Read idege EHE ỌKPỤKPỤ 14 Bible Online

EHE ỌKPỤKPỤ 14 - idege bible

EHE ỌKPỤKPỤ 14

¹Ọọwa lẹ, Amkpaa-à ya ẹla ta iMosisi yẹkẹẹ,

²“Byi ala Isirẹlụ kị tịrẹkpẹ warị kaka chịkụ ọ-ọnụ nya iPihahirotu ọlẹ kọ ji apewa nya iMigidolu bala Ihu Oletungkohyo ba ịBaalụ-ịsẹfọn ba mẹ.

³IFero ka juwa me irya yẹkẹẹ, ‘Ala Isirẹlụ lalẹẹ hwahị tụ ang-ang da, ugbileji hịla ọhwọọ yaa dada du kị jẹ ụgbẹyị rụ ka.’

⁴Lẹ, m̀ ka họ ká iFero ka ngịrị ọkịlẹtụ nyamwụ ọngịrị, kọ ka kwaa nyọka waa. Ma, ọkụrụ-kụrụ nyam oluhye nya iFero bala angịdẹwụ nyamwụ tị ka kpa ogbo ogwogwo wam. Ala Ijipiti wuu ka jẹ kam kpakpaakpa à ri Amkpaa.” Ịnyị, ala Isirẹlụ à họ jaabwọ ká Ohe Oluhye ya wẹ lẹlẹ.

⁵Ụka kị ya je adịrahụ nya ala Ijipiti ya ala Isirẹlụ wuu nyị rụnyẹ rụ lẹ, ọwa bala alegbeju ịtụkụ yoo à nwụ irya me chajị nyaa lẹ, ị juwa kpụ ịlaa abyị yẹkẹẹ, “Ahị họ ịlọhị uguru-ẹla lẹ! Ahị pẹhi ala Isirẹlụ ịlẹ rụ lẹ, oowo āhị tị́ ka ye ri anyịhị nyahị mẹ?”

⁶Ịnyị, adịrahụ à nwụla ang ọrụnyẹ nyamwụ ọlẹ ká anyịrẹ kaa gbile nọ bala angịdẹwụ nyamwụ lẹlẹ.

⁷Ọ kpa ang ịrụnyẹ ohu ịrwọnyẹ (600) ịlẹ kị hagụ wuu bala alegbeju nya ẹwụ ịkpẹhị rịraa. Ọọwa, ị wuleji la ang ịrụnyẹ ịkịla ihihi nya Ijipiti juwa ku ala Isirẹlụ lẹlẹ.

⁸Amkpaa họ ká adịrahụ nya ala Ijipiti ngịrị ọkịlẹtụ nyamwụ ọngịrị. Ọ dọmwụ nyọka ku ala Isirẹlụ ụka kị ya ogu dawụlẹ juwa jẹdịyẹ nya ọkụrụ-kụrụ rụ.

⁹Angịdẹwụ nya ala Ijipiti ịlẹ kịị kpa anyịrẹ bala ang ịrụnyẹ dẹwụ bala angịdẹwụ ịkịla wuu juwa ku ala Isirẹlụ. Ị waa ọyị ẹ-ẹga kị chịkụ ọ-ọnụ nya Ihu Oletungkohyo ju iPihahirotu bala ịBaalụ-ịsẹfọn chwẹẹ

¹⁰Ụka ká iFero bala angịdẹwụ nyamwụ anyị juwa jẹ kele ịnyịnyịịnyị, ká ala Isirẹlụ chẹhị yaa lẹ, uhi ọtụka-ọtụka à jwaa lẹlẹ. Ị cheko bịlẹ ụbwọ ọdada bwu ẹga nya Amkpaa.

¹¹Ị byi iMosisi yẹkẹẹ, “À myị kpá ka, iworu ọhẹ-lọhẹ à ji Ijipiti ka du ká kpahị bwu ụwa warị nyọka gbu ám̀ u-ugbileji ọlẹ lẹ-ẹ́? Ịyẹ tị́ dọmwụ du ká gbahị kpehe bwu ọpyị nya Ijipiti ene-é?”

¹²Áhị ya ẹla ọlẹ dang e-eji bwu Ijipiti-Ijipiti ene yẹkẹẹ, “Yẹhị chịng, kahị kịnyaa juwa myị ẹrụ ha ala Ijipiti mẹ ka-á? Áhị dọmwụ ri anyịhị nyaa pyịyọọ, ọ haahị gụ igụ ọlapịlọyị nya ugbileji ọlẹ kọ lẹẹ ka nwụhị!”

¹³IMosisi wẹ byi ala Isirẹlụ yẹkẹẹ, “Ānụ chuko ka, anụ godayị kpọọ mẹ aalẹ, anụ ka yẹ jaabwọ ká Amkpaa ka bwụ gbanụ kpehe hi ẹpwụtụbwọ nyaa alẹ lẹ. Ánụ ka ya ẹhị nyanụ gu ala Ijipiti ịwẹ kanụ wẹẹ yẹ alẹ oleeri ọlẹ gụ ọwẹ ẹnẹnẹhẹ kaka.

¹⁴Amkpaa ka ma uya ọlẹ yẹẹnụ dada. Ọkẹnẹ-kẹnẹ ri, anụ hụ lọnụ ujiji kem mẹ.”

¹⁵Ọọwa lẹ, Amkpaa-à byi iMosisi yẹkẹẹ, “Ahụ myịmyị juwa kịnyaa la ọ-chị eko wụrụm wẹẹ-ẹ́? Byi ala Isirẹlụ kị yegiri kịnyaa mẹ.

