Read idege EHE ỌKPỤKPỤ 15 Bible Online

EHE ỌKPỤKPỤ 15 - idege bible

EHE ỌKPỤKPỤ 15

¹Ụka ọọwa, iMosisi bala ala Isirẹlụ anyị juwa mwu eje ọlẹ ha Amkpaa yẹkẹẹ, “M̄ mwu eje ha Amkpaa, chajị ọ kụrụ, ma kụrụ lẹ. Ọ da ụnyịrẹ bala ọngọ kwọọ kụ ejwo ju ka ẹpwụ nya Ihu jurum.

²Amkpaa ri ọngịrị nyam, m̀ ka mwu eje họọ. ọwa-à ri ọngọlẹ kọ chịm da lẹ. Ọ ri Ohe Oluhye nyam, m̀ ka gwogbo họọ. Ohe Oluhye nya adam ịnyị, m̀ ka hu ẹnyị nyamwụ hwaa.

³Amkpaa ri ọngọdẹwụ, Amkpaa-à ri ẹnyị nyamwụ lẹ.

⁴Ang ịrụnyẹ ị-kpa dẹwụ bala angịdẹwụ nya iFero, Ọ daa ẹjwọ ju ka ẹpwụ nya Ihu jurum. Ịbagọ nya alegbeju ịtụkụ yi iFero byi enyi hyẹkẹẹm ẹ-ẹpwụ nya Ihu Oletungkohyo.

⁵Ihu tụ biraa gbee kị kpụ myọọ keji lala ẹjwọ.

⁶Amkpaa, ugburubwọ nyang ayịdang, ụmụmẹ nya ọngịrị nyamwụ lụmẹ. Amkpaa, ugburubwọ nyang ayịdang du aluji ịwẹ abwọ yịgẹ-yịgẹ lẹ.

⁷Bwula ọkụrụ-kụrụ ọtụka nyang à pwọ angị mwẹla tang ọmwụ chị eji. Ikẹjẹ-awụrụ nyang chabwọ pilooo kaka rwaa ila kure-kure lala amẹ.

⁸Ịhụ ọ-chi pwuu nyang tụ enyi guru. Enyi olihu godayị kọkọ lala ọhwọọ. Enyi olekpeleji nya ihu wu kpa kpọnchị.

⁹“Oluji chị ọgọm yẹkẹẹ, ‘M̀ ka kwaa kaka wu. M̀ ka ga ang-ụdụ nyaa la; M̀ ka ye ri wu ẹpwụ. M̀ ka gbile ẹma nyam jahị daa, kam ka taa ayịreji.’

¹⁰Ma, à tị chị ịhụ pwuu, du ká Ihu tụ biraa wuu. Ị kpụ myọọ lala oje ju ka ẹpwụ nya ukpilo nya enyi ọọwa.

¹¹“Amkpaa ee, ẹ-ẹpwụ nya ijiga wuu, oyina nyaa-à tị́ lala ahụ myị-ị̀? Oowo à tị́ la abwụma nyang? ịgọgọ ọlala nyang la ẹbyẹbyị, Ụmụmẹ ọlala nyang wu ejiri, à ri ọngọ họ ụkụrwọ ẹbyẹbyị.

¹²À nịra upwuriri nyang kpaa, ọpyị ye aluji mile.

¹³“La ọháha o-gbu enyi-ka nyang, à kpa angịlẹ ká chịda lịlọng. La ọngịrị nyang kpaa ka ẹga ọlịgọgọ ọlẹ ká kụ.

¹⁴Aloja wuu wo ẹlẹwẹ, ị hụ́ kpákpaakpa. Uhi ọtụka-ọtụka ju ala iFilisitiya.

¹⁵Ịdịrịhụ nya ala Ẹdọm myị̀ la uko ọchịchị, alegbeju nya ala iMowabụ juwa che kpákpaakpa. Angị kụ iKenan wuu ka kpa igbeene a-abwabwọ

¹⁶Uhi ọtụka-ọtụka ri nyaa. Bwula ọngịrị ọtụka nyang, ị gbu oje-oje gbee ká angịnyị nyang ahụ Amkpaa kpoye kám̀— angịlẹ ká nyẹ bwu ẹpwụ nya ọnyọhị oriri,

¹⁷A kpaa kaka ya ẹta yeji ọ-ọgbọdọ nyang, ẹga kaahụ Amkpaa nwụ ha ịlọng ká ka kụ— ube ịgọgọ ọlẹ kaahụ Amkpaa nwụ lụbwọ nya ịlọng.

