Read idege EHE ỌKPỤKPỤ 28 Bible Online

EHE ỌKPỤKPỤ 28 - idege bible

EHE ỌKPỤKPỤ 28

¹Ọọwa, Amkpaa-à byi iMosisi yẹkẹẹ, “Kpa Erọn ọnyịnang bala ịNadabụ bala Abihu bala Eliyesa bala Itamaa anyị alẹng nyamwụ warị mẹ. Ịwa m̄ wụrụ bwu ẹpwụ nya ala Isirẹlụ ịkịla kị ka ri angịkiliya ham lẹ.

²Aa gá ịwụrụ ị-há ụhị pwoku ọngọkiliya kụrụ Erọn ọnyịnang mẹ.

³Byi angị jẹ ụkụrwọ yẹẹyẹẹ ịlẹ wuu kam ya ẹhị ọ-kpa rige-rige ha kị ga ang ịkụrụ-kụrụ nya Erọn ịịwa. Ọọwa lẹ, ị ka yụbwọ nịra Erọn e-egbeju kọ ka ri olegbeju ọngọkiliya nyam lẹlẹ.

⁴Ang ịkụrụ-kụrụ ịlẹ kị ka ga ri ang ọdọkịlẹtụ bala ẹfọdụ ọlẹ kọ ri awụrụ oluhye bala awụrụ ogbileji bala awụrụ ọlẹ kị nọmwụ ju bala apwụ ọkụrụ egbeju bala apwụ ọchọhị. Ị ka ga ịwụrụ nya angịkiliya ịwẹ kụrụ Erọn ọnyịnang bala anyị alẹng nyamwụ chajị kị ka ri angịkiliya ham.

⁵Aa byi angị jẹ ụkụrwọ yẹẹyẹẹ ịwẹ kị kpa iwu nya okpoko ịgọm bala iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị bala ịpwụ ịnyịịla-ịnyịịla họ ang ịkụrụ-kụrụ ịwẹ mẹ.

⁶“Owu nya okpoko ịgọm bala iwu ịlẹ kị ju ido onyuukpuukpo bala ọnyọmịla gbuuu bala ọnyọmịla nyẹrị-nyẹrị bala ịpwụ ịnyịịla-ịnyịịla ịlẹ kị nọmwụ ju yẹẹyẹẹ ị ka kpa họ ẹfọdụ nya ọngọkiliya lẹ.

⁷Ị ka jwoo iri imiiye ịlẹ kị ka ri akịlawa chajị kị ka waa bwọ ịkịka imimiiye nyamwụ.

⁸Owu nya okpoko ịgọm bala iwu ịlẹ kị ju ido onyuukpuukpo bala ọnyọmịla gbuu bala ọnyọmịla nyẹrị-nyẹrị bala ịpwụ ịnyịịla-ịnyịịla ịlẹ kị nọmwụ ju yẹẹyẹẹ ịlẹ kị kpa họ ẹfọdụ wẹẹ ị ka kpa họ apwụ ọchọhị ịnyịnyị lẹ. Ị ka nọọnụ yẹẹyẹẹ kị ka gọọ ju awụlẹ bala ẹfọdụ chajị kọ ka la ookpokpo.

⁹“Go ajwọ onikisi imiiye ịnyịịla-ịnyịịla, ká da ẹnyị nya anyị alẹng iwo kụrụ imiiye nya iJekọbụ baa.

¹⁰Aa da ẹnyị nyaa ọgbahị-ọgbahị. Da ẹnyị nya angị ịrwọnyẹ nyaa ba ẹjwọ ọhẹ, ká da ịnya angị ịrwọnyẹ ihihi ba ẹjwọ ọkịla mẹ.

¹¹Ọlịbańg ọhẹ ā gu ịna nya ẹnyị nya anyị alẹng nya iJekọbụ ba ajwọ imiiye ịịwa mẹ. Ọọwa lẹ, ká ya ajwọ ịwẹ ba ang ọlala ụbaala ochiche ọlẹ kị kpa okpoko ịgọm họ mẹ.

¹²Aa ya ajwọ ịwẹ ba iri nya ẹfọdụ ị-da pịlẹ amwachwọ u-uhye, chajị kị ku ọmwakpa nya anyị alẹng nya iJekọbụ mẹ. Ịịwẹ Erọn à ka kpa ẹnyị nyaa ụ-ụwa amwachwọ nyamwụ, chajị kam ka kpịtịya nya angịnyị nyam ụka wuu lẹlẹ.

