Read idege EHE ỌKPỤKPỤ 29 Bible Online

EHE ỌKPỤKPỤ 29 - idege bible

EHE ỌKPỤKPỤ 29

¹“Ọlẹ ri jaabwọ ká ka bwu chị Erọn bala anyị alẹng nyamwụ ịgọgọ kị ka ri angịkiliya ham. Wu ụgba nya ẹna bala imilodo imiiye ịlẹ ká ehe-é haa ka.

²Chụ ọrụ nya ịrayịsị iwiiti ọlẹ kọ hagụ wuu ju a-ang, ká ya họ ịkaa ọmịrịị-mịrị-ka la ida nya olive. À ka họ ịhyẹ la ọ-ya ida jwaa ka. À ka họ ịkịla lala ịkama ịlẹ kị gu ida tudu.

³Ya ju u-udo kpa wẹ ka ha ọhaha ham ụka ká ka ya ẹna bala imilodo imiiye ịwẹ kịla iya ham mẹ.

⁴“Aa kpa Erọn bala anyị alẹng nyamwụ wẹ ọnang nya Ẹga Ọlịgọgọ, ká da ịlọ hyaa enyi mẹ.

⁵Ọọwa lẹ, ká ya ang ịkụrụ-kụrụ nya ọngọkiliya kụrụ Erọn mẹ. Ang ịịwa ri awụrụ ogbileji bala awụrụ olekpeleji nya ẹfọdụ bala ẹfọdụ ayịdang bala ang ọdọkịlẹtụ bala apwụ ọchọhị.

⁶Ya apwụ ọ-kụrụ egbeju kụrwọọ, ká ya uginikpo ọlẹ kị da ụpwụ ba ju ori wu apwụ ọ-kụrụ egbeju ọwẹ ịnyịnyị mẹ.

⁷Ọọwa lẹ, ká yụbwọ nịrọọ bwula ọ-ya ida ọlịgọgọ yẹ hwọọ e-egbeju mẹ.

⁸“Kpa anyị alẹng nya Erọn warị ká ya ịwụrụ kụrwaa ịnyịnyị.

⁹Ya apwụ chaa ọ-ọhị, ká ya ori ju okpo ipepile waa e-egbeju. Jaabwọ ká ka bwu yụbwọ nịraa e-egbeju à wẹ lẹlẹ. Ịwa bala anyị ịtụma nyaa ka ri angịkiliya ham gbe oyi myị oyi.

¹⁰“Kpa ẹna ọọwa wẹ ọnang nya Ọdụ Ọlịgọgọ, ká byi Erọn bala anyị alẹng nyamwụ kị ya abwọ bọọ e-egbeju.

¹¹Aa nwụ ẹna ọọwa ị-ịlahị nyam ọ-ọnang nya Ọdụ nya Amkpaa mẹ.

¹²Chị́ ịwọ nyamwụ ká kpa ụkụchụ gwoo tudu ipyiye-pyiye nya ogidi. Ọọwa lẹ, ká ya ịwọ ohihi hụrụ ọ-ọmwụ nya ogidi mẹ.

¹³Ang ọkịla ọlẹ ká ka họ ri aa hị eyo ịlẹ kị ba ang-ẹpwụ wuu bala ẹjẹ bala egbachị imimiiye tụ eyo oluhye nyaa wuu ká ya kịla iya ju ila ogidi ham mẹ.

¹⁴Chị iyo nya ẹna ọwẹ bala ugba bala igbeene nyamwụ ila u-ugumẹ nya ịkampụ nyanụ. Ọlẹ ri iya ọkịlaakịla ọlẹ kọ ka hụ́ ịhọbịrị nya angịkiliya.

¹⁵“Hu omilodo ọhẹ lẹpwụ nya imiiye ịwẹ ká byi Erọn bala anyị alẹng nyamwụ kị ya abwọ bọọ e-egbeju.

¹⁶Nwọọ, ká hu ịwọ nyamwụ yẹ hụ ịkịka inine nya ogidi mẹ.

¹⁷Aa wọ omilodo, ká hụ ang-ẹpwụ bala ata nyamwụ. Gyaa nịrọ egbeju bala ẹga ịkịla nyamwụ.

¹⁸Jụ omilodo ọwẹ wuu ila u-uhye nya ogidi ham mẹ. Iya ọkịlaakịla ọlẹ chịm oru kwọkwọ.

