Read idege EHE ỌKPỤKPỤ 26 Bible Online

EHE ỌKPỤKPỤ 26 - idege bible

EHE ỌKPỤKPỤ 26

¹Amkpaa byi iMosisi yẹkẹẹ, “À ka kpa egbile nya ịpwụ iwo chiriri họ Ọdụ nyam. Ịpwụ ịịwa ka ri ịlẹ kị nụ yẹẹyẹẹ la iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị. Ị ka kpa owu-owu nọmwụ nya ihwoto nya alegu-icherubu baa.

²Udiyo bala ẹpwụ ojuju nya egbile nya ịpwụ ịwẹ wuu ka memeeme. Udiyo nya ọnyọnyọọnyị ka la apatẹ iwo ine kụrụ imiiye (42). Ẹpwụ ojuju nya ọnyọnyọọnyị ka ri apatẹ ịrwọnyẹ.

³Ya egbile ịrụ nyaa gá ju awụlẹ, ká ya egbile ịrụ ịkịla ga ju awụlẹ ịnyịnyị.

⁴Kpa apwụ onyuukpuukpo gá iri ịkịlẹlẹ-kịlẹlẹ ju ugbọọnụ ọlọbaba nya ebwo nya ịpwụ imimiiye ịwẹ.

⁵Gá iri ịkịlẹlẹ-kịlẹlẹ iwo ịrụ (50) ju ugbọọnụ nya apwụ ọlọbaba nya ebwo ọhẹ, ká ga iri ịkịlẹlẹ-kịlẹlẹ iwo ịrụ (50) ịlịnyịnyị ju ugbọọnụ nya apwụ ọlọbaba nya ebwo ọkịla. Iri iloye ọhẹ ka jahị da iloye ọwụlẹ.

⁶Kpa okpoko ịgọm họ apata ịkụrẹche iwo ịrụ ịnyịnyị. Wu egbiinụ nya ebwo nya ịpwụ imiiye ịwẹ ku awụlẹ la apata ịịwa, chajị ka apwụ nya Ọdụ nyam ka ju awụlẹ la ookpokpo mẹ.

⁷“Ya egbile nya ịpwụ iwo kụrụ ookpokpo ịlẹ kị nụ la egbii nya ẹmwụ họ ang ọ-dakụrụ Ọdụ mẹ.

⁸Egbile nya ịpwụ ịịwa wuu ka la memeeme. Udiyo nya ọnyọnyọọnyị ka la apatẹ iwo ine kụrụ ịrụ (45). Ẹpwụ ojuju ka ri apatẹ ịrwọnyẹ.

⁹Ya egbile ịrụ ga ju awụlẹ, ká ya egbile ịrwọnyẹ ihihi ga ju awụlẹ datị. Mwụ ugbile ọlẹ kọ ju ọharwọnyẹ aba bawụlẹ ị-ịlahị nya Ọdụ mẹ.

¹⁰Ga iri ịkịlẹlẹ-kịlẹlẹ iwo ịrụ (50) ju ugbọọnụ ọlọbaba nya ebwo nya ịpwụ ọhẹ, ká ga iri ịlịnyị-ịnyị iwo ịrụ (50) ju ugbọọnụ ọlọbaba nya ebwo ọkịla mẹ.

¹¹Ọọwa lẹ, ká kpa oje ọnyọmịla họ apata ịkụrẹchẹ iwo ịrụ ju iri ilugbọọnụ nya ebwo nya apwụ ọhẹ, chajị kị ka kpa wu egbiinụ nya ịpwụ imimiiye ịwẹ ku awụlẹ mẹ. Ọọwa, apwụ ọ-dakụrụ Ọdụ ọwẹ à ka ju awụlẹ la ookpokpo lẹlẹ.

¹²Ya ẹhya nya apwụ ọlẹ kọ ka hi pịlẹ dàaa ẹ-ẹkpẹ nya Ọdụ nya Amkpaa mẹ.

¹³Apwụ ọ-dakụrụ Ọdụ ọwẹ u-uhye ka hi lala ẹpẹtẹ ookpokpo ba ẹhya da ka ugbọọnụ oloyiye-oyiye, chajị kọ ka pịlẹ da dàaa weji nya ịkịka imimiiye nyamwụ.

¹⁴À ka myịmyị-ị̀ họ ang ọ-dakụrụ Ọdụ la egba nya imilodo. Egba ịịwa ka ju ido ọnyọmịla. Ang ọ-dakụrụ oheeye ọkịla ka ri nya egba ịnyịịla-ịnyịịla. Ọwa-à ka ri ọlẹ kị ka ya kụrụ odehe nya ọdụ wuu lẹlẹ.

¹⁵“Okoji akechiya ā ka kpa kọ ekeji iweji nya Ọdụ nyam lẹ.

¹⁶Udiyo ọlala nya okoji oweji ọnyọnyọọnyị ka ri apatẹ iwo kụrụ ịrụ. Ẹpwụ ojuju ka lala apatẹ imiiye.

¹⁷À ka kọ ekeji ipyiye-pyiye imiiye kwoo ịkịka ẹga kị ka ya ekeji iweji ịwẹ ku awụlẹ. Ịịwẹ ā tị ka kọ ekeji iweji nya Ọdụ wuu lẹlẹ.

¹⁸Kọ ekeji iweji iwo imiiye ịlẹ kị ka ji ịkịka oledii,

¹⁹ká kpa okpoko onyoowuru họ ang ikperi-kperi iwo ine ịlẹ kị ka ya daa e-ekpeleji ịnyịnyị mẹ. Ang ikperi-kperi ịwẹ imiiye à ka ji ekpeleji nya okoji ookpokpo lẹ. Ọhẹ ka ji ekpeleji nya okoji opyiye-pyiye ọhẹ, ọkịla ka ji ekpeleji nya ọkịla.

