Read idege EHE ỌKPỤKPỤ 19 Bible Online

EHE ỌKPỤKPỤ 19 - idege bible

EHE ỌKPỤKPỤ 19

¹Ẹnụtụrụ nya ọgbanyẹ-ọgbanyẹ ẹ-ẹpwụ nya ọya ọhata nyọlẹ ká ala Isirẹlụ yegiri bwu ọpyị nya Ijipiti ị kpa pwụ ugbileji nya ịSayịnayị lẹ.

²Ụka kị bwu iRefidim kaka pwụ ẹgẹwẹ, ị chịkụ ụ-ụwa ba Ọgbọdọ nya ịSayịnayị ba.

³Ọọwa lẹ, iMosisi à kele kaka tọ Ohe Oluhye u-uhye nya Ọgbọdọ ọọwa lẹ, Amkpaa-à be ẹkọ wụrwọọ bwu ụwa byoo yẹkẹẹ, “Ịịlẹ ā ka byi ala Isirẹlụ anyị nya iJekọbụ lẹ:

⁴Anụ tị́ kpẹhị nya ịlọnụ yẹ ang ịlẹ kam họ ẹ-ẹga nya ala Ijipiti wẹ lẹ. Anụ tị yẹ jaabwọ kam huunu kpa lala īdū à go anyị nyamwụ kpa a-achwọ, gbee kam kpanụ wẹ ẹga nya ịlọm lẹẹ lẹ̀.

⁵Ee lẹ, ó-ri kanụ myị ju ihi nya ẹla nyam kpẹẹkpẹẹ, kanụ kpa iro ọnwanwa nyam ịnyịnyị aalẹ, anụ ka ri angịnyị ịlẹ kam chụ ha ịlọm bwu ẹpwụ nya alẹpwụma nya odehe wuu. Odehe ọlẹ wuu lẹpwụ-lẹpwụ ri ịnyam,

⁶anụ à tị ri epwoja ọlịgọgọ ọlẹ kam chụchụ nyọka ri angịkiliya ham lẹ. IMosisi ee, aa ya ala ịwẹ jẹ ala Isirẹlụ mẹ.”

⁷Ịnyị, iMosisi à hireji bwu uhye nya ọgbọdọ lẹ, ọ wụrụ ịgabwọ nya ala Isirẹlụ kaka jịra wuu lẹ, ọ tịrọnụ jaa ẹla ọlẹ ká Amkpaa byoo nyị ya wuu lẹlẹ.

⁸Lẹ, ịwa wuu à ya ọnụ dawụlẹ myị m̀m̀m̀ yẹkẹẹ, “Ahị ka họ ẹla myị ẹla ọlẹ ká Amkpaa ya wẹ wuu.” Ọọwa, iMosisi à tịrẹkpẹ kpa ọwẹwẹ nyaa kaka ya je Amkpaa lẹlẹ.

⁹Amkpaa byi iMosisi yẹkẹẹ, “M̀ juwa ka wẹ kaka tọng labwụma nya egbamwụ ọtụka-ọtụka, chajị ká ala Isirẹlụ ka wo omyi nyam ụka kam ka ya ẹla tang. Ọọwa, ị ka dahịhileng pyịyọọ lẹlẹ.” IMosisi ya je Amkpaa jaabwọ ká ọwẹwẹ olene nya angịnyị nyamwụ ri.

¹⁰Ọọwa, Amkpaa-à byi iMosisi yẹkẹẹ, “Kele ká byi ala Isirẹlụ kị chị ịlaa ịgọgọ alẹ bala ijuju mẹ. Ị ka hụ́ ang ịkụrụ-kụrụ nyaa cheri-cheri

¹¹nwụlanọ gbe ẹnụtụrụ ọhata mẹ. Ẹnụ ọọwa am Amkpaa-à ka hireji wẹ uhye nya ọgbọdọ nya ịSayịnayị a-ahị nyanụ wuu lẹ.

¹²Aa chị àjẹ́ dagaga ju ọgbọdọ wuu, ká da ala Isirẹlụ ọna yẹkẹẹ, ‘Anụ kpẹhị chịng, kanụ kpụ uhye nya ọgbọdọ lee ọ-ya ịnyịrọ kịlọọ kpong-kpong koo. Ọng myị ọng kọ ya ịnyịrọ gu ọgbọdọ ọwẹ aalẹ, ị ka nwọọ.

