Read idege EHE ỌKPỤKPỤ 21 Bible Online

EHE ỌKPỤKPỤ 21 - idege bible

EHE ỌKPỤKPỤ 21

¹“Ehile ịlẹ ká ka ya ha ala Isirẹlụ à lẹẹ lẹ:

²“Ó-ri kanụ ra ọnyọhị ọlẹ kọ ri ọla iHiburu nyanụ aalẹ, ọnyọhị ọọwa ka myịnụ ẹrụ jịra ẹka ịrwọnyẹ gbẹgbịlẹ. Ma, ẹ-ẹpwụ nya ẹka ọharwiye, anụ ka tụụbwọ hyoo rụ ka la ịlọmwụ la ọ-nwụnụ uri ene ka.

³Ó-ri kanụ ra ọnyọhị ọọwa wẹ ẹpwa la o-ye ahụ ene ka aalẹ, anụ tịtị ka tụụbwọ hyoo rụ lịlọmwụ-ịlọmwụ ịnyịnyị. Ọ́ tị ri kọ ye ahụ ene kọọ ri ọnyọhị nyanụ aalẹ, ọ ka kpa ahụ nyamwụ rụ ba ịlọmwụ.

⁴Ó-ri ká ayịbamwụ-ụ́ ye ahụ họọ kpụ kọ ma anyị aalẹ, ahụ ọwẹ bala anyị nyamwụ wuu ka ri nya ayịbaba nya ọnyọhị ọọwa. Ọnyọhị ọọwa kẹnẹ-kẹnẹ à ka rụ kaka la ịlọmwụ lẹ.

⁵Ọ́ tị ri ká ọnyọhị ọọwa-á ya dodehe yẹkẹẹ, ‘Ayịbam bala ahụ nyam bala anyị nyam ịlẹ ham. Lẹẹlẹ, ḿ tịtọ nyọka rụ kaka la ịlọm kaka,’

⁶aalẹ, ayịbamwụ ka kpọọ kịlahị nya Ohe Oluhye[15]. Ọ ka yọọ godayị rịrị ọ-ọnang lee ẹ-ẹga nya ekeji i-wu ukpileku kpa lẹ, ọ ka bwurwoo ụrụ iwa lẹlẹ. Ọọwa lẹ, ọ-ka ri ọnyọhị nya ayịbamwụ ọwẹ pyịyọọ lẹlẹ.

⁷“Ó-ri ká ọlẹng á wu ọnyị ọnyang nyamwụ ra nya ọnyọhị, ọnyị ọọwa-á ka la ịlọmwụ lụgbẹyị ọlẹ ká anyịhị alẹng kaa rụ ka la ịlaa ka.

⁸Ó-ri ká ọnyang ọwẹ-ẹ́ tị há ayịbamwụ ọlẹ kọ chwọọ nyọka ri ahụ-ọnchẹ nya ịlọmwụ kaka lẹ aalẹ, ọ̄ ka yọọ ha adamwụ ra tịrẹkpẹ. Ọwa ayịdang á la ọngịrị nyọka yọọ ha ọngga ọhẹ-lọhẹ ra ka, chajị ọwa-à pwa ọnyang ọwẹ lẹ.

⁹Ó-ri kọ chụ ọnyang ọwẹ chụ chajị kọ ka yọọ ha ọnyị ọlẹng nyamwụ ye aalẹ, ọ ka hu ahụ nya ọnyị nyamwụ ọwẹ lala ọnyị nya ụbwọ nya ịlọmwụ.

¹⁰Ọ́ tị ri ká ọlẹng á ye ahụ oheeye kaka ba ahụ nya ọgbanyẹ nyamwụ, ọ ka kịnyaa la ọ-kpa ahụ-ịnẹpwa la ang oriri bala ang ọkụrụ-kụrụ bala ọ-kpọọ nya ahụ nyamwụ jaabwọ kọọ họ ene-ene.

¹¹Ó-ri kọ myị kpọọ ẹ-ẹpwụ nya ang ịta ịwẹ ka aalẹ, ọ ka tụụbwọ hyoo rụ ka la ịlọmwụ la ọ-nwụnụ uri ha ayịbamwụ ene ka.

