Read idege EHE ỌKPỤKPỤ 24 Bible Online

EHE ỌKPỤKPỤ 24 - idege bible

EHE ỌKPỤKPỤ 24

¹Ọọwa, Amkpaa-à byi iMosisi yẹkẹẹ, “Ahụ bala Erọn bala ịNadabụ bala Abihu bala ịgabwọ angị iwo irwiye (70) nya ala Isirẹlụ ā bam warị wẹ uhye nya ọgbọdọ wẹẹ. Ánụ wuloo chẹẹ lẹ, anụ godayị hwẹẹẹ kanụ gbịgba ham mẹ.

²Ahụ ụbwọng kem à ka kpụ uhye nya ọgbọdọ tụ jum chwẹẹ lẹ. Angịkịla ā tụ jum chwẹẹ ka. Ala Isirẹlụ ihihi á ka kpụ uhye nya ọgbọdọ warị kpongkpong ka.”

³Ụka ká iMosisi kpa ẹlẹwẹ ká Amkpaa ya bala ehile ịlẹ kọ da wuu kaka tịrọnụ je ala Isirẹlụ lẹ, ị yọnụ dawụlẹ myị m̀mm yẹkẹẹ, “Ahị ka họ ẹla myị ẹla ọlẹ ká Amkpaa ya wẹ ahị nyị họ.”

⁴Ọọwa, iMosisi à da ẹla ịlẹ ká Amkpaa ya wẹ wuu ju ụ-ụpwụ lẹlẹ. Ụka kọ chahị lụtụrụ gbegbegbe nya ahị ọpyẹpyẹ ọọnamwụ lẹ, ọ me ogidi ụ-ụwa ọ-ọmwụ nya ọgbọdọ ọwẹ lẹ, ọ go ajwọ iwo kụrụ imiiye ịhyẹ yi eji rịrị kọkọ lẹlẹ. Ẹjwọ ọnyọnyọọnyị nyaa ku ọmwakpa nya imwawụ ọnyọnyọọnyị nya ala Isirẹlụ.

⁵Ọọwa, iMosisi à du ikolobya ịhyẹ la ịna kaka kịla iya ọ-rụ ila bala iya nya ọhọlawụlẹ ha Amkpaa lẹlẹ.

⁶IMosisi ya ẹhya nya ịwọ nya iyo ịịwa ju ịja, ọ nyi ẹhya ohihi hụ ogidi.

⁷Ọọwa, ọ hu ụpwụ nya iro ọnwanwa kọ da ehile nya Amkpaa ju lẹ, ọ wọọ dodehe je ala Isirẹlụ wuu lẹlẹ. Ụka ọọwa, ị myị ọnụ yẹkẹẹ, “Ẹla ọnyị myị ọnyị ọlẹ ká Amkpaa ya wẹ lẹ, ahị ka họ ịnyị. Ahị ka ju ihi nya ehile nyamwụ.”

⁸IMosisi hu ịwọ nya iyo ọlịja lẹ, ọ nyoo hụ angịnyị lẹ, ọ yẹkẹẹ, “Ịwọ ọlẹ à ri ang-ẹjẹẹ nya iro ọlẹ ká Amkpaa nwa tanụ bwula ehile ịlẹ kọ ya danụ e-eji wuu wẹ lẹlẹ.”

⁹IMosisi bala Erọn bala ịNadabụ bala Abihu bala ịgabwọ iwo irwiye (70) nya ala Isirẹlụ kpụ uhye nya ọgbọdọ ọọwa.

¹⁰Ị yẹ Ohe Oluhye nya ala Isirẹlụ. Ịngịhyẹ lala ụgbẹyị ọlẹ kị kpa ajwọ nya ịsafaya da juwa e-ekpeleji nya ata nyamwụ. Ọ hụ́ tangtang lala egbamwụ.

¹¹Alegbeju ị-kpa ịlahị nya ala Isirẹlụ ịwẹ yẹ Ohe Oluhye lẹhị kpá odu ịnyị-ị̄, ọ́ taa ayịreji ka. Ọọwa, ị ri ang bala ọ-nwa ere lawụlẹ ị-ịlahị nyamwụ lẹlẹ.

¹²Ọọwa lẹ, Amkpaa-à byi iMosisi yẹkẹẹ, “Kpụ uhye bam warị wẹ ọgbọdọ wẹẹ. Ám̀ u-uhye nya ọgbọdọ m̄ ka ya ajwọ ịpapịla imiiye ịlẹ kam da ehile wuu ju hang chajị ká ka kpa mẹ ang jẹ angịnyị nyang lẹlẹ.”

¹³Ọọwa, iMosisi bala iJochuwa ọnchẹ nyamwụ à wuleji ẹdịyẹ lẹ, iMosisi à wule Ọgbọdọ nya ịSayịnayị kele lẹlẹ.

¹⁴IMosisi byi ịgabwọ nya ala Isirẹlụ yẹkẹẹ, “Ẹga kahị chịkụ lẹẹ anụ ka hụ gbehi gbee kahị ka nyà tịrẹkpẹ chịnụ ọgụ lẹlẹ. Erọn bala iHuu ka hi hụ am tanụ. O-wo lawụlẹ-ka ọhẹ-lọhẹ kọ jị ẹpwarịrị nyanụ, ịwa anụ ka kpa kaka tọ lẹlẹ.”

¹⁵Ụka ká iMosisi kpụ uhye pwụ ụwa kpa lẹ, egbamwụ à wẹ kaka ke ọgbọdọ ọwẹ wuu lẹlẹ.

¹⁶Ohwoo nya ụmụmẹ nya Amkpaa warị kaka mwụ ịnyọ u-uhye nya Ọgbọdọ nya ịSayịnayị ọwẹ. Egbamwụ ke ọgbọdọ wuu jịra ẹnụtụrụ ịrwọnyẹ lẹpwụ-lẹpwụ. Ẹnụtụrụ ọharwiye lẹ, Amkpaa-à ya ẹla ta iMosisi bwu ẹpwụ nya egbamwụ ọọwa lẹlẹ.

¹⁷Ụka ká ala Isirẹlụ yẹ ohwoo nya ụmụmẹ nya Amkpaa, ị me ká ila ọtụka-ọtụka à juwa wuru u-uhye nya ọgbọdọ.

¹⁸Lẹ, iMosisi à wule kele gbee kọ ya ẹtẹ chị ẹpwụ nya egbamwụ ọwẹ gbirím lẹlẹ. Ọ hụ ụ-ụwa jịra ahị ọpyẹpyẹ iwo ine tụ odu iwo ine gbẹgbịlẹ.