Read idege EHE ỌKPỤKPỤ 25 Bible Online

EHE ỌKPỤKPỤ 25 - idege bible

EHE ỌKPỤKPỤ 25

¹Ọọwa, Amkpaa-à byi iMosisi yẹkẹẹ,

²“Byi ala Isirẹlụ kị kpa ọhaha wam mẹ. Ọhaha ọọwa ọlẹ ká ọngịnyị ka ha bwu ọkịlẹtụ nyamwụ ā ka ye ham lẹ.

³Ụma nya ang ịlẹ kị ka kpa họ ọhaha ọọwa ri okpoko ịgọm bala okpoko onyoowuru bala oje ọnyọmịla bala

⁴iwu inyuukpuukpo bala iwu ịnyịmịla gbuuu bala iwu ịnyịmịla nyẹrị-nyẹrị bala apwụ ọnyịịla-ọnyịịla bala apwụ ọlẹ kị kpa egbii nya ẹmwụ họ bala

⁵egba nya imilodo ịlẹ kị jwaa ido ọnyọmịla bala egba ịnyịịla-ịnyịịla bala okoji nya akechiya, bala

⁶ida nya otinika bala etiji ichoru kwọkwọ ịlẹ kị ka ya ju ida ọlịgọgọ bala iya nya ịtangare bala

⁷ẹjwọ ọnịkịsị bala ajwọ ịnyịịla-ịnyịịla ịkịla ịlẹ kị ka ya ju awụrụ oluhye bala ang ọdọkịlẹtụ nya olegbeju okiliya.

⁸Aa byaa kị ya ang ịwẹ nwụ ube ịgọgọ ham mẹ. Aalẹ, m̄ ka wẹ kaka kụ ẹpwa taa ụ-ụwa lẹlẹ.

⁹Aa nwụ Ọdụ nyam am Amkpaa ọwẹ bala ọ-họ ang-abwọ ịlẹpwụ nyamwụ wuu kpẹẹkpẹẹ jaabwọ kam wẹẹ ka chabwọ ya jeng mẹ.

¹⁰“Ị ka kpa okoji nya akechiya kọ akpa ọhẹ. Udiyo nyamwụ ka lala apatẹ ịta ba ẹhya. Ẹpwụ ojuju nyamwụ ka lala apatẹ imiiye. Uhye ọlala nyamwụ ka lala apatẹ imiiye ịnyịnyị.

¹¹À ka kpụ okpoko ịgọm ọlahịchịng kụrwọọ wuu ẹ-ẹpwụ tụ odehe nyamwụ. À ka me okpoko ịgọm dịrọọ tụ ugbọọnụ nyamwụ da wuu ịnyịnyị.

¹²À ka kpa okpoko ịgọm me ang ịlala ịmapẹ jwoo ẹ-ẹga nya ata nyamwụ jịra ine. Imiiye nya ang ịlala ịmapẹ ịwẹ-ẹ́ ji oye ọhẹ, imiiye ihihi ka ji oye ọkịla.

¹³Aa kpa okoji nya akechiya kọ igbilo iwulele imiiye, kanụ kpụ okpoko ịgọm kụrwaa wuu gbịlẹ-gbịlẹ ịnyịnyị mẹ.

¹⁴Ọọwa lẹ, ká ya igbilo iwulele ịwẹ dụrụ kpoye-kpoye bwu iwa nya ịmapẹ iloye imiiye nya Akpa nya Iro ọwẹ mẹ. Igbilo ịwẹ ị ka yụbwọ chị kpa kpa olo nya akpa ọwẹ lẹlẹ.

¹⁵Ānụ gba igbilo ịwẹ hi ịmapẹ ịlata nya akpa ọwẹ kokoo. Anụ ka pẹ hyaa jwaa ụ-ụwa pyịyọọ.

¹⁶Ọọwa lẹ, ká ya ajwọ ịpapịla imiiye ịlẹ kam da ehile ju kam wẹẹ ka ya hang nọ ẹ-ẹpwụ nya akpa ọwẹ mẹ.

¹⁷“Kpa okpoko ịgọm ọlahịchịng họ ọnụ nya akpa ọwẹ. Udiyo nyamwụ ka lala apatẹ ịta ba ẹhya. Ẹpwụ ojuju nyamwụ tị ka lala apatẹ imiiye.

¹⁸À ka kpa okpoko ịgọm ọlẹ ká ka hyà me alegu-icherubu imiiye rịrị e-egbeju imimiiye nya ọnụ nya Akpa nya Iro ọwẹ.

¹⁹Olegụ icherubu ọhẹ-ẹ́ ji egbeju ọhẹ, ọkịla ā ji ka egbeju ọkịla mẹ. Aa họ alegu-icherubu ịịwa bala ọnụ nya akpa ọwẹ ju awụlẹ, la ọ-cha ebwo hi awụlẹ ka.

²⁰Alegu icherubu ịịwa ka kụ jahị dawụlẹ, pyẹ achwọ nyaa maa ke ọnụ nya akpa.

²¹Aa ya ajwọ ịpapịla imiiye ịlẹ kam wẹẹ ka ya hang ju ka ẹpwụ nya akpa, ká ya ọnụ nyamwụ kụrwọọ u-uhye birikiti mẹ.

