Read idege EHE ỌKPỤKPỤ 17 Bible Online

EHE ỌKPỤKPỤ 17 - idege bible

EHE ỌKPỤKPỤ 17

¹Ala Isirẹlụ wuu wuleji ẹdịyẹ nyaa myịmyị bwu ugbileji nya iSiin, juwa jẹ bwu ẹgẹhẹ ka ẹga ọkịla jaabwọ ká Amkpaa byaa ya nyị jẹ. Ụka kị jẹ ka pwụ iRefidim, ị chịkụ, ma enyi-í tị juwa ị ka ye nwa ka.

²Ịnyị, ị rwarụ ta iMosisi juwa byoo yẹkẹẹ, “Ya enyi hahị kahị nwa pyii-ì.” IMosisi wẹ byaa yẹkẹẹ, “Ọọ-la ịyẹ tị́ kanụ-ụ̀ rwarụ tam-m̀? Ịyẹ tị́ du kanụ juwa ma Amkpaa yẹ ịnyị kpong-kpong ene-è?”

³Imyi-enyi-í tị pwurwaa ka lẹ, ị juwa mwọ ala ya ba iMosisi gụ ọọwa. Ị byoo yẹkẹẹ, “Ajị nya ịyẹ à tị́ du ká gbahị kpehe bwu Ijipiti-ì? À kpahị bala anjwo nyahị bala iyo ileji nyahị wẹ ẹgẹlẹ kaka gbu imyi-enyi ịnyị-ị́?”

⁴Ọọwa lẹ, iMosisi à raabwọ jida ju Amkpaa, juwa yẹkẹẹ, “Ányị m̄ tị́ ka họ ẹ-ẹga nya angịlẹ kpá lẹẹ mẹ? Ị jam ka da ajwọ nwụmm-nwụ lẹ̀!”

⁵Ọọwa, Amkpaa-à byi iMosisi yẹkẹẹ, “Chụ ịgabwọ ịhyẹ nya ala Isirẹlụ ba ịlọng kanụ ji ịlahị nya aluche ihihi kịnyaa mẹ. Aa kpa ọgọdọ ọlẹ ká ya wa Ihu ịNayịlị kpúùù lẹẹ ba ịlọng mẹ.

⁶M̀ ka godayị ị-ịlahị nyanụ u-uhye nya ẹjwọ ọlọgbọdọ nya ịSayịnayị lẹ. Aa ya ọgọdọ mịla ẹjwọ ọọwa mẹ aalẹ, enyi ka kpehe bwu ẹpwụ nyamwụ ká angịnyị nyang kà nwa.” Ọọwa, iMosisi à họ ịnyị ị-ịlahị nya ịgabwọ nya ala Isirẹlụ lẹlẹ.

⁷Ọọwa, iMosisi à wụrụ ẹnyị nya ẹgẹwẹ iMeriba[10] bala ịMasa[11] lẹlẹ. Ọ wụrwaa ịnyị chajị ẹ-ẹgẹwẹ ala Isirẹlụ à mwẹla ya ba Amkpaa bala ọ-mọọ yẹ bwula ọ-tọ awụlẹ wo yẹkẹẹ, “Anụ ya ká Amkpaa jam tahị lẹẹ wẹẹ-ẹ́?”

⁸Ụka ọọwa, Ala Amalẹkị wẹ kaka mwẹla tọ ala Isirẹlụ i-iRefidim.

⁹Lẹ, iMosisi à byi iJochuwa yẹkẹẹ, “Chụ alẹng ịhyẹ bwu ẹpwụ nya angịnyị nyahị kanụ kele ka dẹwụ ta ala Amalẹkị mẹ. M̀ ka godayị rịrị u-uhye nya ikiti ọwẹ ijuju la ọgọdọ ọlẹ ká Ohe Oluhye ya am nyị kpa ụ-ụbwọ nyam lẹ.”

¹⁰IJochuwa kele ka dẹwụ ta ala Amalẹkị jaabwọ ká iMosisi byoo. Ụka ọọwa, iMosisi bala Erọn bala iHuu rụ kele ka uhye nya ikiti ọọwa.

¹¹IMosisi kpa abwiye-abwiye nyamwụ ka uhye. Jaabwọ myị abwọ kọ nịra abwọ kpaaa ka uhye tata ka ba, ala Isirẹlụ juwa kụrụ ala Amalẹkị lụka ọọwa. Ma, ụka ká abwọ nyamwụ-ụ́ juwa nyà dọọọ weji, ala Amalẹkị juwa yẹ ala Isirẹlụ abwilo.

¹²Ụka ká abwọ chị iMosisi pyẹpyẹ lụmẹ-lụmẹ lẹ, Erọn bala iHuu à hu ẹjwọ ọhẹ da họọ hụ lẹlẹ. Ịwa angị imimiiye godayị ịkịka oyiye-oyiye nyamwụ juwa kpọọ abwọ ka uhye gbee ká ẹnụ byi tịrẹm.

¹³Jaabwọ ká iJochuwa bwu dẹwụ kụrụ ala Amalẹkị pẹtẹ-pẹtẹ à wẹ lẹlẹ.

¹⁴Ọọwa lẹ, Amkpaa-à byi iMosisi yẹkẹẹ, “Da oja nya ọkụrụ-kụrụ ọlẹ ju ụ-ụpwụ mẹ, chajị ị́ ka wo ẹnyị nya ala Amalẹkị e-ekpeleji nya ẹnụ ẹnẹnẹhẹ kaka.”

¹⁵IMosisi me ogidi okiliya lẹ, ọ wụrụ ẹnyị nyamwụ yẹkẹẹ, “Amkpaa-à ri ụgbàńg nyam lẹ”.

¹⁶Ọọwa, iMosisi à yẹkẹẹ, “Kpa ụgbàńg nya Amkpaa ka uhye![12] Amkpaa ka dẹwụ ọkpụkpụ-ka ta ala Amalẹkị gbe oyi myị oyi.”