Read idege EHE ỌKPỤKPỤ 18 Bible Online

EHE ỌKPỤKPỤ 18 - idege bible

EHE ỌKPỤKPỤ 18

¹Ụka ọọwa, iJetiro ọngọkiliya nya ala iMidiyan ọlẹ kọ ri adịda-ẹpwa nya iMosisi wo oja nya ang ịlẹ wuu ká Ohe Oluhye họ ha iMosisi bala ala Isirẹlụ bala jaabwọ ká Amkpaa gbaa kpehe bwu ọpyị nya Ijipiti.

²IMosisi lẹẹ ya iSipọra ahụ nyamwụ du ka ka hụ ta iJetiro adamwụ-ẹpwa. Ọ ya anyị alẹng imiiye nyaa du kele ịnyịnyị. Ẹnyị nya ọngọhẹ nyaa ri ịGẹẹchọm. IMosisi lẹẹ jwoo ẹnyị ọwẹ chajị, ọ yẹkẹẹ, “M̀ ri ọngga ám̀ ọ-ọpyị ọlẹ.” Ọ wụrụ ọnyị nyamwụ ọkịla Eliyesa chajị, ọ yẹkẹẹ, “Ohe Oluhye nya adam à ri ọngọdụbwọ nyam lẹ. Ọ gbam kpehe bwu ẹpwụtụbwọ nya iFero du kọ nwụm ka.”

⁵Ụka ọọwa, iJetiro bajẹ bala ahụ nya iMosisi lanyị alẹng imiiye ịwẹ wẹ ẹga nya iMosisi u-ugbileji ọlẹ ká iMosisi anyị chịkụ ba Ọgbọdọ nya ịSayịnayị ba.

⁶IJetiro ayịdang lẹẹ du ẹrụ kaka byi iMosisi ene yẹkẹẹ, “M̀ wẹẹ kpa ahụ nyang bala anyị alẹng imiiye nyang warị wẹ ẹga nyang.”

⁷Ọọwa, iMosisi à kpehe kele kaka tọọ ụ-ụgbẹyị lẹlẹ. Ọ hirikpẹẹ ha adamwụ-ẹpwa bala o-jwoo ọnụ nya ọnụ ọdachị. Ị tọ awụlẹ ịtọ nya anjwo wuu lẹ, ị rụ ka ẹpwang nya ọdụ nya iMosisi lẹlẹ.

⁸IMosisi gbana ya joo ang myị ang ịlẹ wuu ká Amkpaa họ ẹ-ẹga nya iFero Adịrahụ bala ala Ijipiti chajị nyọka gba ala Isirẹlụ kpehe. Ọ tịrọnụ ya joo akama ịlẹ kịịwa ayịdang tịtị yẹ ẹ-ẹpwụ nya ẹdịyẹ nyaa bala jaabwọ ká Amkpaa gbaa kpehe bwu ẹpwụ nyaa wuu ịnyịnyị.

⁹Ụka ká iJetiro wo oja nya ang ịnyịịla ịlẹ wuu ká Amkpaa họ ha ala Isirẹlụ bwula ọ-gbaa kpehe bwu ẹpwụtụbwọ nya ala Ijipiti, ọ chị ọkẹkẹnị lụmẹ.

¹⁰Ịnyị, ọ yẹkẹẹ, “Ogbo ogwogwo ā juwa ha Amkpaa ọlẹ kọ gbanụ kpehe bwu ẹpwụtụbwọ nya iFero bala ala Ijipiti.

¹¹Ugbẹnyị lẹ, m̀ jẹ ká Amkpaa gụ ijiga ịkịla wuu lẹ, chajị ọ yẹ angị kpa ọbọọche yẹ ala Isirẹlụ ụhị akama lẹ.”

¹²Ọọwa lẹ, iJetiro à kpa iyo okiliya ọ-rụ ila warị lẹlẹ. Ọ kpa ụma nya iya ọkịlaakịla ịkịla wẹ Ohe Oluhye ịnyịnyị. Ọọwa, Erọn bala ịgabwọ nya ala Isirẹlụ wuu à wẹ kaka ri ang nya iya ọkịlaakịla ọwẹ ẹ-ẹga ọgbịgba lẹlẹ.

¹³Ahị ọpyẹpyẹ ọọnamwụ, iMosisi hụhụ ẹ-ẹchị juwa leje nya arụ ọrụrụ nya angịnyị nyamwụ. Ị juwa kpa ẹla myị ẹla kaka tọọ bwu alụtụrụ gbee da ka alobyi.