¹⁹“Hu omilodo ọkịla, ká byi Erọn bala anyị alẹng nyamwụ kị ya abwọ bọọ e-egbeju.

²⁰Nwọọ, ká chị́ ịwọ nyamwụ ká gwoo chị iteeju nya ụrụ upwuriri nya Erọn bala iteeju nya ụrụ upwuriri nya anyị alẹng nya Erọn bala akachụ ịdụdụgba nya upwuriri bala achụụ ịdụdụgba nya upwuriri. Ọọwa lẹ, ká ya ịwọ ohihi yẹ hụ ịkịka inine nya ogidi mẹ.

²¹Chị́ ịwọ oluhye nya ogidi bala o-gu ida ọlịgọgọ, ká nyoo hụ Erọn bala ang ịkụrụ-kụrụ nyamwụ tụ anyị alẹng nyamwụ bala ang ịkụrụ-kụrụ nyaa mẹ. Ọọwa, ọwa bala anyị nyamwụ tụ ang ịkụrụ-kụrụ nyaa à ka la ịgọgọ ham lẹlẹ.

²²“Ẹ̀ga ịlẹ ká ka chị hụrụ bwu ẹpwụ nya omilodo ọwẹ ri eyo nyamwụ bala itọọgbẹ oleyo bala eyo oluhye nya ang-ẹpwụ bala ẹjẹ bala egbachị imimiiye tụ eyo oluhye nyaa bala ugbẹta nya upwuriri.

²³Hu ẹbẹ nya ịkaa ookpokpo nya ụma ọnyọnyọọnyị bwu ẹpwụ nya udo nya ịkaa ịlẹ kị ya kịla iya ham. Hu ookpokpo-ookpokpo bwu ẹpwụ nya ịlẹ kị kpa ida nya olivu họ bala ịlẹ kị kpa ida nya olivu họ ka bala ịkama ookpokpo.

²⁴Ya ang oriri ịwẹ wuu ju Erọn bala anyị alẹng nyamwụ ụ-ụbwọ kị ya kịla iya o-nyí kile-kile ham bwula o-nyaa kile-kile i-ijata nyam mẹ.

²⁵Á họ lẹ, à ye bwu ụbwọ nyaa ká jwọọ ila ogidi bala iya ọ-rụ ila lawụlẹ mẹ. Ọlẹ ri iya nya ang oriri ọlẹ kị kịla ham, ọ chịm oru kwọkwọ.

²⁶“Aa hu ẹmẹ nya omilodo ọwẹ kịla iya o-nyí kile-kile ham bwula ọ-nyoo kile-kile i-ijata nyam mẹ. Ẹ̀ga ọwẹ kpangga ri nya ịlọng ọlẹ ká ka la.

²⁷“Ụka nya ụbwọ ọ-nịrọ ọngọkiliya e-egbeju, ị ka ya ẹmẹ bala ugbẹta nya omilodo ọlẹ kị nwụ chajị nya ọhọhọ ọọwa kịla iya o-nyí kile-kile ham bwula o-nyaa kile-kile chajị ẹ̀ga ịwẹ ri nya angịkiliya.

²⁸M̀ hwoo nọ pyịyọọ nyori ụka myị ụka ká ala Isirẹlụ-ụ́ kịla iya nya ọhọlawụlẹ, ị ka ya ẹmẹ bala ugbẹta nya iyo ha angịkiliya. Ọwẹ ri ọhaha nyaa ọlẹ kị hu ham am Amkpaa.

²⁹“Ụka ká Erọn-ń gbu kpá, ịwụrụ ịlịgọgọ nyamwụ ịwẹ ka hi ri nya ọnyị nyamwụ ọlẹ kọ ka ku ọmwakpa nyamwụ. Ọnyị ọọwa ka kụrwaa ụka kị ka yụbwọ nịrọọ e-egbeju lala olegbeju okiliya.

³⁰Ọnyị nya Erọn ọlẹ kọ ka ye iwe nya adamwụ ku ka kụrụ ịwụrụ ịwẹ jịra ẹnụtụrụ irwiye gbẹgbịlẹ lụka kọ ka wẹ Ẹga Ọlịgọgọ ẹ-ẹpwụ nya Ọdụ nyam am Amkpaa kaka myị ẹrụ.

³¹“Hu iyo nya omilodo ọlẹ kị nwụ lụka nya ụbwọ ọ-nịrọ angịkiliya e-egbeju, ká ya kpụ ẹ-ẹga ọlịgọgọ ọhẹ mẹ.

