Read idege EHE ỌKPỤKPỤ 22 Bible Online

EHE ỌKPỤKPỤ 22 - idege bible

EHE ỌKPỤKPỤ 22

¹“Ó-ri ká ọngịnyị-ị́ wu ẹna lee ọkpịlọ yi oyi kpa kaka ra lee ọ-nwụ ri, ọngọọwa ka ya ịna ịrụ nwụ uri nya ẹna ookpoko ọọwa. Ma, Ọ́ tị ri ọkpịlọ aalẹ, ịkpịlọ ine ọ ka ya nwụ uri tịrẹkpẹ ha ayịdang lẹ. Ọ ka nwụ uri nya ang ịlẹ kọ go pyií. Ọ́ tị ri kọ ye ang ka ya nwụ uri ka aalẹ, ị ka woo ọọwa ayịdang ra chajị kị ka jẹ-ẹ nwụ uri nya ang ịlẹ kọ go.

²Ó-ri kị tọ iyo ọlẹ ká oyi ọwẹ wu wẹ lahị-lahị ụ-ụbwọ nyamwụ wẹẹ aalẹ, ọ ka ya iyo imiiye nwụ uri tịrẹkpẹ kwiwa nya iyo ookpokpo ọlẹ kọ wu.

³“Ó-ri ká oyi-í juwa be ẹpwa ene lodu, kị mịlọọ ang kpụ kọ gbu kpịlagada aalẹ, ọngọ nwọọ-ọ́ la abyị nya ọngịnyị ọnwụnwụ ka,

⁴kẹnẹ-kẹnẹ ó-ri ká ahị á pyẹ kpa ene ka ẹlẹwẹ-ẹ̀ họ lẹ, ọ ka la abyị nya ọngịnyị ọnwụnwụ lẹlẹ.

⁵“Ó-ri ká ọngịnyị-ị́ yi iyo ileji nyamwụ ori da kị ka ri ang, kọ pẹ hyaa kị rụ kaka ri alakọnụ lee ang ịlẹrụ nya ọngọkịla aalẹ, ang-ẹrụ ịlahịchịng-ịlahịchịng ịhagụ wuu nya ịlọmwụ ọ ka ya kwiwa nya ịlẹ ká iyo nyamwụ ri lẹ.

⁶“Ó-ri ká ọngịnyị-ị́ chị ụmẹ ila ẹ-ẹrụ nyamwụ, ká ila ọọwa-á tị tụ ọyịrị da ka ẹrụ nya ọngọkịla kaka rụ ōgū nya ang-ẹrụ ịlẹ kị chị lee ịlẹ kị hi rịrị kọkọ ẹ-ẹrụ aalẹ, ọngọ jụ ila ọwẹ ka nwụ uri nya ang-ẹrụ ịịwa wuu lẹpwụ-lẹpwụ tịrẹkpẹ ha ayịdang nya ẹrụ ọlẹ ká ila rụ chajị nya iyabwọ ọlẹ kọ họọ.

⁷“Ó-ri ká ọngịnyị-ị́ ya okpoko lee ang-abwọ ọkịla ha ọngịnyị ehe ọọnamwụ kpa, ká ang ịịwa-á tị byi ẹ-ẹpwa nyamwụ aalẹ, oyi ọlẹ kọ go ang ịịwa ka nwụ uri mwụ aba ba ugbabwọ imiiye ó-ri kị bọọ ụbwọ myị.

⁸Ma, ó-ri kị jẹ oyi ọọwa ka aalẹ, ayịdang nya ẹpwa ọwẹ ka kpa ịlọmwụ wẹ ịlahị nya Ohe Oluhye kọ ka kpa ọnụ nya ịlọmwụ nwa iro ya ụbwọ nyị́ gụ ọọwa gu ang nya ọngọkịla ọọwa ka ịnyịlẹhị.

