Read idege EHE ỌKPỤKPỤ 30 Bible Online

EHE ỌKPỤKPỤ 30 - idege bible

EHE ỌKPỤKPỤ 30

¹“A ka kọ ogidi okiliya nya ịtangare la okoji nya akechiya.

²Họọ ká ẹpwụ ojuju bala udiyo nyamwụ ā memeeme. Ọnyọnyị nyamwụ ka la ẹpẹtẹ ookpokpo ba ẹhya. Uhye ọlala nyamwụ ka ri apatẹ ịta. À ka họ ang ipyiye-pyiye ịlọkọnggọ nyamwụ inine julawụlẹ bala ogidi ọwẹ.

³Kpụ́ okpoko ịgọm kụrụ uhye bala ịkịka inine bala ipyiye-pyiye nyamwụ. Aa kpa okpoko ịgọm họ ugbọọnụ dagaga jwoo wuu.

⁴Họ ịmapẹ nya okpoko ịgọm imiiye jwoo e-ekpeleji nya ugbọọnụ ịlịkịka imimiiye kị ka ya igbilo ju kpa hwoo.

⁵Okoji nya akechiya ā ka kpa họ igbilo ịwẹ lẹ. À ka kpụ okpoko ịgọm kụrwaa.

⁶Ya ogidi ọwẹ rịrị odehe nya ịpwụ i-ke ịlahị nya Akpa nya Iro mẹ. Ẹgẹwẹ m̄ ka wẹ kaka tọng lẹlẹ.

⁷Ẹnụ myị ẹnụ lụtụrụ ká Erọn á wẹ kaka hịlẹ itinika, ọ ka ju iya nya ịtangare ila u-uhye nya ogidi ọwẹ.

⁸Ụka kọ ka ya ila ju itinika lobyi, ọ ka ya ila ju iya ọwẹ ịnyịnyị. Iya ochoru kwọkwọ ọlẹ kanụ ka ju ila ha Amkpaa ịnyịnyịịnyị pyịyọọ ụka wuu a wẹ lẹ.

⁹Anụ ya ịtangare o-ri ịgọgọ ọhẹ-lọhẹ ju ila u-uhye nya ogidi ọwẹ koo. Anụ ya iyo lee ajẹ nya ang-ẹrụ kịla iya ụ-ụwa lee ọ-ya ere nya iya hwọọ ka ịnyịnyị.

¹⁰Erọn ka gu ịwọ nya iyo ọlẹ kị ya kịla iya ọ-hụ́ ọhọbịrị tudu ipyiye-pyiye nya ogidi ọwẹ ụka ookpokpo ẹ-ẹpwụ nya ẹka. Ọọwa-à ri ịlọ ọ-da hụ ogidi kọ ka la charị-charị lẹ. Ị ka họ ịịwẹ ẹka ọnyị myị ọnyị gbe oyi myị oyi. Ogidi ọwẹ ri ọlịgọgọ ọlẹ kị chịgọ ju ham am Amkpaa.”

¹¹Ọọwa, Amkpaa byi a iMosisi yẹkẹẹ,

¹²“Ụka myị ụka ká wa ala Isirẹlụ, ọng myị ọng nyaa ka nwụ̀ okpoko o-gu ịlọmwụ e-egbeju ọlẹ kọ ka ya nyẹ ọhịhị nya ịlọmwụ bwu ẹga nyam chajị ká akama onyobyi ọhẹ-lọhẹ á ka wẹ ẹga nyaa lụka ọọwa ka.

¹³Ọng myị ọng ọlẹ kọ ji ẹpwụ nya ọwawa ọwẹ ka nwụ̀ okpoko pwụ ẹga ká angị kpẹhị rịrị Ube Ịgọgọ hunọ. Ọwẹ ri ọhaha o-hu ham.

¹⁴Ọng myị ọng ọlẹ kọ pwụ ẹka iwo imiiye (20) kịlahị kị wẹẹ ka wa à ka nwụ okpoko nya ọhaha ọwẹ ham am Amkpaa lẹ.

¹⁵Ụka kị ka nyẹ ẹpwa ọwẹ nyọka nyẹ ọhịhị nya ịlaa, ọlụdụ-ụ́ ka nwụ konugo nya ịnya ọlẹbyahị koo. Ọlẹbyahị-ị́ tị ka nwụ pwuru abwọ nya ịnya ọlụdụ ka.

¹⁶Aa ye ẹpwa ọnyẹnyẹ ọwẹ bwu ẹga nya ala Isirẹlụ, ká kpa họ ụkụrwọ ọlẹpwụ nya Ọdụ nyam mẹ. Ọọwa m̄ ka kpịtịya nyọka chewu kaa lẹlẹ.”

¹⁷Amkpaa byi iMosisi yẹkẹẹ,

¹⁸“À ka họ ẹja ọtabwọ nya oje ịbịrọnsi ká ọmwụ nyamwụ ka ri oje ọnyọmịla ịnyịnyị. À ka ya rịrị apewa nya Ẹga Ọlịgọgọ bala ogidi lenyi ẹ-ẹpwụ nyamwụ.