¹²“Ọng myị ọng ọlẹ kọ ya ang mịla ọngọkịla kpụwa kpụ kọ gbu aalẹ, ị ka nwọọ.

¹³Ọ́ tị ri kọ mamachịng nwọọ ka, kọ ri ụbwọ-anịya aalẹ, ọ ka rụnyẹ rụ ka kpịbaa ẹ-ẹga kam Ohe Oluhye ka chụ hanụ.

¹⁴Ó-ri ká ọngọngọhẹ-ẹ́ me obyi jahị da ọngọkịla kpụ kọ nwụ ọngọọwa aalẹ, ó-riri kọ rụnyẹ rụ ka kpịbaa ẹ-ẹga nya ogidi nyam, anụ-ụ̀ gbiloo bwu ụwa kpa ka nwụ.

¹⁵“Ọng myị ọng ọlẹ kọ ya ang mịla adamwụ lee ịnamwụ kpụwa-kpụwa aalẹ, ị ka nwọọ.

¹⁶“Ọng myị ọng ọlẹ kọ wu ọngịnyị yi oyi, ó-riri kọ yọọ ra lee ọ kpọọ ụ-ụwa gbee kị yọọ ụ-ụbwọ nyamwụ aalẹ, ị ka nwọọ.

¹⁷“Ọng myị ọng ọlẹ kọ gọlọ ju adamwụ lee ịnamwụ aalẹ, ị ka nwọọ.

¹⁸“Ó-ri ká angị imiiye nyanụ-ụ́ mwẹla, ká ọngọhẹ-ẹ́ ya ẹjwọ gu ọngọwụlẹ igo lee ọ-mịlọọ ẹwụ bwòóo, ká ọngọlẹ kị họ ang á gbugbu ka ma, kọ tị hu ẹngkịlẹ kpehe bwu ube myị ka aalẹ,

¹⁹ọngọlẹ kọ họọ ang ka gbocho bwu ẹpwụ nya ẹlẹwẹ ụka ká ọngọwẹ-ẹ́ hagụ kpụ kọ juwa kpa ọgọdọ cheji kpehe wẹ odehe myị. Ọngọ họ ọngọwẹ ang à tị ka nwụ uri nya ụka ọlẹ ká ang họ ọngọwẹ neeji bala ọ-kpahị jwoo gbee kọ ka hagụ wuu lẹ.

²⁰“Ọng myị ọng ọlẹ kọ hu okoji kpa nyi ọnyọhị ọlẹng lee ọnyọhị ọnyang nyamwụ kpụ kọ gbu aalẹ, ị ka yẹ ọngọọwa akama.

²¹Ọ́ tị ri kọ hị lala ụtụrụ ookpokpo lee ụtụrụ imiiye myị lẹ aalẹ, akama ọyẹyẹ ọkịla ọhẹ-ẹ́ juwa ha ayịbamwụ kaka, chajị ọnyọhị ọwẹ à ri ang ọlala nyamwụ lẹ.

²²“Ó-ri ká alẹng ịhyẹ-ẹ́ juwa ma uya, kị mịla ọnyang ọlẹnyị nmoo kpụ kọ chị ọnyị ma, ká ang ọkịla ọhẹ dala ọwẹ-ẹ́ họọ ka aalẹ, ọngọ họọ ang kpangga ka jwo ijwo ha ọrụmwụ jaabwọ myị abwọ kọ há ọrụmwụ, ká angịleje-é tịtị myị jwoo.

²³Ma, ang ọkịla-á họọ ba ọọwa u-uhye aalẹ, akama ọyẹyẹ chajị nya ọọwa ka ri ọ-ya ọhịhị kwiwa nya ọhịhị. Ị tị ka

²⁴ya ẹhị kwiwa nya ẹhị bala ẹngịrị kwiwa nya ẹngịrị bala ụbwọ kwiwa nya ụbwọ bala ẹpẹtẹ kwiwa nya ẹpẹtẹ

²⁵ẹbẹ nya ila kwiwa nya ẹbẹ nya ila bala ẹbẹ kwiwa nya ẹbẹ bala ugbobiri ọpyẹpyẹ kwiwa nya ugbobiri ọpyẹpyẹ.