¹⁸Ahụ Amkpaa ka ri adịrahụ gbe oyi myị oyi.”

¹⁹Ala Isirẹlụ jẹdịyẹ kpoye nya Ihu bwụ ọpyị ọchọrụ. Ma, ụka ká anyịrẹ bala ang ịrụnyẹ ị-kpa dẹwụ bala angị kpa anyịrẹ dẹwụ nya iFero pwọ ju ka ẹpwụ nya ogo lẹ, Amkpaa-à kpa enyi nyà tịrẹkpẹ kaka tụ biraa wuu lẹlẹ.

²⁰Ọọwa lẹ, iMiriyam ọlọmwụ ọnyang, ọnyịnịna nya Erọn à hu ịchẹchẹ nyamwụ ju ụbwọ lẹ, anyang ịkịla wuu à dịrọọ wurututuutu, juwa kpa ịchẹchẹ nyaa du, kpa ewo chị lẹlẹ.

²¹Ọọwa, iMiriyam à kpaa mwu eje yẹkẹẹ, “Anụ mwu eje ha Amkpaa, chajị ọ kụrụ, ma kụrụ lẹ. Ọ da ụnyịrẹ bala ọngọ kwọọ kụ ẹjwọ ju ka ẹpwụ nya Ihu jurum.”

²²Ọọwa lẹ, iMosisi à kpa ala Isirẹlụ yegiri bwu ọnụ nya Ihu Oletungkohyo kele ka ju ka ugbileji ọla ịChuu lẹlẹ. Ị jẹdịyẹ nyaa ọwẹ ẹ-ẹpwụ nya ẹnụtụrụ ịta gbẹgbịlẹ, la ọ-yẹ enyi ugbẹhị nyaa kpong-kpong ka.

²³Ụka kị jẹ ka pwụ ịMara, enyi ọlụwa la ujujwo lụmẹ lẹ, ị́ nwọọ myị ka. Ajị nyọlẹ ká enyi ọlụwa la ujujwo à du kị wụrụ ẹgẹwẹ ịMara[7] lẹ.

²⁴Ịnyị, ị juwa mwọ ala ya ba iMosisi yẹkẹẹ, “Ịyẹ āhị tị́ ka ye nwa lẹẹ mẹ?”

²⁵Ọọwa lẹ, iMosisi à raabwọ chị eru ju Amkpaa lẹ, ọ da iMosisi ụbwọ nya eku nya okoji ọhẹ lẹlẹ. Ụka kọ ya eku nya okoji ọọwa da ju ka ẹpwụ nya enyi lẹ, ọ há ọnwanwa lẹlẹ. Ụ-ụwa ẹgẹwẹ Amkpaa-à ya ehile haa kị ka kpa lẹ. Ẹgẹwẹ-ẹgẹwẹ ọ tị ma ọmyịmyị ọlala nyaa yẹ ịnyịnyị lẹ.

²⁶Ọ byaa yẹkẹẹ, “Ó-ri kanụ myị ju omyi nyam am Amkpaa Ohe Oluhye nyanụ, la ọ-họ ang ọle kọ pwoku irya nyam, kanụ juwa họ ehile nyam wuu jịra aalẹ, ḿ ka kpa ụma nya ẹdụrụ ọhẹ-lọhẹ ịlẹ kam kpa yẹ ala Ijipiti akama wẹ uhye nyanụ kpong-kpong ka. Am kpakpaakpa à ri Amkpaa oluda nyanụ lẹ.”

²⁷Ọọwa lẹ, ala Isirẹlụ à jẹ bwu ẹgẹwẹ kaka pwụ ẹga ọkịla ọlẹ kị wụrụ Elim lẹlẹ. Ágbụ nya enyi iwo kụrụ imiiye bala ịmwụ nya ịrị iwo irwiye (70) juwa ụ-ụwa. Lẹ̀, ị chịkụ ọ-ọnụ nya enyi ọọwa lẹlẹ.