³²Ị ka ri iyo nyamwụ tụ ịkaa ihihi iludo ọ-ọnang nya Ọdụ Ọlịgọgọ.

³³Ang ịlẹ kị hi bwu ụka nya iya ọ-hụ́ ịhọbịrị wuu wẹẹ, ị ka ya ri ụka nya ụbwọ ọ-nịraa e-egbeju. Angịkiliya kem à ka ri ang ịịwa lẹ, chajị ịla ịgọgọ.

³⁴Ó-ri ká ịhyẹ nya iyo lee ịkaa ịwẹ-ẹ́ hi gbe alụtụrụ aalẹ, ị́ ka ya ri koko. Ị ka chaa ịla lẹ, chajị ang ịwẹla ịgọgọ.

³⁵“Ịịwẹ ā ka bwu kpa ọhọhọ nya ụbwọ ọ-nịrọ Erọn bala anyị alẹng nyamwụ e-egbeju kpẹẹkpẹẹ jaabwọ kam ya ehile dang e-eji wẹ lẹlẹ. Ọhọhọ ọọwa wuu ka la ẹnụtụrụ irwiye gbẹgbịlẹ.

³⁶À ka ya ẹna ookpokpo kịla iya ọ-hụ́ ọhọbịrị ẹnụtụrụ ọnyọnyọọnyị. Ọlẹ ka du ká ogidi ka la charị-charị. Ọọwa lẹ, ká nyí ida nya olivu hwọọ kọ kala ịgọgọ mẹ.

³⁷À ka họ ịnyị ẹnụ myị ẹnụ jịra ẹnụtụrụ irwiye gbẹgbịlẹ. Ọọwa, ogidi à kala ịgọgọ lẹlẹ. Ọngọngọhẹ lee ịngịngịhyẹ kọ ya ịnyịrọ gwoo aalẹ, ọ la ịgọgọ lẹ.

³⁸“Ẹnụ myị ẹnụ wuu à ka ya anyị-ịkpịlọ alẹng imiiye i-gu ẹka ookpokpo kịla iya ogidi pyịyọọ.

³⁹À ka ya ọnyị-ọkpịlọ ọhẹ kịla iya lụtụrụ. À ka ya ọkịla kịla iya lobyi.

⁴⁰Ang ịlẹ ká ka ya kịla iya ọnyị-ọkpịlọ ọhẹ ri ọrụ nya iwiiti ịlẹ kị lala okolo ookpokpo dala ida nya olivu ọlẹ kọ ka myị̀ ekpem ookpokpo. À ka ya ere ọlẹ kọ ka myị̀ ekpem kịla iya ịnyịnyị.

⁴¹Ya ọnyị-ọkpịlọ oheeye kịla iya lobyi jula iya nya ajẹ nya ang-ẹrụ bala iya nya ere lawụlẹ jaabwọ ká họ lụtụrụ mẹ. Iya ọ-kịla ju ila ham am Amkpaa-à wẹ lẹ. Ọ chịm oru kwọkwọ.

⁴²Ahụ bala anyị ịtụma nyang ka kịnyaa la ọ-kịla iya ọ-rụ ila ọlẹ pyịyọọ ị-ịlahị nyam am Amkpaa ọ-ọnang nya Ọdụ nyam. Ọọwa, m̄ ka wẹ kaka tọnụ ẹ-ẹga okiliya ọwẹ, kam ka ya ẹla tanụ lẹlẹ.

⁴³M̀ ka tọ ala Isirẹlụ ụ-ụwa. Ụmụmẹ nyam ka họ ká ẹgẹwẹ kala ịgọgọ.

⁴⁴M̀ ka chị ịgọgọ ju Ọdụ nyam nyam bala ogidi okiliya. M̀ ka họ ká Erọn bala anyị alẹng nyamwụ ka la ịgọgọ ịnyịnyị chajị kị ka kịnyaa juwa kịla iya ham.

⁴⁵M̀ ka kụ ẹpwa ta ala Isirẹlụ kam ka ri Ohe Oluhye nyaa.

⁴⁶Ọọwa, ị ka jẹ kam à ri Amkpaa Ohe Oluhye nyaa ọlẹ kọ gbaa kpehe bwu ọpyị nya Ijipiti chajị kam ka kụ taa lẹlẹ. Am à ri Amkpaa Ohe Oluhye nyaa lẹ.