¹³Aa kpa okpoko ịgọm họ abaala ichiche imiiye

¹⁴bala agba imiiye ịlẹ kị gu lala ori. Ọọwa lẹ, ká ya agba ịwẹ ju abaala mẹ.

¹⁵“Aa họ ang ọdọkịlẹtụ nya olegbeju okiliya ọlẹ kọ ka kpa jẹ irya nya Ohe Oluhye mẹ. Ụma nya ang-abwọ ịlẹ kị kpa họ ẹfọdụ ọngọ jẹ ụkụrwọ yẹẹyẹẹ à ka kpa họ ang ọdọkịlẹtụ bala ọmwụ ọ-nụ jwoo ịnyịnyị lẹ.

¹⁶Ẹpwụ ojuju bala udiyo nyamwụ ka memeeme. Udiyo nyamwụ ka lala ẹhya nya ẹpẹtẹ. Ẹpwụ ojuju nyamwụ ka lala ẹhya nya ẹpẹtẹ ịnyịnyị. Ị ka mwụ ang ọdọkịlẹtụ ọwẹ aba bawụlẹ ugbabwọ imiiye.

¹⁷Aa ya ajwọ ịnyịịla-ịnyịịla ịlịnya bọọ rẹẹrẹẹrẹẹ jịra ịgba ine mẹ. Ajwọ ịlẹ ká ka ya bọọ ọgba ọhọhẹ à lẹẹ lẹ: ẹjwọ irubi bala ẹjwọ itopasị bala ẹjwọ ịganẹtị.

¹⁸Ajwọ ịlẹ kị tị ka ji ọgba oheeye ri ẹjwọ emaradị bala ẹjwọ ịsafaya bala ẹjwọ ịdayamọndụ.

¹⁹Ajwọ ịlẹ kị ka ji ọgba ọhata ịnyịnyị ri ẹjwọ ịtẹkwasị bala ẹjwọ ageti bala ametisi.

²⁰Ụma nya ajwọ ịlẹ kị ka ji ọgba ohene ri ẹjwọ iberiili bala ẹjwọ ịkaneliyan bala ẹjwọ ịjasịpa. Aa ya ajwọ ịwẹ ku ang ịlala abaala ichiche imiiye ịwẹ kị họ lokpoko ịgọm mẹ.

²¹Ajwọ iwo kụrụ imiiye ịwẹ ku ọmwakpa nya anyị iwo kụrụ imiiye nya iJekọbụ. Ị ka kpa ang ọlẹhị pyiye-pyiye da ẹnyị nya ọngọngọọng nyaa ba ẹjwọ ọnyọnyọọnyị chajị kị ka ku ọmwakpa nya imwawụ iwo kụrụ imiiye nya ala Isirẹlụ.

²²À ka họ agba nya okpoko ịgọm ọlẹ kị gu lala ori nyọka ya ju ang ọdọkịlẹtụ.

²³Họ ịmapẹ nya okpoko ịgọm imiiye ká ya ju ọbaba iluhye nyamwụ,

²⁴ká ya agba imiiye ịwẹ do bwọ ịmapẹ imiiye ịwẹ mẹ.

²⁵Aa kpa egbeju ịlọbaba ịkịla nya agba ịwẹ kaka bwọ abaala ichiche imiiye chajị kị pịlẹ iri ịlamwachwọ nya ẹfọdụ da wẹ ịlahị mẹ.

²⁶Họ ịmapẹ nya okpoko ịgọm imiiye ịkịla ká ya ju ọbaba oleji nya ang ọdọkịlẹtụ ọlẹ kọ ji ka ẹpwụ ba ẹfọdụ ba.

²⁷Aa myịmyị-ị̀ họ ịmapẹ nya okpoko ịgọm imiiye ịkịla ká ya ju iri nya ẹfọdụ ị-da pịlẹ amwachwọ wẹ ịlahị u-ugbọọnụ oluhye nya apwụ ọchọhị nya ẹfọdụ ọlẹ kị nụ yẹẹyẹẹ mẹ.

²⁸Kpa ori onyuukpuukpo wu ịmapẹ nya ang ọdọkịlẹtụ bala ịmapẹ nya ẹfọdụ do bwọ awụlẹ kaka wu apwụ ọchọhị, chajị ká ang ọdọkịlẹtụ-ụ́ ka yi hi apwụ ọchọhị nya ẹfọdụ ka.

²⁹“Ụka myị ụka ká Erọn á ka jụ ka ẹpwụ nya Ẹga Ọlịgọgọ ọ-ọdụ nyam am Ohe Oluhye, ịịwẹ ọ ka ya ang ọdọkịlẹtụ ọ-kpa jẹ irya nya Ohe Oluhye ọlẹ kị da ẹnyị nya imwawụ nya ala Isirẹlụ wuu ba kụrụ kele lẹlẹ. Ọ ka ya kụrụ ịnyị chajị kam ka kpịtịya nya angịnyị nyam ụka wuu.