¹⁴Ụka ká adịda-ẹpwa nya iMosisi yẹ ang ịlẹ wuu ká iMosisi wẹẹ họ ha ala Isirẹlụ lẹ, ọ tọọ wo yẹkẹẹ, “IMosisi ee, ụkụrwọ-ụkụrwọ wuu ká ka họ ha angịnyị nyang à wẹ lẹ-ẹ́? Ịyẹ tị́ du kaahụ ụbwọng kem à wẹẹ leje-è? Yẹ iru nya angịlẹ wuu kị jam kpa ẹla kaka tọng lụtụrụ-ụtụrụ gbee da ka alobyi wẹẹ-ẹ̀!”

¹⁵IMosisi wẹ byoo yẹkẹẹ, “Ang odudu kam wẹẹ họ ịnyị ri angịnyị-ị̀ wẹ ẹga nyam ịnyịnyịịnyị chajị kị ka jẹ irya nya Ohe Oluhye.

¹⁶Ụka ká ọngọhẹ bala ọngọkịla nyaa-á rwarụ, ịị kpa ẹla ọọwa wẹ ẹga nyam. Ọọwa, ḿ cheje ha ọngọ ri oku lẹ, m̄ kaa mẹ ehile bala ọmẹjẹ nya Ohe Oluhye jaa lẹlẹ.”

¹⁷Ma, adamwụ-ẹpwa wẹ byoo yẹkẹẹ, “Eheehe, ịịwẹ ā ka họ koo.

¹⁸Ụkụrwọ ọ-chị ịlọng ẹchwọ bala angịlẹ kị wẹẹ kpa ẹla ka tọng ā wẹẹ họ lẹ, chajị ọ kịlang ahụ ụbwọng kịla.

¹⁹Ke ụrụ ká wo ọmẹjẹ nyam wẹẹ. Ohe Oluhye ka hụ tang. Ahụ ā ri ọngọ ku omwakpa nya angịnyị nyang ẹ-ẹga nya Ohe Oluhye, ká kpa o-wo lawụlẹ-ka nyaa kaka tọọ mẹ.

²⁰Aa mẹ ehile bala ọmẹjẹ nya Ohe Oluhye wuu jaa mẹ. À ka ya jaa ụkụrwọ ọlẹ kị ka họ bala ọhịhị ọlẹ kị ka ba jẹ ịnyịnyị.

²¹Ọ́ ba ọọwẹ ka, à ka chụ alẹng ịhyẹ ịlẹ kị jẹ-ẹ̀ họ ụkụrwọ kpẹẹkpẹẹ bwu ẹpwụ nya angịnyị nyang. Angịịwa ka ri angị chịla o-hu ọkịlẹtụ ha, ịlẹ kị ju uhi nya Ohe Oluhye bala ọ-ka ye ang ochikiriju ka. Go angị ịlịnyị ri alegbeju ịkpẹhị rịrị ebwebweebwo nya angị ụnọ bala angị ohu bala angị iwo ịrụ bala angị iwo.

²²Ịwa ā ri agaba ileje nya angịnyị nyang pyịyọọ mẹ. Ịwa lịlaa ka cheje nya o-wo lawụlẹ-ka ichiche ịlẹ kị kpa kaka taa myị. Ẹla ilujwo kịlaa-kịla ị ka kpa wẹ ẹga nyang lẹlẹ. Ọlẹ kị wẹẹ ka chụ ụkụrwọ nyang hi lẹ, olo ọlẹga nyang ka hi huke-huke gụ olene.

²³Ó-ri ká họ ịnyị, ká Ohe Oluhye-é myị aalẹ, ịnyịrọ-ọ́ ka chịng pyẹpyẹ ka. Akama nya angịlẹ wuu ka myị, ị ka rụ ka ẹpwa lokpunyi.”

²⁴IMosisi wo oyaya nya adamwụ-ẹpwa. Ọ họ jaabwọ kọ ya joo wuu.

²⁵Ọ chụ alẹng ị ka jẹ-ẹ̀ họ ụkụrwọ kpẹẹkpẹẹ ri alegbeju ịkpẹhị rịrị ebwebweebwo nya angị ụnọ bala angị ohu bala angị iwo ịrụ bala angị iwo wuu lẹlẹ.

²⁶Angịịwa ri angịleje ụka wuu. Ị juwa cheje u-uhye nya ala ichiche-ichiche lịlaa. Ma, ị kaa kpa ala ilujwo wuu kaka gba iMosisi.

²⁷Ọọwa, ụka ká iMosisi da iJetiro adamwụ-ẹpwa ọkpahị kpá lẹ, iJetiro à yegiri rụ ka ẹpwa nyamwụ lẹlẹ.