Read idege EHE ỌKPỤKPỤ 23 Bible Online

EHE ỌKPỤKPỤ 23 - idege bible

EHE ỌKPỤKPỤ 23

¹“Ā kpa oja ọnọọkịla pyebile ka. Ā myị ẹla ju oluguru-ẹla ká họ ibeenụ ọnọọkịlẹ ka.”

²“Ā ba iru nya angịnyị jẹ nyọka họ ang onyobyi ka. Ụka ká juwa họ ibeenu ẹ-ẹga oleje, ā myị ẹla jwaa jẹkpẹ da ẹla nya ịlẹhị ka.

³A tị choku nya ẹla ha ọlẹbyahị chajị nya ọlẹbyahị oriri nyamwụ ka ịnyịnyị.

⁴“Ó-ri ká jẹ ka gba chị ẹna nya oluji nyang kọ juwa rụ hwahị aalẹ, aa woo kpa tịrẹkpẹ wọọ.

⁵Á tị yẹ obyiyó nya oluji nyang ká olo-ó chọọ ẹkpa beji aalẹ, ā yọọ chịng, ká rụ hyoo ụ-ụwa ka. Aa dọọ ụbwọ kọ wule obyiyó nyamwụ ọọwa eji.

⁶“Ā yeje tu alẹbyahị ịlịnyanụ ụka kị kpa ẹla nyaa wẹ ube oleje ka.

⁷Ā chẹla ba ọngịnyị kịrọrọ lee o-wu ọngọ da ẹla ọhẹ-lọhẹ ka kpa ka nwụ timajẹ ka, chajị am Ohe Oluhye ka ya eje wu ọngọ họ ang onyobyi.

⁸“Ā ye ang ochikiriju koo. Ọ kaa ya umilebwu kụrụ ọngịnyị a-ahị, gwoo ahịgboo hi ang ọnyịịla ọhọhọ. Ọ kaa pyị ẹla nya ọlabwẹla ọnyịịla anyoko.

⁹“Ā tụ angga pyịpyị koo. Anụ lịlọnụ tị jẹ jaabwọ ká ọngga oriri la-à wẹ lẹ, chajị anụ ayịdang ri angga ọ-ọpyị nya Ijipiti ẹnẹhẹ lẹ.

¹⁰“À ka kpa ọpyị nya ẹrụ nyang họ ang ẹ-ẹpwụ nya ẹka ịrwọnyẹ gbẹgbịlẹ. À tị ka kpa ang-ẹrụ ọlụwa nyà wẹ ẹpwa lụka ọwẹ wuu ịnyịnyị.

¹¹Ma, à ka pẹhi ọpyị ọwẹ mwụ ịnyọ ẹka ọharwiye. Ang myị ang ọlẹ kọ bwu ụ-ụwa ẹ-ẹpwụ nya ẹka ọharwiye ọwẹ ri nya alẹbyahị ịlịnyanụ. Ang ịlẹ kịịwa-á pẹhi à ka ri nya iyo ịlẹpwamẹ lẹ. Ịịwẹ ā kà họ ẹ-ẹga nya ẹrụ nya alakọnụ bala olivu nyang ịnyịnyị.

¹²“Ẹnụtụrụ ịrwọnyẹ ā ka họ ụkụrwọ nyang wuu lẹ. Ā họ ụkụrwọ ọhẹ-lọhẹ ẹnụtụrụ ọharwiye kaka, chajị ká ọnyọhị bala ọngga ọlẹpwa nyang tụ ẹna bala obyiyó nyang wuu ka mwụ ịnyọ ẹnẹwẹ mẹ.

¹³“Aa kpẹhị chịng chajị ká kpa ehile ọnyị myị ọnyị ọlẹ kam ya dang e-eji wẹ mẹ. Ā raabwọ wụrụ ẹnyị nya ijiga ịkịla lee ẹnyị nyaa ọ-dọmwụ kpehe bwu ọnụ nyang kpong-kpong ka.

¹⁴“Anụ ka la ọhụhụ ị-kpa kpịtịya ọ-ka chihi jum am Ohe Oluhye ugbabwọ ịta ẹ-ẹpwụ nya ẹka ọnyị myị ọnyị.

¹⁵“Ọya nya Abiibu ọlẹ kanụ kpa rụ bwu ọpyị nya Ijipiti ānụ ka la Ọhụhụ nya Ịkaa Ọmịrịị-mịrị-ka ham lẹ. Anụ ka ri ịkaa ọlẹ kị ya ang ọ-mịrị ịkaa ju ka jịra ẹnụtụrụ irwiye gbẹgbịlẹ jaabwọ kam danụ ehile. “Ọngọngọhẹ nyanụ ā wẹ kaka gbịgba ham la ọ-kpa ọhaha warị ka lẹ koo.

¹⁶“Anụ ka la Ọhụhụ nya Ang-ẹrụ Ọwụwụ[17] ịnyịnyị. Ọlẹ ri ọ-kpa kpịtịya nya egbe nya ọgbanyẹ i-bwu ẹrụ nyanụ. “Anụ ka la Ọhụhụ nya Adáa ụka nya egbe nya ekeji ịlẹrụ nyanụ o-go kpa nyà wẹ ẹpwa nyanụ.