²²M̀ ka wẹ kaka tọng ahụ iMosisi u-uhye nya ẹchị nya ahyẹẹrwerwa ọlẹ kọ ri ọnụ nya akpa ọwẹ. Ụ-ụwa apewa nya alegu-icherubu ịwẹ m̄ ka ya ehile ịlẹ kam da wuu chajị nya ala Isirẹlụ hang lẹlẹ.

²³“Aa kpa okoji nya akechiya kọ iteburu ọlẹ ka udiyo nyamwụ ka la apatẹ ịta gbẹgbịlẹ. Ọ ka ju ẹpwụ lala apatẹ imiiye ba ẹhya bala ọ-ka la uhye lala apatẹ imiiye.

²⁴Aa kpụ okpoko ịgọm ọlahịchịng kụrwọọ ẹ-ẹga myị ẹga nyamwụ wuu, ká me okpoko ịgọm ọwẹ dịrọọ tụ ugbọọnụ nyamwụ da wuu ịnyịnyị mẹ.

²⁵Aa kọ ugbọọnụ ọlẹ kọ ka ju ẹpwụ lala ẹpwụtụbwọ ju itebwuru ọwẹ, ká me okpoko ịgọm dịrọọ ịnyịnyị.

²⁶Me ịmapẹ nya okpoko ịgọm kụ itebwuru ọwẹ jịra ọ-ọkpanggọ nyamwụ inine ẹga kị ka ya ata ine nyamwụ kwoo mẹ.

²⁷Ịmapẹ ịlẹ kị ka ya igbilo ị-kpa kpa olo nya itebwuru ọwẹ dụrụ ka ji tụ ba ugbọọnụ nyamwụ.

²⁸Aa kpa okoji nya akechiya kọ igbilo ị-kpa olo nya itebwuru ọwẹ ká kpụ okpoko ịgọm kụrwaa wuu yẹẹyẹẹ mẹ.

²⁹Okpoko ịgọm ọlahịchịng ị ka kpa me ịja ịpapịla bala ịja ikpori-kpori bala ekeku ị-ya ere ju ya hụ eji nya iya ọkịlaakịla ha Ohe Oluhye lẹ.

³⁰Ọọwa lẹ, à ya ịkaa ọlịgọgọ ọlẹ kị ya ham nọ u-uhye nya itebwuru ọwẹ rịrị ị-ịlahị nyam ụka wuu mẹ.

³¹“Okpoko ịgọm ọlahịchịng ā ka kpa họ ang ọ-ya itinika rịrị lẹ. À ka kpa okpoko ịgọm ọlẹ ká ka hyà họ ọmwụ bala ekilo nyamwụ. À ka họ egbeju ikperi-kperi nya ábwọ nyamwụ bala ịlẹ kị ịlala àpwụ nya ekeji ju ang ọ-ya itinika rịrị ọwẹ la ọ-chaa ebwo hi ekilo nyamwụ ka.

³²Ábwọ ịrwọnyẹ ā ka họ ju ekilo nyamwụ lẹ. Ábwọ ịta ka jwoo ekilo oloye ọhẹ, ábwọ ịta ka jwoo ekilo oloye ọkịla nyamwụ ịnyịnyị.

³³Ụ́bwọ ọnyọnyọọnyị nya ábwọ ịrwọnyẹ ịwẹ ka la egbeju okperi-kperi ịtịtịịta lala ẹhị obebe bala àpwụ ogugu nya okoji nya amọndụ.

³⁴Ekilo owulele nya ang ọ-ya itinika rịrị ọwẹ ayịdang ka la egbeju ikperi-kperi ine ịlẹ kị ka lala àpwụ ogugu nya amọndụ.

³⁵Ẹhị obebe ọhẹ ka ji ekpeleji nya ábwọ imiiye ịhọhẹ-họhẹ ịlẹ kị be hụrụ ekilo nyamwụ. Ẹhị obebe oheeye ka ji ekpeleji nya ábwọ imiiye ịkịla ịlẹ kị ba ịnya ọgbanyẹ ba. Ẹhị obebe ọhata ka ji ekpeleji nya ábwọ imiiye ihihi ịnyịnyị.

³⁶Ẹhị ibebe bala ábwọ ịrwọnyẹ ịwẹ wuu ka be hụrụ ekilo nya ang ọ-ya itinika rịrị la ọ-chị ebwo hi awụlẹ ka. Okpoko ịgọm ọlahịchịng ọlẹ ká ka hyà ā ka kpa haa lẹ.

³⁷“Ọọwa lẹ, ká họ itinika irwiye ịlẹ ká ka ya rịrị u-uhye nya ang ọ-ya itinika rịrị ọwẹ mẹ. Ya itinika ịịwa rịrị chajị ká ahịgboo nyaa ā hụ́ kịlahị nya ang ọ-ya itinika rịrị ọwẹ.

³⁸Aa kpa okpoko ịgọm ọlahịchịng họ abụwa ọ-kpa chị owu nya itinika ebyi bala ịja ị-ya ebyi ju mẹ.

³⁹Ilo ọlala nya okpoko ịgọm ọlahịchịng ọlẹ ká ka kpa họ ang ọ-ya itinika rịrị ọwẹ bala ang-abwọ nyamwụ ịkịla wuu ka la okolo iwo ịta kụrụ ịrụ (35).

⁴⁰Aa kpẹhị chịng ká họ ang ịwẹ wuu kpẹẹkpẹẹ jaabwọ kam wẹẹ chabwọ ya jeng ám̀ ọ-ọgbọdọ ọlẹ mẹ.”