Read idege EHE ỌKPỤKPỤ 2 Bible Online

EHE ỌKPỤKPỤ 2 - idege bible

EHE ỌKPỤKPỤ 2

¹Ụka ọọwa, ọlẹng ọhẹ ọlẹ kọ bwu imwawụ nya iLivayị ye ahụ bwu imwawụ ọọwa-ọọwa.

²Ịnyị, ahụ nyamwụ a ma ọnyị ọlẹng họọ lẹlẹ Ụka ká ọnyang ọwẹ yẹ jaabwọ ká ọnyị nyamwụ ọọwa há ụhị lụmẹ, ọ yọọ kpịbaa ẹ-ẹpwụ nya ịya ịta gbẹgbịlẹ.

³Ụka ká ọnyị ọọwa nwa kịla ọ-ka ya kpịbaa ẹ-ẹpwa kịla lẹ, ịnamwụ à hu okpukpu ọlẹ kị kpa etungkohyo họ lẹ, ọ ya ida nya ikorota mịla iwa nyamwụ wuu kpẹmkpẹm ká enyi-í ka jẹ-ẹ̀ ka ẹpwụ nyamwụ kaka lẹlẹ. Ọ ya ọnyị ọọwa nọ ẹ-ẹpwụ nyamwụ lẹ, ọ hwoo lọnyị-lọnyị kpa kaka rịrị ẹ-ẹpwụ nya amẹ ịlọka nya Ihu lẹlẹ.

⁴Ọọwa, ọnyịnịna ọnyang nya ọnyị ọọwa à godayị rịrị hwẹẹẹ nyọka yẹ ó-ri ká ịngịngịhyẹ-ẹ́ ka họ ta ọnyị ọwẹ lẹlẹ.

⁵Ọọwa lẹ, ọnyị ọnyang nya adịrahụ à wẹ ogo kọ ka hyo enyi lẹlẹ. Ụka ọọwa, anchẹ anyang nyamwụ juwa jẹdịyẹ tụ ọnụụka-ọnụụka da. Lụka ọmwaaa lẹ, ọ chẹhị ka yẹ okpukpu ọọwa ẹ-ẹpwụ nya amẹ lẹ, ọ du ọnchẹ nyamwụ ọhẹ kaka hwoo kpa wọọ lẹlẹ.

⁶Ụka ká ọnyị ọnyang nya adịrahụ wụrụ okpukpu ọọwa, ọ yẹ ọnyị ọlẹng nụwa ẹ-ẹpwụ nyamwụ. Ọnyị ọọwa juwa jida. Ọ la ọnyị ọnyang nya adịrahụ ọwẹ ahyẹẹrwẹrwa lẹ, ọ yẹkẹẹ, “Ọnyị nya ala iHiburụ ọhẹ a ka lẹẹ lẹ.”

⁷Ọọwa lẹ, ọnyịnịna ọnyang nya ọnyị ọlẹng ọwẹ à kpehe gẹgịlẹ lẹ, ọ tọ ọnyị ọnyang nya adịrahụ wo yẹkẹẹ, “M̄ kele kaka wụrụ ọnyang nya ala iHiburụ ọhẹ warị kọ ka kpẹhị rịrị ọnyị ọwẹ hang mẹ?”

⁸Ọnyị ọnyang nya adịrahụ wẹ byoo yẹkẹẹ, “Ịnọọ, kele mẹ.” Ịnyị, ọ kele ka kpa ịnịna nya ọnyị ọlẹng ọwẹ kpangga kele lẹlẹ.

⁹Ọnyị ọnyang nya adịrahụ byi ọnyang ọọwa yẹkẹẹ, “Ye ọnyị ọlẹ kpa rụ ka kpẹhị rịrọọ ham mẹ aalẹ, m ka nwụng uri.” Ọọwa, ọ ye ọnyị ọọwa kpa rụ kaka kpa lẹlẹ.

¹⁰Ụka ká ọnyị ọọwa nwa ọngịnyị kpá, ká ọnyang ọwẹ kpọọ kịla ọnyị ọnyang nya adịrahụ lẹ, ọ yoo kpa lala ọnyị nya ụbwọ nya ịlọmwụ lẹlẹ. Ịnyị, ọ kụ irya nya ẹnyị ọlẹ kọ ka ya jwoo lẹ, ọ yẹkẹẹ, “Ẹnyị nyamwụ ka ri iMosisi[2], chajị m̀ gbọọ kpehe bwu ẹpwụ nya enyi.”

¹¹Ụka ká iMosisi nwa adam-ọlẹng kpá kọ kpehe kaka wụla ala iHiburu nyaa yẹ, ọ yẹ ká ala Ijipiti juwa kpa agbụrụ-agbụrụ tụ ụkụrwọ ọnyọọngịrị ọhọhọ rịraa. IMosisi dọmwụ ye ọla Ijipiti ọhẹ kọ juwa nyi ọngọhẹ ọlẹ kọ ri ala iHiburu nyaa.

