Read idege EHE ỌKPỤKPỤ 3 Bible Online

EHE ỌKPỤKPỤ 3 - idege bible

EHE ỌKPỤKPỤ 3

¹Ẹnẹhẹ ká iMosisi juwa kpa ịkpịlọ nya adamwụ-ẹpwa iJetiro ọngọkiliya nya ala iMidiyan ri, ọ kpaa kpoye nya ugbileji gbee kọ jẹ pwụ ịSayịnayị ọlẹ kọ ri ọgbọdọ nya Ohe Oluhye.

²Olegu-ẹrụ nya Amkpaa chị ịlọmwụ ehe mẹ jẹ iMosisi ụ-ụwa la abwụma nya ẹlẹlẹ nya ila kọ juwa wuru bwu ẹpwarịrị nya ukpupwụ ọhẹ. IMosisi yẹ ká ukpupwụ ọọwa juwa wuru, ma ọ́ tị rụ ila ka.

³Ọọwa, iMosisi à yẹkẹẹ, “Ẹla ọlẹbyẹbyị ịnyị ooo! Ịyẹ tị́ du ká ukpupwụ ọwẹ-ẹ́ rụ ila ka? M̀ ka jẹ̀ tụ bọọ kam ka yẹ wẹ-ẹ̀.”

⁴Ụka ká Amkpaa yẹ ká iMosisi juwa jẹ̀ tụ ju ukpupwụ ọọwa chwẹẹ gụ olene lẹ, ọ be ẹkọ wụrwọọ bwu ẹpwarịrị nya ukpupwụ ọọwa yẹkẹẹ, “IMosisi ee! iMosisi ee!” Ọọwa, iMosisi à myị yẹkẹẹ, “Èé!”

⁵Ohe Oluhye byoo yẹkẹẹ, “Ā jẹ̀ tụ warị gụ ọwẹ kaka. Pwọ egbatẹ nyang mẹ, chajị a godayị rịrị ẹ-ẹga ọlịgọgọ.

⁶Am kpangga à ri Ohe Oluhye nya adang igogo Ebiraham bala Ayịsiki bala iJekọbụ lẹ.” Ọọwa, iMosisi à ya ang ke ahị chajị nyọlẹ kọ ju uhi nyọka yẹ Ohe Oluhye lẹhị-lẹhị nya ịlomwụ lẹlẹ.

⁷Ọọwa lẹ, Amkpaa-à byi iMosisi yẹkẹẹ, “M̀ chẹhị kaka yẹ jaabwọ kị juwa kpa angịnyị nyam yẹ ụhị ụ-ụwa ọ-ọpyị nya Ijipiti kaka ba lẹ. M̀ wo eru ọlẹ kị juwa chị wụrụm nyọka gbaa kpehe bwu ẹpwụtụbwọ nya angị kpaa yẹ ụhị lẹ. Ā me irya kam jẹ ẹla chajị nya akama ọlẹ kị wẹ-ẹ̀ yẹ ka lẹ koo.

⁸Ọọ-lajị nya ọọwa lẹ, Am Ohe Oluhye hireji warị kam ka họ kị ka la ịlaa bwu ẹpwụtụbwọ nya ala Ijipiti bala ọ-ka gbaa kpehe bwu ọpyị nya Ijipiti kele ka ọpyị ọlẹ kọ ju ẹpwụ gbamgbam, kọ ju eyo bala ọ-há ang hiigu-hiigu lẹ. Ọpyị ọọwa-à ri ẹga ọlẹ ká ala iKenan bala ala iHiiti bala ala Amọ bala ala ịPẹrisi bala ala iHivi bala ala ịJẹbusi kụ lẹẹlẹẹ lẹ.

⁹M̀ wo omyi nya eru ọlẹ ká angịnyị nyam wẹ-ẹ̀ chị lẹ. M̀ tị yẹ jaabwọ ká ala Ijipiti wẹẹ taa pyịpyị ịnyịnyị lẹ.

¹⁰Am Ohe Oluhye jam dung ẹrụ tọ adịrahụ nya ala Ijipiti lẹ, chajị ká ka gba angịnyị nyam kpehe bwu ọpyị nyamwụ mẹ.”

¹¹Ma, iMosisi wẹ byi Ohe Oluhye yẹkẹẹ, “Am okpehika nya ọngịnyị ọlẹ-ẹ́? Kam ka kele ka ẹga nya adịrahụ chajị nyọka gba ala Isirẹlụ kpehe bwu ọpyị nya Ijipiti-í?”

¹²Ohe Oluhye wẹ byi iMosisi yẹkẹẹ, “M̀ kà juwa tang. Ụka ká tị kpa angịnyị nyam kpehe bwu Ijipiti kpá lẹ, ānụ ka gbịgba ham ám̀ u-uhye nya ọgbọdọ ọlẹ lẹlẹ. Ịgba ọgbagba ọọwa ka mẹjẹ angịnyị ya am Ohe Oluhye ayịdang nyaà dung ẹrụ lẹ.”