³⁰Aa ya Urim bala iTumim[19] ju ẹ-ẹpwụ nya ang ọdọkịlẹtụ ọwẹ ịnyịnyị. Ọọwa du ká ang ịwẹ ka pịlẹ ọ-ọkịlẹtụ nya Erọn ụka myị ụka kọ ka wẹ ijata nyam Amkpaa lẹ. Ịịwẹ Erọn à ka juwa kpaa ụ-ụwa kọ ka jẹ irya nyam chajị nya ala Isirẹlụ lẹlẹ.

³¹“Aa kpa apwụ onyuukpuukpo kem ga awụrụ ogbileji olekpeleji nya ẹfọdụ mẹ.

³²Ị ka chọọ iwa ọlẹ kọ ka ka egbeju. Ị ka nọmwụ ju ụkpụrọkọ nyamwụ wuu dọgịlẹ ju chajị kọ ka jẹ-ẹ gu ene bwu ụwa ka.

³³Aa kpa owu onyuukpuukpo bala ọnyọmịla gbuu bala ọnyọmịla nyẹrị-nyẹrị nụ egbe nya okoji ipomegiraneti dọgịlẹ ju ugbọọnụ oleji nyamwụ wuu. Họ atang nya okpọko ịgọm pịlẹ apewa ọnyọnyọọnyị nyaa.

³⁴Ịnyị atang bala ipomegiraneti ịwẹ à ka pịlẹ apewa nya awụlẹ dọgịlẹ ju ugbọọnụ nya awụrụ ọwẹ lẹlẹ.

³⁵Erọn ka kụrụ awụrụ ọwẹ ụka myị ụka kọ juwa myị ẹrụ ham am Amkpaa ẹ-Ẹga Ọlịgọgọ. Ị ka wo anụ onmeleng-nmeleng nya atang ịwẹ ụka kọ juwa jụ kele lee ọ-gba kpehe bwu ụwa, chajị kọ ka gbu ka.

³⁶“Aa kpa okpoko ịgọm-ịgọm kem họ uginikpo ọhẹ kị gu ịna bọọ yẹkẹẹ: ‘Ọlẹ ri nya Amkpaa lẹ’.

³⁷Ya ori onyuukpuukpo jwoo ka wu ịlahị nya apwụ ọkụrụ egbeju,

³⁸chajị ká Erọn ka kpọọ i-itochi nyamwụ ụka wuu mẹ. Erọn ka kpa olo nya abyị ọhẹ-lọhẹ ká ala Isirẹlụ-ụ́ la ẹ-ẹpwụ nya ọhaha ịlịgọgọ nyaa ịlẹ kị hu ha. Ọọwa, m̄ ka ye ọhaha nyaa lẹlẹ.

³⁹“Kpa apwụ ọnyịịla-ọnyịịla nụ awụrụ nya Erọn, ká kpa apwụ ọnyịịla-ọnyịịla ọkịla họ apwụ ọkụrụ egbeju nyamwụ. Aa nụ apwụ ọchọhị nyamwụ yẹẹyẹẹ ịnyịnyị.

⁴⁰Aa ga ịwụrụ bala egba ịchọhị bala ikpo ịkụrụ egbeju ha anyị alẹng nya Erọn nyọka họ kị ka la ihi-ihi bala ọ-há ụhị nwurwo-nwurwo.

⁴¹À ka ya ang ịwẹ kụrụ Erọn ọnyịnang bala anyị alẹng nyamwụ. Ọọwa, ā ka ya ida hwaa bala ọ-yụbwọ nịraa e-egbeju, ká chaa ịgọgọ kị ka ri angịkiliya ham mẹ.

⁴²“À ka ga ịbantẹ ịlẹ kị ka ya ke ịlaa ọ-ọhị ịnyịnyị. Ịbante ịịwa ka bwu ọhị ba e-egbata.

⁴³Erọn bala anyị alẹng nyamwụ ka ju ịbante ịwẹ ụka myị ụka kị juwa jẹ ka ẹga nya ogidi kaka kịla iya ẹ-Ẹga Ọlịgọgọ. Ó-ri ịnyị ka aalẹ, ị la abyị lẹ, ị kị ka gbu. “Ọwẹ à ri ehile o-gbe oyi myị oyi ọlẹ ká Erọn bala anyị ịtụma nyamwụ ka kpa lẹlẹ.