¹²IMosisi chẹhị mịla-mị̀la-mịla, ọ je ká ọngọngọhẹ-ẹ́ ji ọnaabwọ juwa yọọ kaka lẹ, ọ nwọọ kpịrang lẹ, ọ ya ogu nyamwụ ju eji lẹlẹ.

¹³Ahị ọpyẹpyẹ ọọnamwụ, ká iMosisi mwẹẹkpẹ kele, ọ yẹ ká alẹng nya ala iHiburu angị imiiye kị juwa ma uya ta awụlẹ. Ọ tọ ọngọlẹ ká ẹla nyamwụ ri abyị wo yẹkẹẹ, “Ịyẹ tị́ du ka juwa mịla ọla iHiburu ọọnang nyi kpuukpuu ịnyị?”

¹⁴Ọlẹng ọọwa wẹ byi iMosisi yẹkẹẹ, “Oowo tị́ hung olegbeju bala agaba ọ-chị oku nya ẹla nyahị kpong-kpong ene-è? À juwa ka nwụm jaabwọ ká nwụ ọla Ijipiti ọlaanyị lẹ-ẹ́?” Ọọwa lẹ, iMosisi à ju uhi, juwa me irya yẹkẹẹ, “Ọọwa ri angịnyị jẹ ẹla ọlẹ kam họ jum lẹ̀.”

¹⁵Ụka ká adịrahụ wo ẹla chajị nya ọngọlẹ ká iMosisi nwụ, ọ tịtọ kọ ka wu iMosisi nwụ ịnyịnyị. Ma, iMosisi rụnyẹ rụ ka kụ ọ-ọpyị nya iMidiyan. Ẹnẹhẹ juwa ká iMosisi hụhụ ẹ-ẹga nya ịwẹẹlụ ọhẹ. Anyị anyang irwiye nya ọngọkiliya nya alepweji nya iMidiyan, ọlẹ ka ẹnyị nyamwụ ri iJetiro, warị nyọka chị enyi kpa ka ju ị-ịkpịla ị-kpa nwa enyi nya ịkpịlọ nya adaa.

¹⁷Ma, angịgbikpịlọ ịhyẹ ku anyị anyang nya iJetiro ịịwa rụ. Ọọwa lẹ, iMosisi à wuleji, daa ụbwọ lẹ, ọ chị enyi ha ịkpịlọ nyaa lẹlẹ.

¹⁸Ụka kị nyà wẹ ẹga nya iJetiro[3] adaa, ọ taa wo yẹkẹẹ, “Ịyẹ tị́ du kanụ nyà hyaa ịnyị alẹ-ẹ́?”

¹⁹Anyị anyang ịwẹ wẹ byi adaa yẹkẹẹ, “Ọla Ijipiti ọhẹ à ká angịgbikpịlọ hiihi wẹ lẹ. Ọwa-à dọmwụ chị enyi hahị bala ọ-ya enyi ha ịkpịlọ nyahị nwa wuu ịnyịnyị lẹ.”

²⁰Ọọwa, ọ tọ anyị anyang nyamwụ wo yẹkẹẹ, “Lẹ, ọlẹng ọọwa tị́ lee mẹ? Ịyẹ tị́ du kanụ rụ hyoo hụ ụwa mẹ? Anụ kele ka wụrwọọ ẹpwa warị kọ ri ang tahị.”

²¹Ịnyị, iMosisi à myị ọnụ nyọka kụ ụwa lẹ, iJetiro a ya ọnyị ọnyang nyamwụ ọlẹ ká ẹnyị nyamwụ ri iSipọra họọ ye lẹlẹ.

²²Ọ ma ọnyị ọlẹng ha iMosisi lẹ, iMosisi à me irya ẹ-ẹpwụ nya ịlọmwụ yẹkẹẹ, “M̀ ri ọngga ám̀ ọ-ọpyị ọlẹ. Lẹẹlẹ, m̀ ka wụrụ ẹnyị nya ọnyị ọlẹ ịGẹẹchọm[4].”

²³Ụka ká ẹka lụmẹ-lụmẹ kam lẹ, adịrahụ nya Ijipiti à gbu lẹlẹ. Ma, ala Isirẹlụ juwa la arụ ọchị́chị chajị nya ụhị ọyẹyẹ nyaa wẹẹ. Ị chị eru bịlẹ ụbwọ ọdada. Ohe Oluhye wo eru ọchịchị nyaa ọọwa.

²⁴Ọ wo la arụ ọchị́chị nyaa ẹ-ẹpwụ nya akama. Ọ kpịtịya nya iro ọlẹ kọ nwa ta Ebiraham bala Ayịsiki bala iJekọbụ.

²⁵Ohe Oluhye yẹ iwe-ahụrụ nya anyịhị oriri nya ala Isirẹlụ, ọ tị gwoo ọ-ọkilẹtụ ịnyịnyị.