnyị.

¹¹“Ụka ká Amkpaa-á kpanụ pwụ ọpyị nya ala iKenan, kọ hwoo hanụ kpá jaabwọ kọ myị ọnụ hanụ bala adanụ igogo anyị lẹ,

¹²ānụ ka chị ịgọgọ ju ọnyị nya ọgbanyẹ ọnyị myị ọnyị wuu ha Amkpaa lẹlẹ. Anyị alẹng nya ọgbanyẹ nya iyo ileji nyanụ wuu ri nyamwụ.

¹³Anụ ka ya ọnyị ọkpịlọ nyẹ ọnyị nya ọgbanyẹ nya obyiyó ọnyị myị ọnyị. Ma, ó tị rị kanụ tịtọ nyọka nyọọ bwula ọ-ya ọnyị ọkpịlọ ku ọmwakpa nyamwụ kaka lẹ aalẹ, anụ tị tị̄ mwọọ ido mẹ. Anụ ka nyẹ anyị alẹng nya ọgbanyẹ nyanụ bwu ẹga nya Amkpaa ịnyịnyị.

¹⁴“Ụka ká ọnyị ọlẹng nyang á tọng wo ị-ịlahị yẹkẹẹ, ‘Ịyẹ a tị́ ri etu nya ẹlẹwẹ-ẹ̀?’ ọwẹwẹ nyang ka ri, ‘Amkpaa gbahị kpehe lọngịrị ọtụka nyamwụ bwu ọpyị nya Ijipiti ẹga kahị ri anyịhị ene-ene.

¹⁵Ụka ká iFero Adịrahụ ngịrị ọkịlẹtụ nyamwụ ọngịrị, kọ myị pẹhiihi rụ kaka lẹ, Amkpaa-à nwụ anyị nya ọgbanyẹ nya angịnyị ehe tụ iyo ileji ịla Ijipiti wuu lẹlẹ. Ang odudu kahị kaa go anyị alẹng nya ọgbanyẹ nya iyo ileji kịla iya ha Amkpaa, kahị tị kaa ya iyo nyẹ anyị alẹng nya ọgbanyẹ nyahị ịnyịnyị à wẹ lẹ.’

¹⁶Ọhọhọ ọwẹ ka ri ang-ẹjẹẹ ọ-ka kpụng ịtịya lala ang ọ-dụụbwọ bala ang ọ-ba itochị ya Amkpaa gbahị kpehe bwu ọpyị nya Ijipiti lọngịrị ọtụka nyamwụ.”

¹⁷Ụka ká iFero tụụbwọ hi ala Isirẹlụ rụ, Ohe Oluhye-é kpaa jẹ bwu ụgbẹyị ọlẹ kọ da bwu ọpyị nya ala iFilisitiya ka. Ụgbẹyị ọọwa à tị la kpii gụ lẹ. Ohe Oluhye ya i-irya nyamwụ yẹkẹẹ, “Ó-ri kị jẹ̀ kaka tọ ẹwụ ọdada ụ-ụgbẹyị, ị ka nwụ irya me jahị kpata nyọka rụ tịrẹkpẹ ka Ijipiti.”

¹⁸Ịnyị, Ohe Oluhye à kpaa jẹ dọgịlẹ bwu ụgbẹyị olugbileji ọlẹ kọ da koye nya Ihu Oletungkohyo lẹlẹ. Ala Isirẹlụ ayịdang ju ịlaa agidi nya ẹwụ ọdada bwu ọpyị nya Ijipiti rụ.

¹⁹IMosisi anyị kpa ekpinegu nya iJosẹfụ dịrẹ ịlaa rụ, chajị iJosẹfụ lẹẹ họ ala Isirẹlụ nwa iro tọọ ya ịwa nyị ka kpa rụ. IJosẹfụ ayịdang byaa ene yẹkẹẹ, “Ohe Oluhye-é ka dayi la ọ-warị kaka danụ ụbwọ kokoo. Ụka ọọwa lẹ, anụ-ụ̀ go ekpinegu nyam kpa ba ịlọnụ rụ bwu ọpyị ọlẹ mẹ.”

²⁰Ụka ká ala Isirẹlụ yegiri bwu iSukotu lẹ, ị je kaka chịkụ ẹ-ẹga kị wụrụ Etam ọlẹ kọ ji ọnụ nya ugbileji lelẹ.

²¹Lụka nya ahị ọpyẹpyẹ, Amkpaa kaa ji ịlahị nyaa la abwụma nya egbamwụ, juwa kpaa ụgbẹyị nya ẹdịyẹ nyaa. Alodu, ọ kaa taa da la abwụma nya ila, juwa ya ahịgboo haa, chajị kị ka jẹ-ẹ̀ jẹdịyẹ nyaa lodu bala alẹnụ.

²²Ụka ọhẹ-lọhẹ-ẹ́ ji ká ahịgboo nya egbamwụ lee ila tụhi ịlahị nya ala Isirẹlụ kpong-kpong ka.