²⁰Aa kọ ekeji iweji iwo imiiye ịlẹ kị ka ji ịkịka ọkịla oloye nya ẹtẹ,

²¹ká kpa okpoko onyoowuru họ ang ikperi-kperi iwo ine (40) kị ka ya daa e-ekpeleji ịnyịnyị mẹ. Ang ikperi-kperi imiiye à tị ka ji ekpeleji nya okoji ookpokpo lẹ.

²²Ekeji ịrwọnyẹ à ka ji ịkịka ọlẹkpẹ ọlẹ kọ ji ọmwẹnụ-obyi lẹ.

²³Aa kọ ekeji iweji imiiye ịlẹ kị ka ji ịtụpịrịhyo ịlụwa ịnyịnyị.

²⁴Ị ka ya ekeji ịlọtụpịrịhyo imiiye ịwẹ bawụlẹ bwu eji pẹtẹ kaka ju ka uhye ẹga kị ya ọmapẹ nya okpoko ịgọm waa kpa. Ịịwẹ ā ka họ ekeji ịlọtụpịrịhyo imimiiye ịwẹ lẹ.

²⁵Lẹẹlẹ, ekeji ịlọtụpịrịhyo wuu ka jịra i-ineku la ang ikperi-kperi iwo kụrụ ịrwọnyẹ ilekpeleji nyaa. Imimiiye à tị ka da okoji oweji ọnyọnyọọnyị ọ-ọmwụ lẹ.

²⁶“À ka kpa okoji nya akechiya kọ ekeji ịlẹ ká ka ya da hịlabwọ ịnyịnyị. Ekeji ịhịlabwọ ịịwa ka la ịrụ ẹ-ẹga nya ekeji iweji ịlịkịka ọhẹ nya Ọdụ.

²⁷Ekeji ịhịlabwọ ịrụ ịkịla ka ji ẹ-ẹga nya iweji ịlịkịka ọkịla. Ọọwa, ịrụ ihihi a ka ji ẹga nya iweji ịlịkịka ọlẹkpẹ ọlẹ kọ ji koye nya ọmwẹnụ-obyi lẹlẹ.

²⁸Okoji ọhịlabwọ ọlẹpwarịrị ọlẹ kị ka ya da bwu ekilo nya ekeji iweji ịwẹ ka la udiyo bwu ọbaba nya Ọdụ ọhẹ kele ka ọbaba nyamwụ ọkịla.

²⁹Kpụ́ okpoko ịgọm kụrụ ekeji i-weji ịwẹ wuu, ká họ ịmapẹ nya okpoko ịgọm ịlẹ kị ka ya wu ekeji ịhịlabwọ ịwẹ kpa mẹ. À ka kpụ́ okpoko ịgọm kụrụ ekeji ịhịlabwọ ịwẹ ịnyịnyị.

³⁰“Ọọwa lẹ, ká nwụ ọdụ ọwẹ labwụma ọlẹ kam chabwọ ya jeng wẹ u-uhye nya ọgbọdọ mẹ.

³¹“À ka ga apwụ ọnyịịla-ọnyịịla ọlẹ kị kpa iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị nụ. Ị ka kpa owu-owu nọmwụ nya ihwoto nya alegu-icherubu ba apwụ ọọwa.

³²Ya apata ịkụrẹchẹ ịlẹ kị kpa okpoko ịgọm họ gu apwụ ọọwa pịlẹ u-uhye nya ịtachị nya akechiya ine ịhyẹ mẹ. Ị ka ya ịtachị ịịwa yi eji rịrị kọkọ u-uhye nya ang ikperi-kperi ine ịlẹ kị họ lokpoko onyoowuru.

³³Ya apwụ ọwẹ pịlẹ dàaa bwu ẹga kị ya apata ịkụrẹchẹ gu rẹẹrẹẹ a-achịmwọrụ nya Ọdụ mẹ. Aa hu Akpa nya Iro rịrị kele kẹkpẹ ọlọbaba nya apwụ ọwẹ ịnyịnyị mẹ. Apwụ ọwẹ à ka chị Ẹga Ọlịgọgọ ebwo hi Ẹga Ọlịgọgọ Ọgụgụ wuu lẹlẹ.

³⁴Aa ya ọnụ nya Akpa nya Iro kụrwọọ rụwa ẹ-Ẹga Ọlịgọgọ Ọgụgụ wuu mẹ.

³⁵Ya itebwuru ọ-ya ịkaa nọ rịrị odehe nya apwụ ka ịkịka oloye nya ẹtẹ nya Ọdụ, ká ya ang ọ-ya itinika rịrị ka ịkịka oloye nya edii mẹ.

³⁶“Apwụ ọnyịịla-ọnyịịla ọlẹ kị kpa iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị nụ yẹẹyẹẹ ā ka ga nya o-ke ọnang o-bwu ka ẹpwụ nya Ọdụ nyam lẹ. Ị ka kpa owu-owu nọmwụ ju apwụ ọọwa yẹẹyẹẹ.

³⁷Aa kpa okpoko ịgọm họ apata ịkụrẹchẹ ịlẹ kị ka ya wu apwụ ọwẹ pịlẹ u-uhye nya ịtachị nya akechiya. À ka kpụ́ okpoko ịgọm kụrụ ekeji ịịwa wuu, ká ka kpa oje ọnyọmịla me ang ikperi-kperi ịlẹ kị ka ya ịtachị ịịwa ọmwụ rịrị ịnyịnyị.