Read idege EHE ỌKPỤKPỤ 16 Bible Online

EHE ỌKPỤKPỤ 16 - idege bible

EHE ỌKPỤKPỤ 16

¹Aluche nya Isirẹlụ wuu wuleji ẹdịyẹ bwu Elim lẹ, ị jẹ ka pwụ ugbileji ọla iSiin lẹlẹ. Ẹgẹwẹ ji apewa nya Elim bala ịSayịnayị. Ẹnụtụrụ iwo kụrụ ịrụ nya ọya oheeye nyọlẹ kị gba kpehe bwu Ijipiti kpá, ị kpa pwụ ugbileji ọwẹ lẹ.

²Ụ-ụwa ẹ-ẹpwụ nya ugbileji ọwẹ ala Isirẹlụ wuu mwẹla ya ba iMosisi bala Erọn.

³Ị byi iMosisi anyị yẹkẹẹ, “Amkpaa-á dọmwụ nwụhị lịlọmwụ ụ-ụwa Ijipiti lẹẹ ịnọ, ọọwa tị́ ka haahị gụ lẹ. Ụ-ụwa lẹ, ahị kaa ye iyo bala ụma nya ang ọnyị myị ọnyị ọlẹ kahị tịtọ ri wu ẹpwụ kpọngkpọng. Ma, anụ tị mwọọgịlẹ gbahị kpehe wẹ ugbileji ọlẹ nyọka yahị wuu gbu igu imyi ododu.”

⁴Ọọwa lẹ, Amkpaa-à byi iMosisi yẹkẹẹ, “M̀ juwa ka dò ang oriri bwu uhye-ọgba wanụ lẹ. Ọng myị ọng ā kpehe kaka tụ ang oriri ọọwa guru ẹnụ myị ẹnụ jaabwọ kọ ka jụ ri kaka ba la ahyẹẹnụ ọọwa mẹ. Bwula ọọwa m̄ ka maa yẹ ó-ri kị ka myị-ị̀ ba ọmẹjẹ nyam jẹ.

⁵Ẹnụtụrụ ọharwọnyẹ ị ka tụ ang oriri guru ugbabwọ imiiye mwụ aba ba ọlẹnụ-ẹnụ kpa kaka kpụ́.”

⁶Ịnyị, iMosisi bala Erọn à byi ala Isirẹlụ wuu yẹkẹẹ, “Alẹ lobyi anụ ka myị ya Amkpaa nyaa gbanụ kpehe bwu ọpyị nya Ijipiti lẹ.

⁷Lụka nya ahị ọpyẹpyẹ, anụ ka yẹ ụmụmẹ nya ọngịrị nya Amkpaa. Ọwa ayịdang wo ala ịlẹ kanụ mwọ ya bọọ lẹ. Ahị ayịdang tị́ ri ịyẹ kanụ ka mwẹla ya baahị-ị̀?”

⁸IMosis byaa myịmyị yẹkẹẹ, “Amkpaa ayịdang à wẹẹ ka ya iyo hanụ ri lobyi bala ịkaa lụtụrụ jaabwọ kanụ ka ri ka ba myị lẹ, chajị ọ wo ala ịlẹ kanụ mwọ ya bọọ lẹ. Ánụ jẹ ka tụbwọ, áhị ri ịngịngịhyẹ anụ ka mwẹla ya ba ka, Amkpaa ayịdang anụ ya ala ba lẹ.”

⁹Ọọwa lẹ, iMosisi à byi Erọn yẹkẹẹ, “Byi aluche wuu kị warị wẹ ijata nya Amkpaa mẹ, chajị ọ wo ala ị-mwọ ya ba nyaa lẹ.”

¹⁰Ụka ká Erọn juwa kpa ẹla ya ta aluche nya Isirẹlụ, kị chẹhị koye nya ugbileji lẹ, ị yẹ ká ahịgboo nya ụmụmẹ nya Amkpaa kọ hu ịlọmwụ mẹjẹ u-uhye nya egbamwụ hwooo lẹlẹ.

¹¹Ọọwa, Amkpaa-à byi iMosis yẹkẹẹ,

¹²“M̀ wo ala ị-mwọ ya nya ala Isirẹlụ wuu lẹ. Aa byaa mẹ, ụka nya ewu-obyi, ị ka ye iyo ri. Ụka nya alụtụrụ, ị ka ye ịkaa ri wu ẹpwụ kpọngkpọng ịnyịnyị. Ọọwa, ị ka jẹ ká am Amkpaa ayịdang à ri Ohe Oluhye nyaa lẹlẹ.”