⁹“Ó-ri ang ojuju nya ọngọ ri ayịdang nya ang lala ẹna lee obyiyó lee ọkpịlọ lee ang ọkụrụ-kụrụ lee ụma nya ang obyibyi ọkịla ọlẹ ká ọngọhẹ lẹpwụ nyaa yẹkẹẹ, ‘Am à la ang ọlẹ lẹ,’ angị imimiiye ịlẹ kị wẹẹ ju ang ọọwa ju ka kpa eje nyaa kịlahị nya Ohe Oluhye[16]. Ọngọ la abyị lẹpwụ nyaa ka nwụ ọngọkịla uri tịrẹkpẹ mwụ aba ba ugbabwọ imiiye.

¹⁰“Ó-ri ká ọngịnyị-ị́ ya obyiyó lee ẹna lee ọkpịlọ lee ụma nya iyo oleji ọkịla ha ọngịnyị ehe ọọnamwụ kpa, ká iyo ọọwa-á gbu lee ị họọ ang ụjụjwọ lee ị woo yi oyi kpa rụ bwu ẹpwa nya ọọnamwụ ọwẹ la ọngọngọhẹ ọjẹjẹ ka aalẹ,

¹¹ọngọlẹ ká ẹlẹwẹ họ ẹ-ẹpwa nyamwụ wẹ ka kele kịlahị nya Amkpaa kọ ka nwa iro chajị nya ẹla ọlẹpwarịrị nyaa. Ó-ri ọwa kọ wu iyo oleji nya ọọnamwụ yi oyi ka aalẹ, iro ọnwanwa ọwẹ ā nwa ayịdang nya iyo ọọwa mẹ. Ọ myịmyị tịtọ nya uri ọ-nwụ tịrẹkpẹ họọ koko.

¹²Ma, ó-ri kị wu iyo ọọwa yi oyi bwu ụbwọ nyamwụ aalẹ, ọ ka nwụ uri tịrẹkpẹ ha ayịdang nyamwụ.

¹³Ó-ri iyo ịnyẹẹgẹga kị woo be ri aalẹ, ọ ka dụmwọ nya apwụ nyamwụ kpa ka mẹjẹ nya ang ibeenu. Ọ́ họ ịnyị lẹ, ọ́ tụtụm ka nwụ uri nya iyo ọọwa kaka.

¹⁴“Ó-ri ká ọngịnyị-ị́ kpịla iyo oleji bwu ẹga nya ọngịnyị ọọnamwụ, ká iyo ọọwa-á gbu lee ị họọ ang ụka ká ayịdang nyamwụ-ụ́ ji ijata ka aalẹ, ọ ka nwụ ayịdang nya iyo ọọwa uri tịrẹkpẹ pyii.

¹⁵Ma, ó-ri ká ayịdang nyamwụ-ụ́ ji eji kpẹhị nya ịlọmwụ yẹ lẹ̀ aalẹ, ọ́ baba ọ ka nwụ uri kaka. Ọ́ tị ri kị ya iyo oleji ọwẹ jwoo ọhị ju aalẹ, okpoko ọlẹ kọ nwụ lalẹẹ ene ku ọmwakpa nya iyabwọ ọwẹ lẹ̀.

¹⁶“Ó-ri ká ọlẹng á pịrị onjwo ịyang ọlẹ kị ya ẹla nya oyeye nyamwụ lẹka, kọ kpọọ kele kaka bịrị aalẹ, ọngọọwa ka go ang ha adamwụ. Ọọwa, ọ ka yoo lẹlẹ.

¹⁷Ó-riri ká adịda nya onjwo ịyang ọwẹ-ẹ́ pwa lụpwụ okpopyi ya ọwa nyị́ ka ya ọnyị ọọwa họọ ha ye ka, ọlẹng ọwẹ ka go ang ha adamwụ jaabwọ ká ang ogogo nya onjwo ịyang kaa la pyii.