¹³Ma, iMosisi byi Ohe Oluhye yẹkẹẹ, “Ụka kam ka ẹga nya ala Isirẹlụ kà byaa ya, ‘Ohe Oluhye nya adanụ igogo anyị à dum ẹrụ tọnụ lẹ, ị tị ka tọm wo yẹkẹẹ,’ ‘Ẹnyị nya Ohe Oluhye ọọwa-à tị́ ri ányị?’ Ọọwa lẹ, m̄ tị́ ka wẹ byaa ányị mẹ?”

¹⁴Ohe Oluhye byi iMosisi yẹkẹẹ, “Am à ka ri Am lẹ. Aa byaa mẹ, ‘Ọngọlẹ ká ẹnyị nyamwụ ri Am à ka ri Am lẹ[5] à dum ẹrụ tọnụ lẹ.’

¹⁵Byi ala Isirẹlụ ya am Amkpaa ọlẹ kam ri Ohe Oluhye nya adaa igogo Ebiraham bala Ayịsiki bala iJekọbụ à dung ẹrụ taa lẹ mẹ. Ẹnyị nyam am Ohe Oluhye a wẹ gbe oyi myị oyi lẹlẹ. Ịnyịnyị-ịnyịnyị aloyi ọlịlahị wuu à tị ka wụrụm lẹlẹ.

¹⁶Kele ká tụ ịgabwọ nya ala Isirẹlụ guru ẹ-ẹga ookpokpo, ká byaa mẹ, am Amkpaa ọlẹ kam ri Ohe Oluhye nya adaa igogo Ebiraham bala Ayịsiki bala iJekọbụ nyị chị ịlọm ehe mẹjẹng lẹ. Byaa ya am nyị yẹ iwe-ahụrụ nyaa bala ang ọlẹ ká ala Ijipiti wẹẹ họ ẹ-ẹga nyaa lẹ.

¹⁷Ọọ-lajị nya ọọwa lẹ, m̀ cheje nyọka gbaa kpehe hi ọpyị nya Ijipiti ẹga kị wẹẹ kpaa yẹ ụhị, kam ka kpaa rụ ka kụ ọpyị ọlẹ kọ ju eyo bala ọ-há ang hiigu-hiigu lẹ. Ụ-ụwa ala iKenan bala ala iHiiti bala ala Amọ bala ala ịPẹrisi bala ala iHivi bala ala iJebusi à kụ lẹ.

¹⁸“Angịnyị nyam ka ke ụrụ la ẹla ọlẹ ká wẹẹ ka ya taa. Aa bajẹ bala ịgabwọ nya ala Isirẹlụ ka ẹga nya adịrahụ nya ala Ijipiti mẹ, kanụ byoo yẹkẹẹ, ‘Amkpaa Ohe Oluhye nya ala iHiburu chị ịlọmwụ ehe mẹ jẹẹhị. Lẹẹlẹ, hi iwe hahị kahị jẹdịyẹ lala ẹnụtụrụ ịta gbẹgbịlẹ kele ka ugbileji kaka kịla iya ha Amkpaa Ohe Oluhye nyahị mẹ.’

¹⁹M̀ jẹ myị̀myị̀ ká adịrahụ nya ala Ijipiti-í ka myị-ị pẹhiinu rụ ịịwẹ ka, kẹnẹ-kẹnẹ, ḿ kpa agbụrụ gbiloo ka họ ịnyị mẹ ịnyị.

²⁰Ma, m̀ ka kpa ọngịrị nyam yẹ ala Ijipiti akama bwula ang ị-la uhi-uhi ịlẹ kam ka họ ọ-ọpyị nyaa. Ọọwa lẹ, adịrahụ à ka pe hiinu rụ lẹlẹ.

²¹“Am Ohe Oluhye ka họ ká ala Ijipiti ka la olegu nya ọnahị ẹ-ẹga nyanụ, chajị ụka kanụ ka rụ, kanụ ka rụ labwabwọ ka.

²²Ọnyang nya ala Isirẹlụ ọnyị myị ọnyị wuu ka tọ ọnyang nya ala Ijipiti oloye-ẹpwa nyamwụ lee ọnyang nya ala Ijipiti ọlẹ kị kụ ẹpwa lawụlẹ ịtọ nya ịwụrụ ịkụrụ-kụrụ bala ịjang ịlẹ kị họ lokpoko ịgọm bala okpoko onyoowuru. Ọọwa lẹ, ala Isirẹlụ à ka ya ang ịwẹ kụrụ anyị anyang bala alẹng nyaa lẹ, ị ka kpa ang-ụdụ nya ala Ijipiti ịwẹ rụ lẹlẹ.”