¹³Ẹnụ ọọwa lobyi, ikpekpile-ẹwa wẹ kaka myị ịkampụ nya ala Isirẹlụ yịrịtịtịịtị. Amwụ kpụ dagaga ju ụwa lụka ká ahị ọọnamwụ pyẹ.

¹⁴Ụka ká amwụ go ba lẹ, ang ipèli-pèli ịhyẹ lala àpwụ̀ nya ekpawẹ à myị ụwa ị-ịpyị lẹlẹ.

¹⁵Ụka ká ala Isirẹlụ yaa, kị jẹ ụma nya ang ịlẹ ká ang ịwẹ ri kaka lẹ, ị juwa tọ awụlẹ wo yẹkẹẹ, “Ịyẹ à tị́-ị̀ wẹ-ẹ̀?” IMosisi byaa yẹkẹẹ, “Ịkaa ọlẹ ká Amkpaa ya hanụ kanụ ka ri à wẹ lẹlẹ.

¹⁶Ehile ọlẹ ká Amkpaa tị da chajị nya ọọwa à lẹẹ lẹ: Ọng myị ọng ka tụ ang oriri ọwẹ guru jaabwọ kọ ka ri ka ba myị. Anụ go myị eku nya ịgalụwa wọnụ nya ọngọngọọng nya alẹpwa nyanụ ju mẹ.”

¹⁷Ịnyị, ala Isirẹlụ à họ ịnyị lẹlẹ. Angịhyẹ lẹpwụ nyaa go kà onugo nya angịkịla.

¹⁸Ma, ụka kị kpa eku nya ịgalụwa ookpokpo me ịlẹ kị go, ị yẹ ká ịnya angịlẹ kị go lụmẹ-ẹ́ nwaa hi ka. Ịnya angịlẹ kị go pyịnyẹng á tị byẹhị ọ-kpụ elego ka ịnyịnyị. Ọng myị ọng go meme la oriri nya ịlọmwụ.

¹⁹Ọọwa lẹ, iMosisi à byaa yẹkẹẹ, “Ọngọngọhẹ nyanụ-ụ́ ka hi ụpịlẹ nya ang oriri ọwẹ gbe ijuju koo.”

²⁰Ma, angịhyẹ nyaa-á myị họ jaabwọ ká iMosis daa ọna ka. Angịịwa hi ịhyẹ nya gbee da ka alụtụrụ nya ahị ọpyẹpyẹ ọọnamwụ. Ihihi ịịwa tị mama, kpụ ekpunjuju yịngọọọ, nyi oru pwuu. Ịnyị, iMosis à wụ ẹjẹ ta angịịwa lẹlẹ.

²¹Ẹnụ myị ẹnụ lụtụrụ, ọng myị ọng go ang ịwẹ ju a-ang jaabwọ kọ ka ri ka ba myị. Ụka ká ẹnụ-ụ́ chị pwuu lẹ, ihihi nyaa-à kaa wulo hụrụ wuu lẹlẹ.

²²Ẹnụtụrụ ọharwọnyẹ nya epwihi, ị go ang oriri ịwẹ ugbabwọ imiiye mwụ aba ba ọlẹnụ-ẹnụ. Ị go myị eku nya ịgalụwa imiiye wọnụ nya ọngọngọọng ju. Ụka ká alegbeju nya ala Isirẹlụ wuu tụchawụlẹ kele ka tịrọnụ nya ọhọhọ nya angịwẹ je iMosisi,

²³ọ wẹ byaa yẹkẹẹ, “Ẹla ọlẹ ká Amkpaa ya ri yẹkẹẹ, ‘Ijuju ri ẹnụ nya Amkpaa ọlẹ kọ ri Ẹnụtụrụ Ọhịnyọ Lụkụrwọ. Lẹẹlẹ, ịlẹ kanụ ka ya ga lẹ, anụ ya ga alẹ mẹ. Ịlẹ kanụ ka ya kpụ́ lẹ, anụ ya kpụ́ alẹ ịnyịnyị mẹ. Ánụ-ụ̀ ya ịlẹ kanụ hi wẹẹ nọ gbe ijuju mẹ.”