¹³Ị ka da ajwọ lẹẹ ịcha nwụ ọngọọwa, la ọngọngọhẹ ọ-yụbwọ gwoo ka. Ó-ri ọngịnyị ehe lee ọ́ ri iyo oleji ri, ọ́ ka jẹ-ẹ̀ be igu ọwẹ kaka.’ Ụka kị wo ẹkụrwẹ ọchịchị gboo bwu uhye nya ọgbọdọ kẹnẹ-kẹnẹ, ị ka kpụ uhye warị lẹlẹ.”

¹⁴Ụka ká iMosisi hireji bwu uhye nya ọgbọdọ kpá, ọ byi ala Isirẹlụ ya nyị chị ịlaa ịgọgọ wuu mẹ. Ọọwa, ị hụ́ ang ịkụrụ-kụrụ nyaa cheri-cheri lẹlẹ.

¹⁵Ọọwa lẹ, ọ byaa ịnyịnyị yẹkẹẹ, “Anụ nwụla ịlọnụ nọ gbe ẹnụtụrụ ọhata mẹ. Ọngọngọhẹ ā doru kịla ọnyang lụka ọlẹ kokoo.”

¹⁶Ụka ká ahị pyẹ ẹnụtụrụ ọhata, ịkpala juwa kpụ, apya juwa chị u-uhye nya ọgbọdọ. Egbamwụ ọ-chị ụka ọhẹ wẹ ka ke ọgbọdọ ọọwa. Omyi nya ẹkụrwẹ ọhẹ juwa chị gbooo ọtụka-ọtụka. Ọng myị ọng ọlẹ kọ juwa ị-ịkampụ nya ala Isirẹlụ wuu che kpákpaakpa luhi ojuju.

¹⁷Ọọwa lẹ, iMosisi à juwa kpa angịnyị kpehe bwu ịkampụ kele ka tọ Ohe Oluhye lẹlẹ. Ị jẹ kaka godayị rịrị ọ-ọmwụ nya ọgbọdọ.

¹⁸Ọgbọdọ nya ịSayịnayị myị lịmwụ wuu chajị Amkpaa hireji wẹ ụwa la ila. Ịmwụ ọọwa juwa bwuru kpunaaa lala ịmwụ nya utiyo. Ọgbọdọ wuu lẹpwụ-lẹpwụ juwa hụ́ kpuka-kpuka.

¹⁹Ụka ọọwa, omyị nya ẹkụrwẹ juwa la gbooo gụ olene-ene. Ụka ká iMosisi-í ya ẹla, Ohe Oluhye wọọ gbooo lala ọkpụkpụ nya ịkpala.

²⁰Amkpaa hireji wẹ uhye nya Ọgbọdọ nya ịSayịnayị lẹ, ọ wụrụ iMosisi kele ka ụwa lẹlẹ. Ịnyị, ụka kọ kele lẹ,

²¹Amkpaa-à byoo yẹkẹẹ, “Hireji kele ká yụbwọ gbile ala Isirẹlụ ụ-ụrụ, kị bá pyeee kpoye wẹ uhye nya ọgbọdọ nyọka yẹm yẹ koo. Ó-ri ịnyị ka aalẹ, iru nyaa ka gbu.

²²Angịkiliya ịlẹ kị ka jẹ jum chwẹẹ wuu ka chị ịlaa ịgọgọ ene. Ó-ri ịnyị ka aalẹ, m̀ ka yaa akama.”

²³Ọọwa, iMosisi à byi Amkpaa yẹkẹẹ, “Ọngọngọhẹ-ẹ́ ka jẹ-ẹ̀ kpụ uhye nya Ọgbọdọ nya ịSayịnayị kokoo, chajị ahụ ayịdang tị́ dahị ọna lẹẹ ene-ene. A ya ahị nyị chị àjẹ́ yọọ dada, kaahị nyị cheji bọọ ọọ-la ịgọgọ ọlala nyamwụ.”

²⁴Amkpaa wẹ byoo yẹkẹẹ, “Hireji kele ká kpa Erọn ba ịlọng warị mẹ. Angịkiliya bala ọngọkịla ọhẹ-lọhẹ ā bá pyeee kpoye wẹ uhye nya ọgbọdọ nyọka yẹm-m yẹ koo. Ó-ri ịnyị ka aalẹ, m̀ ka yaa akama.”

²⁵Ọọwa lẹ, iMosisi a hireji ka ẹga nya ala Isirẹlụ lẹ, ọ tịrọnụ nya ẹla ọlẹ ká Amkpaa ya wuu jaa lẹlẹ.