¹⁷Ụka ịta ịwẹ alẹng ịlẹpwụ nyanụ wuu ka warị wẹ ịlahị nyam am Ọngọlahị Amkpaa kaka gbịgba ham.

¹⁸“Ānụ ya ịkaa ọmịrịị-mịrị ba iyo oleji kpa ka kịla iya ham koo. Ānụ pẹhi eyo nya iyo ịlẹ kanụ ya kịla iya ham lụka nya ọhụhụ ị-kpa kpịtịya ịwẹ rịrị gbe alụtụrụ nya ahị ọpyẹpyẹ ọọnamwụ koo.

¹⁹“Anụ ka kpa egbe nya ọgbanyẹ ịlẹ kị ri ịlẹhị-ịlẹhị nya ang-ẹrụ nyanụ warị ka ha ọhaha u-ube ịgọgọ nyam Amkpaa Ohe Oluhye nyanụ. “Ānụ kpa enyi-ẹmẹ nya ịnịna nya ẹmwụ kpụ́ ọnyị nyamwụ koo.

²⁰“M̀ juwa du olegu-ẹrụ ọhẹ jịlahị nyanụ nyọka chẹwụ keenu bala ọ-ka kpanụ ụgbẹyị gbee kaka pwụ ọpyị ọlẹ kam nwụlanọ gbenu.

²¹Anụ-ụ̀ ke ụrụ wo omyi nyamwụ, kanụ ju ẹla nyamwụ ihi mẹ. Ānụ la egbeju-ọngịrị tọọ koo. Ọ́ ka myị-ị̀ hịnyọhi ga hanụ ka, chajị am à wẹẹ doo ẹrụ lẹ.

²²Ọ́ tị ri kanụ myị ke ụrụ lọọ kpẹẹkpẹẹ juwa họ jaabwọ kam byinu aalẹ, m̀ ka jahị da aluji nyanụ wuu hanụ.

²³Olegu-ẹrụ nyam ọọwa ka jịlahị nyanụ kọ ka kpanụ gbee kaka ju ka ọpyị ọlẹ ká ala Amọ bala ala iHiiti bala ala iPẹrisi bala ala iKenan bala ala iHivi bala ala iJebusi kụ. Ọọwa, m̄ ka ta alụwa ayịreji wuu gbanggbang lẹlẹ.

²⁴Ánụ tị ka hirikpẹẹ lee ọ-gbịgba ha ijiga nya alụwa koo. Ānụ ba ụgbẹyị nyaa jẹ ka ịnyịnyị. Anụ ka ta ijiga nyaa ayịreji bala o-be ajwọ iweji irigọgọ nyaa ene yịgẹ-yịgẹ wuu.

²⁵Anụ gbịgba ham am Amkpaa Ohe Oluhye nyanụ kem mẹ aalẹ, m̄ ka wahị kụrụụnụ la ang oriri bala enyi ọnwanwa lẹlẹ. M̀ ka ku ẹdụrụ wuu rụ hiinu ịnyịnyị.

²⁶Ọngọngọhẹ nya anyang nyanụ-ụ́ tị ka ya ẹnyị nyamwụ chị ọnyị ma lee ọ-ta ụma kaka ịnyịnyị. M̀ ka ya ọhịhị onyudiyo hanụ.

²⁷“M̀ ka chị uhi ju aluji nyanụ. M̀ ka ya ojigi-jigi ju ka ẹpwụ nya epwoja ịlẹ wuu kanụ wẹẹ ka dẹwụ ta. M̀ ka họ kị ka yẹnụ rụnyẹ rụ.

²⁸M̀ ka họ ká ala iHivi bala ala iKenan bala ala iHiiti, aluji nyanụ ịwẹ, ka ju uhi[18] ọtụka-ọtụka. M̀ ka kwaa rụ hi iwe da hanụ jaabwọ kanụ juwa jẹ ka ịlahị-ịlahị.

²⁹Ma, ḿ tị ka kwaa rụ gbanggbang ẹ-ẹpwụ nya ẹka ookpokpo koo. Ó-ri ịnyị ka ọpyị ka kpụ egwawụ-egwawụ, iyo ịnyẹẹgẹga ka ju iru kịlaanụ kịla.

³⁰Lẹẹlẹ, m̀ ka kwaa rụ dụmwọ-dụmwọ gbee kanụ ka pyẹ ju iru kpụ ọ-ka ye ọpyị ọwẹ wuu lẹpwụ-lẹpwụ.

³¹“M̀ ka họ ká oyi nya ẹpwa nyanụ ka ri ọpyị o-bwu Ihu Oletungkohyo lalaala ka gu Ihu nya ala iFilisitiya bala o-bwu ugbileji kele ka ba Ihu nya iYufuretisi. M̀ ka ya angịlẹ kị kụ ọpyị ọwẹ wuu junu ẹ-ẹpwụtụbwọ, kanụ ka kwaa rụ tụkịnyaa hi ịlọnụ.

³²Ānụ nwa iro ọhẹ-lọhẹ ta alụwa lee ijiga nyaa koo.

³³Ānụ pẹ hyaa kị hi kụ ụwa ọ-ọpyị nyanụ koko. Ó-ri ịnyị ka, ị ka kpanụ ka họ ang onyobyi bam. Ó-ri kanụ gbịgba ha ijiga nyaa lẹ aalẹ, anụ chị ẹkpa no gbe ịlọnụ lẹ.”