²⁴Ịnyị, ị ya ihihi nọ gbe ahị ọpyẹpyẹ ọọnamwụ jaabwọ ká iMosisi byaa lẹlẹ. Ịịwa-á tị go oru lee ọ-kpụ ekpunjuju ka.

²⁵Lẹ, iMosisi à byaa yẹkẹẹ, “Anụ ya ịwẹ ri alẹ mẹ, chajị alẹ kpangga ri Ẹnụtụrụ Ọhịnyọ Lụkụrwọ ha Amkpaa. Ánụ ka ye ang oriri ọwẹ ụ-ụwa ọdọda alẹ ka.

²⁶Ẹ-ẹpwụ nya ẹnụtụrụ ịrwọnyẹ kem anụ ka ye ang oriri ọwẹ go lẹ. Ánụ ka ye ẹnụtụrụ ọharwiye ọlẹ kọ ri Ẹnụtụrụ Ọhịnyọ Lụkụrwọ ka.”

²⁷Tị kpọkpọọkpọ, angịhyẹ nyaa kpehe kị ka go ang oriri ọwẹ ẹnụtụrụ ọharwiye. Ị́ tị ye go ka.

²⁸Ọọwa lẹ, Amkpaa-à byi iMosisi yẹkẹẹ, “Anyị anụ tị́ ka kịnyaa la o-ju ehile bala ọmẹjẹ nyam ihi ka tata ka ba-à?

²⁹Anụ wo mẹ! Am Amkpaa-à hu Ẹnụtụrụ Ọhịnyọ Lụkụrwọ hanụ lẹ. Ịnyị à du kam ya ang oriri hanụ ẹnụtụrụ ọharwọnyẹ wọnụ nya ahị ọpyẹpyẹ imiiye ju lẹ. Ọngọngọhẹ nyanụ-ụ́ ka kpehe ka ẹgẹgẹhẹ hi ẹpwa nyamwụ ẹnụtụrụ ọharwiye ka.”

³⁰Ọọwa lẹ, ala Isirẹlụ à mwụ ịnyọ la ụkụrwọ ọhọhọ ẹnụtụrụ ọharwiye lẹlẹ.

³¹Ẹnyị ọlẹ ká ala Isirẹlụ ya ju ang oriri ri ịmána. Ịmána[8] ọọwa lala ajẹ nya ang ịlẹ kị la owuru. Ịpyọ ọlala nyaa me ụma nya ịkama ịlẹ kịị kpa inwa họ.

³²IMosisi byị ala Isirẹlụ yẹkẹẹ, “Amkpaa ya ehile dahị e-eji ya ahị nyị ya ịmána ọlẹ kọ ka meme la eku nya ịgalụwa kpịlẹgẹdẹ nọ a-ang gbe anyị ịtụma nyahị kịị nyị ka yẹ. Ọọwa, ị ka jẹ ịkaa ọlẹ ká Amkpaa ya hahị ri am u-ugbileji lụka kọ gbahị kpehe bwu ọpyị nya Ijipiti lẹlẹ.”

³³Ịnyị lẹ, iMosisi à byi Erọn yẹkẹẹ, “Hu ichu-ọta ọhẹ ká ya ịmána ọlẹ kọ ka myị eku nya ịgalụwa ju ụ-ụwa mẹ. Ọọwa lẹ, ká hwoo kpa ka rịrị a-ang ẹ-ẹga ọgbịgba nya Amkpaa chajị nyọka ya nọ gbe anyị ịtụma nyahị mẹ.”

³⁴Lẹ, Erọn à hu ichu-ọta nya ịmána ọọwa rịrị ị-ịlahị nya Akpa nya Iro chajị kọ ka nọ gbe anyị ịtụma nyaa jaabwọ ká Amkpaa da iMosisi ehile lẹlẹ.

³⁵Ala Isirẹlụ kịnyaa juwa ri ịmána nya ang oriri nyaa jịra ẹ-ẹka iwo ine (40) gbẹgbịlẹ da ka ụka kị pwụ ọpyị nya iKenan.

³⁶Eku nya ịgalụwa iwo chiriri nya ang ọlọrụ a kaa myị abang ọlẹpwụ-lẹpwụ lẹ[9].