²⁶“Ó-ri ká ọngịnyị-ị́ ya ang mịla ọnyọhị ọlẹng lee ọnyọhị ọnyang nyamwụ ẹ-ẹhị, ká ẹhị ọọwa-á bwuru aalẹ, ọ ka tụụbwọ hi ọnyọhị ọọwa rụ kaka la ịlọmwụ kwiwa nya ẹhị ọlẹ kọ bwuru.

²⁷Ọ́ ri kọ wo ọnyọhị ọlẹng lee ọnyọhị ọnyang ẹngịrị gbịlọgọ aalẹ, ọ ka tụụbwọ hi ọnyọhị ọọwa rụ kaka la ịlọmwụ kwiwa nya ẹngịrị nyamwụ ịnyịnyị.

²⁸“Ó-ri ká ẹna-á gu ọngịnyị achụ, ká ọngọọwa-á gbu kẹhị-kẹhị, ị ka da ajwọ nwụ ẹna ọọwa. Ọngọngọhẹ-ẹ́ tị ka kpa iyo nyamwụ ka ọnụ ka. Ụka kị họ ịnyị lẹ aalẹ, akama ọyẹyẹ ọkịla ọhẹ-ẹ́ juwa ha ayịdang nyamwụ gụ ọwẹ kaka.

²⁹Ọ́ tị ri ká ẹna ọọwa-á kaa họ la achụ ogugu ene-ene kpụ kị da ayịdang nyamwụ ọna, kọ tị myị woo da ka ẹpwụ nya iku ka gbee kọ kaka nwụ ọngịnyị aalẹ, ị ka da ajwọ nwụ ẹna ọọwa. Ị ka wu ayịdang nyamwụ kpa ka nwụ ịnyịnyị.

³⁰Ma, ọ́-ri kị chọọ ijwo wọnụ nya ọhịhị nyamwụ ju aalẹ, ọ ka nwụ ang myị ang ọlẹ kị hunọ chajị kọ ka nyẹ egbeju nya ịlọmwụ.

³¹Ó-ri onjwo ọlẹng lee onjwo ọnyang ká ẹna-á gu achu, anụ ka kpa ehile ọlẹ họ ụkụrwọ i-iwe ahụrụ ọọwa ịnyịnyị.

³²Ma, ó-ri ọnyọhị ọlẹng lee ọnyọhị ọnyang ká ẹna-á nwụ, ayịdang nya ẹna ọọwa ka nwụ ayịbaba nya ọnyọhị ọwẹ uri lokpoko onyoowuru iwo ịta (30) lẹpwụ-lẹpwụ. Ọọwa, ị ka da ajwọ nwụ ẹna ọọwa lẹlẹ.

³³“Ó-ri ká ọngịnyị-ị́ nwụla ang hi ụjẹ lee o-wu ụjẹ, pẹ hyoo da dodo, ká ẹna lee obiyó-ó chabwọ kpọọ aalẹ,

³⁴ọngọọwa ka nwụ uri nya iyo ọọwa. Ụka kọ nwụ ayịdang nya iyo ọọwa uri kpá lẹ, ọ ka hu ogu nya iyo ọọwa la lẹlẹ.

³⁵“Ó-ri ká ẹna nya ọngọhẹ-ẹ́ nwụ ẹna nya ọngọkịla, ị ka wu ẹna ọlahị-lahị ra, kị ka ga okpoko nyamwụ memeeme. Ịwa angị imimiiye ka ga iyo nya ẹna ogbugbu ha awụlẹ memeeme ịnyịnyị.

³⁶Ma, ó-ri ka ẹna ọọwa-à họ la achụ ogugu ene-ene, ká ayịdang nyamwụ-ụ́ tị myị woo da ka ẹpwụ nya iku ka aalẹ, ayịdang nya ẹna ọlahị-lahị ọwẹ ka nwụ ọngọ la ẹna ogbugbu uri bwula ọ-ya ẹna ọlahị-lahị kwoo iwa. Ọọwa lẹ, ogu nya ẹna à ka ri ịnyamwụ lẹlẹ.