¹⁶Hu ọgọdọ nyang hwaa, ká kpa ka uhye nya ihụ. Ọọwa, enyi à ka chị eku imiiye kpoo, chajị ká ala Isirẹlụ ka jẹdịyẹ bwu ọpyị ọchọrụ kpoye nya Ihu lẹlẹ.

¹⁷M̀ tị ka ngịrị ọkịlẹtụ nya ala Ijipiti ịwẹ ọngịrị chajị kị ka baanụ ju wẹ ẹpwụ nya ihu. Ọkụrụ kụrụ nyam oluhye nya iFero bala angịdẹwụ nyamwụ bala ang ịrụnyẹ ị-kpa dẹwụ bala angị kpa anyịrẹ dẹwụ nyamwụ wuu tị ka kpa ogbo ogwogwo wam am Ohe Oluhye.

¹⁸Ụka ọọwa, ala Ijipiti ka jẹ kam kpakpaakpa à ri Amkpaa.”

¹⁹Ọọwa lẹ, olegu-ẹrụ nya Ohe Oluhye ọlẹ kọ lẹẹ kpa angịdẹwụ nya ala Isirẹlụ à rụ bwu ịlahị kele kẹkpẹ nyaa lẹlẹ. Egbamwụ ọ-kpaa ụgbẹyị rụ bwu ịlahị nyaa kele kẹkpẹ ịnyịnyị,

²⁰kaka ji apewa nya angịdẹwụ nya ala Ijipiti bala ala Isirẹlụ. Lodu ọọwa wuu, egbamwụ ọwẹ họ ká ukpowu ji oye nya ala Ijipiti. Ọ tị ya ahịgboo ha ala Isirẹlụ. Lẹẹlẹ, alebwo ọhẹ-ẹ́ jẹ jẹ̀ ju alebwo ọkịla chwẹẹ lụka nya odu ọọwa kpong-kong ka.

²¹IMosisi nịra ụbwọ nyamwụ kpaa ka uhye nya ihu. Ọọwa, Amkpaa-à tu enyi tuu kẹkpẹ la igbachịwụ ọnyọọngịrị o-bwu ọmwẹnụ-ụtụrụ ọlẹ kọ da lodu ọọwa wuu gbee ká Ihu nwụ kịra-kịra ẹ-ẹga ká enyi ji ene-ene lẹlẹ. Enyi chị ebwo imiiye kpoo

²²lẹ, ala Isirẹlụ a chịpwụrụ bwu ọpyị ọchọrụ kpoye lẹlẹ. Enyi ọle kọ chị eku godayị lala egwalọ ọyịye-ọyiye nya ala Isirẹlụ.

²³Ala Ijipiti ya oko myọọ yahị da ala Isirẹlụ. Anyịrẹ bala ang ịrụnyẹ bala angị kpa anyịrẹ dẹwụ nya iFero Adịrahụ wuu baa gbee pwụ ẹpwụ nya ihụ.

²⁴Lụka nya odu nya ewu-ụtụrụ, ká Amkpaa chẹhị weji bwu ẹpwụ nya ahịgboo nya ila bala egbamwụ kaka yẹ angịdẹwụ nya ala Ijipiti lẹ, ọ chị uhi jwaa lẹlẹ.

²⁵Amkpaa họ ká ata nya ang ịrụnyẹ nyaa wuu rụ-ba du ká ịlahị ọ-jẹ ka ri akama haa. Ịnyị, ị juwa byi awụlẹ yẹkẹẹ, “Ahị rụnyẹ rụ hi ala Isirẹlụ ịlẹ mẹ! Amkpaa jam ma ụya yaa dada tụụhị ahị ala Ijipiti pyịpyị lẹ.”

²⁶Ọọwa lẹ, Amkpaa a byi iMosisi yẹkẹẹ, “Nịra ụbwọ nyang kpaaa ka uhye nya ihu, chajị ká enyi ā mwụ nyà tịrẹkpẹ kaka ju ala Ijipiti bala ang ịrụnyẹ ị-kpa dẹwụ bala angị kpa anyịrẹ dẹwụ nyaa wuu mẹ.”

²⁷IMosisi nịra ụbwọ nyamwụ kpaa ka uhye nya Ihu lẹ, enyi à mwụ tịrẹkpẹ wẹ ẹga onyogo nyamwụ lụka ká ahị pyẹ bwaaa lẹlẹ. Ala Ijipiti juwa rụnyẹ rụ ụka kị yẹ ka enyi juwa nyà tịrẹkpẹ ma, Amkpaa tị taa kpilo ẹ-ẹpwụ nya ihụ.

²⁸Ịnyị, enyi à mwụ kaka wu ang ịrụnyẹ ị-kpa dẹwụ nya iFero ịkịla wuu ịlẹ kị dịrẹ ala Isirẹlụ pwụ ẹpwụ nya Ihu lẹlẹ. Ọngọngọhẹ lẹpwụ nyaa-á be rụ myị kpong-kpong ka.

²⁹Ma, ala Isirẹlụ tị jẹdịyẹ bwu ẹpwụ nya Ihu kpoye ọ-ọpyị ọchọrụ ụka ká enyi chị eku hi awụlẹ godayị lala egwalọ oyiye-oyiye nyaa.

³⁰Jaabwọ ká Amkpaa bwu chị ala Isirẹlụ da bwu epwụtụbwọ nya ala Ijipiti ẹnụ ọọwa à wẹ lẹlẹ. Ị yẹ egu nya ala Ijipiti ịlẹ ká enyi wu chụwa ọ-ọnụụka.

³¹Ụka kị yẹ ọngịrị ẹbyẹbyị nya Amkpaa ọlẹ kọ kpa kụrụ ala Ijipiti lẹ, ị ju uhi nyamwụ, juwa dahị hiloo bala iMosisi ọnchẹ nyamwụ lẹlẹ.