¹⁹Erọn bala anyị alẹng nyamwụ ka tọ abwọ bala ọ-hụ ata ụ-ụwa

²⁰ene kị ka jụ ka Ẹga Ọlịgọgọ lee ọ-ka ẹga nya ogidi kaka kịla iya ju ịla. Ị́ họ ịnyị lẹ, ị́ ka gbu kaka.

²¹Ị ka hụ abwọ bala ata nyaa chajị kị ka gbu ka. Ehile ọlẹ kịịwa bala anyị ịtụma nyaa ka kpa pyịyọọ à wẹ lẹlẹ.”

²²Amkpaa myịmyị byi iMosisi yẹkẹẹ,

²³“Chụ etiji ichoru kwọkwọ ịlẹ kị hagụ wuu mẹ. Ịịlẹ ā ka chụ lẹ: okolo ịrwọnyẹ nya ịmaa olenyi-lenyi bala okolo ịta nya isinamọn ochoru kwọkwọ bala okolo ịta nya ịmakọ ochoru kwọkwọ

²⁴bala okolo ịrwọnyẹ nya ịkechiya. Ilo ọlala nyaa wuu ka pwoku ọlẹ ká angị kpẹhị rịrị Ube Ịgọgọ hunọ. Ya ịgalụwa ookpokpo nya ida nya olivu jwaa mẹ.

²⁵Ya ang-abwọ ịwẹ wuu ju awụlẹ họ ida ọlịgọgọ mẹ.

²⁶Ya ida ọwẹ hụ Ọdụ nya Amkpaa nyam bala Akpa nya Iro

²⁷bala itebwuru tụ ang-abwọ nyamwụ wuu bala otinika tụ ang-abwọ nyamwụ wuu

²⁸bala ogidi okiliya nya ịtangare tụ ang-abwọ nyamwụ wuu bala ẹja ọtabwọ bala ọmwụ nyamwụ.

²⁹Chị ịgọgọ jwaa mẹ aalẹ, ang ịwẹ wuu ka la ịgọgọ lẹ. Ọngọngọhẹ lee ịngịngịhyẹ ọkịla kọ ya ịnyịrọ gu iya ọwẹ aalẹ, ọ lịgọgọ lẹ.

³⁰Ọọwa lẹ, ká ya ida hụ Erọn bala anyị alẹng nyamwụ bala ọ-yụbwọ nịraa e-egbeju kị ka ri angịkiliya ham mẹ.

³¹Aa byi ala Isirẹlụ yẹkẹẹ, ‘Ida ọlịgọgọ ọlẹ ri ang ọlẹ kị ka họ ụkụrwọ nyam pyịyọọ.

³²Ị́ ka ya hụ ọng myị ọng ododu ka. Ị́ tị ka kpa họ ida ọkịla ọlẹ kọ ka me ọlẹ kaka ịnyịnyị. Ọ la ịgọgọ lẹ, anụ-ụ̀ kpọọ la ịgọgọ mẹ.

³³Ọngọngọhẹ kọ họ ida o-me ọlẹ lee ọ-ya hụ ọngọ ri ọngọkiliya ka aalẹ, ị ka be ọngọọwa deeji hi ẹpwụ nya angịnyị nyam.’ ”

³⁴Amkpaa byi iMosisi yẹkẹẹ, “Me etiji ichoru kwọkwọ ịlẹ memeeme ju a-ang. Ẹnyị nya etiji ịịwa ri ịsịtakịtẹ bala ọnịcha bala ịgalụbanụm bala ịtangare.

³⁵Kpa ang ịwẹ họ iya nya ịtangare ọlẹ kị họọ lala ida ochoru kwọkwọ. Ya ịma dọọ chajị kọ la cheri-cheri bala ọ-lịgọgọ.

³⁶Gò ebwo nyamwụ ọhẹ hịlẹ-hịlẹ kọ kpọrụ, ká kpa ka ẹpwụ nya Ọdụ Ọlịgọgọ. Nyi ọrụ nyamwụ ọwẹ hule-hule ị-ịlahị nya Akpa nya Iro ẹga kam ka tọnụ. Anụ kpa iya nya ịtangare ọwẹ la ịgọgọ nya ịlẹhị-ịlẹhị.

³⁷Anụ kpa etiji ụma ịwẹ họ ịtangare ọhẹ-lọhẹ ịlọnụ kokoo. Anụ-ụ̀ kpọọ la ịgọgọ lala ang ọlẹ kị chịgọ ju ham.

³⁸Ó-ri ká ọngọngọhẹ-ẹ́ họ ida ochorụ kwọkwọ ọlịịwẹ aalẹ, ị ka be ọngọọwa deeji hi ẹpwụ nya angịnyị nyam.”