¹⁸“Anụ-ụ̀ nwụ ọlụhwa ọnyang ọnyị myị ọnyị wuu.

¹⁹“Anụ-ụ̀ nwụ ọng myị ọng ọlẹ kọ nọ ta iyo oleji.

²⁰“Anụ-ụ̀ nwụ ọng myị ọng ọlẹ kọ kịla iya ha ohe ọkịla dala Amkpaa.

²¹“Ānụ kpa ọngga lụbwọ onyobyi lee ọ-tọọ pyịpyị kpong-kpong ka, chajị anụ ayịdang tị́ jẹ kanụ ri angga ọ-ọpyị nya Ijipiti ẹnẹhẹ lẹ.

²²“Ānụ họ ẹla ịmịmẹ ẹ-ẹga nya ahụ-ogu lee ọnyị-ogu ọhẹ-lọhẹ koo.

²³Ó-ri kanụ họ ẹla ẹ-ẹga nyaa tịmịmẹ, kị cheru jum bịlẹm ụbwọ ọdada aalẹ, m̀ ka ke ụrụ lomyi nyaa.

²⁴Ikẹjẹ-awụrụ nyam ka wuru jahị danụ. Ọọwa, m̄ ka ya iwe da ká aluji ka nwụnụ ẹ-ẹwụ chajị ká ịhụ nyanụ ka yẹ ka ri ịhụ-egu, ká anyị nyanụ tịtị ka ri anyị-egu ịnyịnyị lẹlẹ.

²⁵“Ó-ri kanụ ya okpoko kpịla ọngọngọhẹ nya angịnyị nyam ịlẹ kị ri alẹbyahị ẹ-ẹpwarịrị nyanụ, ānụ họ lala ọngọ ya okpoko ju ọhị ka. Ānụ byaa kị ya okpoko haju hanụ koo.

²⁶Ó-ri kanụ ye awụrụ ocheji-cheji oluhye nya ọọnanụ nya ang ọbọkpa, ọọ-la uri kọ kpang aalẹ, anụ-ụ̀ tịrọọ ẹkpẹ họọ ene ká ẹnụ ka ya ẹtẹ dụrụ ugba.

²⁷Ang odudu ri awụrụ ọwẹ kẹnẹ-kẹnẹ à ri apwụ ọ-dakụrụ ká ịnyịrọ ka lọọ gbigbiigbi lẹ. Ó-ri ká ya họọ ka, ịyẹ ọ tị́ tị̀ tị ka ye ke ịlọmwụ ohu? Ụka ká ọngọọwa-á cheru jum bịlẹm ụbwọ ọdada, m̀ ka ke ụrụ lọọ, chajị am Ohe Oluhye ri ọngọ yẹ ahyẹẹrwẹrwa.

²⁸“Ānụ ya ẹla ọpyịpyị ba Ohe Oluhye lee ọ-gọlọ ju adịrahụ ọ-kpa ọpyị nya alịnyanụ ka.

²⁹“Ānụ họ atịmẹ nyọka hu ọhaha nya ajẹ ang-ẹrụ bala ịnya ere nya egbe nya ekeji nyanụ ham ka. “Anụ ka ya anyị alẹng nya ọgbanyẹ nyanụ ham.

³⁰Anụ ka ya anyị nya ọgbanyẹ nya ịna bala ịkpịlọ nyanụ ham ịnyịnyị. Anụ ka bà hyaa ẹ-ẹpwụ achwọ nya ịnaa jịra ẹnụtụrụ irwiye gbẹgbịlẹ. Ẹnụtụrụ ọhaneku lẹ, anụ kpaa warị ka ha ọhaha ham mẹ.

³¹“Anụ ka ri angịnyị ịlịgọgọ nyam. Chajị nya ọọwa lẹ, ānụ ri ogu nya iyo ọlẹ ká iyo ịnyẹẹgẹga nwụ kpong-kpong koo. Anụ pẹ hyaa chị ha ibwu.